1 TIMOTE 6

1Ādə̄ ɓəlo gə̄ malang rāān̄ kɔ́ɔ̄də́ gə̄ i de kə́ asən̄ kadə̄ de gə̄ rɔȳn̄də́ tə́, yā kadə̄ deē tájəń rī Nə́ɓā aĺ ō, deē ədań najə̄ kə́ majaĺ dɔ yá̰á̰ ndóō yājí tə́ aĺ ō. 2Ngé gə̄ ń kɔ́ɔ̄də́ gə̄ i ngé taā kem gə̄ ní, lōōn̄ kəga rɔ̄də́ gidə ɓāŕ naā ngōkó̰ó̰ tə́, ba mbātə́nń ɓōĺ ndíĺ kɔ́ɔ̄də́ gə̄ ní. Ba dan ń ngé gə̄ ń nin̄-rāān̄ kəla adə̄n̄də́ ní, i ngé taā kem gə̄ ō, i kó tár gə̄ ō ní, majə kadə̄ nin̄-rāān̄ kəla majə tɔȳ kə́ kété adə̄n̄də́.

Loo rāā yá̰a̰ kə gō ń Nə́ɓā ndigə ní kə́ rɔ̄kum

I yá̰á̰ ń toō n majə kadə̄ ī-ndóō de gə̄ ō, ī-tāādə́ dɔ tə́ ō ní. 3Ré deē kógə̄ḿ ndóō de gə̄ yá̰á̰ kə́ rang ba əya̰ najə̄ kə́ rɔ̄kum gə̄ yā Kɔ́ɔ̄ɓē yājí Jeju Kərist kɔ̄ɔ́ ō, əya̰ yá̰á̰ ndóō kə́ əhɔn̄ naā kə taā kem yājí kɔ̄ɔ́ ō anī, 4ni i de kə́ kɔjə rɔ̄ ādə̄n dɔ bo ō, ni i de kə́ ger̄ yá̰a̰ aĺ ō. Ngur nējə̄ naā najə̄ ō, kəhɔ naā najə̄ tə́ kə́ dan gān̄g aĺ ō i kemən tə́, adə̄ rāān kə́ mo̰y tə́. Nge ń noō a reē i kə kəndā naā nií ō, kɔ̄l̄ naá ō, tájə̄ naá ō, tetə kem kə́ majaĺ ō, 5kəhɔ naā najə̄ tə́ kə́ dan gān̄g aĺ, yā de gə̄ kə́ gír̄ yādə́ nujə kɔ̄ɔ́, tām̄ tḭ̄ḭ̄ kə́ nin̄-tḭ̄ḭ̄n̄ ta najə̄ kə́ rɔ̄kum kɔ̄ɔ́ tə́ ō. Nin̄-ɔjənə̄ń na rāā yá̰a̰ kə gō ń Nə́ɓā ndigə ní, na i yá̰a̰ kənge yá̰a̰.

6Rāā yá̰a̰ kə gō ń Nə́ɓā ndigə ní, i yá̰a̰ kənge kə́ ngá̰ý rɔ̄kum, ba i loo ń rɔ̄ deē ní nelə̄n tām̄ yā yá̰a̰ ń ni-ənge kɔ̄ɔ́ ní tə́ tá. 7Tɔdɔ̄ jə-reēī dɔ nang tə́ i kə yá̰á̰ kógə̄ḿ aĺ ō, tá j-asiī kun yá̰á̰ kógə̄ḿ kə́ dɔ nang tə́ kaw̄ń aĺ ō. 8Adə̄ ré j-əngeī yá̰a̰ kəsa ō, kūbə̄ ko̰ō̰ ō anī, nge ń noō asəjí. 9Ba ngé gə̄ ń gḛyn̄ kənge yá̰á̰ ngá̰ý ní, a əsōn̄ kum gūmbə̄ yā yá̰a̰ nāā tə́ ō, yā ngur yá̰á̰ kə́ to mbóo gə̄ tə́ ō, kə́ majaĺ gə̄ tə́ ō ń i yá̰á̰ kə́ a nujən̄ de gə̄ sák sák ō, a tḭ̄ḭ̄n̄ tadə́ ō ní. 10Tɔdɔ̄ ngəra yá̰á̰ kə́ tōr̄ gə̄ malang, i rāā ta nar. Dan ń ngé kə́rēý gə̄ adə̄n̄ rɔ̄də́ njɔ́ḿ tāmən tə́ ní, nin̄-əya̰n̄ taā kem kɔ̄ɔ́, ba ndúm̄ aw̄n̄ sa̰y ō, yá̰á̰ kə́ tōr̄ kə́ tayā tayā gə̄ rāān̄də́ ō.

Yá̰a̰ gə̄ kə́ Pol əda Timote kadə̄ rāā

11Ba ḭ̄ ń i deē yā Nə́ɓā ní, ā̰ȳ kɔ̄ɔ́ ta yá̰a̰ gə̄ ń noō tə́. Ba ī-sāā yá̰a̰ rāā kə́ gōtə́ ō, yá̰a̰ rāā kə́ kə gō ń Nə́ɓā ndigə ní ō, taā kem ō, tár ō, kəhɔ rɔ̄ tɔ́gə ō, háĺ kə́ sɔl̄ lɔm ō. 12Ī-rɔ̄ɔ̄ rɔ̄ɔ̄ kə́ majə yā taā kem ō, ə́hɔ ndi kə kumuú kə́ ngándáńg ō. Tɔdɔ̄ ndɔ̄ ń ə́dań najə̄ taā kem yāí ta kum de kə́ ngá̰ý gə̄ tə́ ní, Nə́ɓā ɓāríī kadə̄ ī-ger̄ ndi kə kumuú kə́ ngándáńg ngeé ń toō. 13Nə́ɓā kə́ nge rāā kadə̄ yá̰a̰ malang ndi kə kumneé ō, Kərist Jeju ń əda najə̄ kə́ kum tə́ ta kum Po̰sə Pilatə tə́, adə̄ əda i najə̄ taā kem kə́ majə ngá̰ý kə̄ ndágá ō ní, m-ə́daī yá̰á̰ ń toō ta kumdə́ tə́ kadə̄ ī-rāā: 14Ī-rāā yá̰a̰ kə gō míndə́ Nə́ɓāá, kadə̄ ī-ndiń kanjə̄ kadə̄ majaĺ kógə̄ḿ tákī ō, kanjə̄ najə̄ kógə̄ḿ dɔí tə́ ō, bátə́ ndɔ̄ ń kadə̄ Kɔ́ɔ̄ɓē yājí Jeju Kərist a ɔjəń rɔ̄n kə̄ ndágá tə́ ní. 15Ni a ɔjə rɔ̄n kə̄ ndágá i kum mbang ń Nə́ɓā a ɔjə tə́ ní. I nəkɔ́ kógə̄ḿ beē ngóy n i dɔ yá̰a̰ gə̄ tə́ ō, nge rāā kadə̄ kemjí nel̄jí ō, Mban̄g kə́ dɔ mban̄g gə̄ tə́ ō, Kɔ́ɔ̄ɓē kə́ dɔ kɔ́ɔ̄ ɓē gə̄ tə́ ō ní. 16I ni ngóy n i de kə́ a oy alé ní. Ni-ndi i dan loo kə́ unjə̄ kow tə́, kə́ de kə́ asə kaw̄ rɔ̄ tə́ gətóo. Kɔsə gɔn i yān ō, tɔ́gə́ kə́ to ngándáńg i yān ō. Adə̄ i tītə̄ ń noō.

17Ə́dá ngé kənge yá̰á̰ ngá̰ý kə́ dɔ nang tə́ laā gə̄ kadə̄ ɔjən̄ rɔ̄də́ alé. Ə́dádə́ ādə̄ əndān̄ kemdə́ dɔ yá̰a̰ kənge kə́ a mān̄ kɔ̄ɔ́ tə́ alé, banī kadə̄ əndān̄ kemdə́ dɔ Nə́ɓā ń i nge kadə̄jí yá̰a̰ malang ngá̰ý tə́ kadə̄ jə-gerī nelə̄n̄ ní tə́. 18Ə́dádə́ kadə̄ rāān̄ majə kə de gēé ō, kadə̄ rāān̄ yá̰á̰ kə́ majə ngá̰ý ō, kadə̄ adə̄n̄ de gə̄ yá̰a̰ ngá̰ý ō, kadə̄ kēgə̄n̄ yá̰a̰ yādə́ gə̄ adə̄n̄ madə̄də́ gə̄ tə́ ō. 19I tītə̄ ń noō n nin̄ a ɔsən̄neé dɔ yá̰a̰ kənge kə́ majə ō, kə́ rɔ̄kum ō, kə̄ naā tə́, tām̄ yā ndɔ̄ kə́ bírí tə́ ní, yā kadə̄ əngen̄neé ndi kə kumuú kə́ rɔ̄kum.

20Ɓɔ́ Timote, yá̰a̰ ɓɔ̄ɔ̄ ní, ī-ngɔ̄m̄ ādə̄ to kə taá. Ī-mbātə́ kɔr̄ najə̄ kə́ kanjə̄ kumən gə̄, tɔdɔ̄ najə̄ gə̄ ní mbātə́n̄ naā kə taā kemeé ō, ī-mbātə́ najə̄ kə́ kɔy kə̄ naā tə́ ń i yá̰a̰ ger̄ kə́ rɔ̄kum aĺ ní ō. 21Yá̰a̰ ger̄ kə́ rɔ̄kum aĺ ngeé ń toō ní, de kə́rēý gə̄ ədan̄ na nin̄ na n-aw̄n̄neé, adə̄ nin̄-əya̰n̄ taā kem kɔ̄ɔ́ ba aw̄n̄ sa̰y.

Ādə̄ Nə́ɓā rāā majə sesí.

Currently Selected:

1 TIMOTE 6: SARDC

Highlight

Copy

Compare