1 MAKABE GƏ̄ 3
3
Judas Makabe i ngār yā ngé ndigə najə̄ gō Jipə gə̄ tə́
1Ngōnən Judas ń a ɓāŕnən̄ na i Makabe ní, ndi ngār gotən tə́. 2Ngákṵ́ṵn gə̄ malang ō, de gə̄ yā bɔbə̄n gə̄ malang ō ní, reē dḭḭ̄nən̄ ō, rɔ̄ɔ̄n̄ tām̄ yā ngáń Israel gə̄ tə́ kə rɔ̄nelé ō.
3Ni rāā adə̄ rī gír deē yān gə̄ ɓār̄ tɔȳ kə́ kété.
Dan ń əla kūbə̄ rɔ̄ɔ̄ yān rɔ̄n tə́ anī, to tītə̄ báw deē beé.
Ni ɔy yá̰a̰ rɔ̄ɔ̄ yān gə̄ ba ənī rɔ̄ɔ̄.
Ni ngɔ̄m̄ géŕ ger yān kə kaskaraá.
4Ni rāā yá̰a̰ tītə̄ ɓɔl beé,
tītə̄ ngōn̄ ɓɔl kə́ a nūū a reēń kə̄ dɔ dā̰ kə́ yā kadə̄ əhɔ əsa tə́ beē,
5Ngé rāā yá̰a̰ kə gō kem ndigə yā
Nə́ɓāá aĺ gə̄ ń ndəledə́ ba teē dɔdə́ tə́ ní, ni ngɔ̄də̄də́ ō,
tə́nī ngé hóȳ gír deē yān gə̄ horoó ō.
6Ngé rāā yá̰a̰ kə gō kem ndigə yā Nə́ɓāá aĺ gə̄ ní, kemdə́ i jōó jōó tām̄ ɓōĺnən̄.
Ngé rāā yá̰a̰ kə gō kem ndigə yā Nə́ɓāá aĺ gə̄ malang ní, ɓōĺ rāādə́ ō,
ni teē kə gír deē yān gēé ɓəloó ō.
7Judas rāā adə̄ mban̄g gə̄ ngá̰ý ní yá̰a̰ tɔȳ dɔdə́ ō,
yá̰á̰ kə́ bo bo gə̄ ń ni rāā ní, adə̄ ngáń Israel rɔ̄nel̄ ō,
lo ń ré əga kem de gə̄ dɔn tə́ anī, a ɓōkə́n̄ i tɔ̄ȳ ngándáńg ō.
8Ni njə̄rā kə gō ɓē gə̄ kə́ Juda tə́ ō,
rāā adə̄ ngé rāā yá̰a̰ kə gō kem ndigə yā
Nə́ɓāá aĺ gə̄ gətóon̄ kɔ̄ɔ́ kem ɓē gə̄ ní tə́ ō.
Ni un wūn̄g yā Nə́ɓā kɔ̄ɔ́ dɔ ngáń Israel gə̄ tə́.
9Rīn ɓār̄ bátə́ ugə̄ ta ngóy dɔ nang tə́ ō,
ngé gə̄ ń kété tadə́ i kə́ tḭ̄ḭ̄ kɔ̄ɔ́ ní, ni kán̄də́ kə̄ naā tə́ ō.
Judas tetə rɔ̄ɔ̄ kə́ ta kəga dɔ gír i jōó
10Apoloniyus ɔsə dɔ áskar gə̄ kə́ nin̄ i Jipə aĺ gə̄ kə̄ naā tə́ ō, ɔsə dɔ ɓūtə̄ ngé rɔ̄ɔ̄ gə̄ kə́ Samari kə̄ naā tə́ ō, yā rɔ̄ɔń ngán Israel gə̄. 11Judas oō najə̄ ní, anī teē tə́nī tan ba rɔ̄ɔn ō, tɔ̄lən ō. De gə̄ ngá̰ý tə́sōn̄, əngen̄ do kə́ asə yodə́ ō, ngé gə̄ ń teēn̄ ta yo tə́ ní, a̰ȳn̄ naā kɔ̄ɔ́ ō. 12Ngáń Israel gə̄ ɔȳn̄ yá̰a̰ kənge yādə́ gə̄ kə́ ta rɔ̄ɔ̄ tə́. Judas taā kaskar yā Apoloniyus ba rɔ̄ɔń bátə́ kadə̄ oyń. 13Sero̰ ngol áskar gə̄ kə́ Siri, oō kadə̄ Judas na kán̄ ngé rɔ̄ɔ̄ gə̄ ō, ngé kán̄ naā gə̄ kə́ ngé ra dɔ ndūdə́ tə́ gə̄ ō, kə̄ dɔn tə́. 14Anī əda kə̄ kemən na: M-ā m̄-rāā kadə̄ rīḿ ɓār̄ ō, kadə̄ de gə̄ rɔȳmə̄n̄ kem ɓē kṵ tə́ ō. M-ā m̄-rɔ̄ɔ̄ Judas kə de gə̄ yān gēé, nin̄ ń i ngé kídə̄ ndū najə̄ yā mban̄g ní. 15Anī ni aw̄ yān ō, ɓūtə̄ ngé rāā yá̰a̰ kə gō kem ndigə yā Nə́ɓāá aĺ gə̄ ngá̰ý aw̄n̄ seneé ō, yā kaw̄ rɔ̄ɔ̄ ngáń ngáń Israel gə̄ yā daləń ba̰ā̰. 16Dan ń Sero̰ i ngɔr kə̄ lo kə́ əta tan kə̄ dɔɔ́ kə́ Betə Horo̰ tə́ anī, Judas teē tə́nī tan kə ɓūtə̄ de kə́ sḛ́ý beē gēé yā rɔ̄ɔn. 17Dan ń de gə̄ ngeé ń toō a̰a̰n̄ áskar gə̄ kə́ a reēn̄ kə̄ dɔdə́ tə́ yā rɔ̄ɔ̄də́ anī, ədan̄ Judas na: Jḭḭ̄ ń kutəjí i ngá̰ý aĺ ní, de kə́ ngá̰ý gə̄ kə́ tɔ́gə́də́ i ngá̰ý ń nuū j-a j-asiī rɔ̄ɔ̄də́ i ba̰ý? Tām̄ tɔ́gə́jí gətóo ō, j-əsaī yá̰a̰ aĺ ō. 18Anī Judas tūr̄ ədadə́ na: De kə́ sḛ́ý beē gə̄ asən̄ tetə de kə́ ngá̰ý gə̄ rɔ̄ɔ̄ i hɔliyɔ karī. Ta kum Nə́ɓā tə́ ɓáa, i kutə de gə̄ n i yá̰á̰ kə́ a ajə deē ní alé. Ká de gə̄ i ngá̰ý, aké i ngá̰ý aĺ gə̄gē anī, nge ń nuū i yá̰á̰ kə́ karī. 19Ta rɔ̄ɔ̄ tə́ ní, tetə rɔ̄ɔ̄ ɔjə i dɔ kutə áskar gə̄ alé, ba i Nə́ɓā ń i nge kadə̄ de gə̄ tɔ́gə́ ní. 20Madə̄ ba̰ā̰jí gə̄ a reēn̄ kə̄ dɔjí tə́ yā rɔ̄ɔ̄jí. Nin̄ ɔjən̄ rɔ̄də́ ngá̰ý ō, kemdə́ ndul ngá̰ý ō. Gḛyn̄ tɔ̄l̄jí kə nə̄yá̰jí gə̄ kə ngáńjí gə̄ ō, ndigən̄ kɔy yá̰a̰ yājí gə̄ ō. 21Banī jḭḭ̄ jə-rɔ̄ɔ̄ī i yā kajəń rɔ̄jí ō, kadə̄ jə-ngɔ̄mīiń ndū najə̄ gə̄ ń Nə́ɓā adə̄jí ní ō. 22Nə́ɓā a rējə̄ madə̄ ba̰ā̰jí gə̄ kɔ̄ɔ́ nojí tə́, ba ī-lōōī ɓōĺ.
23Dan ń Judas ɔr̄ najə̄ oy anī, ənī Sero̰ kə de gə̄ yān gēé rɔ̄ɔ̄. Ni teē sedə́ rétə́ gēé, əhɔdə́ dɔ jīdə́ tə́. Adə̄ a̰ȳn̄ naā kɔ̄ɔ́ non tə́. 24Judas kə de gə̄ yān gēé ngɔ̄də̄n̄də́, ḭḭn̄ sedə́ lo kə́ risə kə̄ nang tə́ kə́ Betə Horo̰ tə́ bátə́ ugə̄n̄ sedə́ kum kubə tə́. De gə̄ kə́ asən̄ ɓú sɔ́sɔ́ ń nuū tə́sōn̄ ō, gotə gə̄ a̰ȳ aw̄n̄ dɔ nang yā Pilistin gə̄ tə́ ō. 25De gə̄ ɓōlə́n̄ Judas nin̄ kə ngákṵ́ṵn gēé ō, ɓē gə̄ ń ndi gīrə̄n̄ gidədə́ ní ndewn̄ ō. 26Rīn ɓār̄ bátə́ ugə̄ rɔ̄ mban̄g A̰tiyokus tə́ ō, gotə gír nápar de kə́ rang gə̄ malang ɔrə̄n̄ najə̄ tetə rɔ̄ɔ̄ yān gə̄ ō.
Mban̄g A̰tiyokus kə́ nge kṵ sɔ́ mēr̄ Lijiyas nujə ɓē kə́ Israel kɔ̄ɔ́
27Dan ń A̰tiyokus kə́ nge sɔ́ oō gotə najə̄ ní anī, wūn̄g rāan ngá̰ý. Ni adə̄ ndūn adə̄ ɔsən̄ dɔ ɓūtə̄ áskar gə̄ kə́ kem ɓē kṵ yān tə́ malang naā tə́, adə̄ i ngé rɔ̄ɔ̄ gə̄ kə́ tɔ́gə́də́ i ngá̰ý. 28Ni teē ta lo ngɔ̄m̄ nar yān, ba ɔy nar adə̄ ɓūtə̄ ngé rɔ̄ɔ̄ gə̄ gír kəla kə́ ɓāl̄ kógə̄ḿ tə́ ō, ədadə́ na kə ndin̄ dɔ rɔ̄də́ tə́ tām̄ yā yá̰a̰ malang ń a rāā yā rāā yá̰á̰ tə́ ní ō. 29Gō tə́ anī, teē dɔ tə́ kadə̄ nar gətóo kem sandúkə ngɔ̄m̄ nar yān gə̄ tə́ ō, a̰ā̰ kadə̄ lambóó ń de kə́ gō nang yān tə́ gə̄ adə̄n̄ ní, i yá̰á̰ kə́ ngár̄ aĺ ō. Nge ń nuū sɔɔ̄ń i mbātə́ najə̄ gō naā tə́ ō, yá̰á̰ kə́ to kum kaȳ aĺ ō ń ni rāā adə̄ to kem ɓēé ní. Tɔdɔ̄ ni ɔgə̄ de gə̄ rāā yá̰a̰ kə gō ndū najə̄ kə́ jóo gə̄ kɔ̄ɔ́. 30Kété ní, jī bēl̄ lo rāā yá̰a̰ yān i kɔy nar mangəń yá̰a̰ ō, i kadə̄ de gə̄ yá̰á̰ ngá̰ý ō. Ni rāā yá̰á̰ ń nuū tɔȳ mban̄g kə́ kété non tə́ gə̄ malang. Ba ń toō ɓáa, ɓōĺ najə̄ kadə̄ tɔ́gən asə rāā tītə̄ ń nuū tṵ alé. 31Adə̄ ndi i kə sōlōó najə̄ yá̰á̰ ń nuū tə́. Lo ń nuū tə́ ní gḛy kaw̄ dɔ nang kə Persə tə́ yā kaw̄ taā lambóo gə̄ kə́ gō nang gə̄ ngeé ń nuū tə́ ō, kɔy nar ngá̰ý ō. 32Lijiyas ń i de kə́ bo ō, gírən i mban̄g ō ní, əndān dɔ yá̰a̰ gə̄ tə́, adə̄ i dɔ dɔ nang ń ḭḭ bā Opəratə tə́ bátə́ ugə̄ń dɔ nin̄ nang kə́ Ejiptə tə́ ní. 33Ni əndā kəla kɔjə̄ ngōnən A̰tiyokus dɔ Lijiyas tə́, bátə́ kadə̄ ni tél reē ugə̄ń. 34Adə̄n núsə ɓūtə̄ áskar gə̄ ō, kedə̄ rɔ̄ɔ̄ gə̄ ō, yá̰a̰ malang ń ni ra dɔ tə́ yā rāā ní, adə̄n kɔjə̄ kə́ dɔ tə́ ō. Mandang ɓáa, i najə̄ yā de gə̄ kə́ dɔ nang kə́ Jude tə́ ō, Jerusalem tə́ ō. 35I gáŕ kadə̄ Lijiyas əla ngé rɔ̄ɔ̄ gə̄ kadə̄ aw̄ ɔrə̄n̄ tɔ́gə́ Israel kɔ̄ɔ́ ō, nujən̄ gotə de kə́ Jerusalem gə̄ ō, rāān̄ kadə̄ əga deē dɔdə́ tə́ tṵ aĺ ō. 36I gáŕ kadə̄ ni tə́ndā ngán tə̄rā gə̄ dɔ gō nang yādə́ tə́ malang ō, gán̄g dɔ nang yādə́ adə̄ de gə̄ kɔ̄ɔ́ ō. 37Mban̄g ɔy núsə áskar gə̄ ń nayn̄ ní, ba ḭḭ A̰tiyos ń i ɓē bo kə́ kem ɓē kṵ yān tə́ ní, kə ɓāl̄ kə́ nge kṵ kutə sɔ́ kə kalən kə́ sīrí ba aw̄. Ni gān̄g bā Opəratə, ba teē ngán ɓē gə̄ kə́ gō nang kə́ mbalá tə́.
Ngé rɔ̄ɔ̄ gə̄ yā Lijiyas taān̄ dɔ nang kə́ Jude
38Lijiyas gə̄rā Pətoleme kə́ ngōn̄ Dorimen ō, Nikanor nin̄ kə Gorjiyas ō. Nin̄ ń i de gə̄ kə́ tɔ́gə́də́ i ngá̰ý dan madə̄ ta mban̄g gə̄ tə́ ní. 39Ni əladə́ kə de gə̄ dūbú kutə sɔ́ ō, ngé kal̄ sə́nda gə̄ dūbú sīrí ō, kadə̄ aw̄ nujən̄ dɔ nang yā Juda kɔ̄ɔ́ kə gō ndū mbangá. 40Nin̄ aw̄n̄ kə ngé rɔ̄ɔ̄ yādə́ gēé malang, ugə̄n̄ ngɔr rɔ̄ ɓē kə́ Emayus tə́ anī, əndān̄ géŕ ger yādə́ kum kubə tə́. 41Ngé rāā gātə̄ gə̄ kə́ gō nang ngeé ń nuū tə́ oōn̄ kōōdə́, anī ɔyn̄ lɔ́ŕ ngá̰ý ō, gində̄ arjā̰a̰ ngá̰ý ō, kángə́lá gə̄ ō, ba aw̄n̄ géŕ ger yādə́ tə́ mang ngáń Israel gə̄ tə́ yā rāādə́ ɓəlo tə́. Ɓūtə̄ áskar gə̄ kə́ Siri tə́ ō, kə́ dɔ nang yā Pilistin gə̄ tə́ ō, reē ərōn̄də́. 42Judas nin̄ kə ngákṵ́ṵn gēé a̰a̰n̄ kadə̄ yá̰á̰ kə́ to kum kaȳ aĺ a bo i kum kə̄ kété kété, tɔdɔ̄ ngé rɔ̄ɔ̄ gə̄ ndin̄ dɔ nang yādə́ tə́ ō, oōn̄ kadə̄ mban̄g adə̄ ndūn kadə̄ tɔ̄lə̄n̄ ngáń Israel gə̄ malang kɔ̄ɔ́ ō. 43Anī nin̄ ədan̄ naā na: Ādə̄ j-ajiī gír deē yājí gə̄ ta nujə kə́ sák sák kɔ̄ɔ́ tə́. Ādə̄ jə-rɔ̄ɔ̄ī tām̄ yādə́ tə́ ō, tām̄ yā lo kə́ táĺ yājí tə́ ō. 44Lo ń nuū tə́ ɓārə́n̄ ngáń Israel gə̄ kadə̄ əndān̄ dɔ rɔ̄də́ danaá tām̄ yā rɔ̄ɔ̄ tə́ ō, ndɔ̄ȳn̄ ō, rāān̄ Nə́ɓā ɓɔ́ kadə̄ ɔjə ka̰a̰ kum tō ndoō yān ō, kem majə yān ō kə̄ ndágá.
45Kété ní deē gətóo kem ɓē kə́ Jerusalem tə́.
De kə́ udə gətóo ō, de kə́ teē gətóo ō.
De gə̄ tə́ɓān̄ lo kə́ táĺ njadə́ tə́,
tə̄rā gə̄ ndin̄ lo kə́ ngan̄g kə́ kem ɓēé tə́,
de gə̄ kə́ nin̄ i Jipə aĺ gə̄ ndin̄ tū tə́.
Ngáń Israel gə̄ əgan̄ kɔŕ rɔ̄nel̄ tṵ alé.
Deē oō kōō nal aké i kənde tṵ alé.
Jipə gə̄ əndān̄ dɔ rɔ̄də́ danaá tām̄ yā rɔ̄ɔ̄ tə́
46Nin̄ kánə̄n̄ naā ba reēn̄ Maspa, lo ń ra sɔɔ̄n̄ ta naā kə ɓē kə́ Jerusalem ní tə́. Tām̄ kété ní, lo ndɔ̄ȳ yā ngáń Israel gə̄ i lo ń nuū tə́. 47Nin̄ ndin̄ ɓōō ndɔ̄ ń nuū tə́ ō, ɓírə̄n̄ rɔ̄də́ kə kūbə̄ sákāá ō, dɔdə́ i bū malang ō, rə́yā̰n̄ kūbə̄ yādə́ gə̄ ō. 48Nin̄ teēn̄ kem makətūbə̄ ndū najə̄ kə́ ɓír̄ gidə naā tə́ tə́dan̄, ba rāān̄ tītə̄ yā de gə̄ kə́ nin̄ i Jipə aĺ gə̄ ń a ndeēn̄ sāā yā koōń kɔjə̄ yā ɓesə̄ yādə́ gə̄ ní alé. 49Nin̄ reēn̄ kə kūbə̄ yā ngé tun̄ yá̰a̰ gə̄ ō, kōō kə́ ta kəga dɔ kə́ ndɔrɔ́ gə̄ ō, dɔ yá̰á̰ kə́ kɔr̄ kógə̄ḿ dan kə́ kutə tə́ gə̄ ō. Najir #3.49 Á̰a̰ī: Tə́da 6.2 gə̄ ń tɔ̄lə̄n̄ ta ndɔ̄ kənī ndū yādə́ gə̄ ní, ɔsən̄ dɔdə́ naā tə́ ō. 50Nin̄ unən̄ ndūdə́ kə̄ dɔɔ́ ngá̰ý ndɔ̄ȳnəń ədan̄ na: Kɔ́ɔ̄ɓē, yá̰á̰ ń kadə̄ jə-rāā kə yá̰a̰ ndējə̄ gə̄ ń toō ní i rí? De gə̄ ń toō ní, kə j-aw̄ sedə́ i rá? 51Tə́ɓān̄ lo kə́ táĺ yāí njadə́ tə́ ō, rāānən̄ lo kə́ karī tə́ ō, ngé tun̄ yá̰a̰ yāí gə̄ əhɔn̄ ndoō ō, rɔ̄də́ sɔl̄də́ ō. 52Nápar de gə̄ əndān̄ rɔ̄də́ naā tə́ yā reē nujəjí kɔ̄ɔ́. Yá̰á̰ ń nin̄ númə̄n̄ rāā sejí ní, ḭ̄ ī-ger̄. 53Ré ī-dḭḭ̄jí aĺ anī, j-a jə-rāā i ba̰ý n j-a jə-dumə̄ń tadə́ ní? 54Gō tə́ anī, kɔrə́n̄ burúnjə ō, əgan̄ kɔŕ ngá̰ý ō.
55Gō yá̰á̰ ń nuū tə́ anī, Judas tə́ndā ngār gə̄ dɔ de gə̄ tə́, dɔ de kə́ dūbú gə̄ tə́ ō, kə́ ɓú gə̄ tə́ ō, kə́ kutə mí gə̄ tə́ ō, kə́ kutə kógə̄ḿ gə̄ tə́ ō. 56Ngé gə̄ ń a rāān̄ i kújə yādə́, aláa əhɔn̄ dɔ dəyá̰ i ngɔr ɓáý, aláa ndɔrə̄n̄ kāgə̄ nduú i ngɔr ɓáý, aláa ɓōlə́n̄ i mbéé ní, ədadə́ kadə̄ tél aw̄n̄ gogə́ ɓēé, tītə̄ ń ndū najə̄ ədań ní. 57Lo ń nuū tə́ ngé rɔ̄ɔ̄ gə̄ ɔrə̄n̄ dɔɔ́, ba reē ndin̄ lo ń deē ra Emayus anī i kə̄ dām̄ mbɔ́r ɓē kə́ geleé tə́ ní. 58Judas ədadə́ na: ə̄ndāī dɔ yá̰a̰ rɔ̄ɔ̄ yāsí gə̄ danaá ō, ə́hɔī rɔ̄sí tɔgə ō, ī-ndiī dɔ rɔ̄sí tə́ yā kadə̄ bírí anī ī-rɔ̄ɔ̄ī nápar de kə́ rang gə̄ ń nuū ń ɔsən̄ dɔdə́ naā tə́ yā nujəjí sák sák kɔ̄ɔ́ ō, yā nujə kə lo kə́ táĺ yājí kɔ̄ɔ́ ō ní. 59Tɔdɔ̄ koyjí ta rɔ̄ɔ̄ tə́ i sóótə́ tɔȳ ka̰a̰ yá̰á̰ kə́ to kum kaȳ aĺ kə́ əsō dɔ nápar deē yājí gə̄ tə́ ō, dɔ lo kə́ táĺ yājí tə́ ō. 60Yá̰á̰ ń Kɔ́ɔ̄ɓē ndigə ní, a rāā.
Currently Selected:
1 MAKABE GƏ̄ 3: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.