ESTER KƏ TA GƏREK 9
9
Jipə gə̄ dalən̄ ba̰ā̰
1Tɔdɔ̄ kem nāā kə́ nge kṵ kutə gidə i jōó tə́, adə̄ i kem nāā Adar tə́, kə ndɔ̄ kə́ nge kṵ kutə gidə i mətá yā nāá ní, makətūbə̄ gə̄ ń mban̄g ndang ní, ugə̄n̄ lo gə̄ ń sɔɔ̄ kadə̄ ugə̄n̄ tū tə́ ní tə́. 2Ndɔ̄ nəkɔ́ ń nuū tə́ tɔ̄lə̄n̄ madə̄ ba̰ā̰ Jipə gə̄ malang kɔ̄ɔ́. Deē kə́ dum ta Jipə gə̄ gətóo: de gə̄ malang ɓōlə́n̄də́. 3Ngé kɔsə kum gotə mban̄g gə̄ ń ndin̄ kə̄ kem ngán ɓē gə̄ tə́ ní ō, ngán ngār gə̄ ō, ngé ndang makətūbə̄ gə̄ yā mban̄g ō ɓōlə́n̄ gidə Jipə gə̄, tɔdɔ̄ nin̄ ɓōlə́n̄ Mardose. 4Tām̄ makətūbə̄ ń mban̄g əlań ní, rāā adə̄ de gə̄ gerə̄n̄ rīn kə̄ lo gə̄ tə́ kem ɓē kṵ tə́.
6Jipə gə̄ tɔ̄lə̄n̄ de kə́ dəngam gə̄ ɓú mí kem ɓē kə́ Sujə tə́ ō, 7tɔ̄lə̄n̄ Parsanestayin ō, Delpon ō, Pasga ō, 8Pardata ō, Bareya ō, Sarbaka ō, 9Marmasim ō, Arupayos ō, Arsayos ō, Jabutayos ō. 10Haman kə́ ngōn̄ Hamadatos ń rī tɔ̄ȳn na i Bugayos ń i madə̄ ba̰ā̰ Jipə gə̄ ní, tɔ̄lə̄n̄ ngánən kə́ dəngam gə̄ kutə kógə̄ḿ ō, gō tə́ anī ɔyn̄ yá̰a̰ kənge yādə́ gə̄ kɔ̄ɔ́ ō. 11Ndɔ̄ nəkɔ́ ń nuū tə́ ədan̄ mban̄g kutə de kə́ Sujə tə́ gə̄ ń tɔ̄lə̄n̄də́ ní.
12Anī mban̄g əda Ester na: Jipə gə̄ tɔ̄lə̄n̄ de gə̄ ɓú mí kem ɓē kə́ Sujə tə́. Gō gír̄ yāí tə́ ní, yá̰á̰ ń nin̄ rāān̄ lo kə́ rang gə̄ tə́ ní i rí? Ɓá tā ba ré ī-dəje yá̰á̰ kə́ rang ɓáý tṵ anī, m-ā m-ādī yá̰á̰ ní. 13Ester tél əda mban̄g na: Ādə̄ adə̄n̄ Jipə gə̄ ta róbə rāā yá̰á̰ bírí tītə̄ kə́ ɓōólaā ɓáý, ādə̄ ənīn̄ kəlā míndə nīń ngán Haman kə́ kutə kógə̄ḿ gə̄ tə́ ba dṵṵ̄n̄də́ dɔ kāgāá dɔɔ́. 14Mban̄g adə̄ ta róbə kadə̄ rāān̄ yá̰á̰ ní tītə̄ ń nuū. Tām̄ yā Jipə gə̄ kə́ kem ɓēé tə́ ɓáa, adə̄də́ ndūn kadə̄ ənīn̄ kəlā míndə nīń ngán Haman kə́ kutə kógə̄ḿ gə̄ tə́, ba dṵṵ̄n̄də́ dɔ kāgāá dɔɔ́. 15Adə̄ Jipə kə́ Sujə gə̄ ɔsən̄ dɔdə́ naā tə́ kə ndɔ̄ kə́ nge kṵ kutə gidə i sɔ́ yā nāā Adar. Nin̄ tɔ̄lə̄n̄ de gə̄ ɓú mətá, kanjə̄ kɔy yá̰a̰ kənge yādə́ gə̄.
16Jipə gə̄ ń ndin̄ kə̄ gotə ngán ɓē kə́ rang gə̄ tə́ kem ɓē kṵ tə́ ní, dḭḭ̄n̄ naā. Nin̄ əngen̄ dɔdə́ jī ngé kənīdə́ rɔ̄ɔ̄ gə̄ tə́, tɔdɔ̄ kə ndɔ̄ kə́ nge kṵ kutə gidə i mətá yā nāā Adar ní, nin̄ tɔ̄lə̄n̄ de gə̄ dūbú kutə gidə i mí kanjə̄ kɔy yá̰a̰ kənge yādə́ gə̄. 17Kə ndɔ̄ kə́ nge kṵ kutə gidə i sɔ́ yā nāā nəkɔ́ ń nuū anī, nin̄ ɔrə̄n̄ koō ō, rāān̄ ndɔ̄ ní i ndɔ̄ rɔ̄nel̄ tə́ ō, i ndɔ̄ kɔjə rɔ̄nel̄ kə́ ngá̰ý tə́ kə̄ ndágá ō. 18Banī Jipə kə́ kem ɓē kə́ Sujə tə́ gə̄ ń ɔsən̄ dɔdə́ naā tə́ kə ndɔ̄ kə́ nge kṵ kutə gidə i sɔ́ rɔ̄ɔ̄nəń dɔ rɔ̄də́ tə́ kanjə̄ kɔr̄ koō ní, rāān̄ rɔ̄nel̄ ō, ɔjən̄ rɔ̄nel̄ yādə́ kə̄ ndágá ō, i kə ndɔ̄ kə́ nge kṵ kutə gidə i mí. 19I tām̄ najə̄ ń toō tə́ n Jipə gə̄ kə́ kem ngán ɓē gə̄ malang yā ɓē kṵ tə́, dɔ nang yā tə̄rā gə̄ tə́ a rāān̄ ndɔ̄ kə́ nge kutə gidə i sɔ́ yā nāā Adar i ndɔ̄ rɔ̄nel̄ tə́ ō, i ndɔ̄ kɔjə rɔ̄nel̄ kə́ ngá̰ý kə̄ ndágá tə́ ō ní. Nin̄ əlan̄ kə núsə yá̰a̰ rāā rɔ̄nel̄ gēé adə̄n̄ naā ndɔ̄ ngeé ń nuū tə́. Banī ngé gə̄ ń ndin̄ kə̄ kem ɓē bo gə̄ tə́ ní, rāān̄ ndɔ̄ kə́ nge kutə gidə i mí yā nāā Adar i ndɔ̄ rɔ̄nel̄ tə́ ō, i ndɔ̄ kɔjə rɔ̄nel̄ kə́ ngá̰ý kə̄ ndágá tə́ ō. Nin̄ əlan̄ kə núsə yá̰a̰ rāā rɔ̄nel̄ gēé adə̄n̄ naā ndɔ̄ ngeé ń nuū tə́ ō.
Əndān̄ ndɔ̄ rɔ̄nel̄
20Mardose ndang yá̰a̰ malang ń rāā yá̰á̰ ní kem makətūbə̄ kógə̄ḿ tə́, ba əlań adə̄ Jipə gə̄ malang kə́ kem ɓē kṵ yā mban̄g Artajerses tə́. Adə̄ ngé kə́ sa̰y gə̄ ō, ngé kə́ ngɔr gə̄ ō. 21Ba dəjedə́ kadə̄ rāān̄ ndɔ̄ kə́ nge kṵ kutə gidə sɔ́ ō, ndɔ̄ kə́ nge kṵ kutə gidə i mí ō, yā nāā Adar i ndɔ̄ rɔ̄nel̄ tə́. 22Tɔdɔ̄ kem ndɔ̄ gə̄ ń nuū tə́ ní, Jipə gə̄ əngen̄ dɔdə́ jī madə̄ ba̰ā̰də́ gə̄ tə́. Majə kadə̄ kem nāā Adar tə́ kə taá malang ní, əga kem Jipə gə̄ dɔ teēdə́ dɔɔ́ tə́. Kem nāā ngeé ń nuū tə́ ní, kəhɔ ndoō yādə́ tél i rɔ̄nel̄ ō, ndɔ̄ kəhɔ ndoō ní tél i ndɔ̄ rɔ̄nel̄ ō. Adə̄ majə kadə̄ Jipə gə̄ rāān̄ ndɔ̄ gə̄ kə́ kem nāā ngeé ń nuū tə́ i ndɔ̄ gə̄ kə́ nin̄ a rāānəń rɔ̄nel̄ ō, a əlanə̄ń kə núsə yá̰a̰ rɔ̄nel̄ gēé adə̄n̄ madə̄ tadə́ gə̄ ō, ngé ndoō gə̄ ō tə́.
23Jipə gə̄ ndigən̄ yá̰á̰ ń Mardose ndang əlań adə̄də́ ní. 24Ni ɔjədə́ gotə lo rɔ̄ɔ̄ ń Haman kə́ ngōn̄ Hamadatos rɔ̄ɔ̄də́ ní ō, lo kadə̄ ń ni adə̄ ndūn yā tɔ̄ləńdə́ ní ō, lo túgə̄ ń ni túgə̄ wə̄lā yā kɔjəń ndɔ̄ koydə́ ní ō. 25Ni aw̄ ɓē mbangá aw̄ dəje mban̄g kadə̄ n-ənī kəlā míndə Mardose tə́, ba kə n-dṵṵ̄n dɔ kāgāá dɔɔ́. Banī yá̰á̰ kə́ to rɔ̄ ndoō gə̄ malang ń Haman sāā rāā kə Jipə gēé ní, tél əsō i dɔn nəkɔ́ tə́, adə̄ ənīn̄ kəlā míndən tə́ ō, míndə́ ngánən gə̄ tə́ ō, ba dṵṵ̄n̄də́ dɔ kāgāá dɔɔ́.
26I tām̄ najə̄ ń toō tə́ n a ɓārə́n̄ ndɔ̄ rɔ̄nel̄ gə̄ ngeé ń toō na i Purim gə̄ ní, najə̄ yā wə̄lā gə̄ ń túgə̄n̄ tə́ ní. Kə taa yā Jipə gēé ní, Purim kumən na i wə̄lā gə̄. Kem ndɔ̄ gə̄ ngeé ń nuū tə́ ní, a terə̄n̄ kem de gə̄ dɔ yá̰a̰ malang ń i kə́ ndang kem makətūbə̄ yā Mardose tə́ ní ō, dɔ yá̰á̰ kə́ tōr̄ gə̄ malang ń teē dɔ Jipə gə̄ tə́ ní ō, yá̰a̰ malang ń rāādə́ ní ō. 27Mardose əndā ndɔ̄ gə̄ kə́ yā rāań nāā ní ō, Jipə gə̄ ndigən̄ kadə̄ ndɔ̄ gə̄ ní télən̄ i yá̰a̰ kāgə̄ ɓē yādə́ ō, yā ngáńdə́ gə̄ ō, ngán kaadə́ gə̄ ō, de gə̄ malang ń a télən̄ Jipə gə̄ ní ō. Nin̄ ənīn̄ ndūdə́ yā rāā ndɔ̄ gə̄ ní kə njadə́ jingling alé. Majə kadə̄ ndɔ̄ gə̄ ní télən̄ i ndɔ̄ gə̄ kə́ yā kadə̄ əgań kem deē dɔ yá̰á̰ kə́ rāā yá̰á̰ tə́, tām̄ yā gír kojə gə̄ malang ń a reēn̄ ɓáý tə́ ní ō, gír kojə yā Jipə gə̄ tə́ kógə̄ḿ kógə̄ḿ ō, tām̄ yā ɓē gə̄ tə́ kógə̄ḿ kógə̄ḿ ō, ɓē bo gə̄ tə́ kógə̄ḿ kógə̄ḿ ō, kem ɓē kṵ tə́. 28Majə kadə̄ Jipə gə̄ rāān̄ nāā Purim gə̄ ngándáńg. Tām̄ yá̰á̰ ń rāā yá̰á̰ ní, majə kadə̄ gír kojə gə̄ malang ń a reēn̄ ɓáý ní ngɔ̄mə̄n̄ kemdə́ tə́.
29Ester ń i mban̄g kə́ dəyá̰ kə́ ngōn̄ Aminadab ní ō, Mardose ń ni i Jipə ní ō, ndangən̄ yá̰a̰ gə̄ ń nin̄ rāān̄ ní malang. I tītə̄ ń nuū n nin̄ ɔjənə̄ń kadə̄ najə̄ kə́ dɔ Purim gə̄ tə́ ń ndangən̄ ní, i najə̄ kə́ rɔ̄kum ní.
31Ester nin̄ kə Mardose əndān̄ ngəra rāā nāā ní i tām̄ yādə́ nin̄ kɔ́ gə̄ tə́ ō, yá̰á̰ ń nin̄ ran̄ dɔ tə́ yā rāā ní i tām̄ yā rɔ̄ ngan̄g yādə́ nin̄ kɔ́ gə̄ tə́ ō. 32Ndū Ester ń adə̄ ní, rāā adə̄ rāā nāā ngeé ń toō tél i yá̰a̰ kāgə̄ ɓē kə́ tɔ́gən to ngándáńg ō, ndangən̄ ndūn ń adə̄ ní yā kadə̄ əgań kem de gə̄ dɔ tə́ ō.
Currently Selected:
ESTER KƏ TA GƏREK 9: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.