1 SAMUEL 26
26
Dabid mbātə́ tɔ̄l̄ Saul ɓáý to̰
1De gə̄ kə́ Jip aw̄ əngen̄ Saul kem ɓē kə́ Gibea tə́ ba ədanən̄ na: Dabid ɓɔ̄ɔ̄ rɔ̄n i dɔ ngán mbal̄ gə̄ kə́ Hakila tə́, ngɔr kə̄ kə̄sāá ní ī-ger̄ aĺ a? 2Anī Saul aw̄ kem dəla loo kə́ Jip tə́ yā ndəle Dabid. Ngé rɔ̄ɔ̄ gə̄ kə́ Israel tə́ kə́ gerə̄n̄ rɔ̄ɔ̄ tɔȳ madə̄də́ gə̄ asən̄ dūbú mətá aw̄n̄ seneé. 3Saul rāā gérger yān i kadə róbə́ tə́ dɔ ngán mbal̄ gə̄ kə́ Hakila tə́ ń ran̄ sɔɔ̄n̄ ta naā kə loo kə́ kə̄sāá tə́ ní. Dabid ndi i kem dəla loo tə́. Ni-a̰a̰ kadə̄ Saul reē i ngɔ̄dən tə́ kem dəla loo tə́, 4tām̄ ni-əla de gə̄ kəndā ma̰ȳ looó, adə̄ ni ger̄ ká̰ý ká̰ý kadə̄ Saul ugə̄. 5Ni-aw̄ ugə̄ loo ń Saul rāā gérger yān tū tə́ ní tə́, ba a̰a̰ loo ń Saul nin̄ kə Abner kə́ ngōn̄ Ner ń i ngol áskar gə̄ ní ton̄ tū tə́ ní. Saul to i danaá kem gérgereé, ba ɓūtə̄ ngé rɔ̄ɔ̄ gə̄ ton̄ gīrə̄n̄ gidən.
6Dabid əda Ahimelek ń i Het ní nin̄ kə Abisai kə́ ngōn̄ Seruya ō kə́ ngōkó̰o̰ Joab ō na: I náā n ndigə kaw̄ seḿ bátə́ rɔ̄ɔ̄ Saul tə́ kem gérgereé ní? Anī Abisai tél ədan na: M-ā m-āw̄ seí. 7Ndɔ̄ɔ́ anī Dabid nin̄ kə Abisai udən̄ kem gérger yā ngé rɔ̄ɔ̄ gə̄ tə́. Saul to kem gérgereé danaá to a ɓīī ō. Nənga yān i kə́ kudə kum kə̄ dɔ tə́, ba Abner nin̄ kə ɓūtə̄ ngé rɔ̄ɔ̄ gēé ton̄ kə gō gidəneé a ɓīīn̄. 8Abisai əda Dabid na: Ɓōólaā Nə́ɓā əla madə̄ ba̰ā̰í jīí tə́. Adə̄ ādə̄m̄ ta róbə ādə̄ m-āw̄ m-ɔ́sən kə nəngaá ta kógə̄ḿ ngóy m-ə́ren nang tə́. M-ā m-ɔ́sən i nja jōó alé. 9Dabid əda Abisai na: Ī-lōō tɔ̄lən. Ɔ́jəń na deē a tɔ̄l̄ mban̄g kə́ Kɔ́ɔ̄ɓē ur yibə̄ ngār dɔn tə́ kanjə̄ kənge najə̄ a? 10Tītə̄ ń Kɔ́ɔ̄ɓē ndiń kə kumneé noō ní, m-ə́daī najə̄ kə́ rɔ̄kum, Kɔ́ɔ̄ɓē nəkɔ́ a tɔ̄lən. Majanī a oy i yo kə́ karī, aláa a oy i ta rɔ̄ɔ̄ tə́. 11Ré m̄-tɔ̄l̄ mban̄g ń Kɔ́ɔ̄ɓē ur yibə̄ ngār dɔn tə́ ní anī, ādə̄ mā i yá̰á̰ kə́ to yḛr kum tām̄ yā Kɔ́ɔ̄ɓē tə́. Ní ɔ̄r̄ nənga ń ra kum kə̄ dɔn tə́ noō ō, ún gaĺ man̄ yān ō, ba ādə̄ j-aw̄. 12Adə̄ Dabid un nənga ō gaĺ man̄ ō kə́ dɔ Saul tə́ ba ɔtə aw̄n̄. Deē a̰a̰də́ aĺ ō deē ger̄ gōdə́ aĺ ō de kə́ ndól̄ dɔ ɓīī tə́ gətóo ō. De gə̄ malang a ɓīīn̄ i mbée, tɔdɔ̄ Kɔ́ɔ̄ɓē ənī ɓīī katə̄ dɔdə́ tə́. 13Dabid mān̄ aw̄ ra gidə kə́ nú tə́ dɔ mbalá dɔɔ́, ba dɔ dáńdə́ kə gérger yā Saul i sa̰y. 14Dabid tūr̄ kumən kə̄ rɔ̄ ɓūtə̄ ngé rɔ̄ɔ̄ gə̄ tə́ ba əga kɔŕ ədań Abner kə́ ngōn̄ Ner na: Abner, ā ī-ndigəm̄ aĺ a? Abner tél ədan na: I ḭ̄ náā n ā ə́ga kɔŕ ta mbī mban̄g tə́ toō? 15Dabid əda Abner na: Abner, ḭ̄ i de kə́ dəngam aĺ a? Tá de kə́ tītīí gətóo dɔ nang kə́ Israel tə́ ɓáý to̰. Ba i ba̰ý á ī-ngɔ̄m̄ mban̄g ń i kɔ́ɔ̄í ní alé ní? Deē kə́rēý reē tɔ̄lən tə́. 16Yá̰á̰ ń ī-rāāī ní majə alé. Tītə̄ ń Kɔ́ɔ̄ɓē ndiń kə kumneé noō ní, majə kadə̄ óyiī malang, tɔdɔ̄ kɔ́ɔ̄sí ń i mban̄g ń Kɔ́ɔ̄ɓē ur yibə̄ ngār dɔn tə́ ní sḭḭ̄ ī-ngɔ̄m̄niī alé. Á̰a̰ loo kum kə̄ dɔn tə́ ké nənga yān ō gaĺ man̄ yān ō ton̄ noó wa.
17Saul ger̄ ndū Dabid adə̄ ni-əda na: Ngōnə̄ḿ Dabid, i īkɔ́ n m-ōō ndūí toō a? Dabid ndigən əda na: Kɔ́ɔ̄ ɓē gə̄, i mā nəkɔ́. 18Gō tə́ anī əda na: Kɔ́ɔ̄ ɓē gə̄, ā ī-ndəlem̄ i tām̄ rí tə́? m̄-rāā i rí yāí? I rí kə́ majaĺ n m̄-rāā ní. 19Kɔ́ɔ̄ ɓē gə̄, m̄-rāāī ɓɔ́, ōō najə̄ ń mā nge kəla yāí m-ā m-ə́daī ní: Ré i Kɔ́ɔ̄ɓē n ra seí ta rāām̄ yá̰á̰ kə́ beē anī, ādə̄ un usə yá̰a̰ ndējə̄ kə́ kotə majə. Ba ré i de gə̄ anī, ādə̄ Kɔ́ɔ̄ɓē ndɔ̄ĺdə́. Tɔdɔ̄ ɓōólaā tə̄ɓāmə̄n̄ kɔ̄ɔ́, ɔgə̄mə̄n̄ ndi dɔ nang ń Kɔ́ɔ̄ɓē adə̄ deē yān gə̄ tə́ ní. Adə̄ to i tītə̄ kə́ ədamə̄n̄ na kə m-āw̄ kə m̄-rāā ɓesə̄ gə̄ beé. 20Ba mā m̄-ndigə koy sa̰y rɔ̄ Kɔ́ɔ̄ɓē tə́ alé. Kɔ́ɔ̄ ɓē gə̄, i tām̄ rí tə́ á ī-rɔ̄ɔ̄m̄ mā ń i ngáɓer kə̄njá ní? I tām̄ rí tə́ á ā ī-ngɔ̄də̄m̄ tītə̄ loo ngɔ̄də̄ kerwḛy dɔ mbal̄ gə̄ tə́ ní? 21Saul əda na: m̄-rāā majaĺ. Ngōnə̄ḿ Dabid, ī-tél ī-reē. M-ā m̄-rāāī majaĺ to̰ alé, tām̄ ndɔ̄ɔ́ laā ḭ̄ á̰a̰ā̰ kadə̄ ndi kə kumuú yāḿ mā i yá̰á̰ kə́ gātə̄n i ngá̰ý ta kumií tə́. Rɔ̄kum, yá̰á̰ ń m̄-rāā ní i tītə̄ kə́ i nge kɔ̄r̄ n rāā yá̰a̰ beé. m̄-rāā i yá̰á̰ kə́ gōtə́ aĺ ngá̰ý. 22Dabid tél əda na: Kɔ́ɔ̄ ɓē gə̄, nənga yāí n toó. Ādə̄ balsáa yāí kógə̄ḿ reē un. 23Ādə̄ Kɔ́ɔ̄ɓē əndā njají kógə̄ḿ kógə̄ḿ tām̄ yá̰á̰ kə́ gōtə́ ń jə-rāāī tə́ ní ō tām̄ yá̰á̰ kə́ rɔ̄kum tə́ ō. Ɓōólaā Kɔ́ɔ̄ɓē əlaī jīḿ tə́ banī m-ɔ́də tɔ̄lī alé. Tɔdɔ̄ ḭ̄ i mban̄g ń Kɔ́ɔ̄ɓē ur yibə̄ ngār dɔí tə́ ní. 24Tītə̄ ń ndií ḭ̄ kə kumií i yá̰á̰ kə́ gātə̄n i ngá̰ý ta kum mā tə́ ní, ādə̄ ndiḿ mā kə kumḿ i yá̰á̰ kə́ gātə̄n i ngá̰ý ta kum Kɔ́ɔ̄ɓē tə́ ō ba ādə̄ ɔrə̄m̄ kɔ̄ɔ́ kum yá̰á̰ kə́ to yo gə̄ tə́ malang.
25Saul əda Dabid na: Ngōnə̄ḿ Dabid, ādə̄ Kɔ́ɔ̄ɓē rāā majə seí. Rɔ̄kum ā ī-rāā yá̰á̰ kə́ bo gə̄ ō ā ī-teē deē ō.
Dabid aw̄ loo yān, ba Saul tél dɔ tə́ aw̄ gogə́ ɓēé.
Currently Selected:
1 SAMUEL 26: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
