1 SAMUEL 27

Dabid ɓɔ̄ɔ̄ rɔ̄n ɓē Pilistin gēé

1Dabid gír̄ najə̄ əda na: Ndɔ̄ kə́rēý tə́ anī Saul a ndi yā tɔ̄lə̄m̄ ɓáý. Yá̰á̰ kə́ só tə́ ń kadə̄ m̄-rāā ní i kadə̄ m-ā̰ȳ m-āw̄ dɔ nang yā Pilistin gə̄ tə́ kɔ̄ɔ́ ngóy. Loo ń noō tə́ Saul a lōō gír ndəlem̄ tə́ dɔ nang yā ngán Israel gə̄ tə́ malang ō m-ā m̄-teē jīn tə́ ō. 2Dabid ḭḭ əsō róbó kə deē yān gə̄ kə́ ɓú mehḛ́ ba aw̄n̄ rɔ̄ mban̄g kə́ Gat ń i Akis ngōn̄ Maok ní tə́. 3Nin̄ malang ndin̄ rɔ̄ Akis tə́ kem ɓē kə́ Gat tə́ kə gír kojə yādə́ gēé. Dabid ndi kə nə̄yá̰n kə́ jōó gə̄ ń i Ahinoam kə́ Jisreel ō Abigail kə́ Karmel ń i nə̄yá̰ nge yo Nabal ní ō. 4Dan ń Saul oō kadə̄ Dabid a̰ȳ aw̄ ɓɔ̄ɔ̄ rɔ̄n kem ɓē kə́ Gat tə́ ní anī, ni-lōō gír ndəlen tə́. 5Ndɔ̄ kə́rēý tə́ anī Dabid əda Akis na: Kɔ́ɔ̄ɓē gə̄, ré ī-ndigə rāā kem majə seḿ anī, ādə̄m̄ ta róbə ādə̄ m̄-ndi ngōn̄ ɓē kə́rēý kə́ kem muú tə́. Kə m̄-ndi seí kem ɓē bo yā mban̄g tə́ i tām̄ rí tə́? 6Ndɔ̄ nəkɔ́ ń noō tə́ Akis adə̄n ɓē kə́ Sikəlag. I tām̄ najə̄ ń noō tə́ n ɓē kə́ Sikəlag i ɓē yā mban̄g kə́ Juda tə́ gə̄ bátə́ ɓōólaā ní. 7Dabid ndi dɔ nang yā Pilistin gə̄ tə́ rāā ɓāl̄ kógə̄ḿ kə nāā sɔ́. 8Dabid nin̄ kə deē yān gēé a ḭḭn̄ i Sikəlag n a aw̄ a rɔ̄ɔ̄n̄neé Gesur gə̄ ō Girji gə̄ ō Amalek gə̄ ō ní. Gesur gə̄ kə Girji gə̄ kə Amalek gə̄ i de gə̄ kə́ ndin̄ gō nang ń noō tə́ i jóo. Nin̄ ndin̄ ta kaw̄ kə̄ Sur ō ndin̄ bátə́ kum kə̄ dɔ nin̄ dɔ nang kə́ Ejiptə tə́ ō. 9Dabid tɔ̄l̄ de kə́ kem ɓēé gə̄ malang. Ni-əya̰ dəyá̰ aĺ ō dəngam aĺ ō. Ni-əhɔ man̄g gə̄ ō batə̄ gə̄ ō bə̄yā̰ gə̄ ō kərō gə̄ ō jámbal gə̄ ō ɔy kūbə̄ gə̄ ō. Ta télən anī ni a aw̄ i rɔ̄ Akis tə́ dejə. 10Ba ré Akis dəjen na ké ɓōólaā ké rɔ̄ɔ̄n̄ i de kə́ rá gə̄ wa anī, ni a tūr̄ a əda Akis na n-rɔ̄ɔ̄n̄ na i de gə̄ ń ndin̄ gō nang kə́ Negeb kə́ Juda tə́ ní, aláa de gə̄ ń ndin̄ gō nang kə́ Negeb yā Yerameel gə̄ tə́ ní, aláa de gə̄ ń ndin̄ gō nang kə́ Negeb yā Keni gə̄ tə́ ní. 11Dabid əya̰ adə̄ deē reē kə de kə́ dəngam aké de kə́ dəyá̰ kem ɓē kə́ Gat tə́ alé. Ni-ɓōĺ najə̄ kadə̄ de gə̄ ní teēn̄ kə gírneé dɔɔ́. Yá̰á̰ ń Dabid rāā ní n noó ō hálən ń ndiń dɔ nang yā Pilistin gə̄ tə́ ní n noó ō. 12Akis ənī kemən mámák adə̄ Dabid. Ni gír̄ kemən tə́ na: Dabid rāā ngán Israel gə̄ ń i deē yān gə̄ ní yá̰á̰ kə́ tōr̄ ngá̰ý, adə̄ nin̄ a̰a̰n̄ loo tə́gā tadə́ dɔn tə́ to̰ alé, adə̄ a rāā i kəla yāḿ mā kə́ njɔ́ḿ gə̄ tə́.

Currently Selected:

1 SAMUEL 27: SARDC

Highlight

Copy

Compare