2 MBAN̄G 5
5
Elije rāā bānjə̄ kə́ rɔ̄ Naaman tə́ adə̄ ur̄
1Naaman ń i ngol áskar gə̄ yā mban̄g kə́ Aram ní i deē kə́ kɔ́ɔ̄n gḛyn ngá̰ý, adə̄ a̰a̰ tan loo kɔr̄ najə̄ tə́ karī, tɔdɔ̄ Kɔ́ɔ̄ɓē tetə rɔ̄ɔ̄ adə̄ Aram gə̄ i kə kūl̄neé. Ba deē ngeé ń toō ń i go̰ rɔ̄ɔ̄ ní, i nge bānjə̄. 2Kété ní ɓūtə̄ Aram kə́rēý gə̄ teē aw̄ nujən̄ loo ba ɔyn̄ yá̰a̰ yā de gə̄ dɔ gúú tə́. Nin̄ əhɔn̄ ngōn̄ kə́ dəyá̰ kógə̄ḿ kə́ dɔ nang kə́ Israel tə́, aw̄n̄ seneé adə̄ tél nge kəla yā nə̄yá̰ Naaman. 3Ndɔ̄ kógə̄ḿ tə́ anī, ngōn̄ kə́ dəyá̰ ní əda kɔ́ɔ̄n kə́ dəyá̰ na:
Nəńgé tə́ kɔ́ɔ̄ḿ Naaman aw̄ ugə̄ rɔ̄ nge koō ta kə́ Samari tə́ anī, ni a rāā kadə̄ bānjə̄ kə́ rɔ̄n tə́ ur̄ a kɔ̄ɔ́.
4Najə̄ ń ngōn̄ kə́ dəyá̰ kə́ Israel tə́ əda ní, Naaman téləń aw̄ əda mban̄g. 5Anī mban̄g əda na:
Majə, āw̄ ə́nge mban̄g kə́ Samari kə makətūbə̄ ń m-ā m-ādī kadə̄ āwń ādə̄n ní.
Ādə̄ Naaman əsō róbó aw̄. Ni ɔy gində̄ arjā̰a̰ kə́ kɔȳn i kəlōo ɓú mətá o, lɔ́r kə́ kɔȳn i kəlōo kutə mehḛ́ ō, kūbə̄ gə̄ kə́ yā kəla rɔ̄ tə́ ndɔ̄ nāā gə̄ tə́ kutə kógə̄ḿ ō, jīn tə́. 6Ni-adə̄ mban̄g kə́ Israel tə́ makətūbə̄ ń mban̄g kə́ Aram ndang najə̄ ń toō kemeé ní: M-ə́la Naaman, ngol áskar yāḿ gə̄ rɔ̄í tə́ kə makətūbə̄ ń toō kadə̄ ī-rāā bānjə̄ kə́ rɔ̄n tə́ ādə̄ ur̄ kɔ̄ɔ́. 7Dan ń mban̄g kə́ Israel tə́ tə́da makətūbə̄ ní oy anī, rə̄yā̰ kūbə̄ kə́ rɔ̄n tə́ ba əda na:
Mā i Nə́ɓā á m-ásə rāā kadə̄ de gə̄ oyn̄ ō, ajən̄ ō a, á deē ń noō əla kə deē kadə̄ m̄-rāā bānjə̄ kə́ rɔ̄n tə́ kadə̄ ur̄ ní. Beé ní á̰a̰ī ō, ī-gerī ō, kadə̄ a sāā i taḿ!
8Dan ń Elije oō kadə̄ mban̄g kə́ Israel tə́ na rə̄yā̰ kūbə̄ kə́ rɔ̄n tə́ anī, əla əda mban̄g na:
Ī-rə̄yā̰ kūbə̄ yāí i najə̄ rí tə́? Ādə̄ Naaman reē looḿ laā, na a ger̄ kadə̄ nge koō ta kógə̄ḿ ndi dɔ nang kə́ Israel tə́!
9Adə̄ Naaman reē dəba ta kújə yā Elije tə́ kə púsə yānneé ō, kə sə́nda yān gēé ō. 10Elije əla deē kógə̄ḿ rɔ̄n tə́ kadə̄ ədan na:
Āw̄ ī-ndogə̄ man̄ bā Jurdḛ nja sīrí anī dā̰í a unjə̄ ō, bānjə̄ kə́ rɔ̄í tə́ a ur̄ kɔ̄ɔ́ ō.
11Loo ń noō tə́ wōn̄g rāā Naaman adə̄ ní ɔtə kə wōngōó ba əda na:
Mā m-ɔ́jəń na a teē yā reē rɔ̄ḿ tə́ yā ra kə njan kə́ dɔɔ́ ɓārə́nń rī Kɔ́ɔ̄ɓē Nə́ɓā yān ō, kəla jīn kɔdəń looḿ ń moy i tū tə́ ní ō, kadə̄ bānjə̄ kə́ rɔ̄ḿ tə́ urə̄ń. 12Bā gə̄ kə́ Damas tə́ ń i Labana ō, Parpar ō ní majən̄ tɔȳn̄ man̄ gə̄ malang kə́ Israel tə́ aĺ a? M-ásə ndogə̄ rɔ̄ḿ kum tə́ kadə̄ rɔ̄ḿ unjə̄ aĺ a?
Naaman tūr̄ rɔ̄n ba tél dɔ tə́ kə wōngōó ta kaw̄ gogə́. 13Banī ngé kəla yān gə̄ aw̄n̄ rɔ̄n tə́ ɔrə̄n̄ najə̄ seneé ədam̄ na:
Bɔbə̄jí, ré nge koō ta ədaī na kə ī-rāā yá̰á̰ kə́ ngan̄g ngá̰ý anī, ā ī-rāā aĺ a? Á ī-ndogə̄ man̄ ngóy kadə̄ rɔ̄í unjə̄ń tá ī-mbātə́ ní.
14Naaman aw̄ əla rɔ̄n kum bā Jurdḛ tə́ nja sīrí tītə̄ ń deē yā Nə́ɓā ədań ní, anī bānjə̄ kə́ rɔ̄n tə́ ur̄ ō, dā̰n tél to tītə̄ dā̰ ngōn̄ kásə̄ beé ō. 15Ni-tél dɔ tə́ reē rɔ̄ deē yā Nə́ɓā tə́ kə de gə̄ malang kə́ gōn tə́, reē ra non tə́ ba əda na:
Ngɔlaā ní m̄-ger̄ kadə̄ Nə́ɓā gətóo loo kə́ rang tə́ ba i dɔ nang kə́ Israel tə́ ngóy. Adə̄ m̄-rāāī ɓɔ́, ī-taā kadə̄ karī kə́ jīḿ mā nge kəla yāí tə́.
16Banī Elije tél ədan na:
Tītə̄ ń Kɔ́ɔ̄ɓē ń mā i nge kəla yān ní ndiń kə kumneé noō, m-ā m̄-taā yá̰á̰ kógə̄ḿ jīí tə́ alé.
Naaman rāān ɓɔ́ kadə̄ ndigə, ba ni ɔdə alé. 17Anī Naaman əda na:
Ī-mbātə́ ɓá ní, ādə̄m̄ ta róbə ādə̄ m-ɔ́y nang kə́ ɓē yāí tə́ sḛ́ý ādə̄ asə kətō kərō rapáy gə̄ jōó. Tɔdɔ̄ m̄-ndigə ndējə̄ nə́ɓā kə́ rang gə̄ yá̰a̰ tun̄ kə́ róō horoó gə̄ ō, yá̰a̰ tun̄ kə́ tām̄ yā kem kógə̄ḿ tə́ gə̄ ō to̰ alé, ba m̄-ndigə i ndējə̄ Kɔ́ɔ̄ɓē kə́ Israel tə́ tá ngóy. 18Banī m̄-dəje Kɔ́ɔ̄ɓē mā̰ȳ rɔ̄ tām̄ yā yá̰á̰ ń toō tə́: ré kɔ́ɔ̄ḿ ń i mban̄g kə́ Aram ní a udə kújə yā nə́ɓā yān ń i ɓesə̄ Rimon ní tə́ yā ndɔ̄yn anī, m-ā m-údə seneé yā kɔsə noḿ nang tə́ seneé, tɔdɔ̄ ni a ndə̄nā rɔ̄n i tū jīḿ tə́. Ní ādə̄ Kɔ́ɔ̄ɓē mā̰ȳ rɔ̄n dɔḿ tə́ tām̄ yā yá̰á̰ ń noō ń m-ā m̄-rāā tə́ ní.
19Elije tél ədan na: āw̄ lápə́ya! Loo ń noō tə́ Naaman ɔtə aw̄.
Yá̰á̰ kə́ gōtə́ aĺ ń Geaji rāā ní
Dan ń Naaman ɔtə rɔ̄ Elije tə́ aw̄ ɓēé teē sa̰y ngá̰ý aĺ ɓáý anī,
20Geaji nge kəla yā Elije əda kə̄ kemən tə́ na:
Kɔ́ɔ̄ḿ əya̰ Naaman ń i Aram deē ń, adə̄ aw̄ kanjə̄ taā yá̰a̰ ndējə̄ gə̄ ń reēń ní jīn tə́. Tītə̄ ń Kɔ́ɔ̄ɓē ndiń kə kumneé noō, m-ā m̄-ngɔ̄də̄ gōn kadə̄ m-āw̄ m-ə́nge yá̰á̰ kógə̄ḿ jīn tə́!
21Geaji ngɔ̄də̄ gō Naaman. Dan ń Naaman a̰a̰ kadə̄ Geaji a ngɔ̄də̄ gōn anī, risə nang tə́ láẃ kɔ̄ɔ́ kem púsə yān tə́, ɔjə non ba dəjen na ké to karī wa.
22Anī Geaji tél ədan na: A̰á̰ā̰ m̄-to karī, ba i kɔ́ɔ̄ḿ n əlam̄ ní, na kə m̄-reē kə m-ə́daī na balsáa gə̄ jōó kə́ dan ɓūtə̄ ngé koō ta gə̄ tə́ na ḭḭn̄ gō nang kə́ mbalá yā Epəraim tə́ reē ugən̄ rɔ̄n tə́ na i ngɔr ɓáý. Ní na n-rāāī ɓɔ́ ba kə ādə̄n gində̄ arjā̰a̰ kə́ kɔȳn i kəlōo kutə mətá o, kūbə̄ kə́ yā mbéləń gír madə̄ gə̄ jōó ō, kadə̄ n-adədə́.
23Naaman əda Geaji na: Beé ɓáa ī-taā gində̄ arjā̰a̰ kə́ kɔȳn i kəlōo kutə mehḛ́ ɗer.
Ni-ɔsə seneé kadə̄ ndigəə, ba ɓōkə́ gində̄ arjā̰a̰ ní ō, kūbə̄ gə̄ ní ō, kem ngong gə̄ tə́ jōó, ba adə̄ ngé kəla yān gə̄ jōó kadə̄ ətōn̄ njə̄rān̄neé kété no Geaji tə́. 24Dan ń ugə̄n̄ Opel#5.24 Opel: Majanī i ngōn̄ ɓē kə́ ndi ngɔr kadə ta róbə́ kə́ yā kudəń kə̄ kem ɓē tə́. anī Geaji taā ngong gə̄ kə́ jī ngé kəla gə̄ ní tə́ aw̄ tə́ndā ɓēé looneé ba əya̰də́ adə̄ aw̄n̄. 25Nəkɔ́ tá aw̄ rɔ̄ kɔ́ɔ̄n Elije tə́. Elije dəjen na:
Geaji, ḭ́ḭ i rá?
Ba ni-tél ədan na: Kɔ́ɔ̄ḿ, m-āw̄ loo alé.
26Elije ədan na: Deē ń risə kem púsə sə́nda yān tə́ ba aw̄ ton a taí ní, ndílə́ḿ á̰a̰n aĺ a? Dan n j-awineé toō i mbang taā nar ā? I mbang taā kūbə̄ ō, kāgə̄ olibə ō, ndɔr̄ kāgə̄ nduú ō, batə̄ ō, man̄g ō, kə ngé kəla kə́ dəngam, aláa kə́ dəyá̰ ō a? 27Á̰a̰ā̰ bānjə̄ yā Naaman a əhɔ gōí ḭ̄ ō, gō ngání gə̄ ō, ngán kaaí gə̄ ō yā rāāsí bátə́ kə no tə́.
Geaji əya̰ Elije ba aw̄. Rɔ̄ Geaji i bānjə̄ malang adə̄ tetə ndaa túĺ túĺ tītə̄ búy kūbə̄#5.27 Búy kūbə̄: Á̰a̰ī Teē 4.6 beé.
Currently Selected:
2 MBAN̄G 5: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
