1 MBAN̄G GƏ̄ 6

Rāān̄ kújə yā Kɔ́ɔ̄ɓē

(Á̰a̰ī 2 Yá̰a̰ 3.1-14)

1Ɓāl̄ ɓú sɔ́ kə kutə sɔ́sɔ́ gō teē ń ngán Israel gə̄ teēn̄ kɔ̄ɔ́ kem ɓē kə́ Ejiptə tə́ ní anī, Salomo̰ əla gír rāā kújə yā Kɔ́ɔ̄ɓē. Ni-əla gír i kem ɓāl̄ ko̰o̰ ɓē yān kə́ nge ko̰ sɔ́ tə́, kem nāā kə́ nge ko̰ jōó ń i nāā Jib ní tə́. 2Kújə́ ń Salomo̰ rāā tām̄ yā Kɔ́ɔ̄ɓē tə́ ní, ngālən i métər kutə mətá ō, laan i métər kutə kógə̄ḿ ō, ngālən kə́ kə̄ dɔɔ́ i métər kutə gidə i mí ō. 3Ngōn̄ kújə́ kə́ ta róbə́ tə́ ń deē a ənda kem yā gān̄g tá a udəń kə̄ kem nge kə́ bo tə́ ní, ngālən i métər kutə kógə̄ḿ tītə̄ yā laa kújə yā Kɔ́ɔ̄ɓē ō, laan i métər mí ō. 4Mbútə̄n̄ ko̰rō̰ kújə gə̄ tū bɔr tə́ ba utə̄n̄ kum kə yengəreé. 5Tə́ndān̄ kújə gə̄ dɔ naā tə́ mətá mətá kə gō gidə ndogə̄ mbalá, ba adə̄ ndə̄nān̄ bɔr kújə́ ń kemən i kə́ bo ní ō, bɔr kújə́ ń kemən i kə́ yā ɓōĺ gidə ní ō. 6Kújə gə̄ ń ndin̄ dɔ naā tə́ mətá mətá ní, laa ngé kə́ gírí nang tə́ gə̄ i métər jōó kə núsə ō, laa ngé kə́ danaá gə̄ i métər mətá ō, laa ngé kə́ ta tə́ dɔɔ́ gə̄ i métər mətá kə núsə ō. Tɔdɔ̄ bɔr kújə yā Kɔ́ɔ̄ɓē ń ḭḭ nang tə́ bátə́ ugə̄ dɔɔ́ ní, nderə̄n kə́ gidə tə́ ndágá asə naā alé. Nge kə́ gírí nang tə́ nder̄ tɔȳ nge kə́ danaá, ba nge kə́ danaá nder̄ tɔȳ nge kə́ ta tə́ dɔɔ́. Adə̄ kāgə̄ kújə udə kem bɔr kújə yā Kɔ́ɔ̄ɓē tə́ alé. 7Rāān̄ kújə yā Kɔ́ɔ̄ɓē i kə mbal̄ gə̄ kə́ ton̄ i kə jī loo kḭḭ ń ḭḭn̄neé sedə́ loo tɔ́sə mbal̄ tə́ ní. I beé n deē oōń kōō martóo ō, də́ga ō, gində̄ rāā kəla kə́ rang ō, loo rāā kújə yā Kɔ́ɔ̄ɓē tə́ aĺ ní. 8Kújə gə̄ ń rāān̄də́ dɔ naā tə́ mətá mətá adə̄ ndə̄nān̄ kadə kújə yā Kɔ́ɔ̄ɓē ní, a udən̄ kemən kə́ gírí nang tə́ tə́ i kə ta róbə́ kə́ dām̄ mbɔ́r ɓē kə́ geleé tə́. Ran̄ kemən kə́ gírí nang tə́ tə́ noō rāān̄ loo kə́ yā njə̄rā dɔ tə́ kal̄ kaw̄ń kemən kə́ dɔɔ́ kə́ nge ko̰ jōó tə́ ō, kə́ nge ko̰ mətá tə́ ō. Ba deē a rə̄ngō i rɔ̄n n a alə̄ń ta kaw̄ dɔɔ́ ní. 9Yā tɔ̄ləń ta kújə yā Kɔ́ɔ̄ɓē ní, rāān̄ no róńg kújə yā Kɔ́ɔ̄ɓē i kə sáa kāgə̄ sédər gə̄ ō, kə kāgə̄ sédər gə̄ kə́ njár̄ kadə̄ laa ba kɔsə̄də́ ta naā tə́ gə̄ ō. 10Kújə gə̄ ń rāān̄də́ dɔ naā tə́ mətá mətá kə gō gidə kújə yā Kɔ́ɔ̄ɓēé ní, ngāl̄də́ kə́ kə̄ dɔɔ́ i métər jōó kə núsə kə dɔdə́ gēé ō, tə́lan̄ sáa kāgə̄ sédər gə̄ i kadə bɔr kújə yā Kɔ́ɔ̄ɓē tə́ dɔɔ́ ō.

11Kɔ́ɔ̄ɓē əda Salomo̰ na:

12Ḭ̄ ī-rāā kújə ń toō, ba ré ī-rāā yá̰á̰ ń ndū najə̄ yāḿ əda ní ō, ré ī-rāā yá̰a̰ i tītə̄ ń m-ɔ́jiīneé kadə̄ ī-rāā ní ō, gō míndə gə̄ ń m-ə́daī kadə̄ ī-rāādə́ ní ə̄ndā kumií gíŕdə́ tə́ ba ī-rāādə́ malang ō anī, m-ā m̄-rāā yá̰á̰ ń m-ə̄nī míndə́ḿ yā rāā kadī á m-ə́da bɔbí Dabid ní. 13M-ā m̄-reē yā ndi dan ngán Israel gə̄ tə́ kem kújə́ ń toō tə́ ō, m-ā m-ə́ya̰ Israel gə̄ ń i gír deē yāḿ gə̄ ní kɔ̄ɔ́ aĺ ō.

Súūn̄ kem kújə yā Kɔ́ɔ̄ɓē

14Dan ń əndān̄ kújə yā Kɔ́ɔ̄ɓē kə gō ndū Salomo̰ó̰ oy anī, 15rāān̄ kem kə kāgə̄ sédər gēé, əlan̄ gír nang tə́ bátə́ dɔɔ́. Gō tə́ anī ɔsə̄n̄ kāgə̄ sipəres nang tə́ kem kújú. 16Tə́ndān̄ kāgə̄ sédər gə̄ kadə bɔr tə́ gə́lé kújə́ tə́, nang tə́ bátə́ dɔɔ́. Rāān̄ gə́lé kújə́ ní i loo kəndā sandúkə madə̄ naā yā Kɔ́ɔ̄ɓē tə́, ngālən kə́ kə̄ dɔɔ́ i métər kutə kógə̄ḿ. Əndan̄ rīn na i loo kə́ táĺ ngá̰ý. 17Kem kújə́ kə́ bo ń ḭ̄ deē ā ə́ngé kété no nge kə́ yā ɓōĺ gidə tə́ ní, ngālən i métər kutə jōó. 18Kāgə̄ sédər gə̄ ń tə́ndān̄ kem kújə yā Kɔ́ɔ̄ɓē tə́ ní, tɔ́sə̄n̄ ndíĺ yá̰á̰ kə́ tītə̄ kosə́ katə̄ gə̄ ō, hútə̄ kāgə̄ gə̄ ō tū tə́. Kem kújə i kə́ rāā kə kāgə̄ sédər malang, deē a̰a̰ mbal̄ alé. 19Rāān̄ loo kə́ yā ɓōĺ gidə gə́lé kújə́ tə́ əndān̄neé sandúkə yā Kɔ́ɔ̄ɓē. 20-21Ngāl loo ní i métər kutə kógə̄ḿ ō, laan i métər kutə kógə̄ḿ ō, ngālən kə́ kə̄ dɔɔ́ i métər kutə kógə̄ḿ ō. Rāān̄ kem kə lɔ́ŕ kə́ unjə̄ njáý njáý. Gotə kem kújə yā Kɔ́ɔ̄ɓē malang ní, rāān̄ i kə lɔ́ŕ kə́ unjə̄ njáý njáý ō. Dēsə́n̄ lɔ́ŕ kə́ kənda kəla tə́ ta róbə kə́ yā kudəń kə̄ gə́lé kújə́ tə́ ní ō, əndān̄ yá̰á̰ róō ndujə̄ yá̰á̰ kə́ kotə majə kə́ rāā kə kāgə̄ sédəreé ta róbə́ kújə́ ní tə́ ō, ba rāān̄ lɔ́r gidə yá̰á̰ róō ndujə̄ yá̰á̰ kə́ kotə majə ní tə́. 22Adə̄ kem kújə yā Kɔ́ɔ̄ɓē i lɔ́r malang ō, yá̰á̰ róō ndujə̄ yá̰á̰ kə́ kotə majə ń əndān̄ ngɔr kə̄ ta róbə́ kújə́ kə́ yā ɓōĺ gidə tə́ ní gidən i lɔ́r malang ō. 23-26Rāān̄ de kə́ dɔ rā̰ tə́ kə́ ngé ngɔ̄m̄ loo gə̄ jōó kə kāgə̄ olibə yā kəndādə́ kem kújə́ kə́ yā ɓōĺ gidə ní tə́. De kə́ dɔ rā̰ tə́ gə̄ ní ngāl̄də́ i métər mí mí kə dɔdə́ gēé. Bɔ̄gə̄ nge kə́ ta kəga dɔ ní kógə̄ḿ ngālən i métər jōó kə núsə. Adə̄ bɔ̄gə̄n gə̄ jōó mbak ta naā tə́ i métər mí. De kə́ dɔ rā̰ tə́ kə́ nge ko̰ jōó ní ngālən i métər mí ō. Ngālən gə̄gē, bon gə̄gē, to tītə̄ yā nge kə́ kété. 27Tə́ndān̄ de kə́ dɔ rā̰ tə́ gə̄ ní i kem kújə́ kə́ táĺ ngá̰ý tə́ danaá bang. De kə́ dɔ rā̰ tə́ gə̄ ní jā̰n̄ bɔ̄gə̄də́, adə̄ nge kə́ ta kəga dɔ ní bɔ̄gə̄n kógə̄ḿ ɔdə kadə ndogə̄ mbal̄ ō, nge kə́ ko̰ jōó ní bɔ̄gə̄n kógə̄ḿ ɔdə kadə ndogə̄ mbal̄ ō. Ba gotə bɔ̄gə̄də́ kə́ jōó gə̄ ní, tadə́ ɔdə naā dan kújú bang. 28Rāān̄ lɔ́r gidə de kə́ dɔ rā̰ tə́ kə́ jōó gə̄ ní tə́.

29Ndogə̄ mbal̄ kújə yā Kɔ́ɔ̄ɓē ń əndān̄ ní, tɔ́sə̄n̄ ndíĺ yá̰a̰ gə̄ tū tə́ gidə tə́ gē, kemeé gē malang. Ndíĺ yá̰a̰ gə̄ ní i de kə́ dɔ rā̰ tə́ kə́ ngé ngɔ̄m̄ loo gə̄ ō, i ta jī kāgə̄ túmbur gə̄ ō, hútə̄ kāgə̄ gə̄ kə́ tadə́ ndɔ̄bə̄ gə̄ ō. 30Rāān̄ lɔ́r nang tə́ kem kújə yā Kɔ́ɔ̄ɓē tə́ ō, rāān̄ nang tə́ ta tə́ ndágá ō. 31Rāān̄ bápə gə̄ jōó kə kāgə̄ olibə yā kutə̄ń ta loo kə́ yā ɓōĺ gidə. Kāgə̄ ta róbə́ kújə́ kə́ dɔɔ́ ō, ngé kə́ kadə tə́ kə́ jōó gə̄ ō ní, rāān̄ yá̰á̰ súūn gə̄ kə́ tū tə́ gír i mí. 32Tɔ́sə̄n̄ ndíĺ yá̰a̰ gə̄ tū bápə́ kə́ jōó gə̄ ní tə́. Adə̄ i ndíĺ de kə́ dɔ rā̰ tə́ kə́ ngé ngɔ̄m̄ loo gə̄ ō, ta jī kāgə̄ túmbur gə̄ ō, hútə̄ kāgə̄ kə́ tadə́ ndɔ̄bə̄ gə̄ ō, ba rāān̄ lɔ́r gidə tə́. Əndan̄ lɔ́r gidə ndíĺ de kə́ dɔ rā̰ tə́ kə́ ngé ngɔ̄m̄ loo gə̄ ní tə́ ō, gidə ndíĺ ta jī kāgə̄ túmbur gə̄ ní tə́ ō. 33Rāān̄ bápə yā kutə̄ń ta kem kújə́ kə́ bo ō. Banī rāān̄ kāgə̄ tan gə̄ i kə kāgə̄ olibə ō, yá̰á̰ súū kāgə̄ tan gə̄ ní i sɔ́ ō. 34Rāān̄ bápə́ kə́ jōó gə̄ i kə kāgə̄ sipəres. Tɔ́sə̄n̄ ndíl nə̄ngá gə̄ jōó tū nge kə́ kógə̄ḿ tə́ ō, jōó tū nge kə́ noō tə́ ō, yā súuńdə́. 35Tɔ́sə̄n̄ ndíl de kə́ dɔ rā̰ tə́ kə́ ngé ngɔ̄m̄ loo gə̄ tū tə́ ō, ndíl ta jī kāgə̄ túmbur gə̄ ō, ndíĺ hútə̄ kāgə̄ gə̄ kə́ tadə́ ndɔ̄bə̄ gə̄ ō, ba rāān̄ lɔ́r gidə tə́. 36Gō tə́ anī əndān̄ ndogə̄ mbal̄ gān̄gə̄n̄neé gíŕ ndágə loo kə́ gīr̄ gidə kújə yā Kɔ́ɔ̄ɓē kə́ kemeé. Ndogə̄ mbal̄ ń əndān̄ ní, ɔsə̄n̄ i mbal̄ kə́ tɔ́sə̄ gə̄ dɔ naā tə́ mətá n əndān̄neé ní ō, ɓōkə́n̄ sáā kāgə̄ sédər gə̄ i kə gō naá n əndān̄neé ní ō.

37Əndān̄ ngəra kújə yā Kɔ́ɔ̄ɓē i kə nāā Jib, kem ɓāl̄ ko̰o̰ ɓē yā Salomo̰ kə́ nge ko̰ sɔ́ tə́. 38Ba tɔ̄lə̄n̄ ta kəla malang kə́ tū kújə yā Kɔ́ɔ̄ɓē tə́ i kə nāā kə́ nge ko̰ sɔ́sɔ́ ń i nāā Bul ní, kem ɓāl̄ ko̰o̰ ɓē yā Salomo̰ kə́ nge ko̰ kutə gidə i kógə̄ḿ tə́. Adə̄ rāān̄ kújə yā Kɔ́ɔ̄ɓē i ɓāl̄ sīrí.

Currently Selected:

1 MBAN̄G GƏ̄ 6: SARDC

Highlight

Copy

Compare