1 MAKABE GƏ̄ 13
13
Simo̰ un gotə Jonata̰
1Simo̰ oō kadə̄ Təripo̰ na ɔsə dɔ ngé rɔ̄ɔ̄ gə̄ naā tə́ ngá̰ý, yā kaw̄ nujəń lo dɔ nang yā Juda tə́. 2Dan ń a̰ā̰ kadə̄ ngáń Israel gə̄ a ndewn̄ i mbée tɔdɔ̄ ɓōĺ rāādə́ anī, aw̄ Jerusalem ɔsə dɔ de gə̄ naā tə́ ba 3nāā tetə kemdə́ kə̄ nang tə́ kə najə̄ ń toō əda na: Yá̰á̰ malang ń mā ō, ngákṵ́ṵ́ḿ gə̄ ō, kojə yāḿ gə̄ ō, jə-rāā yā rɔ̄ɔń dɔ ndū najə̄ yājí gə̄ tə́ ō, dɔ kújə yā Kɔ́ɔ̄ɓē tə́ ō ní, sḭḭ̄ ī-gerī majə. Ī-gerī rɔ̄ɔ̄ gə̄, kə tápə̄ gə̄ ń jə-tə́gā tají danaá ní ō. 4I tām̄ najə̄ ń nuū tə́ n ngákṵ́ṵ́ḿ gə̄ oynə̄ń tām̄ yā Israel tə́ ō, mā m̄-naań kə kérə́ḿ kal kógə̄ḿ beē ní ō. 5Kə́ ngɔr ń toō tə́ ní, m̄-gír̄ kajə rɔ̄ḿ kum mbang kə́ majə aĺ ń toō tə́ alé. M̄-majə m̄-tɔȳ ngákṵ́ṵ́ḿ gə̄ alé. 6Banī m-ā m̄-rɔ̄ɔ̄ dɔ gíŕ nápar deē yāḿ gə̄ tə́ ō, dɔ lo kə́ táĺ tə́ ō, nə̄yá̰sí gə̄ tə́ ō, ngáńsí gə̄ tə́ ō. Tām̄ nápar de gə̄ malang ní, nel̄də́ sejí aĺ ngá̰ý. Adə̄ əndān̄ rɔ̄də́ naā tə́ yā nujə sejí kɔ̄ɔ́ malang. 7Dan ń ngáń Israel gə̄ oōn̄ najə̄ gə̄ ń nuū ní, dɔdə́ ḭḭ já̰ já̰ ō, 8tūr̄ ədan̄ najə̄ ń toō kə tɔ́gɔ́ ō, ədan̄ na: ḭ̄ i ngār yājí kum gotə Judas ō, kum gotə ngōkṵ́ṵ́jí Jonata̰ ō. 9Ɔ́r nojí āw̄ sejí ta rɔ̄ɔ̄ tə́ ō, yá̰a̰ malang ń ā ə́dájí ní j-a jə-rāā ō. 10Ni ɔsə dɔ dəngam rɔ̄ɔ̄ gə̄ malang naā tə́ ō, nāgə̄rā tɔ̄l̄ ta ndogə̄ mbal̄ kə́ gidə ɓē kə́ Jerusalem tə́ ō, rāā lo kə́ ngan̄g gə̄ tū ndogə̄ mbal̄ ní tə́ adə̄ gīr̄ gidə ɓē kə́ Jerusalem ō. 11Ni əla Jonata̰ kə́ ngōn̄ Abəsalom kem ɓē kə́ Jope tə́ kə kutə áskar kə́ ngá̰ý gēé. Jonata̰ tə̄ɓā de kə́ kem ɓē kə́ Jope tə́ gə̄ kɔ̄ɔ́, ba ndi kemeé.
Təripo̰ gól̄ Simo̰ ba tɔ̄l̄ Jonata̰
12Təripo̰ ḭḭ kem ɓē kə́ Pətolemayis tə́ kə ngé rɔ̄ɔ̄ kə́ ngá̰ý gēé seneé aw̄ udəń kem ɓē kə́ Jude tə́. Ni un Jonata̰ ń i dəngáy ní adə̄ aw̄ seneé. 13Simo̰ reē əndā géŕ ger yān Adida, tadə́ sɔɔ̄ naā kə kubə. 14Dan ń Təripo̰ oō kadə̄ Simo̰ na un gotə ngōkṵ́ṵn ō, na əndā dɔ rɔ̄n danaá yā reē rɔ̄ɔn ō anī, əla de gə̄ kadə̄ aw̄ ədanən̄ na: 15I gáŕ kadə̄ ngōkṵ́ṵ́í Jonata̰ əla kə naraá kem mōȳ nar yā mban̄g tə́ sɔɔ̄ń kəla ń a rāā ní. Ba ni rāā nge ń nuū alé, i tām̄ najə̄ ń nuū tə́ n m-ə́hɔn dəngáyá ní. 16Ré ə́la kə gində̄ arjā̰a̰ kə́ kɔȳn i kəlōo dūbú jōó kə ɓú sīrí ō, kə ngánən kə́ dəngam gə̄ jōó kadə̄ i yá̰á̰ kə́ yā gān̄g dɔ gə̄ ō anī, m-ā m-ə́ya̰n dɔɔ́. I beé tá gō teēn dɔɔ́ tə́ anī, a əsō wūn̄g tají tə́ alé 17Simo̰ ger̄ kadə̄ i najə̄ kə́ kɔr̄ kə ngamaá ɓá tā, ba əla kadə̄ reēn̄ kə gində̄ arjā̰a̰ ō, kə ngáń gə̄ ní ō, na sógə́ nel̄ ngáń Israel gə̄ seneé aĺ ngá̰ý. 18Nin̄ a ədan̄ na i tām̄ kəla kə́ n-əla kə gində̄ arjā̰a̰ aĺ ō, kə ngán gēé aĺ ō n Jonata̰ na oyń ní. 19Adə̄ ni əla kə ngán gə̄ ní ō, kə gində̄ arjā̰a̰ kə́ kɔȳn i kəlōo dūbú jōó kə ɓú sīrí ní ō. Banī Təripo̰ ń sor̄ i mbé ní, əya̰ Jonata̰ dɔɔ́ alé. 20Gō yá̰á̰ ń nuū tə́ anī, Təripo̰ əsō róbó yā kaw̄ taā ɓē kə́ Jude ō, nujəń kɔ̄ɔ́ ō. Ni rə̄ngō rɔ̄n kə róbə́ kə́ Adora. Banī Simo̰ kə ngé yān gēé njadə́ i gōn tə́ gōn tə́. 21Dan ngeé ń nuū tə́ ní, de gə̄ ń ndin̄ kem kújə́ kə́ ngan̄g kə́ Jerusalem tə́ ní, əlan̄ de gə̄ rɔ̄ Təripo̰ tə́. Nin̄ rāānən̄ ɓɔ́ kadə̄ kə teē kə ta róbə́ kə́ dəla lo tə́ kə reē láẃ kə́ əngedə́ ō, kə əla kə yá̰a̰ kəsaá kə adə̄də́ tə́ ō. 22Lo ń nuū tə́ Təripo̰ əndā dɔ ngé rɔ̄ɔ̄ kə sə́ndá yān gə̄ malang naā tə́ yā kaw̄ kújə́ kə́ ngan̄g kə́ Jerusalem tə́. Banī ndɔ̄ɔ́ ndɔ̄ nge ń nuū tə́ ní, néjə tə́sō ngá̰ý adə̄ aw̄ alé. Ni ɔr̄ dɔɔ́, ba aw̄ kumən kə̄ nang kə́ Galaad tə́. 23Dan ń ugə̄ ngɔr kə̄ Baskama anī, tɔ̄l̄ Jonata̰ ō, dubə̄n̄ Jonata̰ kə̄ lo ń nuū tə́ ō. 24Gō tə́ anī, Təripo̰ tél dɔ tə́ aw̄ gogə́ dɔ nang yān tə́.
25Simo̰ əla de gə̄ adə̄ aw̄ ɔyn̄ kə̄ngā ngōkṵ́ṵn Jonata̰ reēnəń, ba dubə̄ Modin kem ɓē yā kaan gə̄ tə́. 26Israel gə̄ malang əhɔn̄ ndoō ngá̰ý tām̄ yān tə́ ō, nūūnən̄ ndɔ̄ ngá̰ý ō. 27Simo̰ rāā dɔ ɓádə bɔbə̄n ō ɓádə ngákṵ́ṵn gə̄ ō adə̄ ḭḭ kə̄ dɔɔ́, yā kadə̄ ré deē ra sa̰y anī a̰ā̰. Dɔ ɓádə́ ní rāān̄ loon kə́ kété no tə́ i kə mbal̄ kə́ kusə gidə kadə̄ ndə́lē ō, loon kə́ gidə tə́ gogə́ i kə mbal̄ kə́ kusə gidə kadə̄ ndə́lē ō. 28Ni rāā dɔ ɓádə́ kə́ kíĺdə́ i mətá gə̄ sīrí kadə naā tə́. Kógə̄ḿ tām̄ yā bɔbə̄n tə́ ō, kógə̄ḿ tām̄ yā kṵ́ṵn tə́ ō, kə́ sɔ́ gə̄ i tām̄ yā ngákṵ́ṵn gə̄ tə́ ō.#13.28 Piramidə: I dɔ ɓádə́ kə́ kílən i mətá. 29Ni adə̄ udən̄ yá̰á̰ kə́ ngāl̄ ɓururu gə̄ kə gō gidə dɔ ɓádə gə̄ ní ō, súū yá̰a̰ gə̄ ní kə yá̰a̰ rɔ̄ɔ̄ gə̄ malang yā áskar gēé kadə̄ əgań kem de gə̄ ngándáńg dɔ Makabe gə̄ tə́ ō. Tɔ́ĺ yá̰á̰ kə́ tītə̄ too bo gə̄ kadə yá̰a̰ rɔ̄ɔ̄ gə̄ ní tə́, yā kadə̄ de gə̄ malang ń njə̄rān̄ mbā dɔ bā bo tə́ ní a̰a̰n̄. 30Yá̰á̰ kə́ dɔ ɓádə́ tə́ ń Simo̰ rāā kem ɓē kə́ Modin tə́ ní, ɓōólaā gə̄gē to nuú ɓáý.
Demetəriyus kə́ nge kṵ jōó ɔjə kadə̄ míndə́də́ ń ənīn̄ adə̄n̄ naā kə Jipə gēé ní, i yá̰á̰ kə́ rɔ̄kum
31Dan ngeé ń nuū tə́ ní, Təripo̰ rāā yá̰a̰ kə ngamaá kə mban̄g A̰tiyokus ń i ngōn̄ kə́ dūú ɓáý ní, ba tɔ̄lən. 32Ni ṵṵ ɓē gotən tə́ ō, ṵṵ̄ yá̰á̰ súū rɔ̄ kə́ ɔjə kadə̄ ni i mban̄g kə́ Aji tə́ ō, nujə kem ɓē sák sák kɔ̄ɔ́ ō. 33Simo̰ tél rāā ɓē kə́ ngan̄g gə̄ kə́ Jude tə́ gogə́ rang ō, rāā kújə́ kə́ ngāl̄ ɓururu gə̄ adə̄ gīr̄ gidə ɓē gə̄ ní ō, əndā ndogə̄ mbal̄ kə́ bo ngá̰ý gə̄ gidədə́ gə̄ tə́ ō, tə́lá bápə gə̄ tadə́ gə̄ tə́ ō, rákə̄ tadə́ adə̄ ngan̄g míŕ míŕ ō, kán̄ yá̰a̰ kəsa gə̄ kə̄ dɔ naā tə́ kem ɓē gə̄ ní tə́ ō. 34Gō tə́ anī, Simo̰ əla dəje mban̄g Demetəriyus kə́ nge kṵ jōó tə́ kadə̄ ɓē kə́ Jude əgā lambóo alé, tām̄ yá̰á̰ ń Təripo̰ rāā ní, i kəla kɔy yá̰a̰ kənge kə́ kemeé ngóy. 35Mban̄g Demetəriyus tūr̄ əda Simo̰ i kə gō ń dəjenəń ní, adə̄ ni ndang najə̄ ń toō əlań adə̄n:
36Mban̄g Demetəriyus rāā Simo̰ ń i nge tun̄ yá̰á̰ kə́ bo ō, i madə̄ mban̄g gə̄ ō ní lápə́ya. Ni rāā kum kɔɔ̄ gə̄ yā ngáń Israel gə̄ ō, gír de gə̄ ń i Jipə gə̄ ní ō lápə́ya. 37Jākā lɔ́r ō, yá̰á̰ súū rɔ̄ kə́ to tītə̄ mbī kāgə̄ túmbur ō ń ə́laīń ādījí karī ní j-ənge. Jə-ndi dɔ rɔ̄jí tə́ kɔ̄ɔ́ yā kəhɔ madə̄ naā kə́ ɔjə dɔ lɔm kə́ kə taá malang sesí ō, yā ndang makətūbə̄ kəlań ngé rāā kəla gə̄ kadə̄ adə̄n̄sí ta róbə kəgā lambóo aĺ ō. 38Yá̰a̰ malang ń j-un ndūjí dɔ tə́ naā tə́ sesí ní, jə-ra dɔ tə́ ō, ɓē kə́ ngan̄g gə̄ ń ī-rāāī ní, i tām̄ yāsí tə́ ō. 39Yá̰á̰ kə́ majə aĺ gə̄ ō, kə́ gōtə́ aĺ gə̄ ō ń ī-rāāī bátə́ ɓōólaā ní, jə-mā̰ȳ rɔ̄jí dɔ tə́ kɔ̄kə́. Lambóó ń kadə̄ ādī mban̄g ní, majə kadə̄ ādī tṵ alé. Ré kété ran̄ kə ɓē kə́ Jerusalem ta kəgā tīr̄ kə́rēý kə́ rang gə̄ anī, ngɔlaā ní ā ə̄gāī tīr̄ ní tṵ alé. 40Ré de kə́rēý gə̄ kə́ dɔ dáńsí tə́ asən̄ téĺ áskar gə̄ kə́ ngé ngɔ̄m̄ mban̄g anī, ādə̄ ndangən̄ rīdə́ makətūbūú ō, ādə̄ lɔm to dɔ dáńjí tə́ ō.
41Kem ɓāl̄ kə́ nge kṵ ɓú kə kutə sīrí tə́ ní, de gə̄ ń i Jipə aĺ gə̄ ní, ndin̄ dɔ Israel gə̄ tə́ tṵ alé. 42Adə̄ de gə̄ əlan̄ gír ndang makətūbə̄ yādə́ gə̄ kə́ yā mangəń yá̰a̰ gə̄ ō, kə́ yā kəndā jī gírí gə̄ ō, i kə najə̄ ń toō: I kem ɓāl̄ kṵ ɓē kə́ ta kəga dɔ yā Simo̰ nge tun̄ yá̰á̰ kə́ bo ō, ngol áskar gə̄ kə́ bo ō, ngār yā Jipə gə̄ ō tə́.
Simo̰ taā ɓē kə́ Gajara ō, ɓē kə́ ngan̄g kə́ Jerusalem ō
43Dan ngeé ń nuū tə́ ní, Simo̰ ənī ɓē kə́ Gajara rɔ̄ɔ̄. Ni adə̄ ɓūtə̄ áskar yān gə̄ gīrə̄n̄ gidə ɓē ní əlan̄ ta naā tə́ ō, rāā kújə́ kə́ kə njaneé kə́ ngāl̄ ɓururu kum kə̄ dɔɔ́ kə́ ɗígə#13.43 Ɗígə: I kāgə̄ kə́ rákə̄ ta naā tə́ yā kalə̄ń dɔɔ́. i kemeé ō, ba aw̄ əndā kadə ndogə̄ mbal̄ kə́ gidə ɓēé tə́ yā rɔ̄ɔń. Kújə rɔ̄ɔ̄ kə́ ngāl̄ ɓururu kum kə̄ dɔɔ́ gə̄ ń rāān̄ gidə ɓē tə́ ní, ni ənī kógə̄ḿ rɔ̄ɔ̄, ba taā kújə́ ní. 44Áskar gə̄ ń i kem kújə́ kə́ ngāl̄ ɓururu kə́ kə njaneé tə́ ní, tḭ́ḭ̄n̄ bal tə́sōn̄ kem ɓēé. Anī de gə̄ malang ɓōlə́n̄ ngá̰ý. 45De kə́ dəngam gə̄ alə̄n̄ dɔɔ́ dɔ ndogə̄ mbal̄ tə́ kə nə̄yá̰də́ gə̄, kə ngáńdə́ gə̄. Nin̄ rə́yā̰n̄ kūbə̄ gə̄ kə́ rɔ̄də́ tə́ ō, əgan̄ kɔŕ ngá̰ý ō, dəjen̄ Simo̰ kadə̄ əla jī kṵṵn kə adə̄də́ ō. 46Nin̄ ədanən̄ na ī-lōō rāā yá̰a̰ sejí sɔɔ̄ń kem ndul yājí, banī á̰a̰ kum tō ndoō yājí. 47Simo̰ oō najə̄ yādə́ ō, rɔ̄ɔ̄də́ aĺ ō. Banī tə̄ɓādə́ kɔ̄ɔ́ kem ɓēé ō, tə́go kem kújə gə̄ ń ɓesə̄ gə̄ i tū tə́ ní adə̄ unjə̄n̄ njáý njáý ō, udə kem ɓēé kə pā rɔȳ gə̄ ō, pā tɔ̄ȳ gə̄ ō. 48Yá̰a̰ malang ń a rāā ɓē adə̄ ɓē téĺ kə́ yḛr ní, ɔgə̄ kɔ̄ɔ́ ō, tə́ndā ngé rāā yá̰a̰ gə̄ ń ndū najə̄ əda ní kem ɓēé ō. Ni rāā ɓē adə̄ ngan̄g ō, adə̄ rāān̄ kújə yān kem ɓēé ō.
49Ngé gə̄ ń ndin̄ kem kújə́ kə́ ngan̄g kə́ Jerusalem tə́ á ɔgə̄n̄də́ kaw̄ ō tél ō gō nang ngeé ń nuū tə́, yā kadə̄ mangən̄ yá̰a̰ aĺ ō, igən̄ yá̰a̰ aĺ ō ní, ɓōō rāādə́ ngá̰ý ō, ngá̰ý gə̄ oyn̄ kɔ̄ɔ́ dɔ dáńdə́ tə́ ō. 50Nin̄ əgan̄ kɔŕ kə̄ dɔ Simo̰ tə́ kadə̄ n-ndin̄ kə lápə́yaá, anī Simo̰ ndigə. Ni tə̄ɓādə́ kɔ̄ɔ́ lo ní tə́ ō, tə́go kem kújə́ kə́ ngan̄g adə̄ unjə̄ njáý njáý ō. 51Jipə gə̄ udən̄ kem kújə́ kə́ ngan̄g tə́ i kem ɓāl̄ kə́ nge kṵ ɓú kə kutə sīrí kə kalən kə́ kógə̄ḿ tə́, kem nāā kə́ nge kṵ jōó tə́, kə ndɔ̄ nāā kə́ nge kṵ kutə jōó gidə i mətá tə́. Nin̄ udən̄ i kə pā tɔ̄ȳ gēé ō, əhɔn̄ ta jī kāgə̄ túmbur gə̄ jīdə́ tə́ ō. Ənīn̄ pā gə̄ kə́ yā rɔȳń Nə́ɓā ō, pā kə́ rang gə̄ ō, dānə̄n̄ gō i kə kənde gə̄, kə kɔdə gə̄, kə sənje#13.51 Sənje: i kənde kə́ ɓār̄ tītə̄ kúndə̄ beé, ba rāān̄ i kə kəlā gində̄ kə́ laa mbé mbé. gə̄. Tām̄ tetən̄ madə̄ ba̰ā̰ Israel kógə̄ḿ kə́ bo rɔ̄ɔ̄ ō, tə̄ɓānən̄ kɔ̄ɔ́ ō. 52Simo̰ adə̄ ndūn kadə̄ de gə̄ ɔsən̄ go̰n ndɔ̄ ń nuū kə dɔ ɓāl̄ gə̄ kə rɔ̄nelé. Mbal̄ ń lo kə́ táĺ i tū tə́ á ra sɔɔ̄n̄ ta naā kə kújə́ kə́ ngan̄g kə́ Jerusalem ní, Simo̰ rāā adə̄ ngan̄g ō, ndi tū tə́ kə ngé rɔ̄ɔ̄ yān gēé ō. 53Ni a̰ā̰ kadə̄ ngōnən Ja̰a̰ i de kə́ dəngam rɔ̄kum. Adə̄ əndān dɔ ɓūtə̄ ngé rɔ̄ɔ̄ yān gə̄ tə́. Ja̰a̰ ndi i Gajara.
Currently Selected:
1 MAKABE GƏ̄ 13: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.