2 YÁ̰A̰ GƏ̄ 19
19
Josapat tə́ndā ngé sarya gə̄ dɔ nang kə́ Juda tə́
1Josapat mban̄g kə́ Juda tél aw̄ gogə́ ɓēé Jerusalem kanjə̄ kadə̄ yá̰á̰ kógə̄ḿ rāān. 2Yehu nge koō ta kə́ ngōn̄ Hanani tə́nī tan ba ədan na: I nge kem ndul n ā ī-rāā seneé ō, i madə̄ ba̰ā̰ Kɔ́ɔ̄ɓē gə̄ n ā ī-gḛydə́ ō ní a? Wōn̄g yā Kɔ́ɔ̄ɓē a reē dɔí tə́ najə̄ yá̰a̰ gə̄ ń noō tə́. 3Ɓá tā ba yá̰á̰ kə́ majə to kemií tə́ ɓáý, tɔdɔ̄ ḭ̄ ī-róō kāgə̄ ɓesə̄ Asera gə̄ adə̄ gətóon̄ kem ɓē yāí tə́ ō, ḭ̄ ōō ta Nə́ɓā kə ngarā̰ kemií mámák adə̄ ī-rāā yá̰á̰ ń kemən ndigə ní ō.
4Josapat ndi i Jerusalem. Gō tə́ anī ni teē njə̄rā kə gō ɓē gə̄ yā ngán Israel gēé. Əla gír i Beer Seba bátə́ ugə̄ń gō nang kə́ mbalá yā Epəraim tə́. Ni-tél kə de gēé reē sedə́ gogə́ rɔ̄ Kɔ́ɔ̄ɓē Nə́ɓā yā kaadə́ gə̄ tə́. 5Ni tə́ndā ngé sarya gə̄ kem ɓēé, tə̄ndādə́ kə̄ kem ɓē kə́ ngan̄g ngan̄g gə̄ kə́ dɔ nang kə́ Juda tə́ malang, 6ba ədadə́ na: Ə̄ndāī kumsí gír kəla ń ā ī-rāāī yā rāā ní tə́ majə, tām̄ sarya ń ā ī-rāāī yā rāā ní i kə rī deé alé, ba i kə rī Kɔ́ɔ̄ɓē. Adə̄ dan ń ā ī-gān̄gī sarya ní anī, Kɔ́ɔ̄ɓē nəkɔ́ i naā tə́ sesí. 7Ní, ī-ɓōlíī Kɔ́ɔ̄ɓē ō, ə̄ndāī kumsí gíŕ yá̰á̰ ń ā ī-rāāī tə́ ní majə ō. Tɔdɔ̄ Kɔ́ɔ̄ɓē Nə́ɓā yājí i nge rāā yá̰a̰ gōtə́ aĺ aĺ ō, i nge rāā yá̰a̰ tām̄ ta kum deē aĺ ō, i nge ndigə kadə̄ karī yā nujəń sarya aĺ ō. 8Josapat tə́ndā ngán Lebi gə̄ kə ngé tun̄ yá̰a̰ gə̄ kə ngār gə̄ kə́ dɔ gír kojə gə̄ yā ngán Israel gə̄ tə́ kem ɓē kə́ Jerusalem tə́ ō, yā kadə̄ gāngə̄n̄ sarya kə rī Kɔ́ɔ̄ɓē ō, yā kadə̄ gāngə̄n̄ sarya kɔ̄l̄ naā gə̄ yā de kə́ kem ɓēé gə̄ ō. 9Ni ədadə́ kadə̄ rāān̄ yá̰a̰ gə̄ ń toō:
Ā ī-rāāī i tītə̄ ń toō beé: Ī-ɓōlíī ndíĺ Kɔ́ɔ̄ɓē loon tə́ ō, ī-rāāī i kə háĺ kə́ gōtə́ ō, kə kem kə́ rɔ̄kum ō. 10Kə dɔ reē ngákó̰ó̰sí gə̄ ń ḭḭn̄ kə̄ kem ɓē yādə́ gə̄ tə́ a reēn̄ kə najə̄ yādə́ gēé nosí tə́ noō, ká i najə̄ kə́ dɔ tɔ̄l̄ deē tə́, aké i kə́ dɔ ndū najə̄ tə́, aké i kə́ dɔ yá̰a̰ gə̄ ń ī-ndang kadə̄ yā rāā gə̄ ní tə́, aké i kə́ dɔ yá̰a̰ kāgə̄ ɓē tə́ anī, ī-ndóōīdə́ ādə̄ gerə̄n̄, na sōgə́ rāān̄ yá̰á̰ kə́ majaĺ kə Kɔ́ɔ̄ɓē kadə̄ najə̄ i dɔdə́ tə́. Loo ń noō tə́ wōn̄g a rāā Kɔ́ɔ̄ɓē sesí aĺ ō, wōn̄g a rāān kə ngákó̰ó̰sí gēé aĺ ō. Ī-rāāī tītə̄ ń noō anī najə̄ a əsō dɔsí tə́ alé. 11Ba á̰a̰ī, Amaria ngol ngé tun̄ yá̰a̰ gə̄ ndi dɔsí tə́ tām̄ yā yá̰a̰ malang yā Kɔ́ɔ̄ɓē tə́ ō, Jebadia ngōn̄ Ismael ń i ngār kə́ dɔ de gə̄ kə́ kem ɓē ko̰o̰ yā Juda tə́ gə̄ malang ní a ndi dɔsí tə́ tām̄ yā yá̰a̰ malang yā mban̄g tə́ ō. Ngán Lebi gə̄ i ngé sarya gə̄ ta kumsí tə́. Ə́hɔī rɔ̄sí tɔgə ī-rāāī kəla! Ba ādə̄ Kɔ́ɔ̄ɓē i naā tə́ kə deē ń a rāā yá̰á̰ kə́ majə ní!
Currently Selected:
2 YÁ̰A̰ GƏ̄ 19: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
2 YÁ̰A̰ GƏ̄ 19
19
Josapat tə́ndā ngé sarya gə̄ dɔ nang kə́ Juda tə́
1Josapat mban̄g kə́ Juda tél aw̄ gogə́ ɓēé Jerusalem kanjə̄ kadə̄ yá̰á̰ kógə̄ḿ rāān. 2Yehu nge koō ta kə́ ngōn̄ Hanani tə́nī tan ba ədan na: I nge kem ndul n ā ī-rāā seneé ō, i madə̄ ba̰ā̰ Kɔ́ɔ̄ɓē gə̄ n ā ī-gḛydə́ ō ní a? Wōn̄g yā Kɔ́ɔ̄ɓē a reē dɔí tə́ najə̄ yá̰a̰ gə̄ ń noō tə́. 3Ɓá tā ba yá̰á̰ kə́ majə to kemií tə́ ɓáý, tɔdɔ̄ ḭ̄ ī-róō kāgə̄ ɓesə̄ Asera gə̄ adə̄ gətóon̄ kem ɓē yāí tə́ ō, ḭ̄ ōō ta Nə́ɓā kə ngarā̰ kemií mámák adə̄ ī-rāā yá̰á̰ ń kemən ndigə ní ō.
4Josapat ndi i Jerusalem. Gō tə́ anī ni teē njə̄rā kə gō ɓē gə̄ yā ngán Israel gēé. Əla gír i Beer Seba bátə́ ugə̄ń gō nang kə́ mbalá yā Epəraim tə́. Ni-tél kə de gēé reē sedə́ gogə́ rɔ̄ Kɔ́ɔ̄ɓē Nə́ɓā yā kaadə́ gə̄ tə́. 5Ni tə́ndā ngé sarya gə̄ kem ɓēé, tə̄ndādə́ kə̄ kem ɓē kə́ ngan̄g ngan̄g gə̄ kə́ dɔ nang kə́ Juda tə́ malang, 6ba ədadə́ na: Ə̄ndāī kumsí gír kəla ń ā ī-rāāī yā rāā ní tə́ majə, tām̄ sarya ń ā ī-rāāī yā rāā ní i kə rī deé alé, ba i kə rī Kɔ́ɔ̄ɓē. Adə̄ dan ń ā ī-gān̄gī sarya ní anī, Kɔ́ɔ̄ɓē nəkɔ́ i naā tə́ sesí. 7Ní, ī-ɓōlíī Kɔ́ɔ̄ɓē ō, ə̄ndāī kumsí gíŕ yá̰á̰ ń ā ī-rāāī tə́ ní majə ō. Tɔdɔ̄ Kɔ́ɔ̄ɓē Nə́ɓā yājí i nge rāā yá̰a̰ gōtə́ aĺ aĺ ō, i nge rāā yá̰a̰ tām̄ ta kum deē aĺ ō, i nge ndigə kadə̄ karī yā nujəń sarya aĺ ō. 8Josapat tə́ndā ngán Lebi gə̄ kə ngé tun̄ yá̰a̰ gə̄ kə ngār gə̄ kə́ dɔ gír kojə gə̄ yā ngán Israel gə̄ tə́ kem ɓē kə́ Jerusalem tə́ ō, yā kadə̄ gāngə̄n̄ sarya kə rī Kɔ́ɔ̄ɓē ō, yā kadə̄ gāngə̄n̄ sarya kɔ̄l̄ naā gə̄ yā de kə́ kem ɓēé gə̄ ō. 9Ni ədadə́ kadə̄ rāān̄ yá̰a̰ gə̄ ń toō:
Ā ī-rāāī i tītə̄ ń toō beé: Ī-ɓōlíī ndíĺ Kɔ́ɔ̄ɓē loon tə́ ō, ī-rāāī i kə háĺ kə́ gōtə́ ō, kə kem kə́ rɔ̄kum ō. 10Kə dɔ reē ngákó̰ó̰sí gə̄ ń ḭḭn̄ kə̄ kem ɓē yādə́ gə̄ tə́ a reēn̄ kə najə̄ yādə́ gēé nosí tə́ noō, ká i najə̄ kə́ dɔ tɔ̄l̄ deē tə́, aké i kə́ dɔ ndū najə̄ tə́, aké i kə́ dɔ yá̰a̰ gə̄ ń ī-ndang kadə̄ yā rāā gə̄ ní tə́, aké i kə́ dɔ yá̰a̰ kāgə̄ ɓē tə́ anī, ī-ndóōīdə́ ādə̄ gerə̄n̄, na sōgə́ rāān̄ yá̰á̰ kə́ majaĺ kə Kɔ́ɔ̄ɓē kadə̄ najə̄ i dɔdə́ tə́. Loo ń noō tə́ wōn̄g a rāā Kɔ́ɔ̄ɓē sesí aĺ ō, wōn̄g a rāān kə ngákó̰ó̰sí gēé aĺ ō. Ī-rāāī tītə̄ ń noō anī najə̄ a əsō dɔsí tə́ alé. 11Ba á̰a̰ī, Amaria ngol ngé tun̄ yá̰a̰ gə̄ ndi dɔsí tə́ tām̄ yā yá̰a̰ malang yā Kɔ́ɔ̄ɓē tə́ ō, Jebadia ngōn̄ Ismael ń i ngār kə́ dɔ de gə̄ kə́ kem ɓē ko̰o̰ yā Juda tə́ gə̄ malang ní a ndi dɔsí tə́ tām̄ yā yá̰a̰ malang yā mban̄g tə́ ō. Ngán Lebi gə̄ i ngé sarya gə̄ ta kumsí tə́. Ə́hɔī rɔ̄sí tɔgə ī-rāāī kəla! Ba ādə̄ Kɔ́ɔ̄ɓē i naā tə́ kə deē ń a rāā yá̰á̰ kə́ majə ní!
Bibəl ta Sar̄ © L'Alliance Biblique du Tchad, 2006, 2010.