1 PIYER 3
3
Najə̄ yā dəyá̰ nin̄ kə dəngameé
1Sḭḭ̄ dəyá̰ gə̄, yāsí ń toó: Ōōī ta ngaasí gə̄ yā kadə̄ ká ré ngé kə́rēý gə̄ dandə́ tə́ mbātə́n̄ taā kem najə̄ yā Nə́ɓā gə̄gē anī, nin̄-taān̄ kem kə ta kūl̄ háĺsí, kanjə̄ kadə̄ ɔ̄rī najə̄ sedə́. 2Tɔdɔ̄ a̰a̰n̄ kadə̄ háĺsí i háĺ kə́ kanjə̄ najə̄ dɔ tə́ ō, a̰a̰n̄ kadə̄ ī-ɓōlíī ndíĺdə́ ō. 3Ādī yá̰á̰ súū rɔ̄ yāsí i yá̰á̰ súū rɔ̄sí kə́ gidə tə́ ndágá alé, tītə̄ dɔ kə́ tūm̄, aláa nə̄ngá lɔ́r, aláa kūbə̄ kə́ majə kə́ ō̰ō̰ī. 4Ba ādī majə yāsí i majə kə́ ngarān̄g kemsí tə́. Ādī i majə kə́ a nujə aĺ bátə́ ń i majə yā háĺ kə́ sɔl̄ lɔ́ḿ lɔ́ḿ ō, yā ndíl de kə́ ndi jəke ō ní tá. I majə ń noō n i majə kə́ gātə̄n i ngá̰ý ta kum Nə́ɓā tə́ ní. 5Dəyá̰ gə̄ kə́ ɔrə̄n̄ kam̄də́ tām̄ yā Nə́ɓā tə́ kété jóó kə́ ngé kəndā kemdə́ dɔ Nə́ɓā tə́ gə̄ a rāān̄ mandə yādə́ i tītə̄ ń noō, tɔdɔ̄ oōn̄ ta ngaadə́ gə̄. 6Tītə̄ Sara ń oō ta Abəraham adə̄ a ɓārə́n na i kɔ́ɔ̄n ní. Sḭḭ̄ ī-téliī ngánən kə́ dəyá̰ gə̄ i kə ta kūl̄ rāā yá̰á̰ kə́ majaá kanjə̄ ɓōĺ yá̰á̰ kógə̄ḿ.
7Yāsí sḭḭ̄ ngaa dəyá̰ gə̄ n toó: Ré ī-ndiī kə nə̄yá̰sí gēé anī, majə kadə̄ ī-gerī na nin̄ i de kə́ ngan̄g aĺ ngá̰ý gə̄. Ī-ɓōlíī ndíĺdə́, tɔdɔ̄ i gáŕ kadə̄ nin̄ a əngen̄ ndi kə kumuú ń Nə́ɓā a adə̄ de gə̄ karī ní sesí ō. Ī-rāāī tītə̄ ń noō i yā kadə̄ yá̰á̰ kógə̄ḿ utə̄ń ta róbə ndɔ̄ȳ yāsí gə̄ alé.
Ka̰a̰ tápə̄ najə̄ yā yá̰á̰ kə́ gō tə́ tə́
8Yā tɔ̄ləń ta ɓáa, sḭḭ̄ malang ní, ādī kemsí i gō naā tə́ ō, kumsí o̰o̰sí kə naá ō, ī-táriī naā tītə̄ ń ngákó̰o̰ naā gə̄ a tárən̄neé naā ní ō, á̰a̰ī kum tō ndoō yā madə̄sí gə̄ ō, ī-téliī kə rɔ̄sí kə̄ nang tə́ ō. 9Ré rāān̄sí yá̰á̰ kə́ majanī, ī-lōōī tél rāādə́ yá̰á̰ kə́ majaĺ kum gotə ō, ré tájə̄n̄sí anī, ī-lōōī tél tájə̄də́ kum gotə ō. Banī ī-tɔ́rī tasí tá dɔdə́ tə́. Tām̄ sḭḭ̄ kɔ́ gə̄ kə dɔsí ní, Nə́ɓā ɓāŕsí i yā tɔ́r̄ tan dɔsí tə́. 10Tɔdɔ̄ makətūbə̄ yā Nə́ɓā əda na:
Deē ń gḛy ndi ndi kə́ majə ō,
ka̰a̰ ndɔ̄ kə́ tō rɔ̄nel̄ gə̄ ō ní,
majə kadə̄ ni-əhɔ tan dɔ najə̄ kə́ majaĺ tə́ ō, dɔ najə̄ kə́ sor̄ gə̄ tə́ ō.
11Majə kadə̄ ni-tūr̄ gidən kɔ̄ɔ́ ta yá̰á̰ kə́ majaĺ tə́
ba rāā yá̰á̰ kə́ majə ō, əhɔ rɔ̄n tɔgə loo sāā lɔm tə́ ō.
12Tɔdɔ̄ kum Kɔ́ɔ̄ɓē i dɔ de kə́ ngé rāā yá̰a̰ gō tə́ gə̄ tə́ ō,
ni nēl̄ mbīn yā koōń ndɔ̄ȳ yādə́ ō.
Banī ni-mbātə́ najə̄ gō ngé rāā yá̰a̰ majaĺ gə̄ tə́#3.12 K. 10-12: Á̰a̰ī Pā 34.13-17.
13Ré ɔjiī kə̄ ndágá kadə̄ sḭḭ̄ i de gə̄ kə́ ī-təngāī loo rāā yá̰á̰ kə́ majə tə́ anī, i náā ɓáý to̰ n a rāāsí yá̰á̰ kə́ majaĺ ní? 14Ká ré i kadə̄ á̰a̰ī tápə̄ najə̄ yā yá̰á̰ kə́ gōtə́ kə́ ī-rāāī tə́ gə̄gē anī, rɔ̄sí nel̄sí. Ī-ɓōlíīdə́ aĺ ō, ī-lōōī kadə̄ ndíĺsí a̰ȳ ō. 15Banī Kərist ń i Kɔ́ɔ̄ɓē ní, ɔ̄rī kamə̄n tayā ngarān̄g kemsí tə́. Ī-ndiī dɔ rɔ̄sí tə́ kə dɔ ndɔ̄ gə̄, yā kadə̄ ɔ́jiī gíŕ yá̰á̰ ń ə̄ndāī kemsí dɔ tə́ ní kə̄ no ngé gə̄ ń a dəjen̄sí gíŕ tə́ ní. 16Banī ə̄nīī rɔ̄sí lɔm ɔ́jiīneédə́ gír ō, ī-ɓōlíī ndíĺdə́ ō. Ādī najə̄ gətóo dɔsí tə́, yā kadə̄ ré tetən̄ najə̄ dɔsí tə́ anī, ngé tə́da najə̄ kə́ majaĺ dɔ háĺ kə́ majə ń sḭḭ̄ ə́ngeī kə ta kūl̄ ɓoo naā yāsí kə Kərist ní, rɔ̄də́ sɔl̄də́ tām̄ najə̄ kɔr̄də́ tə́. 17Tɔdɔ̄ ka̰a̰ tápə̄ loo rāā yá̰á̰ kə́ majə tə́, kə gō ń kem Nə́ɓā ndigəń ní, i só tə́ ngá̰ý tɔȳ ka̰a̰ tápə̄ loo rāā yá̰á̰ kə́ majaĺ tə́. 18Tām̄ Kərist nəkɔ́ oy ɓá najə̄ yā yá̰á̰ kə́ majaĺ gə̄ ń de gə̄ rāān̄ tə́ ní. Ni a oy yo kə́ rang to̰ alé. Ni ń i de kə́ súmūú ní, oy tām̄ yā de kə́ súmūú aĺ gə̄ tə́, yā kaw̄ń sesí rɔ̄ Nə́ɓā tə́. Tɔ̄l̄nən̄, banī Ndíl Nə́ɓā rāā adə̄ ni-tél ndi kə kumneé gogə́.
19De gə̄ ń oyn̄ ba ndíĺdə́ i dəngáyá ní gə̄gē, ni-aw̄ ɔjədə́ najə̄ kə ta kūl̄ Ndíl Nə́ɓā ngeé ń toō. 20Kumən na ɔjə i ndíl de gə̄ ń kété mbātə́n̄ ta Nə́ɓā, dan ń Nə́ɓā a tə́gań tan ɓáý ndɔ̄ gə̄ ń Noe a rāań to bo tə́ ní. I de kə́ sḛ́ý beē gə̄, adə̄ malang ɓáa i deē sɔ́sɔ́ ngóy n udən̄ kem toó ajən̄neé ní. 21Man̄ ngeé ń toō i yá̰á̰ kə́ ɔjə kum gotə batém ń ngɔlaā ajəsí ní: Batém ngeé ń toō i batém tə́gó yá̰á̰ kə́ yḛr gə̄ kə́ rɔ̄ deē tə́ kɔ̄ɔ́ alé, banī i de kə́ ənī míndən adə̄ Nə́ɓā kanjə̄ kadə̄ kemən ɔjən yá̰á̰ kə́ majaĺ. Batém ní ajəsí i kə ta kūl̄ koy ń Jeju oy ta ndól̄ ní. 22Jeju ngeé ń toō aw̄ dɔ rā̰ tə́ ba ndi dɔ jī ko̰ Nə́ɓā tə́. Ni-ndi noó o̰o̰ń ɓē dɔ de kə́ dɔ rā̰ tə́ gə̄ tə́ ō, dɔ ngé ko̰o̰ ɓē kə́ rang gə̄ kə́ dɔ rā̰ tə́ ō, dɔ ngé tɔ́gə gə̄ kə́ dɔ rā̰ tə́ ō.
Currently Selected:
1 PIYER 3: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.