2 MBAN̄G 15

Ajaria, mban̄g kə́ Juda

(Á̰a̰ī 2 Yá̰a̰ 26.3-4,21-23)

1Kem ɓāl̄ ko̰o̰ ɓē kə́ nge ko̰ kutə jōó gidə i sīrí yā Jeroboam mban̄g kə́ Israel tə́ ní, Ajaria ngōn̄ Amasia, mban̄g kə́ Juda, ndi mban̄g. 2Ɓālə̄n i kutə gidə i mehḛ́ n əlań gíŕ ndi mban̄g ní. Ni-o̰o̰ ɓē ɓāl̄ kutə mí gidə i jōó kem ɓē kə́ Jerusalem tə́. Rī kó̰o̰n na i Yekolia, i dəyá̰ kə́ Jerusalem. 3Ajaria rāā yá̰á̰ kə́ gōtə́ ta kum Kɔ́ɔ̄ɓē tə́ tītə̄ yā bɔbə̄n Amasia. 4Ɓá tā ba ni-rāā adə̄ loo ndɔ̄ȳ gə̄ gətóon̄ kɔ̄ɔ́ kem ɓēé alé. Adə̄ de gə̄ na̰yn̄ kə̄ loo tun̄ yá̰a̰ gə̄ tə́ ō, kə̄ loo róō ndujə̄ yá̰á̰ kə́ kotə majə gə̄ tə́ ō, dɔ loo ndɔ̄ȳ gə̄ tə́. 5Kɔ́ɔ̄ɓē ənda mban̄g Ajaria kə mo̰y bānjāá, adə̄ bānjə̄ rāān bátə́ oyń. Ni-ndi i kə kerneé kem kújə́ kógə̄ḿ tə́. Ngōnən Yotam ń i de kə́ dɔ yá̰a̰ kənge yā mban̄g tə́ ní, o̰o̰ ɓē dɔ Juda gə̄ tə́.

6Gotə yá̰a̰ malang ń Ajaria rāā ní ndangən̄ kem makətūbə̄ kəla rāā mban̄g gə̄ kə́ Juda tə́. 7Ajaria oy aw̄ gō kaan gə̄ tə́. Dubə̄nən̄ i kem bāá ɓádə yā kaan gə̄ tə́, kem ɓē yā Dabid tə́. I ngōnən Yotam n o̰o̰ ɓē gotən tə́ ní.

Jakari mban̄g kə́ Israel

8Kem ɓāl̄ ko̰o̰ ɓē kə́ nge ko̰ kutə gidə i sɔ́sɔ́ yā Ajaria mban̄g kə́ Juda tə́ ní, Jakari ngōn̄ Jeroboam ndi mban̄g dɔ Israel gə̄ tə́ kem ɓē kə́ Samari tə́. Ni-o̰o̰ ɓē nāā mehḛ́. 9Rāā yá̰á̰ kə́ majaĺ ta kum Kɔ́ɔ̄ɓē tə́ tītə̄ ń kaan gə̄ rāān̄neé ní. Əya̰ gō yá̰á̰ kə́ majaĺ gə̄ ń Jeroboam ngōn̄ Nebat rāā ō, sə̄lā Israel gə̄ adə̄ rāān̄ ō ní alé. 10Salum ngōn̄ Yabes oōn̄ naā kə madə̄n gēé dɔn tə́, adə̄ tɔ̄lən ta kum de gə̄ tə́ malang ba o̰o̰ ɓē gotən tə́.

11Gotə yá̰á̰ kə́ rang gə̄ ń Jakari rāā ní, ndangən̄ kem makətūbə̄ kəla rāā mban̄g gə̄ kə́ Israel tə́. 12Yá̰á̰ ń noō rāā adə̄ najə̄ ń Kɔ́ɔ̄ɓē əda Yehu kété ní reē udə gírí rɔ̄kum. Nī-ədan na ngōnən ō, ngōn̄ kaan ō, kaa gugūn ō, kaa dɔgən ō, na a ndin̄ dɔ kōr̄ kāgə̄ mban̄g kə́ Israel tə́.

Salum mban̄g kə́ Israel

13Salum ngōn̄ Yabes ndi mban̄g dɔ Israel gə̄ tə́ i kem ɓāl̄ ko̰o̰ ɓē kə́ nge ko̰ kutə mətá gidə i ndōhó yā Ojias mban̄g kə́ Juda tə́. Ni-o̰o̰ ɓē nāā kógə̄ḿ kem ɓē kə́ Samari tə́. 14Menahem kə́ ngōn̄ Gadi ḭḭ Tirsa reē tɔ̄l̄ Salum kə́ ngōn̄ Yabes kem ɓē kə́ Samari tə́ ba o̰o̰ ɓē gotən tə́.

15Gotə yá̰á̰ kə́ rang gə̄ ń Salum rāā ní, ndangən̄ kem makətūbə̄ kəla rāā mban̄g gə̄ kə́ Israel tə́. Ɔ̄jən̄ gotə koō naā yān kemeé ō. 16Dan ń noō tə́ ní Menahem rɔ̄ɔ̄ ɓē kə́ Tipəsa ba tɔ̄l̄ de kə́ kemeé gə̄ malang. Ni nujə loo gō nang ń ḭḭ Tirsa bátə́ ugə̄ń Tapua ní tə́. Ni rɔ̄ɔ̄ ɓē ní i tām̄ mbātə́ ń mbātə́n̄ teē ta róbə́ kə́ yā kudəń kə̄ kem ɓēé kadə̄n ní. Ni njár̄ kem dəyá̰ kə́ ndān̄ ngán gə̄ malang.

Menahem, mban̄g kə́ Israel

17Kem ɓāl̄ ko̰o̰ ɓē kə́ nge ko̰ kutə mətá gidə i ndōhó yā Ajaria mban̄g kə́ Juda tə́ ní, Menahem kə́ ngōn̄ Gadi ndi mban̄g dɔ Israel gə̄ tə́ kem ɓē kə́ Samari tə́. Ni-o̰o̰ ɓē ɓāl̄ kutə kógə̄ḿ. 18Ni-rāā yá̰á̰ kə́ majaĺ ta kum Kɔ́ɔ̄ɓē tə́ kə dɔ ndɔ̄ gə̄ malang ń ni ndiń kə kumneé ní. Əya̰ gō yá̰á̰ kə́ majaĺ gə̄ ń Jeroboam ngōn̄ Nebat rāā ō, sə̄lā Israel gə̄ adə̄ rāān̄ ō ní alé. 19Pul, mban̄g kə́ Asiri, reē dɔ nang kə́ Israel tə́. Anī Menahem adə̄n sə́lē arjā̰a̰ kə́ kɔȳn i kəlōo dūbú kutə mətá kadə̄ rāań seneé kadə̄ n-ndiń ngan̄g dɔ ɓē tə́. 20Menahem gān̄g i lambóo dɔ Israel gə̄ tə́ n əngen̄ nar ngeé ń noō ní. Ba gān̄g i dɔ de kə́ ngé kənge yá̰a̰ gə̄ tə́. Deē kógə̄ḿ adə̄ i njáŕ sə́lē arjā̰a̰ kutə mí kutə mí. Dan ń adə̄n̄ Pul mban̄g kə́ Asiri nar ní oy anī, ni əya̰ ɓē kə́ Israel ba tél dɔ tə́ aw̄ gogə́ ɓēé looneé.

21Gotə yá̰á̰ kə́ rang gə̄ malang ń Menahem rāā ní ndangən̄ kem makətūbə̄ kəla rāā mban̄g gə̄ kə́ Israel tə́. 22Dan ń Menahem oy ní i ngōnən Pekaya n o̰o̰ ɓē gotən tə́ ní.

Pekaya, mban̄g kə́ Israel

23Kem ɓāl̄ ko̰o̰ ɓē kə́ nge ko̰ kutə mí yā Ajaria mban̄g kə́ Juda tə́ ní, Pekaya kə́ ngōn̄ Menahem ndi mban̄g dɔ Israel gə̄ tə́ kem ɓē kə́ Samari tə́. Ni-o̰o̰ ɓē ɓāl̄ jōó. 24Ni-rāā yá̰á̰ kə́ majaĺ ta kum Kɔ́ɔ̄ɓē tə́. Əya̰ gō yá̰á̰ kə́ majaĺ gə̄ ń Jeroboam ngōn̄ Nebat rāā ō, sə̄lā Israel gə̄ kadə̄ rāān̄ ō ní alé. 25Peka ngōn̄ Remalia ń i nge kətō der yān ní, oōn̄ naā kə madə̄n gēé dɔn tə́ ba tɔ̄lən ō, tɔ̄l̄ Argob ō, Ariye ō, kem kújə kə́ dɔɔ́ yā mban̄g tə́, kem ɓē kə́ Samari tə́. De kə́ Galaad gə̄ i kutə mí kə Peka n rāań yá̰á̰ ń noō ní. Peka tɔ̄l̄ Pekaya ba o̰o̰ ɓē gotən tə́.

26Gotə yá̰á̰ kə́ rang gə̄ malang ń Pekaya rāā ní, ndangən̄ kem makətūbə̄ kəla rāā mban̄g gə̄ kə́ Israel tə́.

Peka, mban̄g kə́ Israel

27Kem ɓāl̄ ko̰o̰ ɓē kə́ nge ko̰ kutə mí gidə i jōó yā Ajaria mban̄g kə́ Juda ní, Peka kə́ ngōn̄ Remalia ndi mban̄g dɔ Israel gə̄ tə́ kem ɓē kə́ Samari tə́. Ni-o̰o̰ ɓē ɓāl̄ kutə jōó. 28Ni-rāā yá̰á̰ kə́ majaĺ ta kum Kɔ́ɔ̄ɓē tə́. Əya̰ gō yá̰á̰ kə́ majaĺ gə̄ ń Jeroboam ngōn̄ Nebat rāā ō, sə̄lā Israel gə̄ adə̄ rāān̄ ō ní alé. 29Dan yā Peka mban̄g kə́ Israel tə́ ní, Tigəlatə Pileser mban̄g kə́ Asiri reē taā ɓē kə́ Iyon ō, Abel Betə Maaka ō, Yanoa ō, Kedes ō, Hasor ō, gō nang kə́ Galaad ō, gō nang kə́ Galile ō, gō nang kə́ Nepətali malang ō. Ni-ɔy de kə́ kemeé gə̄ aw̄ sedə́ dɔ nang kə́ Asiri tə́. 30Ose ngōn̄ Ela oōn̄ naā kə madə̄n gēé dɔ Peka kə́ ngōn̄ Remalia tə́. Ose tɔ̄lən ba o̰o̰ ɓē gotən tə́ kem ɓāl̄ ko̰o̰ ɓē kə́ nge ko̰ kutə jōó yā Yotam ngōn̄ Ojias tə́.

31Gotə yá̰á̰ kə́ rang gə̄ malang ń Peka rāā ní, ndangən̄ kem makətūbə̄ kəla rāā mban̄g gə̄ kə́ Israel tə́.

Yotam, mban̄g kə́ Juda

(Á̰a̰ī 2 Yá̰a̰ 27.1-3,7-9)

32Kem ɓāl̄ ko̰o̰ ɓē kə́ nge ko̰o̰ jōó yā Peka ngōn̄ Remalia, mban̄g kə́ Israel tə́ ní, Yotam ngōn̄ Ojias mban̄g kə́ Juda ndi mban̄g. 33Dan ń əla gír ndi mban̄g ní ɓālə̄n i kutə jōó gidə i mí. Ni-o̰o̰ ɓē ɓāl̄ kutə gidə i mehḛ́ kem ɓē kə́ Jerusalem tə́. Rī kó̰o̰n na i Yerusa, i ngōn̄ Sadok. 34Ni-rāā yá̰á̰ kə́ gōtə́ ta kum Kɔ́ɔ̄ɓē tə́ tītə̄ ń bɔbə̄n Ojias rāań ní. 35Ɓá tā ba ni-rāā adə̄ loo ndɔ̄ȳ gə̄ gətóon kɔ̄ɔ́ kem ɓēé alé, adə̄ de gə̄ na̰yn̄ i kə̄ loo tun̄ yá̰a̰ gə̄ tə́ ō, róō ndujə̄ yá̰á̰ kə́ kotə majə gə̄ tə́ ō, dɔ loo ndɔ̄ȳ gə̄ tə́. I Yotam n rāā ta róbə́ kə́ dɔɔ́ kə́ tū kújə yā Kɔ́ɔ̄ɓē tə́ ní.

36Gotə yá̰á̰ kə́ rang gə̄ malang ń Yotam rāā ní, ndangən̄ kem makətūbə̄ kəla rāā mban̄g gə̄ kə́ Juda tə́. 37Dan ngeé ń noō tə́ ní, Kɔ́ɔ̄ɓē əla gír rāā kadə̄ Resin mban̄g kə́ Aram ō, Peka ngōn̄ Remalia ō, reē rɔ̄ɔ̄n̄ ɓē kə́ Juda. 38Yotam oy aw̄ gō kaan gə̄ tə́. Dubə̄nən̄ i kem ɓē yā Dabid tə́ kem bāá ɓádə yā kaan gə̄ tə́. Ngōnən Akaj o̰o̰ ɓē gotən tə́.

Currently Selected:

2 MBAN̄G 15: SARDC

Highlight

Copy

Compare