ESDRAS 4
4
Madə̄ ba̰ā̰ Jipə gə̄ sāān̄ nujə kəla kújə yā Kɔ́ɔ̄ɓē
1Dan ń madə̄ ba̰ā̰ Juda gə̄ ō Benjamḛ gə̄ ō oōn̄ kadə̄ ngé gə̄ ń ɔyn̄də́ aw̄n̄ sedə́ ɓəloó tá tél reēn̄ gogə́ ɓēé ní, na ra na a rāān̄ kújə yā Kɔ́ɔ̄ɓē yā Israel noó anī, 2reē əngen̄ Jorobabel ō, de kə́ dɔ gír kojə gə̄ tə́ ō, ba ədan̄də́ na: Jə-ndigə rāā kəla kújə yā Kɔ́ɔ̄ɓē sesí. Tā m̄ i Nə́ɓā yāsí ń ā ī-rɔȳniī ní n jḭḭ jə-rɔȳn ō ní. Tá j-əla gír ndējə̄n yá̰á̰ kə́ tun̄ gə̄ i dan ń Asaradon mban̄g kə́ Asiri ɔyjí reēń sejí loo ń toō tə́ laā ní.
3Banī Jorobabel ō Yesua ō, gotə de kə́ dɔ gír kojə gə̄ yā Israel tə́ gə̄ ō, tél ədan̄də́ na: Rāā kújə yā Nə́ɓā yājí sejí i kəla kə́ ndetəsí alé! I jḭḭ kɔ́ gə̄ ngóy n j-a jə-rāā kújə yā Kɔ́ɔ̄ɓē Nə́ɓā yā Israel tītə̄ ń Sirus mban̄g kə́ Persə ədańjí kadə̄ jə-rāā ní.
4Loo ń noō tə́ de kə́ kem ɓēé gə̄ əlan̄ gír kɔr̄ tɔ́gə Jipə gə̄ ō, rāādə́ kadə̄ ɓōlə́n̄ ō, kadə̄ lōn̄neé gír rāā kújə yā Kɔ́ɔ̄ɓē tə́.
5Adə̄ əla gír ɓāl̄ ko̰o̰ ɓē yā Sirus mban̄g kə́ Persə tə́ bátə́ ugə̄ń ɓāl̄ ko̰o̰ ɓē yā Darius mban̄g kə́ Persə tə́ ní, əndān̄ yá̰a̰ jī ngé kadə̄ kɔjə̄ kə́ ndogó mbangāá gə̄ tə́ kadə̄ rāān̄ adə̄ ta kəla ń Jipə gə̄ a sāān̄ rāā ní ta to kə to kɔ̄ɔ́.
Sekə́n̄ Jipə gə̄ rɔ̄ mban̄g Artajerses tə́
6Ɓāl̄ gə̄ ń Jerses əlań gír ko̰o̰ ɓē ngɔr ɓáý tə́ ní madə̄ ba̰ā̰ Jipə gə̄ ndangən̄ makətūbə̄ adə̄nən̄ sekə́n̄neé Juda gə̄ ō, de kə́ Jerusalem gə̄ ō.
7Ɓāl̄ ko̰o̰ ɓē yā Artajerses mban̄g kə́ Persə tə́ ní, Bisəlam ō Mitəredat ō Tabeel ō, nin̄ kə madə̄də́ kə́ rang gēé ndangən̄ makətūbə̄ adə̄n̄ Artajerses. Ndangən̄ makətūbə̄ ní i kə jī loo ndangən yā Aram gə̄ ō, i kə ta Aram ō.
8Rehum nge ko̰o̰ ɓē nin̄ kə Simsai nge ndang makətūbə̄ yānneé ndangən̄ makətūbə̄ kə́ ɔjə dɔ de kə́ Jerusalem gə̄ adə̄n̄ mban̄g Artajerses ō. Ta kəla gír makətūbə̄ ní n toó:
9I Rehum nge ko̰o̰ ɓē nin̄ kə Simsai nge ndang makətūbə̄ ō, gotə madə̄də́ kə́ rang gə̄ ń i de gə̄ kə́ Din ō, kə́ Aparsatak ō, kə́ Tarpel ō, kə́ Aparas ō, kə́ Erek ō, kə́ Babilon ō, kə́ Sujə ō, kə́ Deha ō, kə́ Elam ō, 10gotə nápar de kə́ rang gə̄ ń Asənapar mban̄g kə́ bo ō, rīn ɓār̄ ngá̰ý ō, ɔydə́ reē sedə́ Samari ō, tə́ndādə́ kə̄ kem ngán ɓē gə̄ tə́ ō, gō nang ń deē ra bā Opəratə tə́ anī i kə̄ dām̄ kə́ no ɓē tə́ ō ní n ndangən̄ makətūbə̄ ń toō ní. Gotə najə̄ kə́ rang gə̄ i ta najə̄ ń toō tə́ ɓáý.
11Najə̄ ń ndangən̄ kem makətūbūú əlan̄neé adə̄nən̄ ní n toó:
I ngé kəla gə̄ yā mban̄g Artajerses, adə̄ i de kə́ g ō nang kə́ gidə bā Opəratə kə́ dām̄ kə́ no ɓē tə́ gə̄ n ndangən̄ makətūbə̄ adə̄n̄ mban̄g Artajerses toó.
12Kɔ́ɔ̄ɓē gə̄, Jipə gə̄ ń ḭḭn̄ looí reēn̄ loojí ní ugə̄n̄ Jerusalem, adə̄ majə kadə̄ j-ədaī ādə̄ ōō. Nin̄ gḛyn rāā ɓē ń de kə́ kemeé gə̄ dɔdə́ ngan̄g ngá̰ý ō, kemdə́ ndul ngá̰ý ō ní gogə́ rang. Ndogə̄ mbal̄ kə́ gidə ɓē ní tə́ ń i kə́ tétə̄ nang tə́ kɔ̄ɔ́ ní, nin̄ tél əndān̄ ngəran gogə́ rang ō, tél a əndān̄ ndogə̄ mbal̄ ní gogə́ rang ō. 13Adə̄ majə kadə̄ mban̄g ger̄ kété ta na ré tél rāān̄ ɓē ń noō gogə́ rang ō, tél əndān̄ ndogə̄ mbal̄ kə́ gidə tə́ gogə́ rang ō anī, de kə́ kemeé gə̄ a lōōn̄ gír kəga tīr tə́ ō, kadə̄ lambóó tə́ ō, kadə̄ nar ń gāngə̄n̄ dɔ ngé mān̄ r óbə gə̄ tə́ ní ō. Ba nge ń noō a rāā majə kə mbangāá alé. 14Kə́ ngɔr ń toō tə́ ní jḭḭ ń kɔ́ĺjí majə adə̄ jə-tōń jījí i kə kūl̄īí, ḭ̄ mbangāá ní j-a̰ā̰ kadə̄ ndi ka̰a̰ loo kə̄ rɔ̄í tə́ kadə̄ de gə̄ mbóon̄ seí ní i yá̰á̰ kə́ gōtə́ alé. J-əla j-ədaī najə̄ gə̄ ń toō i 15kadə̄ de yāí gə̄ ndəlen̄ gír kem makətūbə̄ yá̰á̰ kə́ rāā yá̰á̰ jóo gə̄ yā ngé gə̄ ń o̰o̰n̄ ɓē kété noí tə́ ní. Ā ī-teē dɔ tə́ kemeé ō, ā ī-ger̄ kadə̄ de kə́ kem ɓē ngeé ń toō tə́ gə̄ i de kə́ dɔdə́ ngan̄g ngá̰ý gə̄ ō, i de kə́ ngé nujə yá̰a̰ yā mban̄g gə̄ ō, yā ngé ko̰o̰ ɓē gə̄ ō. Tá nin̄ a oōn̄ naā i kem ɓē ngeé ń toō tə́ n a ənīn̄eé wúȳ ní ō. Əlan̄ gír rāā yá̰á̰ ń noō i jóó ngá̰ý. Adə̄ i tām̄ najə̄ ń noō tə́ n nujən̄neé ɓē ngeé ń toō kɔ̄ɔ́ ní. 16Ní, j-əda mban̄g kadə̄ oō. Ré tél rāān̄ ɓē ń noō gogə́ rang ō, ənīn̄ ndogə̄ mbal̄ kə́ ngan̄g dɔ tə́ gogə́ rang ō anī, ā ásə ko̰o̰ ɓē gō nang kə́ gidə bā Opəratə kə́ dām̄ kə́ laā tə́ to̰ alé.
Najə̄ ń mban̄g Artajerses tūr̄ əda ní
17Najə̄ ń mban̄g tūr̄ əda ní n toó, ni ndang makətūbə̄ əda na:
m̄-ndang makətūbə̄ ń toō m-ādə̄ i Rehum nge ko̰o̰ ɓē ō, Simsai nge ndang makətūbə̄ ō, madə̄də́ gə̄ ń ndin̄ Samari ō, kem ɓē gə̄ kə́ gō nang kə́ gidə bā Opəratə kə́ dām̄ kə́ no ɓē tə́ ní ō. m̄-rāāsí lápə́ya! Tá gotə najə̄ kə́ rang gə̄ i ta tə́ noō ɓáý.
18Makətūbə̄ ń ə́laīneé ādījí ní, tə́dan̄ ta kum tə́ adə̄ unjə̄. 19m̄-mēr̄ ndəle gír yá̰a̰ gə̄ ba teēn̄ dɔ tə́ kadə̄ de kə́ Jerusalem gə̄ əlan̄ gír sə̄lā naā dɔ mban̄g gə̄ tə́ ō, mbātə́ koō ta ngé ko̰o̰ ɓē gə̄ ō, kənī wúȳ jī ngé ko̰o̰ ɓē gə̄ tə́ kə rɔ̄ɔ́ ō i jóó ngá̰ý. 20Kété ní mban̄g kə́ tɔ́gə́də́ i ngá̰ý gə̄ ndin̄ Jerusalem ba o̰o̰n̄ ɓē dɔ nang kə́ gidə bā Opəratə kə́ dām̄ kə́ no ɓē tə́ malang. De gə̄ əgān̄də́ tīr̄ ō, adə̄n̄də́ lambóo ō, ngé njə̄rā mbā gə̄ adə̄n̄də́ yá̰á̰ ń gāngə̄n̄ najə̄ njə̄rā mbā róbə gə̄ tə́ ní ō. 21Banī ngɔlaā ní ɔ̄gī Jipə gə̄ rāā kəla yādə́. Ādə̄ deē tél rāā ɓē ń noō gogə́ rang alé, bátə́ kadə̄ ré i mā n m-ə́da najə̄n pá tá. 22Ī-lōōī rāā najə̄ ń noō kə njasí, na sōgə́ majaĺ ní bo adə̄ nujə mban̄g gə̄ kum kə̄ kété.
23Dan ń tə́dan̄ makətūbə̄ yā mban̄g Artajerses ní adə̄n̄ Rehum ō, Simsai nge ndang makətūbə̄ ō, madə̄də́ gə̄ ō oy anī, nin̄ ḭḭn̄ dɔɔ́ aw̄n̄ Jerusalem kə nāgá aw̄ əndān̄ tɔ́gə́də́ dɔ Jipə gə̄ tə́ ɔgə̄n̄neédə́ rāā kəla.
24Adə̄ ta kəla kújə yā Nə́ɓā kə́ Jerusalem dəba bátə́ ugə̄ ɓāl̄ ko̰o̰ ɓē kə́ nge ko̰ jōó yā Darius mban̄g kə́ Persə tə́. Tél unən̄ ta kəla rāā kújə yā Nə́ɓā gogə́.
Currently Selected:
ESDRAS 4: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.