2 SAMUEL 23

Najə̄ gə̄ ń Dabid ɔr̄ gō gogə́ ní

1Najə̄ gə̄ ń Dabid ɔr̄ gō gogə́ ní n toó:

Ōōī najə̄ kɔr̄ Dabid ngōn̄ Jese,

najə̄ kɔr̄ deē ń əndānən̄ loo kə́ bo tə́ ní,

deē ń Nə́ɓā yā Jakob ur yibə̄ ngār dɔn tə́ ní,

deē ń nel̄ ngán Israel gə̄ tɔ̄ȳ kə pāá ngá̰ý ní.

2Ndíĺ Kɔ́ɔ̄ɓē ɔr̄ najə̄ kə kūlə̄ḿ, ni-əndā najə̄ yān ta ndo̰ḿ tə́.

3Nə́ɓā yā Israel ɔr̄ najə̄, nge ngɔ̄m̄ Israel ədam̄ na:

Deē ń o̰o̰ ɓē dɔ de gə̄ tə́ kə háĺ kə́ gōtə́ ní,

deē ń o̰o̰ ɓē dɔ de gə̄ tə́ kə ɓōĺ ndíĺ Nə́ɓāá ní,

4to tītə̄ mbang kə́ əɓa dəloí

ndɔ̄ kə́ kil̄ man̄ gətóó tə́ adə̄ ndə́lē dɔ rā̰ tə́ beē.

Yḛŕ mbang kə́ gō man̄ kə́ edə tə́ rāā adə̄ mu əɓa.

5Yá̰á̰ ń Nə́ɓā rāā kə kojə yāḿ ní n toó.

Ni-əhɔ madə̄ naā kə́ a to ngándáńg seḿ.

tə́ndā ndū najə̄ gə̄ dɔ tə́ ō, ɔjə loo ngɔ̄mən majə ō.

I ni n rāā adə̄ m̄-tetə rɔ̄ɔ̄ ō,

rāā yá̰a̰ malang kə́ nel̄ de gə̄ ō ní.

6Banī ngé gə̄ malang ń háĺdə́ nujə kɔ̄ɔ́ ní ton̄ i tītə̄ kōn̄ kə́ yā tə́gā kɔ̄ɔ́ gə̄.

Deē a ɔydə́ kə jīneé alé.

7Deē ń a sāā kɔdə rɔ̄də́ ní a əhɔ i gində̄ aláa i kāgə̄ nənga jīn tə́,

ba a əla hor dɔdə́ tə́ malang i kə̄ loo nəkɔ́ ń noō tə́.

Ngé rɔ̄ɔ̄ yā Dabid gə̄

(Á̰a̰ī 1 Yá̰a̰ 11.10-47)

8Rī go̰ rɔ̄ɔ̄ yā Dabid gə̄ n toó:

Isəbaal ń i Hakəmon ní, i ngāgəra dɔ go̰ rɔ̄ɔ̄ kə́ mətá gə̄. Rīn kə́rēý ń a ɓāŕnən̄neé ní na i Adoni kə́ Esəni. I ni n tɔ̄l̄ de gə̄ ɓú sɔ́sɔ́ gidə kógə̄ḿ ní.

9Nge kutə̄ gōn i Eleajar ngōn̄ Dodo kə́ ngōn̄ deē kógə̄ḿ kə́ Ahoa. Dan ń Dabid gē aw̄ ənīn̄ Pilistin gə̄ rɔ̄ɔ̄ ní, ni i dan ngé rɔ̄ɔ̄ kə́ mətá gə̄ ń dānə̄n̄ Dabid ní tə́. Pilistin gə̄ ń kánə̄n̄ naā ní i yā rɔ̄ɔ̄ Israel gə̄. Ngé rɔ̄ɔ̄ yā Israel gə̄ a̰ȳn̄ naā, 10banī ni-ra gotoó beé, tɔ̄l̄ Pilistin gə̄ bátə́ adə̄ jīn oy yélélé ō, ngōngə̄rō tū kūl̄ kaskar yān tə́ ō. Ndɔ̄ ń noō tə́ Kɔ́ɔ̄ɓē tetə rɔ̄ɔ̄ kə́ bo adə̄ ngán Israel gə̄. Ngé rɔ̄ɔ̄ yā Israel gə̄ tél reēn̄ gogə́ rɔ̄ Eleajar tə́ i kə rī kɔy yá̰a̰ kənge gə̄ kə́ ta rɔ̄ tə́ ngóy.

11Nge kutə̄ gōdə́ i Sama ngōn̄ Age kə́ Harar. Dan ń Pilistin gə̄ ɔsən̄ dɔdə́ naā tə́ Lehi, loo ń ndɔr̄ kōō la̰tíi#23.11 La̰tíi: Á̰a̰ī Tkg 25.34 gə̄ i tū tə́ ní anī, ngé rɔ̄ɔ̄ kə́ Israel tə́ gə̄ tūrə̄n̄ gándə́də́ adə̄n̄də́. 12Banī Sama ra gotoó kem ndɔr̄ ní tə́. Ni ngɔ̄m̄ ndɔr̄ ní ō, tɔ̄l̄ Pilistin gə̄ ō. I beé n Kɔ́ɔ̄ɓē tetəń rɔ̄ɔ̄ kə́ bo adə̄ ngán Israel gə̄ ní.

13Ndɔ̄ kə́rēý tə́ anī, ngé rɔ̄ɔ̄ gə̄ mətá dan ngé rɔ̄ɔ̄ kə́ kutə mətá gə̄ tə́ reē əngen̄ Dabid kem bəlo mbal̄ kə́ Adulam tə́, i dan yā sāā kōō gə̄ tə́. Ɓūtə̄ ngé rɔ̄ɔ̄ yā Pilistin gə̄ aw̄ rāān̄ gérger yādə́ wól loo yā Repay gə̄ tə́. 14Dan ngeé ń noō tə́ ní Dabid ndi loo ɓɔ̄ɔ̄ rɔ̄ yān kə́ ngan̄g tə́ ō, ɓūtə̄ ngé rɔ̄ɔ̄ yā Pilistin gə̄ ndin̄ kem ɓē kə́ Betlehem tə́ ō. 15Anī yá̰á̰ ń ngurən rāā Dabid ní, Dabid əda kə̄ ndágá. Ni-dəje na ké i náā n a adə̄n man̄ kə́ kem bəlo man̄ kə́ ta ɓē kə́ Betlehem tə́ kadə̄ n-a̰ȳ wa. 16Anī ngé rɔ̄ɔ̄ kə́ mətá gə̄ ní udən̄ kem gérger yā Pilistin gə̄ tə́ ba ɔdən̄ man̄ kə́ kem bəlo taā man̄ ndi kə́ ta róbə́ kə́ yā kudəń kə̄ kem ɓē kə́ Betlehem tə́ ní reēn̄neé adə̄nən̄. Ba Dabid mbātə́ ka̰ȳ man̄ ní. Ni ɓōkə́ nang tə́ ndējə̄ Kɔ́ɔ̄ɓē 17ba əda na: Kɔ́ɔ̄ɓē, kə m-ā̰ȳ man̄ ń toō a? To i tītə̄ loo ka̰ȳ mósə de gə̄ ń ənīn̄ kəla jī yo aw̄n̄neé gō tə́ ní. Adə̄ Dabid mbātə́ ka̰ȳ man̄ ní. Yá̰á̰ ń ngé rɔ̄ɔ̄ kə́ mətá gə̄ ń toō rāān̄ ní n noó.

18Abisai kə́ ngōkó̰o̰ Joab i ngōn̄ Seruya. Ni i ngol ngé rɔ̄ɔ̄ gə̄ kə́ nin̄ i kutə mətá kem ɓūtə̄ yādə́ tə́. Ndɔ̄ kógə̄ḿ tə́ anī, ni tɔ̄l̄ madə̄ ba̰ā̰ gə̄ ɓú mətá kə nənga yānneé, adə̄ rīn ɓār̄ dan ngé rɔ̄ɔ̄ kə́ kutə mətá gə̄ tə́. 19Kə́ rɔ̄kum tə́ ní rīn ɓār̄ ngá̰ý tɔȳ yādə́ ō, tél ngāgəra dɔdə́ ō, ba ni-əndā gō go̰ rɔ̄ɔ̄ kə́ mətá gə̄ ní tə́ alé.

20Benaya kə́ Kabəseel ń i ngōn̄ Yoyada kə́ ngōn̄ go̰ rɔ̄ɔ̄ kógə̄ḿ ní, rāā yá̰á̰ kə́ to ɓōĺ gə̄ i ngá̰ý. I ni n tɔ̄l̄ go̰ rɔ̄ɔ̄ kə́ jōó gə̄ kə́ Moab ní ō, risə gō ɓɔl tə́ aw̄ tɔ̄lən kem bəlo taā man̄ tə́, ndɔ̄ ń néjə#23.20 Néjə: Néjə i man̄ kə́ to tītə̄ kɔ̄sə̄ ba ndaa túĺ túĺ tītə̄ búy kūbə̄ beé. Dan ń kūl̄ o̰o̰ ngá̰ý anī a ḭḭ dɔ rā̰ tə́ a dəse tun tun, ba gətóo dɔ nang yājí tə́ laā. a dəseń tun tun tə́ ní ō. 21Tɔ̄l̄ báw deē kógə̄ḿ kə́ Ejiptə kə́ kə nəngaá jīn tə́. Ni-əhɔ kāgə̄ jīn tə́ ənīń deē ní rɔ̄ɔ̄. Taā nənga yān jīn tə́ ba tɔ́sə̄ tɔ̄l̄nəń. 22Yá̰á̰ kə́ to ɓōĺ gə̄ ń Benaya rāā ní n noó. Ni-rāā adə̄ rīn ɓār̄ ngá̰ý dan ngé rɔ̄ɔ̄ kə́ mətá gə̄ tə́. 23Rīn ɓār̄ ngá̰ý tɔȳ yādə́ ba ni-əndā gō go̰ rɔ̄ɔ̄ kə́ mətá gə̄ ní tə́ alé. Dabid əndān dɔ áskar gə̄ kə́ ngé ngɔ̄m̄ dɔn gə̄ tə́.

24Asael kə́ ngōkó̰o̰ Joab i dan ngé rɔ̄ɔ̄ kə́ kutə mətá gə̄ ní tə́. Gat de kə́ rang kə́ sedə́ gə̄ i Elanan ngōn̄ Dodo kə́ Betlehem ō, 25Sama kə́ Harod ō, Elika kə́ Harod ō, 26Heles kə́ Pelet ō, Ira ngōn̄ Ikes kə́ Tekoa ō, 27Abiejer kə́ Anatot ō, Mebunai kə́ Husa ō, 28Salmon kə́ Ahoa ō, Marai kə́ Netopa ō, 29Heleb ngōn̄ Baana kə́ Netopa ō, Itai ngōn̄ Ribai kə́ Gibea kə́ dɔ nang yā Benjamḛ tə́ ō, 30Benaya kə́ Piraton ō, Hidai kə́ kem wól loo gə̄ ń man̄ gə̄ kə́ dɔ mbal̄ Gaas tə́ a nūgə́n̄ tū tə́ ní ō, 31Abialbon kə́ Bet Araba ō, Asmabet kə́ Bahurim ō, 32Eliaba kə́ Saalbon ń i ngōn̄ Yasen kógə̄ḿ kə́ dan madə̄ gə̄ tə́ ní ō, Yonatan ō, 33Sama kə́ Harar ō, Ahiam ngōn̄ Sarar kə́ Harar ō, 34Elipelet ngōn̄ Ahasəbai kə́ ngōn̄ deē kógə̄ḿ kə́ Maaka ō, Eliam ngōn̄ Ahitopel kə́ Gilo ō, 35Hesərai kə́ Karmel ō, Parai kə́ Arab ō, 36Igal ngōn̄ Natan kə́ Soba ō, Bani kə́ gír kaa yā Gad tə́ ō, 37Selek ń ni i Amon ní ō, Narai kə́ Beerot ń i nge kətō yá̰a̰ rɔ̄ɔ̄ gə̄ yā Joab kə́ ngōn̄ Seruya ní ō, 38Ira ō, Gareb ō ń nin̄ i de kə́ gír kojə yā Yeter tə́ ní ō, 39Uri ń i Het ní ō. Malang ɓáa nin̄ i deē kutə mətá gidə i sīrí.

Currently Selected:

2 SAMUEL 23: SARDC

Highlight

Copy

Compare