2 MBAN̄G 2
2
Nə́ɓā un Eli aw̄ seneé dɔɔ́. Elije un gotən
1Dan ń Kɔ́ɔ̄ɓē un Eli kum nél māĺ tə́ aw̄ seneé dɔ rā̰ tə́ ní, yá̰á̰ ń rāā yá̰á̰ ní n toó.
Eli nin̄ kə Elije ḭḭn̄ i Gilgal. 2Anī Eli əda Elije na:
Ɓɔ́, ī-ndi laā, tɔdɔ̄ Kɔ́ɔ̄ɓē əlam̄ Betel.
Banī Elije tél ədan na:
Tītə̄ ń Kɔ́ɔ̄ɓē ndiń kə kumneé noō ō, ḭ̄ ī-ndiń kə kumií ō noó, m-ā m-ə́ya̰ gōí alé! Tā anī nin̄ aw̄n̄ Betel mbak. 3Ɓūtə̄ ngé koō ta gə̄ ń ndin̄ Betel ní teē reēn̄ rɔ̄ Elije tə́ ba dəjenən̄ na Kɔ́ɔ̄ɓē na a un kɔ́ɔ̄n ɓōólaā yā kaw̄ seneé dɔ rā̰ tə́ ní ké ger̄ wa. Anī Elije tél ədadə́ na nəkɔ́ na n-ger̄ ō, ba kə utə̄n̄ tadə́. 4Eli tél əda Elije ɓáý to̰ na:
Elije, ɓɔ́ ī-ndi laā tɔdɔ̄ Kɔ́ɔ̄ɓē əlam̄ Jeriko. Banī Elije tél ədan na:
Tītə̄ ń Kɔ́ɔ̄ɓē ndiń kə kumneé noō ō, ḭ ī-ndiń kə kumií ō noó, m-ā m-ə́ya̰ gōí alé!
Tā anī nin̄ aw̄n̄ Jeriko i mbak. 5Ɓūtə̄ ngé koō ta gə̄ ń ndin̄ Jeriko ní reēn̄ rɔ̄ Elije tə́, ba dəjenən̄ na Kɔ́ɔ̄ɓē na a un kɔ́ɔ̄n ɓōólaā yā kaw̄ seneé dɔ rā̰ tə́ ní ké ger̄ wa. Anī Elije tél ədadə́ na nəkɔ́ na n-ger̄ ō, ba kə utə̄n̄ tadə́. 6Eli ədan na:
Ɓɔ́, ī-ndi laā tɔdɔ̄ Kɔ́ɔ̄ɓē əlam̄ bā Jurdḛ tə́.
Banī Elije tél ədan na:
Tītə̄ ń Kɔ́ɔ̄ɓē ndiń kə kumneé noō ō, ḭ̄ ī-ndiń kə kumií ō noó, m-ā m-ə́ya̰ gōí alé! Tā anī aw̄n̄ Jurdḛ tə́ mbak. 7Ɓūtə̄ ngé koō ta gə̄ kutə mí aw̄ dəba ran̄ sa̰y kumdə́ sɔɔ̄ ba Jurdḛ, ba Eli nin̄ kə Elije tá dəban̄ ta bā tə́. 8Eli ɔr̄ kūbə̄ kə́ rɔ̄n tə́ kə́ dɔ madə̄ tə́ ɓir̄ ba əndań man̄ bā adə̄ kēgə̄ naā tə́ jōó. Nin̄ mānə̄n̄ jōó mbak kanjə̄ kadə̄ man̄ ɔdə njadə́. 9Dan ń teēn̄ kə̄ gidə kə́rēý tə́ anī Eli əda Elije na:
Ī-dəjem̄ yá̰á̰ ń kemií gḛy kadə̄ m̄-rāā m-ādī ní pá tá ādə̄ Kɔ́ɔ̄ɓē unəm̄ taí tə́ kɔ̄ɔ́ ɓáý.
Anī Elije tél əda Eli na:
m̄-rāāī ɓɔ́, ādə̄ ndílí ń a kegə̄n̄jí naā tə́ ní, m-ə́ngé núsən nja jōó#2.9: K. 9: I ngōn̄ hágə n i nge kənge yá̰a̰ ndə̄bā nja jōó ní (Ndū 21.17), adə̄ Elije sāā kadə̄ i ni n i nge kənge yá̰a̰ ndəbā kə́ kem ndíl tə́ gotə Eli tə́ ní. Ndíl Eli i ndíl koō ta: Ij 42.1; 61.1; Eje 2.2; 3.12; Oje 9.7. 10Eli əda na:
Ī-dəje i yá̰á̰ kə́ ngan̄g. Ba ré á̰a̰m̄ dan ń Kɔ́ɔ̄ɓē a unəm̄neé kɔ̄ɔ́ taí tə́ ta kaw̄ dɔɔ́ ní anī, ā ə́ngé yá̰á̰ ń ī-dəje ní. Ré á̰a̰m̄ aĺ ɓáa ā ə́nge aĺ ō.
11Nin̄ wálə̄n̄ najə̄ dɔɔ́ dɔɔ́ a aw̄n̄neé anī, púsə hor kógə̄ḿ kə sə́nda hor gēé kēgə̄ndə́ naā tə́. Eli aw̄ dɔ rā̰ tə́ dan nél māĺ tə́. 12Dan ń Elije a̰a̰ yá̰á̰ ní anī əda kə tɔ́gɔ́ na:
Bɔbə́ḿ! Bɔbə́ḿ! Púsə rɔ̄ɔ̄ gə̄ kə ngé kal̄ sə́ndá kə́ Israel tə́ gə̄#2.12: Bɔbə́ḿ, bɔbə́ḿ: Tām̄ yā Israel tə́ gə̄ ní, i nōō wur kɔl ō, kumən na tɔ́gə yā ngán Israel gə̄ malang kə́ dum̄ ta yá̰a̰ malang i kem nge koō ta yā Nə́ɓā tə́ ō.!
Gō tə́ anī ni a̰a̰n to̰ alé. Loo ń noō tə́ ni-əhɔ kūbə̄ yān rə̄yā̰ naā tə́ jōó. 13Ni un kūbə̄ yā Eli ń teē dɔ bɔ̄gə̄ Eli tə́ əsō ní ba tél dɔ tə́ reē dəba ta bā Jurdḛ tə́. 14Ni-un kūbə̄ ní əndań man̄ bā ba əda na:
Kɔ́ɔ̄ɓē Nə́ɓā yā Eli i rá?
Adə̄ ni-ənda man̄ bā tītə̄ yā Eli ō. Man̄ kēgə̄ naā tə́ jōó anī ni mān̄ danaá.
15Ɓūtə̄ ngé koō ta gə̄ kə́ Jeriko ń ran̄ sa̰y a a̰a̰n̄neé Elije ní ədan̄ na: Ndíl Eli reē dɔ Elije tə́.
Nin̄ ɔjən̄ no Elije ō, ɔsə̄n̄ nodə́ nang tə́ non tə́ ō, 16ba ədanən̄ na n-aw̄n̄ kə de kə́ kəhɔ rɔ̄də́ tɔgə gə̄ kutə mí adə̄ na n-a n-əlan̄də́ sāā kɔ́ɔ̄n tə́. Tɔdɔ̄ Ndíĺ Kɔ́ɔ̄ɓē ń na un kɔ́ɔ̄n aw̄ seneé ní majanī na aw̄ ənīn dɔ mbal̄ kógə̄ḿ tə́, aláa wól loo kə́rēý tə́. Elije tél ədadə́ na:
Ī-lōōī kəla deē!
17Banī ɔsən̄ seneé gar gar ngá̰ý, adə̄ ta tɔ̄l̄ ta anī ni ədadə́ na beé ɓá anī kə əlan̄də́ tā. Nin̄ əlan̄ de kə́ kutə mí gə̄ ní sāā Eli tə́, banī sāān̄ Eli ndɔ̄ mətá kanjə̄ kəngen. 18Dan ń télən̄ dɔ tə́ reēn̄ rɔ̄ Elije ń ndi i kem ɓē kə́ Jeriko tə́ ɓáý ní anī, Elije ədadə́ na: M-ə́dásí na kə āwī alé aĺ a?
Elije rāā man̄ kə́ majaĺ adə̄ to kaȳ
19De kə́ Jeriko gə̄ ədan̄ Elije na:
Tītə̄ ń īkɔ́ kɔ́ɔ̄jí á̰a̰ń ní, loo ń ɓē yājí ndi tū tə́ toó majə ɓá tā ba man̄ kə́ tū tə́ majaĺ ō, dɔ nang teē yá̰a̰ aĺ ō.
20Anī Elije ədadə́ na kə reēn̄ kə katāá kem kār̄ kə́ kijə tə́ kə adə̄nən̄. Nin̄ reēn̄neé adə̄nən̄. 21Ni teē aw̄ loo ń man̄ a əɓa nang tə́ tū tə́ ní, ɓōkə́ katə̄ kum man̄ tə́ ba əda na:
Kɔ́ɔ̄ɓē əda na n-a n-rāā man̄ kə́ majaĺ ń toō kadə̄ tél to ka̰ȳ. A tɔ̄l̄ deē to̰ aĺ ō, a rāā kadə̄ dɔ nang teē yá̰a̰ aĺ to̰ aĺ ō.
22Adə̄ bátə́ ɓōólaā gə̄gē man̄ ní to ka̰ȳ tītə̄ ń Elije ədań ní.
Elije ndɔ̄ĺ ngán gə̄ kə́ mbóon̄ seneé
23Elije ḭḭ noó aw̄ Betel. Dan ń ni un róbə́ kə́ əta tan kə̄ dɔɔ́ ta kaw̄ kə̄ Betel anī, ngán kə́ dəngam gə̄ teēn̄ kem ɓēé mbóon̄ seneé ədan na:
Nge bay ndə́lē, āw̄ kə̄ noí tə́! Nge bay ndə́lē āw̄ kə̄ noí tə́!
24Anī ni mbel a̰a̰də́ ba ndɔ̄ĺdə́ kə rī Kɔ́ɔ̄ɓēé. Loo ń noō tə́ dā̰ úrsə#2.24 Dā̰ úrsə: Á̰a̰ī 1 Sam 17.34 gə̄ jōó teēn̄ kem ku kāgə̄ gə̄ tə́ əhɔn̄ ngán gə̄ ní kutə sɔ́ gidə i jōó, rə́yā̰n̄də́ naā tə́. 25Gō tə́ anī Elije ra noó gān̄g mbal̄ Karmel tə́ ba tél dɔ tə́ reē Samari gogə́.
Currently Selected:
2 MBAN̄G 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.