2 YÁ̰A̰ GƏ̄ 18
18
Josapat ɓoo rɔ̄n tū yā Akab mban̄g kə́ Israel tə́
(Á̰a̰ī 1 Mba 22.1-4)
1Josapat ənge yá̰á̰ ngá̰ý ō, ɔsən̄ gɔnən ngá̰ý ō. Nin̄ télən̄ ngéé naā gə̄ kə mban̄g Akab kə ta kul̄ taā naā kógə̄ḿ kə́ to dɔ dáńdə́ tə́. 2Gō tə́ asə ɓāl̄ kóndóńg wań ɓáa Josapat aw̄ ɓē Akab kem ɓē kə́ Samari tə́. Akab tɔ̄l̄ batə̄ gə̄ ngá̰ý ō, man̄g gə̄ ngá̰ý ō, rāānneé mbā kə de kə́ gōn tə́ gə̄. Anī Akab mēr̄ Josapat kaw̄ seneé kadə̄ n-aw̄ n-ənīn̄ ɓē kə́ Ramot kə́ Galaad rɔ̄ɔ̄. 3Ni-dəje Josapat mban̄g kə́ Juda na ké ndigə kaw̄ seneé kənī ɓē kə́ Ramot kə́ Galaad tə́ rɔ̄ɔ̄ wa. Anī Josapat tél əda Akab na n-a n-aw̄ seneé ta rɔ̄ɔ̄ tə́. Ré yá̰a̰ rāān a rāā na i ni ō, ré yá̰a̰ rāā deē yān gə̄ a na rāā na i deē yān ni gə̄ ō.
Ngé koō ta gə̄ ədan̄ najə̄ kə́ majə tām̄ yā mban̄g tə́
(Á̰a̰ī 1 Mba 22.5-12)
4Ɓá tā ba Josapat əda mban̄g kə́ Israel ɓáý to̰ na kə oō yā Kɔ́ɔ̄ɓē pá tá. 5Loo ń noō tə́ mban̄g kə́ Israel kán̄ ngé koō ta gə̄ ɓú sɔ́ ba dəjedə́ na ké kə n-aw̄ kə n-rɔ̄ɔ̄n̄ ɓē kə́ Ramot kə́ Galaad aké kə n-lōō gírí wa. Ngé koō ta gə̄ tél ədanən̄ na kə aw̄ na Nə́ɓā na a əla ɓē ní kem jīn tə́. 6Banī Josapat dəje na ké nge koō ta kə́ rang kə́ kadə̄ n-oōn̄ najə̄ kə́ ta Kɔ́ɔ̄ɓē tə́ tan tə́ ké gətóo wa. 7Mban̄g kə́ Israel tə́ tél əda Josapat na na̰y deē kógə̄ḿ noō ɓáý, banī na nelə̄n ni kə deē ní alé, tām̄ na a əda najə̄ kə́ majə tām̄ yān ní tə́ alé, ba na a əda i najə̄ kə́ majaĺ tá dejə. Deē ní na i Mise kə́ ngōn̄ Yimla. Josapat əda na kadə̄ mban̄g ɔr̄ najə̄ beé alé. 8Loo ń noō tə́ mban̄g kə́ Israel ɓāŕ nge kəla kógə̄ḿ ba ədan na kə aw̄ láẃ kə reē kə Mise kə́ ngōn̄ Yimla.
9Mban̄g kə́ Israel ō, mban̄g kə́ Juda ō, tə́lan̄ kūbə̄ mban̄g yādə́ gə̄ rɔ̄də́ tə́, ba ndin̄ dɔ kōr̄ kāgə̄ mbang yādə́ gə̄ tə́ ndágə looó, ta róbə́ kə́ yā kudəń kə̄ kem ɓē kə́ Samari tə́ tə́. Ngé koō ta gə̄ malang ran̄ a ɔrə̄n̄ najə̄ kə́ loo ngé koō ta gə̄ tə́. 10Sidekia kə́ ngōn̄ Kenana rāā gajə dā̰ gə̄ kə gindīí ba əda na: Kɔ́ɔ̄ɓē əda na i gajə dā̰ gə̄ ń toō n ā ī-tetəń Aram gə̄ rɔ̄ɔ̄ ní. 11Gotə ngé koō ta gə̄ malang ədan̄ yādə́ i tītə̄ ń noō ō, ədan̄ na kə aw̄ kə ənī ɓē kə́ Ramot kə́ Galaad rɔ̄ɔ̄ na a ənge yá̰á̰ ń kemən gḛy ní! Kɔ́ɔ̄ɓē na a əla ɓē kə́ Ramot kə́ Galaad kem jī mban̄g tə́.
Mise nge koō ta əda na a tetən̄ mban̄g rɔ̄ɔ̄
(Á̰a̰ī 1 Mba 22.13-28)
12Nge kəla ń aw̄ ɓāŕ Mise tə́ ní ədan na kə a̰ā̰, ngé koō ta gə̄ malang na ədan̄ na i yá̰á̰ kə́ kógə̄ḿ beē, ədan̄ na i najə̄ kə́ majə tām̄ yā mban̄g tə́. Ní, kadə̄ najə̄ kɔrə̄n ni Mise kə i gō yādə́ tə́, kə əda yá̰á̰ kə́ majə tām̄ yā mban̄g tə́ ō. 13Banī Mise tél ədan na: Tītə̄ ń Kɔ́ɔ̄ɓē na ndiń kə kumneé noō ní, na i yá̰á̰ ń Nə́ɓā yān na a əda ní n na n-a n-əda ní. 14Ni-reē rɔ̄ mban̄g tə́ anī mban̄g dəjen na: Mise, j-aw̄ jə-rɔ̄ɔ̄ī ɓē kə́ Ramot kə́ Galaad aké m̄-lōō gírí ní? Anī Mise tél ədan na kə aw̄n̄ na a tetən̄ rɔ̄ɔ̄, Kɔ́ɔ̄ɓē na a əla ɓē kə́ Ramot kə́ Galaad kem jīdə́ tə́. 15Banī mban̄g tél ədan na: I nja kóndóńg n kə m̄-rā seí kadə̄ ə̄nī míndí ādə̄m̄ kadə̄ i najə̄ kə́ rɔ̄kum kə́ kə rī Kɔ́ɔ̄ɓē ngóy n kə ə́dam̄ ní? 16Loo ń noō tə́ Mise əda na n-a̰a̰ ngán Israel gə̄ malang tḭ̄ḭ̄n̄ naā kə̄ dɔ mbal̄ gə̄ tə́ tītə̄ batə̄ gə̄ kə́ nge kul̄də́ gətóo beé. Kɔ́ɔ̄ɓē əda na de gə̄ ń toō ngoldə́ gətóó ní, ādə̄ náā nəkɔ́ a tél ta kaw̄ gogə́ ɓēé kə kem kə́ sɔl̄ lɔmɔɔ́.
17Mban̄g kə́ Israel əda Josapat na ké n-ədan najə̄ ń noō aĺ wa, na n-ədan na a əda najə̄ kə́ majə dɔn ni tə́ alé, na a əda na i najə̄ kə́ majaĺ dejə. 18Banī Mise əda ɓáý to̰ na kə oōn̄ najə̄ ń Kɔ́ɔ̄ɓē əda ní, tɔdɔ̄ na na̰a̰ Kɔ́ɔ̄ɓē ndi dɔ kōr̄ kāgə̄ mbang yān tə́ ō, ngé kəla yān kə́ dɔ rā̰ tə́ gə̄ malang na ran̄ kə njadə́ dɔɔ́ dɔ jī ko̰n tə́ ō, jī gelən tə́ ō. 19Kɔ́ɔ̄ɓē dəje na ké i náā n ndigə kaw̄ gól̄ Akab tə́ kadə̄ ənī ɓē kə́ Ramot kə́ Galaad rɔ̄ kadə̄ tɔ̄lə̄n̄ Akab tū tə́ wa. Anī deē kógə̄ḿ əda yān i beé, ba de kə́ rang əda yān i beé. 20Loo ń noō tə́ ndíl ndɔ́tə̄ kə̄ kété aw̄ ra no Kɔ́ɔ̄ɓē tə́ ba əda na, i ni n n-ā n-aw̄ yā gólə̄n ní. Banī Kɔ́ɔ̄ɓē dəjen na ké a rāā i ba̰ý wa. 21Anī ndíl əda na n-a n-aw̄, ba na n-aw̄ yā rāā kadə̄ ngé koō ta gə̄ malang yā mban̄g tə́dan̄ najə̄ kə́ sor̄ gə̄. Kɔ́ɔ̄ɓē tél ədan na, asə gólə̄n ní kə aw̄ kə rāā tītə̄ ń noō. 22Adə̄ ré Kɔ́ɔ̄ɓē əndā ndíl sor̄ ta ngé koō ta yāí gə̄ tə́ malang ɓáa kumən na nəkɔ́ əda najə̄ yá̰á̰ kə́ to kum kaȳ aĺ kə́ a rāā yā rāāī.
23Sidekia ngōn̄ Kenana ndɔ̄tə̄ kə̄ ngɔr, ənda mbɔ́r Mise ba əda na: Ndíĺ Kɔ́ɔ̄ɓē teē kemḿ tə́ i kə ta róbə́ kə́ rá n aw̄ ɔrə̄ń najə̄ seí ní? 24Mise tél ədan na: Majə, ndɔ̄ ń ā ā̰ȳ yā kaw̄ ɓɔ̄ɔ̄ rɔ̄í gə́lé kújə́ tə́ ní, ndɔ̄ ń noō tə́ ā ī-ger̄. 25Loo ń noō tə́ mban̄g kə́ Israel tə́ əda ngé kəla yān gə̄ na kə əhɔn̄ Mise, kə tél kə aw̄n̄ seneé gogə́ kə adə̄n̄ Amon nge ko̰o̰ ɓē nin̄ kə Yoas kə́ ngōn̄ mban̄g 26Ba kə ədan̄də́ na mban̄g əda na kə ənīn̄ deē ń toō dəngáyá, ba kə a̰a̰n̄ gōn kə mápá kə́ sḛ́ý beē ō, kə man̄ kə́ sḛ́ý beé ō, bátə́ kadə̄ n-téləń ta rɔ̄ɔ̄ tə́ kə lápə́yaá. 27Mise tél ədan na: Kə́ rɔ̄kum tə́, ré ī-tél kə lápə́ya anī, kumən na najə̄ ń m-ə́daī ní i Kɔ́ɔ̄ɓē n əndā taḿ tə́ ní alé. Gō tə́ anī əda ɓáý to̰ na: Sḭḭ̄ gír deē gə̄ malang ōōī najə̄ ń noō.
Tɔ̄lə̄n̄ mban̄g kə́ Israel ta rɔ̄ɔ̄ tə́
(Á̰a̰ī 1 Mba 22.29-40)
28Mban̄g kə́ Israel nin̄ kə Josapat mban̄g kə́ Juda aw̄ ənīn̄ ɓē kə́ Ramot kə́ Galaad rɔ̄ɔ̄. 29Mban̄g kə́ Israel əda Josapat na n-a n-əla kūbə̄ kə́ kadə̄ deē a̰a̰n a gerə̄n alé rɔ̄n tə́ yā kudəń dan rɔ̄ɔ́, banī ni Josapat kə əla kūbə̄ mban̄g yān rɔ̄n tə́.
Adə̄ mban̄g kə́ Israel tə́ əla kūbə̄ kə́ yā kadə̄ deē a̰a̰n a gerə̄n alé rɔ̄n tə́ ba udə dan rɔ̄ɔ̄ tə́. 30Banī mban̄g kə́ Aram tāā ngol ngé púsə yān gə̄ na kə lōōn̄ rɔ̄ɔ̄ áskar gə̄ ń əsan̄ kəlā aĺ ní ō, ngol áskar gə̄ ō, ba kə rɔ̄ɔ̄n̄ rɔ̄ mban̄g kə́ Israel tə́ nəkɔ́ ngóy. 31Adə̄ dan ń ngol ngé púsə rɔ̄ɔ̄ gə̄ a̰a̰n̄ Josapat ní, ɔjən̄neé na i mban̄g kə́ Israel tə́, adə̄ tə́nīn̄ rɔ̄də́ gīrə̄n̄ gidən yā rɔ̄ɔ̄n, banī Josapat əga kɔŕ. Kɔ́ɔ̄ɓē dḭḭ̄n adə̄ Nə́ɓā tūr̄ tadə́ kɔ̄ɔ́ dɔn tə́. 32Dan ń ngol ngé púsə rɔ̄ɔ̄ gə̄ a̰a̰n̄ kadə̄ ni i mban̄g kə́ Israel tə́ aĺ anī, əya̰nən̄ ba aw̄n̄. 33Banī deē kógə̄ḿ ur gərā yān kə̄ noó anī gərā ní ur mban̄g kə́ Israel mbo̰ō̰ kūbə̄ gində̄ kə́ rɔ̄n tə́ tə́. Mban̄g əda nge kun púsə rɔ̄ɔ̄ yān na kə tetə dɔ púsə ba kə teē seneé kɔ̄ɔ́ loo rɔ̄ɔ̄ tə́, tɔdɔ̄ n-ənge do. 34Ndɔ̄ ń noō tə́ rɔ̄ɔ̄ təngā ngá̰ý adə̄ mban̄g ra kem púsə rɔ̄ɔ̄ yān tə́ no Aram gə̄ tə́ bátə́ loo tíbə dɔn tə́. Dan ń mbang udə anī ni-oy.
Currently Selected:
2 YÁ̰A̰ GƏ̄ 18: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
2 YÁ̰A̰ GƏ̄ 18
18
Josapat ɓoo rɔ̄n tū yā Akab mban̄g kə́ Israel tə́
(Á̰a̰ī 1 Mba 22.1-4)
1Josapat ənge yá̰á̰ ngá̰ý ō, ɔsən̄ gɔnən ngá̰ý ō. Nin̄ télən̄ ngéé naā gə̄ kə mban̄g Akab kə ta kul̄ taā naā kógə̄ḿ kə́ to dɔ dáńdə́ tə́. 2Gō tə́ asə ɓāl̄ kóndóńg wań ɓáa Josapat aw̄ ɓē Akab kem ɓē kə́ Samari tə́. Akab tɔ̄l̄ batə̄ gə̄ ngá̰ý ō, man̄g gə̄ ngá̰ý ō, rāānneé mbā kə de kə́ gōn tə́ gə̄. Anī Akab mēr̄ Josapat kaw̄ seneé kadə̄ n-aw̄ n-ənīn̄ ɓē kə́ Ramot kə́ Galaad rɔ̄ɔ̄. 3Ni-dəje Josapat mban̄g kə́ Juda na ké ndigə kaw̄ seneé kənī ɓē kə́ Ramot kə́ Galaad tə́ rɔ̄ɔ̄ wa. Anī Josapat tél əda Akab na n-a n-aw̄ seneé ta rɔ̄ɔ̄ tə́. Ré yá̰a̰ rāān a rāā na i ni ō, ré yá̰a̰ rāā deē yān gə̄ a na rāā na i deē yān ni gə̄ ō.
Ngé koō ta gə̄ ədan̄ najə̄ kə́ majə tām̄ yā mban̄g tə́
(Á̰a̰ī 1 Mba 22.5-12)
4Ɓá tā ba Josapat əda mban̄g kə́ Israel ɓáý to̰ na kə oō yā Kɔ́ɔ̄ɓē pá tá. 5Loo ń noō tə́ mban̄g kə́ Israel kán̄ ngé koō ta gə̄ ɓú sɔ́ ba dəjedə́ na ké kə n-aw̄ kə n-rɔ̄ɔ̄n̄ ɓē kə́ Ramot kə́ Galaad aké kə n-lōō gírí wa. Ngé koō ta gə̄ tél ədanən̄ na kə aw̄ na Nə́ɓā na a əla ɓē ní kem jīn tə́. 6Banī Josapat dəje na ké nge koō ta kə́ rang kə́ kadə̄ n-oōn̄ najə̄ kə́ ta Kɔ́ɔ̄ɓē tə́ tan tə́ ké gətóo wa. 7Mban̄g kə́ Israel tə́ tél əda Josapat na na̰y deē kógə̄ḿ noō ɓáý, banī na nelə̄n ni kə deē ní alé, tām̄ na a əda najə̄ kə́ majə tām̄ yān ní tə́ alé, ba na a əda i najə̄ kə́ majaĺ tá dejə. Deē ní na i Mise kə́ ngōn̄ Yimla. Josapat əda na kadə̄ mban̄g ɔr̄ najə̄ beé alé. 8Loo ń noō tə́ mban̄g kə́ Israel ɓāŕ nge kəla kógə̄ḿ ba ədan na kə aw̄ láẃ kə reē kə Mise kə́ ngōn̄ Yimla.
9Mban̄g kə́ Israel ō, mban̄g kə́ Juda ō, tə́lan̄ kūbə̄ mban̄g yādə́ gə̄ rɔ̄də́ tə́, ba ndin̄ dɔ kōr̄ kāgə̄ mbang yādə́ gə̄ tə́ ndágə looó, ta róbə́ kə́ yā kudəń kə̄ kem ɓē kə́ Samari tə́ tə́. Ngé koō ta gə̄ malang ran̄ a ɔrə̄n̄ najə̄ kə́ loo ngé koō ta gə̄ tə́. 10Sidekia kə́ ngōn̄ Kenana rāā gajə dā̰ gə̄ kə gindīí ba əda na: Kɔ́ɔ̄ɓē əda na i gajə dā̰ gə̄ ń toō n ā ī-tetəń Aram gə̄ rɔ̄ɔ̄ ní. 11Gotə ngé koō ta gə̄ malang ədan̄ yādə́ i tītə̄ ń noō ō, ədan̄ na kə aw̄ kə ənī ɓē kə́ Ramot kə́ Galaad rɔ̄ɔ̄ na a ənge yá̰á̰ ń kemən gḛy ní! Kɔ́ɔ̄ɓē na a əla ɓē kə́ Ramot kə́ Galaad kem jī mban̄g tə́.
Mise nge koō ta əda na a tetən̄ mban̄g rɔ̄ɔ̄
(Á̰a̰ī 1 Mba 22.13-28)
12Nge kəla ń aw̄ ɓāŕ Mise tə́ ní ədan na kə a̰ā̰, ngé koō ta gə̄ malang na ədan̄ na i yá̰á̰ kə́ kógə̄ḿ beē, ədan̄ na i najə̄ kə́ majə tām̄ yā mban̄g tə́. Ní, kadə̄ najə̄ kɔrə̄n ni Mise kə i gō yādə́ tə́, kə əda yá̰á̰ kə́ majə tām̄ yā mban̄g tə́ ō. 13Banī Mise tél ədan na: Tītə̄ ń Kɔ́ɔ̄ɓē na ndiń kə kumneé noō ní, na i yá̰á̰ ń Nə́ɓā yān na a əda ní n na n-a n-əda ní. 14Ni-reē rɔ̄ mban̄g tə́ anī mban̄g dəjen na: Mise, j-aw̄ jə-rɔ̄ɔ̄ī ɓē kə́ Ramot kə́ Galaad aké m̄-lōō gírí ní? Anī Mise tél ədan na kə aw̄n̄ na a tetən̄ rɔ̄ɔ̄, Kɔ́ɔ̄ɓē na a əla ɓē kə́ Ramot kə́ Galaad kem jīdə́ tə́. 15Banī mban̄g tél ədan na: I nja kóndóńg n kə m̄-rā seí kadə̄ ə̄nī míndí ādə̄m̄ kadə̄ i najə̄ kə́ rɔ̄kum kə́ kə rī Kɔ́ɔ̄ɓē ngóy n kə ə́dam̄ ní? 16Loo ń noō tə́ Mise əda na n-a̰a̰ ngán Israel gə̄ malang tḭ̄ḭ̄n̄ naā kə̄ dɔ mbal̄ gə̄ tə́ tītə̄ batə̄ gə̄ kə́ nge kul̄də́ gətóo beé. Kɔ́ɔ̄ɓē əda na de gə̄ ń toō ngoldə́ gətóó ní, ādə̄ náā nəkɔ́ a tél ta kaw̄ gogə́ ɓēé kə kem kə́ sɔl̄ lɔmɔɔ́.
17Mban̄g kə́ Israel əda Josapat na ké n-ədan najə̄ ń noō aĺ wa, na n-ədan na a əda najə̄ kə́ majə dɔn ni tə́ alé, na a əda na i najə̄ kə́ majaĺ dejə. 18Banī Mise əda ɓáý to̰ na kə oōn̄ najə̄ ń Kɔ́ɔ̄ɓē əda ní, tɔdɔ̄ na na̰a̰ Kɔ́ɔ̄ɓē ndi dɔ kōr̄ kāgə̄ mbang yān tə́ ō, ngé kəla yān kə́ dɔ rā̰ tə́ gə̄ malang na ran̄ kə njadə́ dɔɔ́ dɔ jī ko̰n tə́ ō, jī gelən tə́ ō. 19Kɔ́ɔ̄ɓē dəje na ké i náā n ndigə kaw̄ gól̄ Akab tə́ kadə̄ ənī ɓē kə́ Ramot kə́ Galaad rɔ̄ kadə̄ tɔ̄lə̄n̄ Akab tū tə́ wa. Anī deē kógə̄ḿ əda yān i beé, ba de kə́ rang əda yān i beé. 20Loo ń noō tə́ ndíl ndɔ́tə̄ kə̄ kété aw̄ ra no Kɔ́ɔ̄ɓē tə́ ba əda na, i ni n n-ā n-aw̄ yā gólə̄n ní. Banī Kɔ́ɔ̄ɓē dəjen na ké a rāā i ba̰ý wa. 21Anī ndíl əda na n-a n-aw̄, ba na n-aw̄ yā rāā kadə̄ ngé koō ta gə̄ malang yā mban̄g tə́dan̄ najə̄ kə́ sor̄ gə̄. Kɔ́ɔ̄ɓē tél ədan na, asə gólə̄n ní kə aw̄ kə rāā tītə̄ ń noō. 22Adə̄ ré Kɔ́ɔ̄ɓē əndā ndíl sor̄ ta ngé koō ta yāí gə̄ tə́ malang ɓáa kumən na nəkɔ́ əda najə̄ yá̰á̰ kə́ to kum kaȳ aĺ kə́ a rāā yā rāāī.
23Sidekia ngōn̄ Kenana ndɔ̄tə̄ kə̄ ngɔr, ənda mbɔ́r Mise ba əda na: Ndíĺ Kɔ́ɔ̄ɓē teē kemḿ tə́ i kə ta róbə́ kə́ rá n aw̄ ɔrə̄ń najə̄ seí ní? 24Mise tél ədan na: Majə, ndɔ̄ ń ā ā̰ȳ yā kaw̄ ɓɔ̄ɔ̄ rɔ̄í gə́lé kújə́ tə́ ní, ndɔ̄ ń noō tə́ ā ī-ger̄. 25Loo ń noō tə́ mban̄g kə́ Israel tə́ əda ngé kəla yān gə̄ na kə əhɔn̄ Mise, kə tél kə aw̄n̄ seneé gogə́ kə adə̄n̄ Amon nge ko̰o̰ ɓē nin̄ kə Yoas kə́ ngōn̄ mban̄g 26Ba kə ədan̄də́ na mban̄g əda na kə ənīn̄ deē ń toō dəngáyá, ba kə a̰a̰n̄ gōn kə mápá kə́ sḛ́ý beē ō, kə man̄ kə́ sḛ́ý beé ō, bátə́ kadə̄ n-téləń ta rɔ̄ɔ̄ tə́ kə lápə́yaá. 27Mise tél ədan na: Kə́ rɔ̄kum tə́, ré ī-tél kə lápə́ya anī, kumən na najə̄ ń m-ə́daī ní i Kɔ́ɔ̄ɓē n əndā taḿ tə́ ní alé. Gō tə́ anī əda ɓáý to̰ na: Sḭḭ̄ gír deē gə̄ malang ōōī najə̄ ń noō.
Tɔ̄lə̄n̄ mban̄g kə́ Israel ta rɔ̄ɔ̄ tə́
(Á̰a̰ī 1 Mba 22.29-40)
28Mban̄g kə́ Israel nin̄ kə Josapat mban̄g kə́ Juda aw̄ ənīn̄ ɓē kə́ Ramot kə́ Galaad rɔ̄ɔ̄. 29Mban̄g kə́ Israel əda Josapat na n-a n-əla kūbə̄ kə́ kadə̄ deē a̰a̰n a gerə̄n alé rɔ̄n tə́ yā kudəń dan rɔ̄ɔ́, banī ni Josapat kə əla kūbə̄ mban̄g yān rɔ̄n tə́.
Adə̄ mban̄g kə́ Israel tə́ əla kūbə̄ kə́ yā kadə̄ deē a̰a̰n a gerə̄n alé rɔ̄n tə́ ba udə dan rɔ̄ɔ̄ tə́. 30Banī mban̄g kə́ Aram tāā ngol ngé púsə yān gə̄ na kə lōōn̄ rɔ̄ɔ̄ áskar gə̄ ń əsan̄ kəlā aĺ ní ō, ngol áskar gə̄ ō, ba kə rɔ̄ɔ̄n̄ rɔ̄ mban̄g kə́ Israel tə́ nəkɔ́ ngóy. 31Adə̄ dan ń ngol ngé púsə rɔ̄ɔ̄ gə̄ a̰a̰n̄ Josapat ní, ɔjən̄neé na i mban̄g kə́ Israel tə́, adə̄ tə́nīn̄ rɔ̄də́ gīrə̄n̄ gidən yā rɔ̄ɔ̄n, banī Josapat əga kɔŕ. Kɔ́ɔ̄ɓē dḭḭ̄n adə̄ Nə́ɓā tūr̄ tadə́ kɔ̄ɔ́ dɔn tə́. 32Dan ń ngol ngé púsə rɔ̄ɔ̄ gə̄ a̰a̰n̄ kadə̄ ni i mban̄g kə́ Israel tə́ aĺ anī, əya̰nən̄ ba aw̄n̄. 33Banī deē kógə̄ḿ ur gərā yān kə̄ noó anī gərā ní ur mban̄g kə́ Israel mbo̰ō̰ kūbə̄ gində̄ kə́ rɔ̄n tə́ tə́. Mban̄g əda nge kun púsə rɔ̄ɔ̄ yān na kə tetə dɔ púsə ba kə teē seneé kɔ̄ɔ́ loo rɔ̄ɔ̄ tə́, tɔdɔ̄ n-ənge do. 34Ndɔ̄ ń noō tə́ rɔ̄ɔ̄ təngā ngá̰ý adə̄ mban̄g ra kem púsə rɔ̄ɔ̄ yān tə́ no Aram gə̄ tə́ bátə́ loo tíbə dɔn tə́. Dan ń mbang udə anī ni-oy.
Bibəl ta Sar̄ © L'Alliance Biblique du Tchad, 2006, 2010.