1 MBAN̄G GƏ̄ 7

Kújə́ kə́ ndogó mbangāá gə̄

1Salomo̰ əndā kújə halan gə̄ ō. Ni-rāā kəlan ɓāl̄ kutə gidə i mətá pá tá tɔ̄l̄ ta ɓáý. 2Rāā kújə́ ń əndān̄ rīn na i ku kāgə̄ gə̄ kə́ Liban ní: Ngālən i métər kutə mí ō, laan i métər kutə jōó gidə i mí ō, ngálən kə́ kə̄ dɔɔ́ i métər kutə gidə i mí ō. Əndān̄ rī kújə́ ní tītə̄ ń noō i tām̄ kāgə̄n gə̄ ń ran̄ kə ta naā gír i sɔ́ tə́ ní. I kāgə̄ sédər gə̄ kə́ tə́nīn̄ sáan gə̄ dɔ tə́. 3Rákə̄n̄ kāgə̄ sédər gə̄ dɔ sáā kāgə̄ kə́ kutə sɔ́ gidə i mí gə̄ ń dēsə́n̄də́ kutə gidə i mí mí gír loo mətá dɔ madə̄ gə̄ tə́ ní. 4Mbútə̄n̄ ko̰rō̰ kújə gə̄ kə́ kə kāgə̄ tadə́ gēé kə ta naā gír loo mətá dām̄ kújə́ kə́rēý tə́ ō, dāmə̄n kə́ noō tə́ ō. ko̰rō̰ kújə gə̄ ní ran̄ tadə́ sɔɔ̄ naā. 5Ko̰rō̰ kújə gə̄ ní i mətá dām̄ kújə́ kə́rēý tə́ ō, mətá dāmə̄n kə́ noō tə́ ō. Ré ún kógə̄ḿ anī ngālən ō, laan ō asə naā. Ko̰rō̰ kújə gə̄ ní ran̄ tadə́ sɔɔ̄ naā gír loo mətá. 6Gō tə́ anī rāā kújə́ ń a ɓārə́n̄ na i kújə bir̄ nja gə̄ ní. Ngālən i métər kutə jōó gidə i mí ō, laan i métər kutə gidə i mí ō. Kújə́ ní rāā rɔ̄n i ngōn̄ kújə́ kə́ ta róbə́ tə́, adə̄ deē a ənda kem a gān̄g pá tá a udəń kə̄ kem kújə́ kə́ rang gə̄ tə́ ɓáý. Kāgə̄ i kemeé ō, rāān̄ ndíl ta tə́ ndágá ō. 7Gō tə́ anī rāā kújə́ ń əndān̄ rīn na i kújə kōr̄ kāgə̄ mbang ní. Kə́rēý gə̄ anī a ɓārə́n̄ kújə́ ní na i kújə gān̄g sarya, tɔdɔ̄ Salomo̰ a gān̄g sarya i kemeé. Rāān̄ kemən i kə kāgə̄ sédər gēé malang, əlan̄ gír i nang tə́ bátə́ dɔɔ́. 8Kújə́ ń Salomo̰ ndi kemeé ní ra i ta ndágə loo kə́ rang tə́, ba ra i ta ndágə loo ń ku kāgə̄ kə́ Liban ra tū tə́ ní alé, ni-ra i kə̄ gogə́ sḛ́ý, ba to tītə̄ kíjə kōr̄ kāgə̄ mbang beé. Kújə́ ń Salomo̰ rāā tām̄ yā nə̄yá̰n kə́ ngōn̄ Parao̰ tə́ ní, to i tītə̄ kújə́ ń rīn na i ku kāgə̄ gə̄ kə́ Liban tə́ ní.

9Kújə gə̄ malang ń noō rāān̄də́ i kə mbal̄ kə́ bo kə́ tə́gā majə gə̄, ba tə́jān̄ dāmə̄n kə́ kemeé ō, kə́ gidə tə́ ndágá ō i kə síí. Əlan̄ gír rāā kəla kə mbal̄ gə̄ ní i nja kújə́ tə́ nang tə́ bátə́ ta tə́ dɔɔ́ ō, rāān̄ kəla kə́ ndágá gə̄ ń i kəndā ndogə̄ mbal̄ gə̄ ń gān̄gə̄n̄neé gíŕ ndágə̄ loo kə́ bo kə́ kem ndogó ní i kə mbal̄ gə̄ ní ō. 10Mbal̄ gə̄ ń əndān̄neé nja ndogə̄ mbal̄ ní i mbal̄ kə́ bo kə́ majə gə̄ kə́ ngāl̄də́ i métər sɔ́ ō mí ō. 11Tə́ndān̄ mbal̄ kə́ tɔ́sə̄ kadə gə̄ ń əndān̄neé ndogə̄ mbal̄ gə̄ ní i dɔ mbal̄ kə́ bo gə̄ ní tə́ ō, ɓōkə́n̄ sáa kāgə̄ sédər gə̄ i dɔ tə́ ō. 12Əndān̄ ndogə̄ mbal̄ ń gān̄gə̄n̄neé gíŕ ndágə loo kə́ gīr̄ gidə kújə yā Kɔ́ɔ̄ɓē kə́ bo kə́ kem ndogó ní i kə mbal̄ kə́ tɔ́sə̄ kadə gə̄ kə́ tə́ndān̄də́ dɔ naā tə́ mətá mətá kə ta naá ō, kə sáa kāgə̄ sédər gə̄ kə́ tə́nīn̄də́ kə ngālāá nja kógə̄ḿ ō. Əndān̄ ndogə̄ mbal̄ ní i tītə̄ ń əndān̄neé ndogə̄ mbal̄ ń gān̄gə̄n̄neé gíŕ ndágə loo kə́ kemeé kə́ gidə kújə yā Kɔ́ɔ̄ɓē tə́ ní ō, i tītə̄ ń əndān̄neé ngōn̄ kújə kə́ ta róbə́ tə́ ní ō.

Kəla gə̄ ń adə̄n̄ Hiram kadə̄ rāā ní

(Á̰a̰ī 2 Yá̰a̰ 2.12-13)

13-14Deē kógə̄ḿ kə́ Tir kə́ ger̄ rāā kəla kə gində̄ nə̄ngá kasaá ngá̰ý ndi noó, rīn na i Hiram. Bɔbə̄n i de kə́ Tir, ba kó̰o̰n i de kə́ gír ɓē yā Nepətali tə́. Kó̰o̰n ní i dəyá̰ kə́ ngaa koy. Hiram ngeé ń toō jīn ger̄ kəla ngá̰ý ō, i de kə́ aw̄ kə kum kedēé ō, ger̄ rāā kəla kə gində̄ nə̄ngá kasaá ngá̰ý ō. I tām̄ najə̄ ń noō tə́ n mban̄g Salomo̰ əla gōn tə́ Tir kadə̄ reē rāā kəla adə̄n ní.

Gində̄ nə̄ngá kasə kə́ ngāl̄ ɓururu gə̄

(Á̰a̰ī 2 Yá̰a̰ 3.15-17)

15Hiram nō gində̄ nə̄ngá kasə kə́ ngāl ɓururu gə̄ jōó. Ngāl̄də́ kə́ kə dɔɔ́ i métər ndōhó ō, bo ɓōdə̄də́ i métər mehḛ́ ō. 16Ni-rāā yá̰á̰ súūn gə̄ jōó yā tə́ndādə́ ta tə́. Rāādə́ i kə gində̄ nə̄ngá kasə kə́ nō horoó. Kógə̄ḿ ngālən kə́ kə̄ dɔɔ́ i métər jōó kə núsə ō, kə́rēý ngālən kə́ kə̄ dɔɔ́ i métər jōó kə núsə ō. 17Ni-rāā yá̰á̰ súū kə́ rang gə̄ ɓáý to̰ kə gində̄ nə̄ngá kasaá. Rāā yá̰á̰ kə́ ton̄ tītə̄ réng gə̄ ō, kə́ ton̄ tītə̄ kəlā kə́ tə́nī kəro gə̄ ō, kə gində̄ nə̄ngá kasaá sīrí sīrí tām̄ yā yá̰á̰ súū kə́ jōó gə̄ ní tə́. 18Ni-rāā yá̰á̰ súū kə́ rang gə̄ ɓáý to̰ kə́ ton̄ tītə̄ kan̄ kāgə̄ gərenadə gə̄ kə ta naá gír jōó, dɔ réng gə̄ ń selə́n̄ dɔ yá̰á̰ súū kə́ jōó gə̄ tə́ ní. 19Yá̰á̰ súū gə̄ ń ndin̄ ta gində̄ nə̄ngá kasə kə́ ngāl̄ gə̄ tə́ ní rāān̄ yá̰á̰ kə́ tītə̄ hútə̄ mu lis #7.19 Lis, i mu kə́ to tītə̄ ndə́ja beé. kə́ ngāl̄də́ i métər jōó tə́ndān̄ ta tə́ kógə̄ḿ kógə̄ḿ. 20Yá̰á̰ súū gə̄ ń tə́ndān̄də́ ta gində̄ nə̄ngá kasə gə̄ tə́ kum kə̄ dɔɔ́ ní, ənīn̄ réng gidə tə́ pá tə́ tə́lan̄ kan̄ kāgə̄ gərenadə gə̄ kə ta naá adə̄ gīr̄ gidə ɓáý. Tə́lan̄ kan̄ kāgə̄ gərenadə gə̄ adə̄ gīr̄ gidə yá̰á̰ súū gə̄ ní jōó mbak. 21Udən̄ gində̄ nə̄ngá kasə kə́ ngāl̄ kə́ jōó gə̄ ní i ta ngōn̄ kújə́ kə́ ta róbə́ tə́ ń deē a gān̄g kem tá a udəń kə̄ kem kújə yā Kɔ́ɔ̄ɓē tə́ ní. Kógə̄ḿ i dām̄ kə́ ko̰ó̰ tə́ ō, kə́rēý i dām̄ kə́ geleé tə́ ō. Əndān̄ rī nge kə́ dām̄ kə́ ko̰ó̰ tə́ na i Yakin, kumən na i Nə́ɓā mbūsə̄ gír ō, əndān̄ rī nge kə́ dām̄ kə́ geleé tə́ na i Boaj, kumən na i tɔ́gə i kem Nə́ɓā tə́ ō. 22Hiram tɔ̄l̄ ta kəla gində̄ nə̄ngá kasə kə́ ngāl̄ gə̄ i tītə̄ ń noō.

Bay kə́ bo kə́ rāān̄ kə gində̄ nə̄ngá kasaá

(Á̰a̰ī 2 Yá̰a̰ 4.2-5)

23Hiram rāā bay kə́ bo kə gində̄ nə̄ngá kasaá. Tan laa asə métər mí ō, rúun i métər jōó kə núsə ō, ɓōdə̄n i métər kutə gidə i mí ō, i bay kə́ gōr̄. 24Tɔ́sə̄n̄ ndíl kosə́ katə̄ gə̄ gír mbī bay ní tə́ adə̄ gīr̄ gidə əla ta naā tə́. Tɔ́sə̄n̄ ndíl kosə́ katə̄ gə̄ ní i kə ta naā gír jōó, métər kógə̄ḿ i kosə́ katə̄ kutə jōó, métər kógə̄ḿ i kosə́ katə̄ kutə̄ jōó. Nōn̄ kosə́ katə̄ gə̄ ní horoó i dan ń nōn̄neé bay ní horoó ní. 25Bay ní ndi i dɔ man̄g kə́ bəra gə̄ kə́ kutə gidə i jōó gə̄ ń rāān̄də́ i kə gində̄ nə̄ngá kasaá ní tə́. Man̄g kə́ bəra kə́ kutə gidə i jōó gə̄ ní, kə́ mətá gə̄ tūrə̄n̄ kumdə́ i kə̄ dām̄ mbɔ́r ɓē kə́ ko̰ó̰ tə́ ō, kə́ mətá gə̄ tūrə̄n̄ kumdə́ i kə̄ dām̄ kə́ no ɓē tə́ ō, kə́ mətá gə̄ tūrə̄n̄ kumdə́ i kə̄ dām̄ mbɔ́r ɓē kə́ geleé tə́ ō, kə́ mətá gə̄ tūrə̄n̄ kumdə́ i kə̄ gír ɓē tə́ ō, banī gíŕdə́ i kə̄ kemeé malang gír bayaá. 26Nder̄ bay ní i ngáń métər sɔ́sɔ́. Rāān̄ bɔ̄gə̄ tan adə̄ to tītə̄ bɔ̄gə̄ ta kɔ̄ý man̄ kə́ rāān̄ adə̄ to tītə̄ hútə̄ mu lís beé. Man̄ kem bay ní i lítər dūbú kutə sɔ́sɔ́.

Púsə gində̄ nə̄ngá kasə gə̄

27Gō tə́ anī Hiram rāā púsə nə̄ngá kasə gə̄ kutə kógə̄ḿ. Ngāl̄də́ i métər jōó ō, laadə́ i métər jōó ō, ngāl̄də́ kə́ kə̄ dɔɔ́ i métər kógə̄ḿ kə núsə ō, kə dɔdə́ gēé malang. 28Rāān̄ púsə gə̄ ní i beé: Rāān̄ kāgə̄ púsə gə̄ ní i kə gində̄ nə̄ngá kasə kə́ dūú gēé. Tə́lan̄ gində̄ nə̄ngá kasə kə́ rang kə́ dūú tītə̄ madə̄ gə̄ mbo̰ō̰ kāgə̄ púsə gə̄ ní tə́. 29Ba tɔ́sə̄n̄ ndíl ɓɔl gə̄ ō, ndíl man̄g kə́ bəra gə̄ ō, ndíl de kə́ dɔ rā̰ tə́ kə́ ngé ngɔ̄m̄ loo gə̄ ō, tū gində̄ nə̄ngá kasə kə́ dūú gə̄ ní tə́ ō, tɔ́sə̄n̄ tū kāgə̄ púsə gə̄ ní tə́ ta tə́ dɔɔ́ ō. Rāān̄ kəlā hútə̄ kámbə́ gír ɓɔl gə̄ kə man̄g kə́ bəra gə̄ ní tə́ nang tə́ adə̄, naā rənge kum kə̄ nang tə́. 30Nja púsə gə̄ ní i sɔ́sɔ́ kə dɔdə́ gēé malang. Rāān̄də́ i kə gində̄ nə̄ngá kasaá. Əhɔn̄də́ ta naā tə́ i kə gində̄ nə̄ngá kasaá. Gində̄ nə̄ngá kasə gə̄ ní tə́lan̄də́ i kílən kə́ sɔ́ gə̄ tə́ tū njadə́ gə̄ tə́. Nōn̄ njan gə̄ i tū kádər púsə gə̄ ní tə́. Ba njan gə̄ ní ngāl̄ mānə̄n̄ kəlā hútə̄ kámbə gə̄ alé. 31Bəlo kógə̄ḿ kə́ tan gōr̄ gong i ta púsə tə́ dɔɔ́. Əndān̄ yá̰a̰ ta tə́ rɔtən̄neé ta adə̄ ngāl̄ kum kə̄ dɔɔ́. Ngālən ní asə kíl deē kógə̄ḿ ba ə̄ndān̄ bay ta tə́. Laa ta bəlo ní asə kíl deē kógə̄ḿ kə núsə. Lon ń mān̄ ta kāgə̄ púsə kə́ rāā kə gində̄ nə̄ngá kasaá kə̄ ndágá ní, laan ō, ngālən ō, asən̄ naā ba gōr̄ alé ō, tɔ́sə̄n̄ ndíĺ yá̰a̰ gə̄ tū tə́ ō. 32Nja púsə́ kə́ sɔ́ gə̄ ní tə́lan̄də́ i gír kāgən gə̄ tə́ nang tə́. Áks nja púsə gə̄ ní teē kem púsú gírí nang tə́. Nja púsə gə̄ ní laadə́ i kíĺ deē kógə̄ḿ kə núsə. 33Rāān̄də́ i tītə̄ ń rāān̄neé nja púsə rɔ̄ɔ̄ gə̄ ní. Rāān̄ áksdə́ gə̄ ō, ga̰də́ gə̄ ō, riyō̰o̰ yādə́ gə̄ ō, moyḛ̄ḛ yādə́ gə̄ ō, rāān̄ yá̰a̰ gə̄ ń noō malang i kə gində̄ nə̄ngá kasə kə́ nō horoó. 34Gində̄ kə́ sɔ́ gə̄ ń ran̄ kíĺ púsə kə́ sɔ́ gə̄ tə́ á ton̄ tītə̄ nja deē ní, ɓoon̄də́ i naā tə́ kə kāgə̄ púsú. 35Ran̄ yá̰á̰ súū kə́ gōr̄ kə́ ngālən kə́ kə̄ dɔɔ́ i núsə́ kíĺ deē kógə̄ḿ, əndān̄ ta bəlo ń ta púsə́ tə́ ní adə̄ gīr̄ gidə tan. Rāān̄ yá̰á̰ kə́ yā kadə̄ deē əga jīn tū tə́ ta púsə́ tə́ dɔɔ́ ō, gində̄ nə́ngá kasə kə́ laa ta púsə́ tə́ dɔɔ́ ō. Yá̰a̰ gə̄ ń noō ɓoon̄ naā kə gotə púsə rɔ̄ɔ̄ malang adə̄ télən̄ i yá̰á̰ kə́ kógə̄ḿ beē. 36Tɔ́sə̄n̄ ndíl de kə́ dɔ rā̰ tə́ kə́ ngé ngɔ̄m̄ loo gə̄ ō, ndíl ɓɔl gə̄ ō, ndíl ta jī kāgə̄ túmbur gə̄ ō, tū loo gə̄ kə́ yā kəga jī tū tə́ tə́ gə̄ ō, tū gində̄ kə́ laa gə̄ tə́ ō, ba rāān̄ kəlā hútə̄ kámbə gə̄ adə̄ gír̄ gidə. 37Rāān̄ púsə́ kə́ kutə kógə̄ḿ gə̄ ní adə̄ ton̄ tītə̄ naā malang, ngāl̄də́ asə naā ō, bodə́ asə naā ō.

38Hiram rāā bay gində̄ nə̄ngá kasə gə̄ kutə kógə̄ḿ ɓáý to̰, yā tə́ndādə́ ta púsə́ kə́ kutə kógə̄ḿ gə̄ ní tə́. Lúu bay gə̄ ní i métər jōó kə dɔdə́ gēé ō, kemdə́ a asə túkə́ sɔ́sɔ́ kə dɔdə́ gēé ō. 39Tə́ndān̄ púsə́ kə́ mí gə̄ dām̄ kújə yā Kɔ́ɔ̄ɓē kə́ ko̰ó̰ tə́, ba tə́ndān̄ kə́ mí gə̄ dāmə̄n kə́ geleé tə́. Əndān̄ bay kə́ bo i dām̄ kújə yā Kɔ́ɔ̄ɓē kə́ ko̰ó̰ tə́, dɔ dáń mbɔ́r ɓē kə́ geleé kə gír ɓēé tə́.

Yá̰á̰ kə́ tām̄ yá̰á̰ kújə yā Kɔ́ɔ̄ɓē tə́ kə́ rāā kə gindīí

(Á̰a̰ī 2 Yá̰a̰ 4.7—5.1)

40Dan ń Hiram rāā bay gə̄ ō, pél gə̄ ō, səmbē gə̄ kə́ yā tə́teń yá̰a̰ ō oy ní, rāā yá̰a̰ malang ń mban̄g Salomo̰ mērən rāā tām̄ yā kújə yā Kɔ́ɔ̄ɓē tə́ ní oy kɔ̄ɔ́: 41Gində̄ nə̄ngá kasə kə́ ngāl̄ ɓururu gə̄ jōó ō, yá̰á̰ súū gə̄ jōó kə́ yā tə́ndādə́ ta gində̄ nə̄ngá kasə gə̄ ní tə́ ō, 42kan̄ kāgə̄ gərenadə gə̄ ɓú sɔ́ ō. Tə́lan̄ kan̄ kāgə̄ gərenadə gə̄ ní ta réńg kə́ jōó gə̄ ń selə́n̄ ta yá̰á̰ súū kə́ jōó gə̄ tə́ ní. Tə́lan̄də́ kə ta naá gír jōó, réńg kógə̄ḿ aw̄ń kə ta naá gír jōó ō, kə́rēý aw̄ń kə ta naá gír jōó ō. 43Hiram rāā púsə kutə kógə̄ḿ ō, rāā bay gə̄ kutə kógə̄ḿ tə́ndādə́ ta púsə gə̄ ní tə́ dɔɔ́ ō, 44rāā bay kógə̄ḿ kə́ bo kə́ gōr̄ ō, man̄g kə́ bəra gə̄ kutə gidə i jōó kə́ ətōn̄ bay kə́ bo ní ō, 45rāā yá̰a̰ kɔy bū gə̄ ō, pél gə̄ ō, səmbē gə̄ kə́ yā tə́teń yá̰a̰ ō, gotə yá̰a̰ rāā kəla gə̄ malang ō. Yá̰a̰ malang ń Hiram rāā kem kújə yā Kɔ́ɔ̄ɓē tə́ tām̄ yā mban̄g Salomo̰ tə́ ní, i kə gində̄ nə̄ngá kasə kə́ kusə gidə kadə̄ ndə́lēé. 46Mban̄g adə̄ nōn̄ yá̰a̰ gə̄ ń noō malang i kem wól loo kə́ Jurdḛ tə́, dɔ dán ɓē kə́ Sukot kə Sartan tə́, nang kə́ to bɔr tə́. 47Gō tə́ anī Salomo̰ adə̄ tə́ndān̄ yá̰a̰ gə̄ ń noō malang kem kújə yā Kɔ́ɔ̄ɓē tə́. Banī kutə yá̰a̰ gə̄ ní i ngá̰ý aĺ naā, adə̄ kɔȳ gində̄ nə̄ngá kasə malang ń rāān̄neé kəla ní gə̄gē deē sāā ger̄ to̰ alé.

48Salomo̰ rāā yá̰a̰ malang kə́ tām̄ yā kújə yā Kɔ́ɔ̄ɓē tə́ kə lɔ́rɔ́. Adə̄ i loo róō ndujə̄ nō kāgə̄ kə́ kotə majə ō, tábəl ń a ɓōkə́n̄ mápá kə́ ndējə̄ gə̄ dɔ tə́ ní ō. 49Rāā ɗəra hor kə́ kutə gə̄ kə lɔ́ŕ kə́ unjə̄ njáý njáý. Tə́ndān̄ ɗəra hor gə̄ ní i ta kújə́ kə́ yā ɓōĺ gidə tə́: Mí dām̄ kə́ ko̰ó̰ tə́ ō, mí dām̄ kə́ geleé tə́ ō. Rāā hútə̄ kāgə̄ gə̄ kə́ tām̄ yā ɗəra hor gə̄ ní tə́ ō, bay hor gə̄ ō, yá̰a̰ kūsə́ ta kəlā hor gə̄ ō, i kə lɔ́rɔ́. 50Rāā kɔ̄ý gə̄ ō, kəyā gə̄ ō, səmbē gə̄ kə́ yā tə́teń yá̰a̰ ō, kópə gə̄ ō, ganán gə̄ ō, i kə́ lɔ́ŕ kə́ unjə̄ njáý njáý. Kem kújə́ ń a ɓārə́n̄ na i loo kə́ táĺ ngá̰ý ní ō, kem kújə́ kə́ bo ō ní, rāā yá̰á̰ súū gə̄ kə lɔ́rɔ́ tə́ndā ta tə́.

51Dan ń Salomo̰ tɔ̄l̄ ta kəla gə̄ kə́ dɔ kújə yā Kɔ́ɔ̄ɓē tə́ malang anī, adə̄ reēn̄ kə gində̄ arjā̰a̰á̰ ō, kə lɔ́rɔ́ ō, ngáń gájə́ yá̰a̰ rāā kəla gə̄ ō ń bɔbə̄n Dabid ɔr̄ kam̄də́ tayā tām̄ yā Kɔ́ɔ̄ɓē tə́ ní, ba ɓōkə́də́ loo ń a ngɔ̄mə̄n̄ yá̰a̰ kənge kə́ kem kújə yā Kɔ́ɔ̄ɓē tə́ tū tə́ ní malang.

Currently Selected:

1 MBAN̄G GƏ̄ 7: SARDC

Highlight

Copy

Compare