2 SAMUEL 22
22
Dabid ndadə̄ Nə́ɓā
(Á̰a̰ī Pā 18)
1Dan ń Kɔ́ɔ̄ɓē ɔr̄ Dabid kɔ̄ɔ́ jī madə̄ ba̰ā̰n gə̄ tə́ ō, jī Saul tə́ ō ní anī, ənī pā ń toō adə̄ Kɔ́ɔ̄ɓē, 2əda na:
Kɔ́ɔ̄ɓē i mbal̄ yāḿ, ni i kújə́ kə́ ngan̄g ngá̰ý yāḿ kə́
m̄-ndi kemeé anī, yá̰a̰ a ɔdə rɔ̄ḿ alé.
3Nə́ɓā i mbal̄ ɓɔ̄ɔ̄ rɔ̄ yāḿ.
Ni i der yāḿ ō, gində̄ ń m-ā m̄-tetəń rɔ̄ɔ̄ ní ō.
Ni i kújə́ kə́ ngan̄g yāḿ ō, kə́ m̄-ndi kemeé anī m-ájə,
loo ɓɔ̄ɔ̄ rɔ̄ yāḿ ō, nge kajəḿ ō.
Ni i nge kɔrə̄m̄ kɔ̄ɔ́ jī ngé dɔ́nɔ gə̄ tə́.
4Ī-tɔ̄yī Kɔ́ɔ̄ɓē!
m̄-ɓāŕ Kɔ́ɔ̄ɓē, anī m̄-tetə madə̄ ba̰ā̰ḿ gə̄ rɔ̄ɔ̄.
5Yo ɓírə̄m̄ kə tɔ́gɔ́ tītə̄ bəngál man̄ beé,
m̄-ɓōĺ tɔdɔ̄ to i tītə̄ man̄ dɔ mbal̄ kə́ a nūgə́
kə tɔ́gɔ́ yā nujə loo beé.
6Kəlā kə́ ɓádá gə̄ ɓír̄mə̄n̄, yo əyā gūmbə̄ noḿ tə́.
7Dan ń wur kɔl kə́ ngá̰ý əsō dɔḿ tə́ ní, m̄-ɓāŕ Kɔ́ɔ̄ɓē,
m̄-ɓāŕ Nə́ɓā yāḿ.
Anī ni-ndi kem kújə yān tə́ oō ndūḿ.
Kɔŕ yāḿ əsō mbīn tə́.
8Loo ń noō tə́ dɔ nang ndebə ō, dɔ rā̰ yéȳ ō.
Dan ń wōn̄g rāā Kɔ́ɔ̄ɓē ní, dɔ rā̰ ō, dɔ nang ō ndewn̄.
9Sa teē kɔ́nən tə́ ō, hor teē tan tə́ ō,
yā̰l̄ hor gə̄ teēn̄ gō tə́ ō.
10Kɔ́ɔ̄ɓē tetə ta dɔ rā̰ kə̄ nang tə́ ba risə nang tə́.
Kil̄ man̄ kə́ ndul ndí ndḭ́ i gír njan tə́.
11Ni-ndi i gidə de kə́ dɔ rā̰ tə́
kógə̄ḿ tə́ ń a risəń ní
Ni teē hɔy dɔ néĺ tə́.
12Ni utə̄ gidə rɔ̄n kə loo kə́ risə tilií.
Ɓɔ̄ɔ̄ rɔ̄n dan kil̄ man̄ kə́ ndul ndí ndḭ́ tə́,
dan kil̄ man̄ gə̄ kə́ man̄ i tū tə́ tə́.
13Loo kə́ unjə̄ kow kə́ ndə́lē ngá̰ý i kété non tə́.
Hor kə́ tū tə́ ndɔ́w̄ adə̄ kə́rā sir sir.
14Kɔ́ɔ̄ɓē ndi dɔ rā̰ tə́ ndán̄g loo, Nə́ɓā kə́ dɔɔ́ sa̰y ngá̰ý rāā adə̄ ndūn ɓār̄.
15Ni túr̄də́ kə kum gərá anī tə̄ndān̄ naā tḭ̄ḭ̄n̄.
Ni urdə́ kə tel̄ maná anī tḭ̄ḭ̄n̄ naā kógə̄ḿ kógə̄ḿ.
16Ndū Kɔ́ɔ̄ɓē ń ndángəń loo ní ō, koō ń teē kɔ́nən tə́ ō ní,
rāā adə̄ gír bā bo teē dɔɔ́ ō, gír ngəra dɔ nang teē dɔɔ́ ō.
17Ni-ndi dɔɔ́ əla jīn əhɔmə̄ń.
Unəm̄ kɔ̄ɔ́ kum yá̰á̰ kə́ tōr gə̄ ń reēn̄ dɔḿ tə́ ní.
18Ni ɔrə̄m̄ kɔ̄ɔ́ jī madə̄ ba̰ā̰ḿ gə̄ kə́ tɔ́gə́də́ i ngá̰ý tə́,
jī madə̄ ba̰ā̰ḿ gə̄ ń tɔ́gə́də́ i ngá̰ý tɔȳ yāḿ ní tə́.
19Ndɔ̄ ń tɔ́gə́ḿ gətóoń tə́ ní, nin̄ ənīmə̄n̄ rɔ̄ɔ̄ kə ngangá ngá̰ý,
banī Kɔ́ɔ̄ɓē reē dḭḭ̄m̄.
20Ni-taā əya̰m̄ dɔɔ́ adə̄ mā i kɔ́ɔ̄ rɔ̄ḿ, ni ajəm̄ tɔdɔ̄ tárəm̄.
21I tām̄ háĺ kə́ gōtə́ kə́ m̄-rāā tə́,
I tām̄ jīḿ kə́ unjə̄ njáý njáý tə́ n Kɔ́ɔ̄ɓē rāań yá̰á̰ kə́ beē seḿ ní.
22Tɔdɔ̄ m̄-rāā yá̰a̰ gə̄ ń Kɔ́ɔ̄ɓē ɔjəm̄ ní,
m̄-rāā háĺ kə́ sew aĺ kə Nə́ɓā yāḿ alé.
23M-ə̄ndā kumḿ gír ndū najə̄ yān gə̄ tə́ m̄-ngɔ̄m̄ majə.
Gō míndə gə̄ ń ni-əda kadə̄ yā rāā ní mā m-mbātə́ rāā alé.
24m̄-ndigə kadə̄ ənge yá̰á̰ kə́ yā kəda dɔḿ tə́ alé.
m̄-gḛy kadə̄ najə̄ əhɔm̄ alé, adə̄ m̄-ngɔ̄m̄ rɔ̄ḿ.
25Loo ń noō tə́ Kɔ́ɔ̄ɓē əndā njaḿ najə̄ háĺ kə́ gōtə́ kə́ m̄-rāā seneé tə́,
najə̄ háĺ kə́ unjə̄ njáý njáý kə́ m̄-rāā adə̄ a̰a̰ kə kumneé tə́.
26Kɔ́ɔ̄ɓē, deē ń ra dɔ ndūn tə́ anī, ḭ̄ ī-ra dɔ ndūí tə́ seneé ō.
Deē ń najə̄ gətóo dɔn tə́ ní,
ḭ̄ ɔ́jən kadə̄ najə̄ gətóo dɔí tə́ ō.
27Deē ń unjə̄ njáý njáý ní ḭ̄ a ɔjən kadə̄ ḭ̄ i kə́ unjə̄ njáý njáý ō.
Ba ḭ̄ ā i lur de kə́ nge gól̄ loo.
28Ḭ̄ ī-dḭḭ̄ gír de gə̄ ń madə̄də́ gə̄ rāān̄də́ mbóó tə́ ní,
ba ī-kídə̄ ngé kɔjə rɔ̄ gə̄.
29Kɔ́ɔ̄ɓē, i ḭ̄ n i lámba yāḿ ní,
adə̄ loo kə́ ndɔ̄ɔ́ ń m̄-ndi kum tə́ ní, ḭ̄ ūnjə̄ tū tə́.
30M-ḭ́ḭ bal dɔ bəlo tə́ i kə ta kūlīí,
m-āl̄ dɔ ndogə̄ mbal̄ tə́ m̄-jə̄ngā kə̄ gidə kə́rēý tə́ i kə Nə́ɓā yāḿ.
31Róbə yā Nə́ɓā i róbə́ kə́ majə ɔtə̄ ta.
Najə̄ yā Kɔ́ɔ̄ɓē rāā yá̰á̰ kə́ ɔjə kadə̄ i najə̄ kə́ rɔ̄kum.
Kɔ́ɔ̄ɓē i der yā de gə̄ malang ń a nam̄nən̄ ní.
32Kɔ́ɔ̄ɓē ngóy i Nə́ɓā! I Nə́ɓā yājí ngóy n i mbal̄ yājí ní!
33I ni n i loo ɓɔ̄ɔ̄ rɔ̄ yāḿ kə́ ngan̄g ngá̰ý ní!
I ni n i nge rāā róbə noḿ tə́ ní.
34Ni-rāā adə̄ njaḿ ɔl tītə̄ nja dul.
Ni-əhɔm̄ adə̄ m̄-rā kə njaḿ dɔɔ́ dɔ loo kə́ kḭḭ kə̄ dɔɔ́ gə̄ tə́.
35I ni n i nge ndóōm̄ loo rɔ̄ɔ̄ ō,
nge rāā seḿ kadə̄ jīḿ rugə ga̰ gəra kə́ rāā kə gində̄ nə̄ngá kasaá ō ní.
36Kɔ́ɔ̄ɓē, ī-ra noḿ tə́ tītə̄ der ō, ájəm̄ ō.
Ré m̄-ɓāríī anī ḭ̄ ī-ndigəm̄ ō, ḭ̄ ī-rāā adə̄ tɔ́gə́ḿ to ō.
37M-ā̰ȳ ngɔ̄də̄ ngá̰ý ō, njaḿ udə̄ aĺ ō, i kə ta kūlīí.
38m̄-ngɔ̄də̄ madə̄ ba̰ā̰ḿ gə̄ ba m̄-tɔ̄l̄də́ kɔ̄ɔ́ malang.
Dan ń m̄-tɔ̄l̄də́ aĺ ɓáý ní, m̄-tél gōdə́ tə́ alé.
39Ré əngən̄ do kə́ asə yodə́ anī, m-ɔ́sə́də́ dɔ tə́ m̄-tɔ̄l̄də́.
Deē kógə̄ḿ dandə́ tə́ kə́ m-ə́ya̰n gətóo, m̄-tɔ̄l̄də́ malang.
Nin̄ ḭḭn̄ dɔɔ́ to̰ alé, nin̄ i nang tə́ ba m-ə̄ndā njaḿ dɔdə́ tə́.
40Ḭ̄ ādə̄m̄ tɔ́gə kadə̄ m̄-rɔ̄ɔń.
Ngé kənīḿ rɔ̄ɔ̄ gə̄ ní, ḭ̄ ə́la dɔdə́ gír njaḿ tə́.
41Ḭ̄ ī-rāā ādə̄ madə̄ ba̰ā̰ḿ gə̄ tūrə̄n̄ gándə́də́ taḿ tə́ kə ngɔ̄dɔ̄ɔ́.
Ngé rɔ̄ɔ̄m̄ gə̄ ní, m̄-tɔ̄l̄də́ kɔ̄ɔ́ náḿ náḿ.
42Nin̄ əgan̄ kɔŕ ba de kə́ dḭḭ̄də́ gətóo.
Nin̄ əgan̄ kɔŕ kə̄ dɔ Kɔ́ɔ̄ɓē tə́, ba ni dal alé.
43m̄-rāādə́ bumbə́rú tə́.
m̄-rējə̄də́, m̄-tə́ɓādə́ tītə̄ bɔr kə́ kum róbó beē.
44Ḭ̄ ɔ̄rə̄m̄ kɔ̄ɔ́ ta deē gír yāḿ gə̄ ń ənīn̄ wúȳ jīḿ tə́ ní,
adə̄ rāān̄ yá̰á̰ kə́ majaĺ seḿ alé
Ḭ̄ ə̄ndām̄ dɔ gír nápar de gə̄ tə́ ba ī-ngɔ̄mə̄m̄ ādə̄ mā i dɔdə́ tə́ dɔɔ́.
Gír de kə́ m̄-ger̄də́ aĺ gə̄ a rāān̄ kəla yāḿ.
45Tə̄rā gə̄ reē a gólə̄n̄ kumḿ, m-ə́dádə́ najə̄ ta kógə̄ḿ anī oōn̄ taḿ.
46Kemdə́ taā loo to̰ alé adə̄ nin̄ teēn̄ loo ɓɔ̄ɔ̄ rɔ̄ yādə́ gə̄ tə́ kə rɔ̄ ndebeé.
47Kɔ́ɔ̄ɓē ndi ngáńdáńg! m̄-rāā mbal̄ yāḿ kə́ra!
Nə́ɓā i go̰ rɔ̄ɔ̄, ni i mbal̄ yāḿ ō, nge kajəḿ ō.
48Ni i Nə́ɓā kə́ nge dal ba̰ā̰ḿ,
kə́ nge kəla dɔ nápar de gə̄ gír tɔ́gə yāḿ tə́.
49Kɔ́ɔ̄ɓē, ḭ̄ ɔ̄rə̄m̄ kɔ̄ɔ́ ta madə̄ ba̰ā̰ḿ gə̄ tə́.
Ḭ̄ ī-rāā adə̄ ngé gə̄ ń ənīmə̄n̄ rɔ̄ɔ̄ ní m̄-tetədə́ rɔ̄ɔ̄.
Ḭ̄ ɔ̄rə̄m̄ kɔ̄ɔ́ jī ngé dɔ́nɔ gə̄ tə́.
50Adə̄ m̄-ndigə ɓōkíī tɔ̄ȳ dan nápar de gə̄ tə́ ō,
m̄-ndigə kɔsə gɔnií kə pā yāḿ gēé ō.
51Kɔ́ɔ̄ɓē rāā yá̰á̰ kə́ bo gə̄ dḭḭ̄ń mban̄g ń ni gə̄rā ní.
Ni-rāā kem majə kə nge ń ni ur yibə̄ ngār dɔn tə́ ní,
adə̄ i kə Dabidí ō, kə gír kaa yānneé ō, bátə́ kə̄ no tə́.
Currently Selected:
2 SAMUEL 22: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
