ESDRAS 3
3
Ndɔy Nə́ɓā tél tél əsō naā tə́
1Dan ń nāā kə́ nge ko̰ sīrí ugə̄ anī, ngán Israel gə̄ malang ń ndin̄ kə̄ kem ɓē yādə́ gə̄ tə́ ní, ḭḭn̄ dɔɔ́ gidə kógə̄ḿ ba reē əngen̄ naā Jerusalem. 2Yesua nge tun̄ yá̰á̰ kə́ ngōn̄ Yosadak nin̄ kə ngákó̰o̰n kə́ ngé tun̄ yá̰a̰ gə̄ ō, Jorobabel ngōn̄ Sealtiel nin̄ kə ngéén gēé ō, ḭḭn̄ dɔɔ́ rāān̄ loo tun̄ yá̰a̰ yā Nə́ɓā yā Israel, yā ndējəń yá̰a̰ tun̄ gə̄ kə́ yā róō horoó gə̄ tītə̄ ń ndū najə̄ yā Moijə deē yā Nə́ɓā ədań ní. 3Nin̄ ɓōlə́n̄ de kə́ kem ɓēé gə̄ ɓá tā ba rāān̄ loo tun̄ yá̰a̰ gotən kə́ kété tə́. Nin̄ ndējə̄n̄ Kɔ́ɔ̄ɓē yá̰a̰ tun̄ kə́ róō horoó gə̄ dɔ tə́, ndējə̄nən̄ yá̰a̰ tun̄ kə́ róō horoó dəloí ō, loo sɔlí ō. 4Gō tə́ anī rāān̄ nāā kújə́ kámbə gə̄ tītə̄ ń ndangən̄neé ní: Ndējə̄n̄ Kɔ́ɔ̄ɓē yá̰a̰ tun̄ kə́ róō horoó gə̄ kə dɔ ndɔ̄ gə̄. Kutə dā̰ gə̄ ń a tɔ̄lə̄n̄ kə dɔ ndɔ̄ gə̄ a tunə̄n̄ ní asə naā i kə nge ń yá̰a̰ kāgə̄ ɓē ɔjə ní. 5Əla gír ndɔ̄ ń noō tə́ ní nin̄ a ndējə̄n̄ Kɔ́ɔ̄ɓē i yá̰a̰ tun̄ kə́ róō horoó kə dɔ ndɔ̄ gə̄ kanjə̄ kəya̰ ta ō, yá̰a̰ tun̄ kə́ kə dɔ ndɔ̄ nāā kə́ ta kəga dɔ gə̄ malang ō, yá̰a̰ tun̄ kə́ ndɔ̄ nāā yā Kɔ́ɔ̄ɓē tə́ gə̄ ō, yá̰a̰ tun̄ kə́ ndējə̄ Kɔ́ɔ̄ɓē kə gō kem ndigií gə̄ ō. 6Kə ndɔ̄ kə́ ta kəga dɔ yā nāā kə́ nge ko̰ sīrí ní, nin̄ əlan̄ gír ndējə̄ Kɔ́ɔ̄ɓē yá̰a̰ tun̄ kə́ róō horoó gə̄ kɔ̄ɔ́. Tá kújə yā Kɔ́ɔ̄ɓē i kə́ kəndā ngəran aĺ ɓáý.
7Adə̄ adə̄n̄ ngé rāā kəla gə̄ nar kadə̄ tə́gān̄neé mbal̄ gə̄ ō, njárə̄n̄neé kāgə̄ gə̄ ō. Adə̄n̄ Sidon gə̄ ō Tir gə̄ ō yá̰a̰ kəsa ō yá̰a̰ ka̰ȳ ō yibə̄ ō, kadə̄ ḭḭn̄neé aĺ kə kāgə̄ sédər dɔ nang kə́ Liban tə́ dɔ bā bo tə́ reēn̄neé Japa. Nin̄ rāān̄ yá̰a̰ i kə gō ń Sirus mban̄g kə́ Persə adə̄ńdə́ ta róbə́ ní.
8Kem nāā kə́ nge ko̰ jōó tə́ yā ɓāl̄ ń utə̄ gō nge ń nin̄ ugə̄n̄neé Jerusalem, ɓē ń kújə yā Nə́ɓā i kemeé tə́ ní anī, Jorobabel ngōn̄ Sealtiel ō, Yesua ngōn̄ Yosadak ō gá̰á̰ ngákó̰ó̰də́ gə̄ kə́ ngé tun̄ yá̰a̰ gə̄ ō, ngán Lebi gə̄ ō, de gə̄ malang ń ɔyn̄də́ aw̄n̄ sedə́ ɓəlo tə́ tá tél reēn̄ gogə́ Jerusalem ní ō, udən̄ kə̄ rɔ̄ kəla tə́ rāān naā tə́. Nin̄ tə́ndān̄ ngán Lebi gə̄ kə́ ɓāl̄də́ i kutə jōó gə̄ ō, ngé kə́ ɓāl̄də́ ḭḭ dɔ kutə jōó tə́ ta kaw̄ kə̄ dɔɔ́ gə̄ ō, kadə̄ unən̄ dɔ kəla kújə yā Kɔ́ɔ̄ɓē. 9Banī Yesua nin̄ kə ngánən gə̄ ō, ngákó̰o̰n gə̄ ō, Kadəmiel nin̄ kə ngánən gə̄ ń i de kə́ gír kaa yā Hodabia tə́ ní ō, nin̄ malang ní rāān̄ gō rɔ̄də́ yā kəndā kumdə́ gíŕ ngé rāā kəla kújə yā Nə́ɓā tə́. Ngán Lebi gə̄ kə́ gír kaa yā Henadad tə́ gə̄ ɔsən̄ kíĺdə́ kem kəla ní tə́ ō.
10Dan ń ngé kəndā kújə gə̄ ra a əndān̄ ngəra kújə yā Kɔ́ɔ̄ɓē anī, adə̄n̄ ngé tun̄ yá̰a̰ gə̄ ndɔ́tə̄n̄ kə̄ kété kə kūbə̄ gēé rɔ̄də́ tə́ ō, kə bərúnjə yādə́ gēé ō, adə̄n̄ ngán Lebi gə̄ kə́ ngán kaa Asap gə̄ ndɔ́tə̄n̄ kə̄ kété kə gində̄ kə́ laa gə̄ kə́ yā kənda naā tə́ kadə̄ ɓār̄ gə̄ ō, yā ɓōkə́nń Kɔ́ɔ̄ɓē tɔ̄ȳ kə gō ń Dabid mban̄g kə́ Israel tə́ ɔjəń ní. 11Nin̄ unən̄ pā tə́da ɔsən̄neé gɔn Kɔ́ɔ̄ɓē ō, ɓōkə́nən̄neé tɔ̄y ō ədan̄ na: Kɔ́ɔ̄ɓē i de kə́ majə, tár yān kə́ tām̄ yā Israel tə́ i táŕ kə́ ta ngóyn gətóo! Ngán Israel gə̄ urən̄ kɔĺ ngá̰ý ɔsən̄neé gɔn Kɔ́ɔ̄ɓē ō, tām̄ kəndā kə́ əndān̄ ngəra kújə yān ní tə́.
12Anī de gə̄ ngá̰ý dan ngé tun̄ yá̰a̰ gə̄ tə́ ō, ngán Lebi gə̄ tə́ ō, de kə́ dɔ gír kojə gə̄ tə́ ō ń tɔgən ngá̰ý á a̰a̰n̄ kújə yā Kɔ́ɔ̄ɓē kə́ kəndā kété ní, dan ń nin̄ a̰a̰n̄ de gə̄ loo kəndā ngəra nge kə́ kijə tə́ anī, unən̄ ndūdə́ kə̄ dɔɔ́ nōōn̄neé. Banī ngá̰ý gə̄ unən̄ ndūdə́ kə̄ dɔɔ́ əganə̄neé i kɔŕ rɔ̄nel̄ ō. 13Adə̄ i kɔŕ rɔ̄nel̄ a ī-ger̄ aĺ ō, i nōō a ī-ger̄ aĺ ō. Tām̄ de gə̄ malang unən̄ ndūdə́ kə̄ dɔɔ́ ngá̰ý əgan̄neé kɔŕ, adə̄ de gə̄ ń ran̄ sa̰y ngá̰ý ní gə̄gē oōn̄ ndūdə́.
Currently Selected:
ESDRAS 3: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.