ESTER KƏ TA GƏREK Ɓ
Ɓ
Ndɔ̄ȳ yā Mardose
18 Əga kem Mardose dɔ yá̰a̰ malang ń Kɔ́ɔ̄ɓē rāā tə́ ní, adə̄ ni ndɔ̄ȳ tītə̄ ń toō beé, 19 əda na:
Kɔ́ɔ̄ɓē, Kɔ́ɔ̄ɓē, Mban̄g kə́ tɔ́gən i ngá̰ý:
Yá̰a̰ malang i gíŕ tɔ́gə yāí tə́,
adə̄ de kə́ yā mbātə́ najə̄ gōí tə́ gətóo,
lo ń ī-ndigə kajə Israel ní.
20 Dan ń i ḭ̄ n ī-rāā dɔ rā̰ ō, dɔ nang ō,
yá̰á̰ kə́ majə gə̄ malang kə́ dɔ nang tə́ ō ní,
21 i ḭ̄ n i kɔ́ɔ̄ yá̰a̰ malang ō,
de kə́ yā dum̄ taí
ḭ̄ Kɔ́ɔ̄ɓē a gətóo ō.
22 Ḭ̄ ī-ger̄ yá̰a̰ malang.
Kɔ́ɔ̄ɓē, ḭ̄ ī-ger̄ majə ngá̰ý
kadə̄ m̄-mbātə́ kɔsə noḿ nang tə́ no Haman nge kɔjə rɔ̄ tə́
sɔɔ̄ń i rāā yá̰a̰ kadə̄ mān̄ dɔ loon yāḿ aĺ ō,
kɔjə rɔ̄ yāḿ aĺ ō, i kə ta kūl̄ gḛy kə́ m̄-gḛy ngá̰ý kadə̄ ɔsən̄ go̰nəḿ aĺ ō.
23 Tɔdɔ̄ ré i yā kajəń ngán Israel gə̄ anī, m-ā m-ágə kə̄ nang tə́ non tə́ karī.
24 Banī m̄-mbātə́ kɔsə noḿ nang tə́ non tə́
i yā kəndāń kɔsə go̰n yā deē
dɔɔ́ dɔ kɔsə go̰n yā Nə́ɓā tə́ alé.
Mā m-ā m-ɔ́sə noḿ nang tə́ no deē kógə̄ḿ tə́ alé,
ba i noí ḭ̄ Kɔ́ɔ̄ɓē yāḿ tə́ ngóy.
Ba m̄-rāā nge ń nuū ní, sɔɔ̄ń i kɔjə rɔ̄ yāḿ alé.
25 Ngɔlaā ní Kɔ́ɔ̄ɓē Nə́ɓā, ḭ̄ ń i mban̄g ō, Nə́ɓā yā Abəraham ō ní,
ə́yá̰ gír deē yāí gə̄ ādə̄ ndin̄ kə kumdə́,
tɔdɔ̄ de gə̄ əndān̄ kumdə́ dɔjí tə́ yā nujə sejí kɔ̄ɔ́.
Yá̰á̰ ń i yá̰a̰ yāí kə́ ta kəla gíŕ tə́ nú ní,
sāān̄ nujəń kɔ̄ɔ́.
26 Ī-lōō kídə̄ gír de gə̄ ń ī-gān̄g dɔdə́
dɔ nang kə́ Ejiptə tə́ kadə̄ nin̄ i gír deē yāí gə̄ ní.
27 Ī-nēl̄ mbīí ōoń ndɔ̄ȳ yāḿ.
Kɔ́ɔ̄ɓē, ī-rāā majə kə yá̰á̰ ń i yá̰a̰ yāí ní,
ba ī-tūr̄ kəhɔ ndoō yājí ādə̄ tél i rāā rɔ̄nel̄.
Lo ń nuū tə́ j-a jə-ndi kə kumjí ō, j-a j-ənī pā
kə rīí ḭ̄ Kɔ́ɔ̄ɓēé ō.
Ba ī-lōō rāā kadə̄ ngé ɓōkíī tɔ̄ȳ gə̄
gətóon̄ kɔ̄ɔ́.
28 Ngán Israel gə̄ malang əgan̄ kɔŕ kə̄ dɔ Kɔ́ɔ̄ɓē tə́ kə tɔ́gə́də́ gēé malang kadə̄ dḭḭ̄də́, tām̄ a̰a̰n̄ kadə̄ a oyn̄ i mbée.
Ndɔ̄ȳ yā Ester
29 Dan ń Ester ń i mban̄g kə́ dəyá̰ ní i ta rɔ̄ɔ̄ kə́ yo a teē danaá tə́ anī, sāā lo ɓɔ̄ɔ̄ rɔ̄n rɔ̄ Kɔ́ɔ̄ɓē tə́. 30 Ni ɔr̄ kūbə̄ ngol kə́ rɔ̄n tə́ kɔ̄ɔ́, ba tə́la kūbə̄ yá̰á̰ kə́ tɔȳ dɔ deē ō, kūbə̄ kəhɔ ndoō ō, rɔ̄n tə́. Ni əga bū kə̄ dɔn tə́ ō, ɔy yá̰á̰ kə́ yḛr gə̄ kə̄ dɔn tə́ ō, kum gotə ítər kə́ gātə̄də́ i ngá̰ý gə̄. Ni əla rɔ̄sɔl̄ dɔ rɔ̄n tə́ kə ngangá ngá̰ý ō, loon gə̄ ń kété nelə̄n tə́lá yá̰á̰ súū rɔ̄ gə̄ tū tə́ ngá̰ý ní, ni ūtə̄ gidə kə nənga dɔn kə́ súndə̄ naā tə́ ō. 31 Ni ndɔ̄ȳ Kɔ́ɔ̄ɓē Nə́ɓā yā Israel əda na:
Kɔ́ɔ̄ɓē yāḿ, Mban̄g yājí,
ḭ̄ i kal kógə̄ḿ beē ngóy! Ī-dḭḭ̄m̄ tə́,
na mə̄kɔ́ i kə kérə́ḿ ō, nge dḭḭ̄m̄ i ḭ̄ ngóy ō.
32 Tɔdɔ̄ m-ā m̄-rāā yā kógə̄ naā kə yá̰á̰ kə́ to yoó.
33 Dan ń ojəmə̄n̄ ní, de gə̄ kə́ gír ɓē yā kaaḿ gə̄ tə́ ədan̄ najə̄ ń toō adə̄ m-ōō, ədan̄ na:
Ḭ̄ Kɔ́ɔ̄ɓē na úń Israel dan nápar de gə̄ tə́ malang ō,
na ún kaají gə̄ dan gír kaa gə̄ tə́ malang ō,
yā kadə̄ nin̄ télən̄ yá̰a̰ kənge yāí kə́ njɔ́ḿ tə́ ō,
na yá̰a̰ malang ń ə́da tām̄ yādə́ tə́ ní, na ī-rāā adə̄ udə gírí ō.
34 Ba ngɔlaā jə-rāā majaĺ ta kumií tə́ ō,
ə́lájí kem jī madə̄ ba̰ā̰jí gə̄ tə́ ō,
35 tām̄ jḭḭ j-ɔsə go̰n ɓesə̄ yādə́ gə̄.
Kɔ́ɔ̄ɓē, ḭ̄ i de kə́ súūmú!
36 Ngɔlaā ní yá̰á̰ kə́ tōr̄ ń nin̄ rāān̄ sejí tām̄ jḭḭ i ɓəlo gə̄ ní asədə́ aĺ ɓáý,
adə̄ ənīn̄ ndūdə́ kə ngangá adə̄n̄ ɓesə̄ yādə́ gə̄
37 yā nujə ndū najə̄ yāí kɔ̄ɔ́ ō,
yā rāā kadə̄ gír deē yāí gə̄ gətóon̄ kɔ̄ɔ́ ō,
yā kutə̄ ta ngé ɓōkíī tɔ̄ȳ gə̄ kɔ̄ɔ́ ō,
yā nujə kújə yāí kə́ to kɔsə go̰n kɔ̄ɔ́ ō,
yā rāā kadə̄ dabə tun̄ yá̰a̰ yāí gətóo kɔ̄ɔ́ ō.
38 Nin̄ sāān̄ kadə̄ gír de kə́ ngé taā kem aĺ gə̄ tɔ̄ȳn̄ nə́ɓā kə́ rɔ̄kum aĺ gə̄ ō,
kadə̄ mban̄g ń i de kə́ a oy ní, de gə̄ kə əndān̄ narə̄n ngándáńg ō.
39 Kɔ́ɔ̄ɓē, ngé gə̄ ń nin̄ gətóon̄ ní, ī-lōō kəya̰ kāgə̄ kṵ ɓē yāí kadə̄də́.
Ādə̄ nin̄ mbóon̄ sejí tām̄ kəsō kə́ j-əsō tə́ alé.
Banī ī-tūr̄ yá̰á̰ ń nin̄ sāān̄ rāā ní, ādə̄ tél ənda dɔdə́ nin̄ kɔ́ gə̄ ō,
nge teē kə gír̄ kə́ yā kadə̄ de gə̄ rɔ̄ɔ̄n̄jí ní,
ə́ndan ndéý kə́ kadə̄ de gə̄ malang gerə̄n̄ gō ō.
40 Kɔ́ɔ̄ɓē, ādə̄ əga kemií dɔjí tə́!
ī-rāā ādə̄ jə-ger̄ gōí kum mbang ń yá̰a̰ tɔȳń dɔjí tə́ ní.
Kə́ tām̄ yāḿ mā tə́ ɓáa, ādə̄m̄ kəhɔ rɔ̄ tɔgə,
ḭ̄ ń i Mban̄g kə́ dɔ nə́ɓā gə̄ tə́ ō, Kɔ́ɔ̄ ngé kṵ ɓē gə̄ malang ō ní.
41 Lo ń ré m-ā m̄-ra no mban̄g tə́, adə̄ i no ɓɔl tə́ anī, ə̄ndā najə̄ kə́ ɓār̄ majə taḿ tə́ ō,
ī-tūr̄ kemən ō.
Ādə̄ nelə̄n kə nge rɔ̄ɔ̄jí aĺ ō,
ī-rāā ādə̄ nge rɔ̄ɔ̄jí ō, de kə́ gōn tə́ gə̄ ō gətóon̄ kɔ̄ɔ́ ō.
42 Kɔ́ɔ̄ɓē, ī-taājí jīdə́ tə́ kɔ̄ɔ́ ō, ī-dḭḭ̄m̄ ō,
tɔdɔ̄ mā i kə kérə́ḿ ō, deē yāḿ i ḭ̄ ngóy ō.
Ḭ̄ ī-ger̄ yá̰a̰ malang:
43 Ī-ger̄ kadə̄ kɔsə ń ngé kəla dɔdə́ gír ndū najə̄ yāí tə́ aĺ gə̄ a ɔsə̄n̄ go̰n deē ní, nelə̄m̄ alé.
Tá ɓīī kə tə̄rā ń i de kə́ əja mɔtən aĺ ní, i yá̰á̰ kə́ nelə̄m̄ aĺ ngá̰ý.
44 Ba m̄-rāā tɔdɔ̄ əndān̄ i gúu dɔḿ tə́ ní ḭ̄ ī-ger̄.
Yá̰á̰ súū rɔ̄ kə́ to kɔjə rɔ̄ ní, nelə̄m̄ aĺ ngá̰ý,
tɔdɔ̄ m-ā m-ə́lan dɔḿ tə́ i dan ń m-ā m̄-teē kə̄ ndágá ta kum de gə̄ tə́ ní,
i yá̰á̰ kə́ nelə̄m̄ aĺ ngá̰ý tītə̄ gó̰ý mósə beé ō,
m-ā m-ə́lan dɔḿ tə́ kem ndɔ̄ gə̄ ń m-ā m-ɔ̄rəń koō tə́ ní aĺ ō.
45 Mā nge kəla yāí kə́ dəyá̰ m-ə́sá yá̰a̰ kə Haman aĺ ō,
yá̰a̰ kəsa kə́ ngá̰ý ń mban̄g rāā adə̄ de gə̄ ní, m-āw̄ tū tə́ aĺ ō.
Kasə ń ni ndējə̄ nə́ɓā kə́ rɔ̄kum aĺ gə̄ ní, mā m-ā̰ȳ aĺ ō.
46 Əla gír ndɔ̄ ń jī lo ndi yāḿ tūrəń tə́ bátə́ ɓōólaā ní,
m̄-ger̄ yá̰á̰ ń i ndi majə ní alé,
ba ndi majə yāḿ i rɔ̄í ḭ̄ Kɔ́ɔ̄ɓē Nə́ɓā yā Abəraham tə́ ngóy.
47 Nə́ɓā, ḭ̄ ń tɔ́gí tɔȳ yā de gə̄ malang ní,
ōō ɓār̄ yā ngé gə̄ ń yá̰á̰ kə́ yā kadə̄ əndān̄ kemdə́ dɔ tə́ tṵ gətóó ní,
ba ī-taājí kɔ̄ɔ́ jī de kə́ majə aĺ gə̄ tə́ ō,
ɔ̄r̄ ɓōĺ kə́ kemḿ tə́ kɔ̄ɔ́ ō.
Currently Selected:
ESTER KƏ TA GƏREK Ɓ: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.