2 MBAN̄G 3
3
Joram mban̄g kə́ Israel
1Kem ɓāl̄ ko̰o̰ ɓē kə́ nge ko̰ kutə gidə i sɔ́sɔ́ yā Josapat mban̄g kə́ Juda tə́ ní, Joram ngōn̄ Akab ndi mban̄g dɔ Israel gə̄ tə́. Ni-o̰o̰ ɓē ɓāl̄ kutə gidə i jōó. 2Ni-rāā yá̰á̰ kə́ majaĺ ta kum Kɔ́ɔ̄ɓē tə́, ba i tītə̄ yā bɔbə̄n nin̄ kə kó̰o̰neé alé. Tɔdɔ̄ ni-ɔr̄ mbal̄ yā Baal ń bɔbə̄n udə dɔɔ́ ní kɔ̄ɔ́. 3Ba yá̰á̰ kə́ majaĺ ń Jeroboam ngōn̄ Nebat sə̄lā ngán Israel gə̄ adə̄ rāān̄ ní n ni ndájə̄ ní. Əhɔ gō adə̄ ngan̄g ba əya̰ gō kɔ̄ɔ́ alé.
Rɔ̄ɔ̄n̄ ɓē kə́ Moab
4Mesa, mban̄g kə́ Moab i nge kul̄ batə̄ gə̄. Kə dɔ ɓāl̄ gə̄ ní ni a adə̄ mban̄g kə́ Israel ngán batə̄ gə̄ dūbú ɓú ō, bal batə̄ kə́ kə bḭḭ̄də́ gēé dūbú yá̰a̰ tīr̄ tə́#3.4 Bḭḭ̄ batə̄: Á̰a̰ī tū «Kum Najə̄ kə́ Ngón̄g Ngón̄g gə̄» tə́.. 5Ba dan ń Akab oy kɔ̄ɔ́ anī, Mesa mbātə́ kadə̄ Joram ń o̰o̰ ɓē gotən tə́ ní ni-ndi dɔn tə́. 6Anī kə̄ ndɔ̄ nəkɔ́ ń noō tə́ mban̄g Joram teē kem ɓē kə́ Samari tə́ aw̄ a̰a̰ ngé rɔ̄ɔ̄ yān gə̄ kə́ Israel tə́ malang. 7Ba gō tə́ anī əla əda Josapat mban̄g kə́ Juda na:
Mban̄g kə́ Moab gḛy kadə̄ m̄-ndi dɔn tə́ to̰ aĺ ní ī-gḛy reē kəngem̄ kadə̄ j-aw̄ j-ənī ɓē yān rɔ̄ɔ̄ a?
Anī mban̄g kə́ Juda ədan na n-a n-reē. Ré yá̰a̰ rāān a, rāān na i ni ō, ré yá̰a̰ rāā deē yān gə̄ a, rāā na i deē yān ni gə̄ ō, ré yá̰a̰ rāā sə́nda yān gə̄ a, rāā na i sə́nda yān ni gə̄ ō. 8Mban̄g kə́ Juda tél dəjen ɓáý to̰ na:
Ba j-a j-aw̄ i kə róbə́ kə́ rá?
Anī ni-tél ədan na: I kə róbə́ kə́ kem dəla loo kə́ Edom tə́.
9Adə̄ mban̄g kə́ Israel ō, mban̄g kə́ Juda ō, mban̄g kə́ Edom ō, əsōn̄ róbó aw̄n̄. Nin̄ njə̄rān̄ ndɔ̄ sīrí anī əngen̄ man̄ tām̄ yā de gə̄ tə́ to̰ aĺ ō, tām̄ yā dā̰ gə̄ tə́ to̰ aĺ ō. 10Anī mban̄g kə́ Israel tél əda na:
Ajá! I Kɔ́ɔ̄ɓē n ndɔ́r̄jí jḭḭ̄ mban̄g kə́ mətá gə̄ reē sejí loo ń toō tə́ yā kəlají kem jī Moab gə̄ tə́ ní!
11Ba Josapat dəje na ké nge koō ta yā Kɔ́ɔ̄ɓē kə́ yā kadə̄ n-oōn̄ najə̄ kə́ ta Kɔ́ɔ̄ɓē tə́ rɔ̄n tə́ ké gətóo laā wa. Anī ngol áskar gə̄ kógə̄ḿ yā mban̄g kə́ Israel tə́ əda na:
Elije kə́ ngōn̄ Sapat ń kété a ɓōkə́ man̄ dɔ jī Eli tə́ ní i laā.
12Josapat əda na:
Najə̄ yā Kɔ́ɔ̄ɓē i kemən tə́ noō.
Mban̄g kə́ Israel ō, Josapat ō, mban̄g kə́ Edom ō, aw̄n̄ rɔ̄ Elije tə́. 13Elije əda mban̄g kə́ Israel na: I rí n ɓoojí jḭḭ seí naā tə́. Āw̄ rɔ̄ ngé koō ta yā bɔbí gə̄ ō, yā kó̰ó̰í gə̄ ō tə́.
Mban̄g kə́ Israel tél ədan na:
I tītə̄ ń noō alé, tɔdɔ̄ kə́ rɔ̄kum gə̄ tə́ ní Kɔ́ɔ̄ɓē əla gō mban̄g kə́ mətá gə̄ ń toō tə́ i yā kəladə́ kem jī Moab gə̄ tə́.
14Elije əda na:
Tītə̄ ń Kɔ́ɔ̄ɓē nge tɔgə yá̰a̰ malang ń mā i nge kəla yān ní ndiń kə kumneé noō, nə́ngē tə́ Josapat mban̄g kə́ Juda i de kə́ ngáā ta kumḿ tə́ aĺ ní anī, m-ā m̄-nēl̄ mbīḿ kə̄ rɔ̄í tə́ aĺ ō, m-ā m-á̰a̰ loo kə̄ rɔ̄í tə́ aĺ ō. 15Ba kə́ ngɔr ń toō tə́ ní, ī-rēēí kə gōsə̄ kógə̄ḿ ādə̄mī.
Dan ń gōsə̄ a ugə kənde ní a, Kɔ́ɔ̄ɓē əhɔ Elije kə tɔgəneé, 16adə̄ Elije əda na:
Kɔ́ɔ̄ɓē əda na ādə̄ ndērə̄n̄ bəlo gə̄ kem wól loo ń toō tə́ ādə̄ i ngá̰ý. 17Ā á̰a̰ī nél loo kəla tə́ aĺ ō, man̄ loo kedə tə́ aĺ ō, ba man̄ a rosə kem wól loo ń toō kadə̄ ā ā̰yī sḭḭ̄ ō, yá̰a̰ kul̄ yāsí gē ō, dā̰ gə̄ ń ā ə̄tōīneé yá̰a̰ yāsí gə̄ ní ō. 18Ba nge ń noō i yá̰á̰ kə́ ngá̰ý ta kum Kɔ́ɔ̄ɓē tə́ aĺ ɓáý, tɔdɔ̄ a əla Moab gə̄ kem jīsí tə́ ō. 19Ā ī-nujiī ɓē kə́ ngan̄g gə̄ kə́ ənīn̄ ndogə̄ mbal̄ gīr̄ən̄neé gidə gə̄ malang ō, ā ī-nujiī ɓē kə́ bo gə̄ malang ō, ā ī-tə́gāī kāgə̄ kə́ kán̄ gə̄ kɔ̄ɔ́ malang ō, ā ūtī ta kəɓa man̄ gə̄ kɔ̄ɔ́ malang ō, ā ī-tə́nāī mbal̄ gə̄ kem ndɔr̄ gə̄ tə́ yā nujəń ndɔr̄ gə̄ kɔ̄ɔ́ malang ō.
20Teē dəloí ɓáa kə kum mbang ń a ndējə̄n̄neé Kɔ́ɔ̄ɓē yá̰a̰ tə́ ní anī, man̄ ḭḭ dām̄ kə́ Edom tə́ reē əla loo, taā loo kem ɓēé malang.
21Moab gə̄ malang oōn̄ na mban̄g gə̄ a reēn̄ yā rɔ̄ɔ̄də́ adə̄ ɓārə́n̄ de gə̄ malang ń ɓāl̄də́ asə kadə̄ ətōn̄ yá̰a̰ rɔ̄ɔ̄ gə̄ ní ō, de gə̄ malang ń ɓāl̄də́ mān̄ dɔ ɓāl̄ kə́ ngé kə́ yā kudəń áskaraá ní ō, adə̄ aw̄ ran̄ dɔ nin̄ ɓē kə́ Moab tə́. 22Tā anī dəloí dan ń mbang ɔsə dɔ man̄ tə́ ō, Moab gə̄ ḭḭn̄ dɔɔ́ ba a̰a̰n̄ man̄ to nodə́ tə́ kərē tītə̄ mósə beé ō ní anī, 23ədan̄ na:
I mósə! Rɔ̄kum, mban̄g gə̄ rɔ̄ɔ̄n̄ naā kə kaskaraá, nin̄ tə́gān̄ naā kə kaskaraá. Kə́ ngɔr ń toō tə́ ní sḭḭ̄ Moab gə̄ āw̄ ɔ́yiī yá̰a̰ yādə́ gə̄!
24Nin̄ aw̄ ugən̄ ngɔr kadə gérger yā Israel gə̄ tə́. Anī Israel gə̄ teēn̄ sedə́ rétə́ gēé rɔ̄ɔ̄n̄də́ adə̄ a̰ȳn̄ naā nodə́ tə́. Israel gə̄ udən̄ dɔ nang kə́ Moab tə́, rɔ̄ɔ̄n̄ ɓē kə́ Moab rɔ̄ɔ̄ tetənən̄. 25Nin̄ nujən̄ ɓē gə̄ ō, nin̄ kógə̄ḿ kógə̄ḿ tə́nīn̄ mbal̄ yādə́ gə̄ kə̄ kem ndɔr̄ gə̄ tə́, adə̄ loo gə̄ kə́ kem ndɔr̄ gə̄ tə́ i mbal̄ malang ō. Nin̄ utə̄n̄ ta kəɓa man̄ gə̄ malang kɔ̄ɔ́ ō, tə́gān̄ kāgə̄ kə́ kan̄ gə̄ kɔ̄ɔ́ malang ō. Ta tɔ̄l̄ ta ní i ndogə̄ mbal̄ kə́ gidə ɓē kə́ Kir Hareset tə́ ngóy n nay ní. Adə̄ ngé bējə̄ gə̄ gīrə̄n̄ gidə ba rɔ̄ɔ̄n̄ ɓē ní. 26Dan ń mban̄g kə́ Moab a̰a̰ kadə̄ rɔ̄ɔ̄ tetən kɔ̄ɔ́ anī, ɔy ngé kaskar gə̄ ɓú sīrí yā mbə̄lāń loo kum kə̄ rɔ̄ mban̄g kə́ Edom tə́, banī ngé kaskar gə̄ ní asən̄ alé. 27Anī ni un ngōn̄ hágən ń kadə̄ o̰o̰ ɓē gotən tə́ ní tɔ̄lən ba róōn kə́ loo tun̄ tə́ dɔ ndogə̄ mbal̄ tə́. Loo ń noō tə́ nél əsō ngán Israel gə̄ ngə̄rāá adə̄ əyan̄ mban̄g kə́ Moab ba télən̄ dɔ tə́ aw̄n̄ gogə́ dɔ nang yādə́ tə́.
Currently Selected:
2 MBAN̄G 3: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.