1 MAKABE GƏ̄ 2
2
Nūū rɔ̄ yā Matatiyas nge tun̄ yá̰a̰
1Kem ndɔ̄ gə̄ ngeé ń nuū tə́ ní, Matatiyas kə́ ngōn̄ Ja̰a̰, kə́ ngōn̄ Simeo̰ ń i nge tun̄ yá̰á̰ kə́ dan ngán Yoyarib tə́ ní, ḭḭ Jerusalem aw̄ ndi Modin. 2Ngánən kə́ dəngam gə̄ i mí: adə̄ i Ja̰a̰ ń rī tɔ̄yn na i Gadi ní ō, 3Simeo̰ ń a ɓāŕnən̄ na i Tasi ní ō, 4Judas ń a ɓāŕnən̄ na i Makabe ní ō, 5Eleyajar ń a ɓāŕnən̄ na i Awaran ní ō, Jonata̰ ń a ɓāŕnən̄ na i Apus ní ō. 6Matatiyas a̰a̰ yá̰á̰ kə́ majə aĺ gə̄ ń de gə̄ rāān̄ dɔ nang kə́ Juda tə́ ō, kem ɓē kə́ Jerusalem tə́ ō ní anī, 7əda na:
Rɔ̄ ndoō i yāḿ! Ojəmə̄n̄ i kadə̄ m-á̰á̰ gír deē yāḿ gə̄ lo nujə tə́ ō,
m-a̰a̰ de gə̄ lo nujə ɓē kə́ táĺ tə́ ō,
kadə̄ m-údə m̄-ndi ba əlanə̄ń ɓē jī madə̄ ba̰ā̰ gə̄ tə́ ō,
tə̄rā gə̄ taānəń lo kə́ táĺ ō a?
8Kújə yā Kɔ́ɔ̄ɓē tél to tītə̄ deē kə́ kɔsə go̰n yān gətóo beé ō,
9Yá̰á̰ gə̄ ń ɔjən̄ kɔsə go̰n yān ní, ɔy aw̄nəń tītə̄ yá̰á̰ kə́ kɔy ta rɔ̄ɔ̄ tə́ beē ō,
tɔ̄lə̄n̄ ngáń kə́ dūú gə̄ ngá̰ý ndágə lo gə̄ kə́ kem ɓēé tə́ ō,
balsáa gə̄ oyn̄ yo kaskar yā madə̄ ba̰ā̰ gə̄ ō.
10I gír nápar de kə́ rá gə̄ n reē taān̄ ɓē kə́ Jerusalem aĺ ō,
ɔyn̄ yá̰a̰ kənge yān gə̄ aw̄nəń kɔ̄ɔ́ aĺ ō ní?
11Ɓē to i tītə̄ dəyá̰ kə́ ró̰ȳn̄ yá̰á̰ súū yān gə̄ malang rɔ̄n tə́ kɔ̄ɔ́ beē.
Ni ń i kɔ́ɔ̄ rɔ̄n ní, ngɔlaā ni i ɓəlo.
12Lo kə́ táĺ ń i majə yājí ō, i kɔsə go̰n yājí ō ní, tél dəla lo kɔ̄ɔ́ ō,
nápar de gə̄ rāān̄ adə̄ tél lo kə́ karī kɔ̄ɔ́ ō.
13Kum ndi kə kumuú tṵ na i rí?
14Matatiyas nin̄ kə ngánən gēé rə́yā̰n̄ kūbə̄ gə̄ kə́ rɔ̄də́ tə́ ō, ɓírə̄n̄ kūbə̄ sákə̄ rɔ̄də́ tə́ ō, əhɔn̄ ndoō ngá̰ý ō.
Matatiyas əsō wūn̄g
15De gə̄ ń mban̄g əndādə́ kadə̄ ɔsən̄ kə de gé kadə̄ lōōn̄ gír taā kem tə́ ní, reē ugə̄n̄ Modin yā tun̄ yá̰a̰. 16Israel gə̄ ngá̰ý reēn̄ rɔ̄də́ tə́, banī Matatiyas ō, ngánən gə̄ ō, ɔrə̄n̄ rɔ̄də́ kə kéŕdə́ ndin̄. 17De gə̄ ń mban̄g əladə́ ní, unən̄ najə̄ ɔrə̄n̄, ədan̄ Matatiyas na: ḭ̄ i ngār kə́ rīí ɓār̄ ō, kə́ bo ō, kem ɓē ń toō tə́. Ngání gə̄ ō, ngákṵ́ṵ́í gə̄ ō, ɔsən̄ kílí. 18Ní, ī-ndɔ́tə̄ kə̄ kété ta kəga dɔ, ba ī-rāā yá̰á̰ ń mban̄g əda kadə̄ yā rāā ní, tītə̄ ń nápar de gə̄ rāānəń ō, de kə́ Juda gə̄ rāānəń ō, ngé gə̄ ń əya̰n̄də́ Jerusalem rāānəń ō ní. Ḭ̄ ō, ngání gə̄ ō, ā ī-ndiī dan madə̄ mban̄g gə̄ tə́ ō, a adə̄n̄sí nar ō lɔ́r ō kadə̄ karī gə̄ ngá̰ý ō yā rɔȳńsí. 19Matatiyas tūr̄ əda kə tɔ́gɔ́ na: Ré nápar de gə̄ malang kə́ kem ɓē kṵ yā mban̄g tə́ oōn̄ najə̄ yān, adə̄ əya̰n̄ lo ndɔ̄ȳ yā kaadə́ gə̄ kɔ̄ɔ́ ba tetən̄ rɔ̄də́ gō ndū gə̄ ń mban̄g teēń tə́ ní anī, 20mā ō, ngánə́ḿ gə̄ ō, ngákṵ́ṵ́ḿ gə̄ ō, j-a j-əhɔ i gō madə̄ naā yā kaají gə̄. 21Ādə̄ Nə́ɓā rāā kem majə sejí ba rāā adə̄ j-əya̰ ndū najə̄ kɔ̄ɔ́ aĺ ō, j-əya̰ yá̰á̰ kə́ yā rāā gə̄ kɔ̄ɔ́ aĺ ō. 22Jḭḭ j-a j-oō najə̄ yā mban̄g alé, adə̄ yá̰a̰ gə̄ ń ni əda kadə̄ yā rāā ní, j-a jə-rāā alé. J-a j-əya̰ lo ndɔ̄ȳ yājí kɔ̄ɔ́ yā tɔ̄ɔń kṵṵ́ aké geleé aĺ ō.
23Dan ń ni ɔr̄ najə̄ ń nuū oy anī, Jipə kógə̄ḿ ndɔ́tə̄ kə̄ kété ta kum de gə̄ tə́ malang, yā tun̄ yá̰a̰ dɔ dabə tun̄ yá̰á̰ kə́ Modin tə́, kə gō ndū mbangá. 24Dan ń Matatiyas a̰a̰n anī, kemən tə́ngān ngá̰ý ō, ndew yak yak ō. Wūn̄g kə́ gōtə́ asən nák, adə̄ a̰ȳ ngɔ̄də̄ aw̄ əja míndə Jipə ní dɔ dabə tun̄ yá̰á̰ tə́. 25Ba deē yā mban̄g kə́ nge kɔsə kə de gé ta tun̄ yá̰á̰ ní tā anī, Matatiyas əhɔ tɔ̄lə̄n kə̄ ta jī tə́ nuū ō, mbəre dabə tun̄ yá̰a̰ ənī kɔ̄ɔ́ ō. 26Kemən təngān najə̄ yā Ndū najə̄ tə́ tītə̄ ń kem Pinas təngānəń dɔ Jimri kə́ ngōn̄ Salu tə́ ní.
Jipə kə́ ngé ra dɔ ndū najə̄ tə́ gə̄ ndin̄ dɔ rɔ̄də́ tə́ yā rɔ̄ɔ̄ dɔ rɔ̄də́ tə́
27Gō tə́ anī, Matatiyas ənī mbēr̄ kem ɓēé əda na: De gə̄ malang ń kemdə́ təngādə́ tām̄ yā ndū najə̄ tə́ ō, ɔsən̄ kíl madə̄ naā ō ní, ādə̄ unən̄ gōḿ. 28Gō tə́ anī nəkɔ́ Matatiyas ō, ngánən gə̄ ō, a̰ȳ aw̄n̄ kem mbal̄ gə̄ tə́, ba əya̰n̄ yá̰a̰ kənge yādə́ gə̄ malang kem ɓēé.
29Lo ń nuū tə́ de gə̄ ngá̰ý kə́ ngé sāā yá̰a̰ rāā kə́ gōtə́ ō, kə́ súūmú ō, aw̄ ndin̄ dəla lo tə́ 30kə ngáńdə́ gə̄ ō, nə̄yá̰də́ gə̄ ō, yá̰a̰ kul̄ yādə́ gə̄ ō, najə̄ yá̰á̰ kə́ majə aĺ ń a reē kə̄ dɔdə́ tə́ ní. 31Ədan̄ de gə̄ yā mban̄g gə̄ ō, áskar gə̄ ń ndin̄ Jerusalem ɓē yā Dabid tə́ ní ō, na ngé mbātə́ ndū najə̄ yā mban̄g gə̄ na ɔrə̄n̄ rɔ̄də́ aw̄ ndin̄ lo ɓɔ̄ɔ̄ rɔ̄ gə̄ kə́ dəla lo tə́. 32Anī ɓūtə̄ áskar kə́ ngá̰ý gə̄ ngɔ̄də̄n̄ gōdə́, aw̄ əngen̄də́. Ba ndin̄ tadə́ tə́ ō, rāān̄ gō rɔ̄də́ yā kaw̄ kənīdə́ rɔ̄ɔ̄ kə ndɔ̄ kə́ nge kṵ sīrí ō. 33Nin̄ ədan̄də́ na: Ń toō asə tā, ī-teēī ndágá ōōī ta mban̄g, ba ī-rāāī yá̰á̰ ń əda kadə̄ yā rāā ní, lo ń nuū tə́ ā ī-ndiī kə kumsí. 34Anī nin̄ ədan̄ na: J-a jə-teē aĺ ō, yá̰á̰ ń mban̄g əda kadə̄ yā rāā á i ɓōĺ gidə ndɔ̄ kə́ nge kṵ sīrí aĺ ní, j-a jə-rāā aĺ ō! 35Áskar gə̄ ənīn̄də́ rɔ̄ɔ̄ kə̄ ta jī tə́ nuū, 36banī nin̄ mbātə́n̄ tā̰ā̰də́ rɔ̄ɔ̄ ō, mbātə́n̄ tínīdə́ kə mbalá ō, mbātə́n̄ kutə̄ ta lo gə̄ ń ɓɔ̄ɔ̄n̄ rɔ̄də́ tū tə́ ní kadə̄ ngan̄g ō. 37Nin̄ ədan̄ na: Ādə̄ j-oyiī malang kem háĺ kə́ súūmú yājí tə́. Dɔ rā̰ ō, dɔ nang ō, i kə́ kum tə́ gə̄ kadə̄ sḭḭ̄ ī-tɔ̄lījí i kə gō róbə́ kə́ súūmú alé. 38Aw̄n̄ ngá̰ý dɔdə́ tə́ ənīn̄də́ rɔ̄ɔ̄ i kə ndɔ̄ kə́ nge kṵ sīrí bang, adə̄ nin̄ oyn̄ kə nə̄yá̰də́ gə̄ ō, ngáńdə́ gə̄ ō, yá̰a̰ kul̄ yādə́ gə̄ ō. De gə̄ malang ń oyn̄ ní, asən̄ dūbú kógə̄ḿ.
39Dan ń Matatiyas nin̄ kə madə̄n gēé oōn̄ gotə ní, nūūn̄də́ kə wurkatá 40ba ədan̄ naā na: Ré jə-rāāī tītə̄ ń ngákṵ́ṵ́jí gə̄ rāānəń ní, adə̄ jə-rɔ̄ɔ̄ī nápar de gə̄ kadə̄ jə-ndiīń kə kumjí ba jə-rāāiń yá̰a̰ kə jī bēl̄ lo rāan yājí aĺ anī, a tɔ̄ɔ̄n̄ kōōjí kɔ̄ɔ́ dɔ nang tə́ i láẃ ngá̰ý. 41Ndɔ̄ nəkɔ́ ń nuū tə́ ní, nin̄ unən̄ ndūdə́ ədan̄ na: Deē ń a reē yā kənījí rɔ̄ɔ̄ kə ndɔ̄ kə́ nge kṵ sīrí anī, ādə̄ jə-rɔ̄ɔ̄in̄. Lo ń nuū tə́, j-a j-oyiī malang tītə̄ ń ngákṵ́ṵ́jí gə̄ oynə̄ń lo ɓɔ̄ɔ̄ rɔ̄ yādə́ gə̄ tə́ ní alé.
42Anī ɓūtə̄ ngé rāā yá̰a̰ kə gō ń Nə́ɓā ndigə ní gə̄ ń i ngé wurkil gə̄ kə́ Israel tə́ ní ō, de gə̄ malang ń ndin̄ i tām̄ yā ndū najə̄ tə́ ní ō, reē ɓoon̄ rɔ̄də́ tū yādə́ tə́. 43De gə̄ malang ń ndigən̄ kadə̄ yá̰á̰ kə́ tōr̄ gə̄ ń nuū rāādə́ aĺ ní, reē ərōn̄də́ adə̄ kutədə́ reē kə̄ dɔ madə̄ tə́ ō, tɔ́gə́də́ reē kə̄ dɔ madə̄ tə́ ō. 44Nin̄ ɔsən̄ nja ngé rɔ̄ɔ̄ gə̄ kə̄ naā tə́ ō, əndan̄ ngé rāā majaĺ gə̄ ō, ngé rāā yá̰a̰ kə gō kem ndigə yā Nə́ɓāá aĺ gə̄ ō, kə wūngūú ngá̰ý. Gotə de gə̄ a̰ȳ aw̄n̄ ɓē nápar de kə́ rang gēé yā kajəń rɔ̄də́. 45Matatiyas nin̄ kə madə̄n gēé teē njə̄rān̄ kə gō ɓē gēé yā mbə́rē dabə tun̄ yá̰a̰ gə̄ tə́nī kɔ̄ɔ́ ō, 46ngáń kə́ kəja mɔtədə́ aĺ gə̄ ń nin̄ əngen̄də́ dɔ nang kə́ Israel tə́ ní, əjan̄ mɔtədə́ dɔ gúú tə́ ō. 47Nin̄ tə̄ɓān̄ ngáń kə́ ngé kɔjə rɔ̄də́ gə̄ kɔ̄ɔ́ ō, kəla ní udə róbó majə kem jīdə́ tə́ ō. 48Ndū najə̄ ń nápar de kə́ rang gə̄ ō mban̄g gə̄ ō ɔgə̄n̄ kun gō ní, nin̄ mērə̄n̄ de gə̄ kun gō ō, əya̰n̄ ta róbə adə̄n̄ nge rāā majaĺ aĺ ō.
Matatiyas ənī ndūn ō, oy ō
49Ndɔ̄ yā Matatiyas a rāā yā təgā anī, ni əda ngánən gə̄ na:
Kṵ ɓē kə́ ngɔlaā i kṵ ɓē yā kɔjə rɔ̄ ō, tájə̄ ndū ō,
i kum mbang ń yá̰a̰ gə̄ a nujənə̄ń ní ō, i kum mbang yā wūn̄g ō.
50Ngánə́ḿ gə̄, ngɔlaā ní ta i dɔsí tə́ kadə̄ ī-təngāī tām̄ yā ndū najə̄ tə́ ō,
kadə̄ ādī rɔ̄sí tām̄ yā madə̄ naā yā kaají gə̄ tə́ ō.
51Ādə̄ əga kemsí dɔ yá̰a̰ gə̄ ń kaají gə̄ rāān̄ ɓāl̄ yādə́ tə́ ní,
anī ā ə́ngeī kɔsə go̰n kə́ ngá̰ý ō, rīsí a ɓār̄ ngándáńg ō.
52Dan ń nāān̄ Abəraham ní, ni ra dɔ ndūn tə́,
anī Nə́ɓā rāan deē kə́ súūmú tə́.
53Kum mbang ń yá̰a̰ tɔȳń dɔ Jəjep ní, ni rāā yá̰a̰ kə gō míndə Nə́ɓāá,
anī ni tél kɔ́ɔ̄ ɓē kə́ Ejiptə.
54Nə́ɓā əhɔ madə̄ naā kə kaají Pinas kadə̄ ni i nge tun̄ yá̰á̰ kə́ ngándáńg
i tām̄ wurkil yān tə́.
55Jojəwe tél nge gān̄g sarya kə́ Israel tə́
sɔɔ̄ń i kəla yān kə́ ni rāā tɔ̄l̄ ta.
56Kaleb ənge dɔ nang yá̰a̰ ndəbā tə́ jī ngé kán̄ naā gə̄ tə́
i tām̄ najə̄ kə́ kum tə́ kə́ rɔ̄kum kə́ əda tə́.
57Dabid ənge kōr̄ kāgə̄ mbang kə́ a to kə dɔ ɓāl̄ gə̄,
i tām̄ ni rāā yá̰a̰ i gō yā Nə́ɓā tə́.
58unən̄ Eli aw̄n̄ seneé dɔ rā̰ tə́
i tɔdɔ̄ ni ɔjə kem tə́ngā yān kə́ tām̄ yā ndū najə̄ tə́.
59Ananiyas ō, Ajariya ō, Misayel ō ní, hor ṵṵdə́ alé,
i tām̄ taā kə́ nin̄ taān̄ kem Nə́ɓā mák mák tə́.
60Daniyel teē ta ɓɔl gə̄ tə́
sɔɔ̄ń i háĺ kə́ súūmú yān.
61I beé ní, majə kadə̄ ī-gerī yá̰á̰ ń toō majə,
de gə̄ malang ń əndān̄ kemdə́ dɔ
Nə́ɓā tə́ kə dɔ gír kojə yādə́ gēé ní,
tɔ́gə́də́ a təgā alé.
62Lo ń ré nge rāā majaĺ gḛy rāāsí yá̰á̰ kə́ tōr̄ anī, ī-lōōī ɓōĺ.
Tɔdɔ̄ kɔsə go̰n yān a tél yá̰á̰ kə́ ndum ō, kəde gə̄ a əsan̄ ō.
63Nge rāā majaĺ ḭḭ dɔɔ́ ɓōólaā,
ba bírí anī deē a əngen tṵ alé.
Tɔdɔ̄ ni a tél yā kaw̄ gogə́ kum bumbə́ru yān tə́ ō,
yá̰a̰ gə̄ ń ni ɔjə rāā ní, ta a to siriri kɔ̄ɔ́ ō.
64Ngánə́ḿ gə̄, ādə̄ sḭḭ̄ i de kə́ dəngam gə̄ ō, ə́hɔī ndū najə̄ ādī ngan̄g ō,
tām̄ i ni n a ɔsə go̰nsí ngá̰ý ní.
65Ngōkṵ́ṵ́sí Simeo̰ n toó, m̄-ger̄ kadə̄ ni i nge kadə̄ kɔjə̄ kə́ majə, ōōī najə̄ yān ngándáńg, anī ni a tél bɔbə̄sí. 66Juda Makabe ń wurən il i kə dūúneé ní, i ni n a tél ngol ngé rɔ̄ɔ̄ yāsí gə̄ ō, a rɔ̄ɔ̄ gír de kə́ rang gə̄ ō ní. 67Yāsí sḭḭ̄ tā a ngé rāā yá̰a̰ kə gō ndū najá gə̄ malang ní, ī-kánīdə́ kə̄ dɔsí tə́ ādə̄ ndi gīrə̄n̄ gidəsí ō, ī-rāāī ba̰ā̰ gír deē yājí gə̄ ō. 68Ngé ndɔ̄ȳ ɓesə̄ gə̄ ń rāān̄sí yá̰á̰ kə́ tōr̄ ní, ī-rāāīdə́ yá̰á̰ kə́ tōr̄ kum gotə ō. Yá̰a̰ gə̄ ń ndū najə̄ ɔjə kadə̄ yā rāā ní, ə́hɔī gō ī-rāāī ō. 69Gō tə́ anī, ni tɔ́r̄ tan dɔdə́ tə́ ō, oy aw̄ gō kaan gə̄ tə́ ō. 70Ni oy kem ɓāl̄ kṵ ɓē yā Gərek gə̄ kə́ nge kṵ ɓú kə kutə sɔ́ kə kalən kə́ mehḛ́ tə́. Dubə̄nən̄ i kem bāá ɓádə yā de gə̄ kə́ gír kojə yān tə́, kem ɓē kə́ Modin tə́ ō, Israel gə̄ malang nūūnən̄ ngá̰ý ō.
Currently Selected:
1 MAKABE GƏ̄ 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.