1 TIMOTE 5

Yá̰a̰ gə̄ kə́ yā kadə̄ deē rāā tām̄ yā ngé taā kem gə̄ tə́

1Ī-lōō gɔŕyɔ̄ de kə́ tɔgə ɓə́ga kə ngangāá, ba ɔ̄jən tītə̄ kə́ ni i bɔbí beē. Ɔ̄jə̄ balsáa gə̄ tītə̄ kə́ nin̄ i ngákó̰ó̰í gə̄ ō, 2kó̰o̰ dəyá̰ gə̄ tītə̄ kə́ nin̄ i kó̰ó̰í gə̄ ō, mandə gə̄ tītə̄ kə́ nin̄ i ngákó̰ó̰í kə́ dəyá̰ gə̄ ō, kə háĺ kə́ unjə̄ njáý njáý.

3Ī-rɔȳ dəyá̰ kə́ ngaa koy gə̄ ń deē yādə́ gə̄ gətóon̄ ní. 4Ré dəyá̰ kə́ ngaa koy kógə̄ḿ i kə ngánən gēé, aláa i kə ngán kaan gēé anī, i nin̄ n majə kadə̄ a̰a̰n̄ gō gír kojə yādə́ ngeé ń toō ní. Yá̰á̰ ń ngéédə́ gə̄ rāān̄ tām̄ yādə́ tə́ ní, majə kadə̄ nin̄-tél rāān̄ tām̄ yādə́ tə́ ō. Tɔdɔ̄ nge ń noō i yá̰á̰ kə́ nel̄ Nə́ɓā. 5Dəyá̰ kə́ ngaa koy ń deē yān gətóo ō, ndi i kə kérneé ō ní, əndā kemən i dɔ Nə́ɓā tə́ ō, na̰y i kə̄ loo ndɔ̄ȳn tə́ ō, loo rāān ɓɔ́ tə́ ndɔ̄ɔ́ ō kadaá ō. 6Banī dəyá̰ kə́ ngaa koy ń i nge ngɔ̄də̄ gō yá̰á̰ kə́ nelə̄n gə̄ tə́ ní, ká ré ndi kə kumneé ɓáý gə̄gē anī, ni i kə́ koy kɔ̄ɔ́. 7Yá̰á̰ ń kadə̄ ə́dádə́ kadə̄ rāān̄ ō, kadə̄ najə̄ gətóoń dɔdə́ tə́ ō ní n noó. 8Ré deē kógə̄ḿ a̰a̰ gō ngéén gə̄ alé, mandang ɓáa a̰a̰ i gō de kə́ kem kújə yān tə́ gə̄ alé anī, ni nējə̄ i taā kə́ ni-taā kem ō, ni i de kə́ majaĺ tɔȳ de kə́ taā kem aĺ ō.

9Yā kadə̄ deē əndāń rī dəyá̰ kə́ ngaa koy dan madə̄n gə̄ tə́ kem makətūbūú ɓáa, ādə̄ ɓālə̄n kə́ ngá̰ý aĺ i kutə mehḛ́ ō, ādə̄ ngaan i kógə̄ḿ beē ō tá. 10Majə kadə̄ de gə̄ ger̄nən̄ tām̄ kəla rāān gə̄ kə́ majə tə́. Ādə̄ ni-ətō ngán gə̄ ō, əhɔ de gə̄ kə̄ rɔ̄n tə́ majə ō, tə́go nja de gə̄ yā Nə́ɓā ō, rāā kə ngé gə̄ n wurdə́ ɔldə́ ní ō, əndā rɔ̄n ta kəla malang kə́ majə tə́ ō.

11Ba dəyá̰ kə́ ngaa koy kə́ na̰y mandə ɓáý gə̄ ní, ī-lōō ndang rīdə́ makətūbūú. Tɔdɔ̄ loo ń ré ngur dəngam rāādə́ anī, a əya̰n̄ Kərist kɔ̄ɔ́, ba a gḛyn̄ taā dəngam. 12I tītə̄ ń noō n najə̄ a əhɔńdə́ ní, tɔdɔ̄ míndə́də́ ń ənīn̄ kété ní, ran̄ dɔ tə́ alé. 13Tá ɓáý to̰ ní, dan ń yá̰á̰ kə́ yā kadə̄ nin̄-rāān̄ gətóó ní, kəla rāādə́ i njə̄rā kaw̄ kə̄ ta de gə̄ tə́, kə̄ kem kújə gə̄ tə́. Ba kə́ majaĺ tɔȳ nge ń noō ní, nin̄ i ngé najə̄ wa gə̄ ō, ngé ger̄ kəhɔ tadə́ dɔ najə̄ tə́ aĺ gə̄ ō, ngé kɔr̄ najə̄ kə́ ndetədə́ aĺ gə̄ ō. 14Adə̄ dəyá̰ kə́ ngaa koy kə́ na̰y mandə ɓáý gə̄ ní, m̄-gḛy kadə̄ táān̄ dəngam gə̄ ō, ojən̄ ngán gə̄ ō, əndān̄ kumdə́ gír de kə́ kem kújə yādə́ gə̄ tə́ majə ō. I beé tá nin̄ a adə̄n̄neé ngé rɔ̄ɔ̄ sejí gə̄ ta róbə kəda najə̄ kə́ majaĺ dɔjí tə́ alé. 15Tɔdɔ̄ dandə́ tə́ ní, ngé kə́rēý gə̄ ndúmə̄n̄ kɔ̄kə́, adə̄ unən̄ gō Sətan. 16Ré nge taā kem kógə̄ḿ kə́ dəyá̰ i kə dəyá̰ kə́ ngaa koy gēé dan ngéén gə̄ tə́ anī, ādə̄ nəkɔ́ rāā sedə́. Majə kadə̄ rāā kə dəyá̰ kə́ ngaa koy gēé ngeé ń toō ní, kəlan i dɔ ngé kán̄ naā gə̄ tə́ alé, yā kadə̄ nin̄-əngen̄neé ta róbə rāā kə ngé ngaa koy kə́ rɔ̄kum gēé.

17Kum kɔɔ̄ gə̄ ń ɔrən̄ no loo kán̄ naā majə ní, ādə̄ de gə̄ adə̄n̄də́ yá̰á̰ kəndā nja yādə́ loo nja kə́ jōó tə́. Ba kə́ ngá̰ý ɓáa i ngé gə̄ ń əndān̄ rɔ̄də́ ta kəla kə́ ɔȳ ngá̰ý tə́, adə̄ i ta kəla kɔjə najə̄ tə́ ō, ndóō de gə̄ yá̰a̰ tə́ ō ní. 18Tɔdɔ̄ makətūbə̄ yā Nə́ɓā əda na:

Ré man̄g a səɓā kōō anī, ā ə́la bendə tan tə́ aĺ ō,

deē ń i nge rāā kəla ní, majə kadə̄ kɔ́ɔ̄ ənge kəgā yān ō.

19Ī-lōō ndigə najə̄ kə́ əndān̄ dɔ de kə́ kum kɔɔ̄ tə́. Ba ré i de kə́ kum tə́ gə̄ jōó, aláa i mətá, n ədan̄ najə̄ dɔn tə́ pá tá ī-ndigə ɓáý. 20Ngé gə̄ ń rāān̄ majaĺ ní, ī-gɔŕyɔ̄də́ ta kum madə̄də́ gə̄ tə́ malang ādə̄ gotə gə̄ ɓōlə́n̄.

21m̄-rāāī ɓɔ́ ta kum Nə́ɓā tə́ ō, ta kum Kərist Jeju tə́ ō, ta kum de kə́ dɔ rā̰ tə́ gə̄ ń gə̄rān̄də́ ní tə́ ō, ī-rāā yá̰a̰ gə̄ ń m-ɔ́jiī toó kanjə̄ kəya̰ kógə̄ḿ kɔ̄ɔ́ ō, kanjə̄ rāā yá̰a̰ kógə̄ḿ tām̄ ta kum deē ō. 22Ī-lōō tewle kəndā jīí dɔ deē kógə̄ḿ tə́. Əla rɔ̄í dan majaĺ yā deē tə́ alé. Ī-ngɔ̄m̄ hálí īkɔ́, ādə̄ ḭ̄ i de kə́ ūnjə̄ njáý njáý.

23Ī-lōō ka̰ȳ man̄ ngóy, banī ā̰ȳ kasə nduú sḛ́ý, tām̄ yā mo̰y kə́ kemií tə́ ń a njə́ɓāī dejə ní.

24De kə́rēý gə̄ majaĺ yādə́ to i kə̄ dɔ ndágá, kanjə̄ kadə̄ deē rāā sarya sedə́ ɓáý. Banī majaĺ yā de kə́ rang gə̄ ní, kum deē a teē dɔ tə́ i gō sarya kə́ deē rāā sedə́ tə́. 25Kəla kə́ majə gə̄ ní ton̄ kə̄ dɔ ndágá wáńg i tītə̄ ń noō ō. Ngé gə̄ ń loo ka̰a̰də́ i láẃ aĺ ní, asən̄ to loo ɓɔ̄ɔ̄ tə́ aĺ ō.

Currently Selected:

1 TIMOTE 5: SARDC

Highlight

Copy

Compare