2 YÁ̰A̰ GƏ̄ 20
20
Ənīn̄ ɓē ko̰o̰ kə́ Juda rɔ̄ɔ̄. Josapat ndɔ̄ȳ Nə́ɓā
1Gō tə́ anī Moab gə̄ ō, Amon gə̄ ō, naā tə́ kə Mewni gə̄, reē ənīn̄ Josapat rɔ̄ɔ̄. 2Reē ədan̄ Josapat na: Kósə de kə́ ngá̰ý gə̄ reēn̄ yā rɔ̄ɔ̄ī. Ḭḭn̄ i gidə bā bo tə́, adə̄ ḭḭn̄ i Edom. Ngɔlaā nin̄ i Hasason Tamar adə̄ i En Gedi tə́. 3Ɓōĺ rāā Josapat adə̄ ni gḛy sāā Kɔ́ɔ̄ɓē. Ni-ənī mbēr̄ kadə̄ de gə̄ ndin̄ ɓō tām̄ yā Nə́ɓā tə́ gō nang kə́ Juda tə́ malang. 4Juda gə̄ ḭḭn̄ kə̄ ɓē gə̄ tə́ malang reē kánə̄n̄ naā yā rāā Kɔ́ɔ̄ɓē ɓɔ́ kadə̄ Kɔ́ɔ̄ɓē rāā sedə́. 5Josapat ra kə njan kə́ dɔɔ́ dan ngé kán̄ naā gə̄ kə́ Juda tə́ ō, kə́ Jerusalem tə́ ō, kem kújə yā Kɔ́ɔ̄ɓē tə́, kumən sɔɔ̄ loo ń a ɓārə́n̄ na i ndágə loo kə́ kijə ní, 6ba əda na: Kɔ́ɔ̄ɓē, Nə́ɓā yā kaají gə̄, i ḭ̄ n i Nə́ɓā dɔ rā̰ tə́ ō, ī-ndi dɔ ɓē ko̰o̰ gə̄ malang yā nápar de gə̄ tə́ ō ní aĺ a? Tɔ́gí to ō, ī-ngan̄g ō, adə̄ de kə́ asə rɔ̄ɔ̄ seí gətóo. 7Nə́ɓā yājí, i ḭ̄ n ī-tə̄ɓā de kə́ dɔ nang ń toō tə́ gə̄ kɔ̄ɔ́ no Israel ń i gír deē yāí gə̄ ní tə́, ba ādə̄ ngán kaa madí Abəraham dɔ nang ń toō kə́ yādə́ tə́ ní aĺ a? 8Nin̄ ndin̄ tū tə́ ō, rāān̄ loo kə́ táĺ kə́ kɔr̄ kam̄ tām̄ yāí tə́ tū tə́ ō, ba ədan̄ na: 9Ré yá̰á̰ kə́ to kum kaȳ aĺ əsō dɔdə́ tə́ adə̄ i kaskar, aláa i kōō gə̄ n ndumən̄ kə njadə́ dɔɔ́, aláa i mo̰y ngāl̄bɔ̄gīí, aláa i ɓō kə́ əsō kem ɓēé, ba ré n-reē n-ndan̄ noí tə́ ta kújə́ ń toō tə́, tɔdɔ̄ rīí i kem kújə́ ń toō tə́, ba ré n-əgan̄ kɔŕ kə̄ dɔí tə́ kadə̄ ī-dḭḭ̄də́, tɔdɔ̄ wur kɔl kə́ ngá̰ý əsō dɔdə́ tə́ anī, kə ōō ndūdə́ ba kə ájə́də́. 10Ngɔlaā ní á̰a̰ā̰, Amon gə̄ ō, Moab gə̄ ō, de kə́ dɔ mbal̄ Seir tə́ gə̄ ō, reē ənīn̄jí rɔ̄ɔ̄. Dan ń kaají gə̄ teēn̄ kɔ̄ɔ́ kem ɓē kə́ Ejiptə tə́ ní, ḭ̄ ɔ̄gədə́ kənda dɔ nang yā gír de gə̄ ń noō gān̄g. Adə̄ nin̄ gōngə̄n̄də́ ba tɔ̄lə̄n̄də́ malang kɔ̄ɔ́ alé. 11Banī yá̰á̰ ń nin̄ əndān̄neé njají ɓōólaā ní i reē tə̄ɓājí dɔ nang ń ḭ̄ ādə̄jí tə́ ní. 12Kɔ́ɔ̄ɓē Nə́ɓā yājí, ā ī-gān̄g sarya dɔdə́ tə́ aĺ a? Jə-tūr̄ kumjí kə̄ rɔ̄í tə́ ba jə-rāāī ɓɔ́ tām̄ tɔ́gə́jí gətóo no kósə de kə́ ngá̰ý gə̄ ń a reēn̄ kə̄ rɔ̄jí tə́ toō ō, jə-ger̄ yá̰á̰ kə́ yā rāā aĺ ō.
13 Juda gə̄ malang ran̄ kə njadə́ dɔɔ́ ta kum Kɔ́ɔ̄ɓē tə́ kum naā tə́ kə ngéédə́ gēé adə̄ i nə̄yá̰də́ gə̄ ō, ngándə́ gə̄ ō.
Kɔ́ɔ̄ɓē tetə rɔ̄ɔ̄ adə̄ Juda gə̄
14Loo ń noō tə́ Ndíĺ Kɔ́ɔ̄ɓē reē dɔ Yajiel tə́ dan ngé kán̄ naā gə̄ tə́. Yajiel i ngōn̄ Jakari kə́ ngōn̄ Benaya kə́ ngōn̄ Matania. Ni i ngōn̄ Lebi kə́ dan ngán Asap gə̄ tə́. 15Ni-əda na: Sḭḭ̄ malang, Juda gə̄ ō, de kə́ Jerusalem gə̄ ō, mban̄g Josapat ō, ī-nēlī mbīsí majə ōōīneé! Najə̄ ń Kɔ́ɔ̄ɓē əda ní n toó: Ī-lōōī sōl̄ ō, ī-lōōī kadə̄ ndíĺsí a̰ȳ ō, no kósə de kə́ ngá̰ý gə̄ ń toō tə́, tām̄ rɔ̄ɔ̄ ń toō i rɔ̄ɔ̄ yāsí alé ba i rɔ̄ɔ̄ yā Nə́ɓā. 16Ī-teēī bírí ī-risə āwī kum kə̄ dɔdə́ tə́. I nin̄ n al̄ a reēn̄ kum kə̄ dɔɔ́ kə gō kadə loo ń a ɓārə́n̄ na i hútə̄ yá̰á̰ ní tə́ toō. Ā ə́ngeīdə́ ta ngóý wól loo tə́, loo ń ra sɔɔ̄n̄ ta naā kə dəla loo kə́ Yeruel tə́ ní. 17Ā ī-rɔ̄ɔ̄īdə́ loo ń noō tə́ alé. Āw̄ ī-raī loo ní tə́ gotə kógə̄ḿ ba á̰a̰ī loo tetə ń Kɔ́ɔ̄ɓē a tetə rɔ̄ɔ̄ yā kadə̄sí ní. De kə́ Juda gə̄ ō, Jerusalem gə̄ ō, ī-lōōī ɓōĺ ō, ī-lōōī kadə̄ ndíĺsí a̰ȳ ō. Bírí ī-teē ī-tə́nāī tadə́ loo ń noō tə́ na Kɔ́ɔ̄ɓē i naā tə́ sesí.
18Josapat əsō sébə kumən nang tə́. Anī Juda gə̄ malang ō, de kə́ Jerusalem gə̄ malang ō, əsō sébən̄ kumdə́ nang tə́ yā rɔȳń Kɔ́ɔ̄ɓē ō. 19Gō tə́ anī ngán Lebi gə̄ kə́ gír kaa yā Kehat tə́ ō, yā Kore tə́ ō, ḭḭn̄ dɔɔ́ ba unən̄ ndūdə́ kə̄ dɔɔ́ tɔ̄ȳn̄neé Kɔ́ɔ̄ɓē Nə́ɓā yā Israel gə̄ kə tɔ́gɔ́. 20Nin̄ ḭḭn̄ dɔɔ́ kə gír looí ɓatə əsōn̄ róbó ta kaw̄ kə̄ dəla loo kə́ Tekoa tə́. Dan ń a rāān̄ yā kɔr̄ dɔɔ́ anī Josapat ədadə́ na: De kə́ Jerusalem gə̄ ō, Juda gə̄ ō, ōōī najə̄ ń m-ā m-ɔ̄r̄ ní! Ī-taāī kem Kɔ́ɔ̄ɓē Nə́ɓā yāsí anī ā ə́ngeī tɔ́gə adə̄ ā ī-raī ngan̄g. Ī-taāī kem ngé koō ta yān gə̄ anī ā ī-tetiī rɔ̄ɔ̄. 21Josapat oōn̄ naā kə ngán Israel gēé ba əndā ngé pā gə̄ kə́ tə́lan̄ kūbə̄ kə́ táĺ gə̄ rɔ̄də́ tə́ kadə̄ njə̄rān̄ kété no ngé rɔ̄ɔ̄ gə̄ tə́ kadə̄ ɔsən̄ gɔn Kɔ́ɔ̄ɓē kə pāá ədan̄ na: Ī-tɔ̄yī Kɔ́ɔ̄ɓē tɔdɔ̄ kem majə yān to ngándáńg. 22Dan ń əlan̄ gír kun pā tɔ̄ȳ anī, Kɔ́ɔ̄ɓē rāā adə̄ ngé tə́la de gə̄ naā tə́ gə̄ ḭḭn̄ dan ngán Amon gə̄ tə́ ō, ngán Moab gə̄ tə́ ō, dan ngé kə́ dɔ mbal̄ kə́ Seir tə́ gə̄ ō ń reēn̄ yā rɔ̄ɔ̄ Juda gə̄ ní tə́, adə̄ nin̄ kɔ́ gə̄ télən̄ kə̄ dɔ naā tə́ a rɔ̄ɔ̄n̄ naā. 23Ngán Amon gə̄ ō, Moab gə̄ ō, əlan̄ gír rɔ̄ɔ̄ de kə́ dɔ mbal̄ kə́ Seir tə́ gə̄. Nin̄ tɔ̄lə̄n̄də́ náḿ náḿ. Gō tə́ anī nin̄ kɔ́ gə̄ tél tɔ̄lə̄n̄ naā kɔ̄ɔ́ malang. 24Dan ń Juda gə̄ ugə̄n̄ loo kə́ kḭḭ kə̄ dɔɔ́ ń deē ra tū tə́ a a̰a̰ loo kə̄ mángá ní anī tūrə̄n̄ kumdə́ kə̄ dām̄ loo ń kósə de kə́ ngá̰ý gə̄ i tū tə́ ní tə́ loo ń noō tə́ a̰a̰n̄ nīń de gə̄ n oyn̄ kanjə̄ kadə̄ deē kógə̄ḿ teē dandə́ tə́ ní. 25Josapat nin̄ kə deē yān gēé ɔyn̄ yá̰a̰ kənge gə̄ kə́ ta rɔ̄ɔ̄ tə́. Ɔyn̄ i yá̰a̰ kul̄ gə̄ ngá̰ý ō, yá̰a̰ kənge gə̄ ō, kūbə̄ gə̄ ō, yá̰á̰ kə́ gātə̄də́ i ngá̰ý gə̄ ō. Ɔyn̄ yá̰a̰ ndɔ̄ mətá ba dum̄də́. 26Kə ndɔ̄ kə́ nge ko̰ sɔ́ anī əngen̄ naā wól loo ń a ɓārə́n̄ na i wól loo tɔ̄ȳ tə́ ní, tɔdɔ̄ nin̄ tɔyn̄ Kɔ́ɔ̄ɓē loo ń noō tə́. Adə̄ bátə́ ɓōólaā gə̄gē ní a ɓārə́n̄ loo ní na i wól loo tɔ̄ȳ. 27Gō tə́ anī de kə́ dəngam gə̄ malang kə́ Juda ō, kə́ Jerusalem ō ń Josapat un dɔdə́ reē sedə́ ní, télən̄ dɔ tə́ ta kaw̄ gogə́ Jerusalem kə rɔ̄nelēé. Tɔdɔ̄ Kɔ́ɔ̄ɓē rāā adə̄ rɔ̄də́ nin̄ nel̄də́ ngá̰ý, banī rāā adə̄ rɔ̄ madə̄ ba̰ā̰də́ gə̄ nel̄də́ alé. 28Nin̄ ugən̄ i kənde gə̄ kə́ kəlādə́ i ngá̰ý aĺ gə̄ ō, kə́ kəlādə́ i ngá̰ý gə̄ ō, kɔ̄rə́n̄ bərúnjə gə̄ ō n udən̄neé kem ɓē kə́ Jerusalem tə́ ō, aw̄n̄neé bátə́ ugə̄n̄ ta kújə yā Kɔ́ɔ̄ɓē tə́ ō ní. 29Dan ń de kə́ kem ɓē ko̰o̰ gə̄ yā tə̄rā gə̄ tə́ oōn̄ kadə̄ Kɔ́ɔ̄ɓē na rɔ̄ɔ̄ madə̄ ba̰ā̰ Israel gə̄ anī nin̄ malang ɓōlə́n̄ Nə́ɓā. 30I beé n yá̰a̰ rāań yá̰a̰ ɓāl̄ ko̰o̰ ɓē yā Josapat tə́ alé, adə̄ loo toń lɔm ní. Tɔdɔ̄ Nə́ɓā yān rāā adə̄ madə̄ ba̰ā̰n gə̄ ń ndin̄ gīrə̄n̄ gidən ní rɔ̄ɔ̄nən̄ alé.
Ta tɔ̄l̄ ta ko̰o̰ ɓē yā Josapat
(Á̰a̰ī 1 Mba 22.41-51)
31Josapat ngōn̄ Asa o̰o̰ ɓē dɔ Juda gə̄ tə́. Dan ń ndi mban̄g ní ɓālə̄n i kutə mətá gidə i mí. Ni o̰o̰ ɓē ɓāl̄ kutə jōó gidə i mí Jerusalem. Rī kó̰o̰n na i Ajuba, i ngōn̄ Sili. 32Ni un gō tóo nja bɔbə̄n Asa ba tɔ̄ɔ̄ róbə alé, tām̄ ni rāā yá̰á̰ kə́ súmūú ta kum Kɔ́ɔ̄ɓē tə́. 33Ɓá tā ba loo ndɔ̄ȳ gə̄ ton̄ kem ɓēé ɓáý ō, kem de gə̄ əhɔ yā Nə́ɓā yā kaadə́ gə̄ aĺ ɓáý ō.
34Gotə yá̰á̰ kə́ rang gə̄ ń Josapat rāā á i ngé kə́ ta kəla gíŕ tə́ gə̄ ō, ngé kə́ ta tɔ̄l̄ ta tə́ gə̄ ō ní, ndangən̄də́ i kem makətūbə̄ kəla rāā Yehu ngōn̄ Hanani tə́. Ndangən̄ ba əlan̄ i kem makətūbə̄ yā mban̄g gə̄ kə́ Israel tə́.
35Gō tə́ anī Josapat ń i mban̄g kə́ Juda ní ɓoon̄ naā kə̄ Akajias mban̄g kə́ Israel tə́ ń hálən majaĺ ní. 36Nin̄ ɓoon̄ naā ba rāān̄ to bo gə̄ kə́ yā kadə̄ aw̄n̄neé Tarsis. Nin̄ rāān̄ to bo gə̄ ní i Esion Geber.
37Banī Eliejer nge koō ta kə́ ngōn̄ Dodaba kə́ Maresa əda Josapat na: Kɔ́ɔ̄ɓē nujə kəla yāí i tām̄ ɓoo kə́ ī-ɓoī naā kə Akajias. Adə̄ to gə̄ ní njárə̄n̄ naā tə́ kɔ̄ɔ́ kanjə̄ kadə̄ aw̄n̄ Tarsis.
Currently Selected:
2 YÁ̰A̰ GƏ̄ 20: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
