ESTER KƏ TA GƏREK D
D
Ester aw̄ ɓē mbangá
1 Dan ń gír ndɔ̄ kə́ mətá gə̄ gān̄g anī, asə Ester ndɔ̄ȳ Nə́ɓā. Ni ɔr̄ kūbə̄ gə̄ ń tə́ládə́ rɔ̄n tə́ rāań Nə́ɓā ɓɔ́ ní kɔ̄ɔ́, ba tə́la kūbə̄ yān kə́ majə ngá̰ý gə̄ rɔ̄n tə́. 2 Ni ra kə kūbə̄ yān kə́ majə ngá̰ý ngeé rɔ̄n tə́ ɓārə́nń Nə́ɓā ɓáý tṵ, Nə́ɓā ń i nge ka̰a̰ yá̰a̰ malang ō, i nge kajə de gə̄ ō ní. Gō tə́ anī, ni ɔy ngé kəla yān kə́ dəyá̰ gə̄ jōó seneé.
3 Ni ndə̄nā rɔ̄n jəke rɔ̄ nge kógə̄ḿ tə́ tītə̄ kə́ tɔ́gən gətóo beé ō, 4 nge kə́ madə̄ əhɔ ta kūbə̄ yān ń a ɔr nang gōn tə́ ní njə̄rań gōn tə́ ō. 5 Mósən kə́ ḭḭ huyuyu rāā adə̄ rɔ̄n malang i kə́ kərē njo̰ ō, ni mandə tɔȳ kə́ kété ō, ta kumən i kə kəgōó nja̰ tītə̄ dəyá̰ kə́ ngur dəngam rāan beé ō, banī kemən tá i kə ɓōló.
6 Ester mān̄ ta róbə gə̄ tə́ malang ba aw̄ ra no mban̄g tə́. Mban̄g ndi i dɔ kōr̄ kāgə̄ mbang yān tə́ ō, tə́lá yá̰á̰ súū rɔ̄ gə̄ malang ń a teēń dan kósə de gə̄ tə́ ní rɔ̄n tə́ ō. Rɔ̄n malang i kə́ kutə gidə kə lɔ́r ō, kə mbal̄ gə̄ kə́ gātə̄də́ i ngá̰ý gə̄ ō. Ni to ɓōĺ ngá̰ý. 7 Lo ń nuū tə́ mban̄g ɔr̄ dɔn dɔɔ́ anī, ta kumən ndə́lē tītə̄ hor beé ō, a̰a̰ lo kə wūn̄g kə́ ngá̰ý ō. Tɔ́gə mban̄g kə́ dəyá̰ gətóó kɔ̄ɔ́ ō, ta kumən tūr̄ kɔ̄ɔ́ ō. Ni sitə̄ kɔ̄ɔ́ ō, əsō kə̄ dɔ bɔ̄gə̄ nge kəla kə́ dəyá̰ kə́ nge njə̄rā kété non tə́ ō.
8 Lo ń nuū tə́ Nə́ɓā tūr̄ wūn̄g yā mban̄g kɔ̄ɔ́ adə̄ kemən tél sɔl̄ lɔ́ḿ lɔ́ḿ. Mban̄g sōl̄ adə̄ ḭḭ kɔ̄ɔ́ láẃ dɔ kōr̄ kāgə̄ mbang yān tə́, ba aw̄ un Ester kem jīn tə́ bátə́ adə̄ kumən gán̄g. Ni ɔr̄ najə̄ kə́ to kem sɔl̄ gə̄ seneé tetəń kemən kə̄ nang tə́ əda na: 9 Ester, i rí n rāā yá̰a̰. Mā i nge táriī ō, nge ngɔ̄mī ō: ī-lōō ɓōĺ. 10 Ā óy alé, i de kə́ karī gə̄ n j-əndā ndū najə̄ j-ɔgə̄ńdə́ kadə̄ reēn̄ rɔ̄ḿ tə́ ní. 11 Ī-reē kə̄ rɔ̄ḿ tə́! 12 Lo ń nuū tə́ un kāgə̄ ngār yān kə́ rāā kə lɔ́rɔ́ kə̄ dɔɔ́ ba əndā dɔ bɔ̄gə̄ Ester tə́. Gō tə́ anī, əhɔ Ester kə̄ rɔ̄n tə́ ɓirə̄n dagə ba əda na: Ɔ̄r̄ najə̄ seḿ. 13 Ester dalən əda na: Kɔ́ɔ̄ ɓē gə̄, m-á̰a̰ī ní, ī-to tītə̄ de kə́ dɔ rā̰ tə́ yā Nə́ɓā beé ō, kɔsə go̰n yāí əla ɓōĺ kemḿ tə́ ō. 14 Tɔdɔ̄ kɔ́ɔ̄ ɓē gə̄, ī-majə deē ō, ta kumií majə ngá̰ý ō. 15 Ba dan ń Ester a ɔr̄ najə̄ kə̄ tan tə́ ɓáý anī, tɔ́gən gətóo adə̄ ni sitə̄ kɔ̄ɔ́. 16 Kem mban̄g nujə sák sák ō, de gə̄ malang kə́ gōn tə́ gə̄ nāān̄ rāā mban̄g kə́ dəyá̰ kadə̄ kumən gān̄g ō.
Currently Selected:
ESTER KƏ TA GƏREK D: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.