2 MBAN̄G 14

Amasia mban̄g kə́ Juda

(Á̰a̰ī 2 Yá̰a̰ 25.1-4,11-12,17-28; 26.1-2)

1Kem ɓāl̄ ko̰o̰ ɓē kə́ nge ko̰ jōó yā Joas kə́ ngōn̄ Joakajə mban̄g kə́ Israel tə́ ní, Amasia ngōn̄ Joas mban̄g kə́ Juda ndi mban̄g. 2Ɓālə̄n i kutə jōó gidə i mí dan ń ndi mban̄g ní ō, o̰o̰ ɓē ɓāl̄ i kutə jōó gidə i ndōhó kem ɓē kə́ Jerusalem tə́ ō. Rī kó̰o̰n na i Yoadan, i dəyá̰ kə́ Jerusalem. 3Amasia rāā yá̰á̰ kə́ gōtə́ ta kum Kɔ́ɔ̄ɓē tə́, banī i tītə̄ yā Dabid alé. Ni-rāā yá̰a̰ i tītə̄ yā bɔbə̄n Joas jéjé. 4Ɓá tā ba ni-rāā adə̄ loo ndɔ̄ȳ gə̄ gətóon̄ kɔ̄ɔ́ kem ɓēé alé. Adə̄ de gə̄ na̰yn̄ kə̄ loo tun̄ yá̰a̰ gə̄ tə́ ō, kə̄ loo róō ndujə̄ yá̰á̰ kə́ kotə majə gə̄ tə́ ō, dɔ loo ndɔ̄ȳ gə̄ tə́. 5Dan ń Amasia mbūsə̄ gír ngəra ko̰o̰ ɓē yān adə̄ ngan̄g ní a, tɔl̄ ngé kəla yān gə̄ ń tɔ̄lə̄n̄ bɔbə̄n mban̄g Joas ní. 6Banī ni tɔ̄l̄ ngáń ngé tɔ̄l̄ bɔbə̄n gə̄ alé, kə gō ń ndangən̄neé kem makətūbə̄ ndū najə̄ yā Moijə tə́ ní. Tɔdɔ̄ Kɔ́ɔ̄ɓē əda kem makətūbə̄ ndū najə̄ yā Moijə tə́ na a tɔ̄lə̄n̄ bɔbə̄ ngán gə̄ tām̄ yā yá̰á̰ kə́ majaĺ gə̄ ń ngán gə̄ rāān̄ tə́ ní aĺ ō, a tɔ̄lə̄n̄ ngán gə̄ tām̄ yā yá̰á̰ kə́ majaĺ gə̄ ń bɔbə̄də́ gə̄ rāān̄ ní tə́ aĺ ō. A tɔ̄lə̄n̄ deē i tām̄ yā yá̰á̰ kə́ majaĺ gə̄ ń kɔ́ɔ̄ rāā tə́ ní. 7I Amasia n tetə Edom gə̄ kə́ dūbú kutə kógə̄ḿ gə̄ rɔ̄ɔ̄ wól loo kə́ katə̄ i tū tə́ tə́ ní ō, taā ɓē kə́ Sela kə rɔ̄ɔ́ ba əndā rīn na i Yokəteel ní ō. Ɓōólaā gə̄gē a ɓārə́n̄ rī ní noō ɓáý. 8Tā anī Amasia əla de gə̄ rɔ̄ mban̄g kə́ Israel tə́ ń i Joas kə́ ngōn̄ Joakajə kə́ ngōn̄ Yehu ní tə́ kadə̄ ədanən̄ na kə reē kadə̄ kə n-rɔ̄ɔ̄n̄ naā. 9Anī Joas əda Amasia na:

Ndɔ̄ kógə̄ḿ tə́ kōn̄ ngār kə́ Liban əla əda kāgə̄ sédər kə́ Liban na: Ādə̄ ngōnə̄ḿ kə́ dəngam ngōnīí kə́ dəyá̰ ādə̄ taā. Banī dā̰ kə́ bembeé kə́ Liban mān̄ anī tə́ɓā kōn̄ ngar̄ njan tə́. 10Ba Joas əda gō tə́ na: I tām̄ tetə̄ ń ī-tetə Edom gə̄ rɔ̄ɔ̄ ní n ā ɔ́jə rɔ̄í noō. Ní, ɔ́r ta rɔ̄í ba ī-ndi ɓēé looí! Ī-sāā kəla gír rɔ̄ɔ̄ kə́ ta tɔ̄l̄ ta a majaĺ tām̄ yāí tə́ i najə̄ rí tə́? Tɔdɔ̄ a tetiīn̄ rɔ̄ɔ̄ naā tə́ kə ngé rɔ̄ɔ̄ kə́ Juda tə́ gə̄ malang loo rɔ̄ɔ̄ ní tə́.

11Banī Amasia oō najə̄ yān alé. Loo ń noō tə́ Joas mban̄g kə́ Israel aw̄ əngen̄ naā kə Amasia mban̄g kə́ Juda kem ɓē kə́ Bet Semes kə́ Juda tə́ ba udən̄ naā tə́ rɔ̄ɔ̄n̄ naā. 12Israel gə̄ tetən̄ Juda gə̄ rɔ̄ɔ̄ adə̄ a̰ȳn̄ naā kógə̄ḿ kógə̄ḿ ta kaw̄ ɓēé. 13Joas mban̄g kə́ Israel əhɔ Amasia mban̄g kə́ Juda ń i ngōn̄ Joas kə́ ngōn̄ Akajias ní dəngáy kem ɓē kə́ Bet Semes tə́. Ni-ḭḭ noó aw̄ Jerusalem, aw̄ tetə ndogə̄ mbal̄ kə́ Jerusalem nang tə́ adə̄ asə kíĺ deē ɓú sɔ́. Əla gír tetə̄ nang tə́ i ta róbə́ kə́ Epəraim tə́ bátə́ ugə̄ń ta róbə́ kə́ kíl ndogə̄ mbal̄ tə́. 14Ni-ɔy lɔ́r ō, gində̄ arjā̰a̰ ō, yá̰a̰ kənge gə̄ kə́ gātə̄də́ i ngá̰ý gə̄ ń ton̄ kem kújə yā Kɔ́ɔ̄ɓē tə́ ō, ton̄ lo ngɔ̄m̄ nar yā mban̄g tə́ ō ní malang ō, əhɔ de kə́rēý gə̄ tām̄ kadə̄ Amasia rāań yá̰á̰ ń n-ndigə ní ō, ba tél dɔ tə́ aw̄ gogə́ Samari.

15Gotə yá̰á̰ kə́ rang gə̄ ń Joas rāā ní, ndangən̄ kem makətūbə̄ kəla rāā mban̄g gə̄ kə́ Israel tə́. Ənīn̄ gotə yá̰a̰ gə̄ ń ni-rāā ní ō, yá̰á̰ kə́ to kɔsə gɔn gə̄ ń ni-rāā ní ō, rɔ̄ɔ̄ ń ni rɔ̄ɔ̄ Amasia mban̄g kə́ Juda ní ō kemeé. 16Joas oy aw̄ gō kaan gə̄ tə́. Dubə̄nən̄ i Samari kem bāá ɓádə yā mban̄g gə̄ kə́ Israel tə́. I ngōnən Jeroboam n o̰o̰ ɓē gotən tə́ ní.

17Gō tə́ ń Joas ngōn̄ Joakajə, mban̄g kə́ Israel, oy ní, Amasia ngōn̄ Joas mban̄g kə́ Juda, ndi kə kumneé ɓāl̄ kutə gidə i mí ɓáý. 18Gotə yá̰á̰ kə́ rang gə̄ ń Amasia rāā ní, ndangən̄ kem makətūbə̄ kəla rāā mban̄g gə̄ kə́ Juda tə́. 19Oōn̄ naā dɔn tə́ kem ɓē kə́ Jerusalem tə́ adə̄ a̰ȳ aw̄ Lakis. Banī əlan̄ de gə̄ gōn tə́ adə̄ aw̄ tɔ̄l̄nən̄ noó. 20Ətōn̄ nīnə́n kə sə́nda gēé aw̄n̄neé Jerusalem. Dubə̄nən̄ i loo ń dubə̄n̄ kaan gə̄ tū tə́ ní tə́, kem ɓē yā Dabid tə́. 21Juda gə̄ malang unən̄ Ajaria ń ɓālə̄n i kutə gidə i mehḛ́ ní əndānən̄ mban̄g gotə bɔbə̄n Amasia tə́. 22I ni n tél taā ɓē kə́ Elat, tél rāā gogə́, gotə bɔbə̄n tə́ adə̄ Juda ní.

Jeroboam kə́ nge ko̰ jōó ndi mban̄g Israel tə́

23Kem ɓāl̄ ko̰o̰ ɓē kə́ nge ko̰ kutə gidə i mí yā Amasia ngōn̄ Joas, mban̄g kə́ Juda tə́ ní, Jeroboam ngōn̄ mban̄g Joas kə́ Israel ndi mban̄g kem ɓē kə́ Samari tə́. Ni-o̰o̰ ɓē ɓāl̄ kutə sɔ́ gidə i kógə̄ḿ. 24Ni-rāā yá̰á̰ kə́ majaĺ ta kum Kɔ́ɔ̄ɓē tə́. Yá̰á̰ kə́ majaĺ gə̄ ń Jeroboam ngōn̄ Nebat rāā ō, sə̄lā ngán Israel gə̄ adə̄ rāān̄ ō ní, ni əya̰ kógə̄ḿ kɔ̄ɔ́ alé. 25I ni n rāā adə̄ dɔ nin̄ ɓē kə́ Israel tél to tītə̄ kə́ kété ní, adə̄ əla gír i Lebo Hamat bátə́ ugə̄ń bā katə̄ kə́ Araba tə́, tītə̄ ń Kɔ́ɔ̄ɓē Nə́ɓā yā Israel əndāń ta nge koō ta yān Jonas ngōn̄ Amitay kə́ Gat Heper tə́ adə̄ ədań ní. 26Tɔdɔ̄ Kɔ́ɔ̄ɓē a̰a̰ rɔ̄sɔl̄ kə́ ngá̰ý ń rāā ngán Israel gə̄ ní. Ɓəlo, aláa de kə́ kɔ́ɔ̄ rɔ̄n, kal deē kógə̄ḿ kə́ yā dḭḭ̄ Israel gətóo. 27Kadə̄ rī Israel kə gətóo dɔ nang tə́ ní, Kɔ́ɔ̄ɓē əda rī gāng gír yā Israel gə̄ kɔ̄ɔ́ dɔ nang tə́ kə taneé alé, ni ajədə́ kə ta kūl̄ Jeroboam kə́ ngōn̄ Joas.

28Gotə yá̰á̰ kə́ rang gə̄ ń Jeroboam rāā ní, ndangə̄n̄ kem makətūbə̄ kəla rāā mban̄g gə̄ kə́ Israel tə́. Ənīn̄ gotə yá̰a̰ malang ń ni-rāā ní ō, yá̰á̰ kə́ to kɔsə gɔn gə̄ ń ni-rāā ní ō, rɔ̄ɔ̄ yān gə̄ ō, loo téĺ ń ni-tél kə ɓē kə́ Damas ō, kə ɓē kə́ Hamat ō, adə̄ Israel gogə́ ní ō. 29Dan ń Jeroboam oy ní dubə̄nən̄ i Samari, kem bəlo ɓádə yā mban̄g gə̄ kə́ Israel tə́. I ngōnən Jakari n o̰o̰ ɓē gotən tə́ ní.

Currently Selected:

2 MBAN̄G 14: SARDC

Highlight

Copy

Compare