1 KORḚNTƏ 5
5
Najə̄ kə́ dɔ sekə́ naā yā ngákó̰o̰ naā gə̄ tə́
1De gə̄ malang ədan̄ na háĺ kə́ majaĺ na to dansí tə́, ba yá̰á̰ ní na majaĺ ngá̰ý al̄ naā, adə̄ de gə̄ kə́ nin̄ i Jipə aĺ gə̄ gə̄gē na rāān̄ háĺ kə́ tītə̄ ń noō alé. Tɔdɔ̄ ənīn̄ gotə najə̄ yāsí, ədan̄ na deē kógə̄ḿ dansí tə́ na aw̄ bátə́ sāā nə̄yá̰ bɔbə̄n loo kaya tə́! 2Ba ī-raī dɔ tə́ noō na ɔ́jiī rɔ̄sí ngá̰ý ɓáý to̰! Deē ń rāā yá̰á̰ ń noō ní, majə kadə̄ wōn̄g rāāsí ba ɔ̄r̄niī kɔ̄ɔ́ dansí tə́. Banī sḭḭ̄ ī-rāāī nge ń noō alé.
3-4Ba mā tā a ká ré m̄-gətóo sesí gə̄gē anī, ndílə́ḿ i naā tə́ sesí, adə̄ m̄-gān̄g sarya kə rī Kɔ́ɔ̄ɓē Jeju dɔ de kə́ beé tə́ kɔ̄ɔ́ ɓá, tītə̄ kə́ mā i sesí beē. Dan ń ā ī-kánī naā adə̄ ndílə́ḿ i sesí naā tə́ anī, tɔ́gə́ Kɔ́ɔ̄ɓē yājí Jeju a ndi dansí tə́. 5Loo ń noō tə́ majə kadə̄ ə́laī deē ní jī Sətan tə́, kadə̄ dā̰ rɔ̄n nujə ba ndílən ajə ndɔ̄ yā Kɔ́ɔ̄ɓē tə́.
6Yá̰á̰ ń ɔ́jiī rɔ̄sí najə̄n tə́ ní i yá̰á̰ kə́ majə alé. Kaa mápá kə́ sḛ́ý beē rāā adə̄ ndujə̄ mápá kə́ ló̰ȳ agə̄ malang ní ī-gerī aĺ a? 7Kaa mápá kə́ lōō kōkə̄ kɔ̄ɔ́ ń i yá̰á̰ kə́ majaĺ ní, ɔ̄rī kɔ̄ɔ́ dɔ dáńsí tə́ tá kadə̄ ī-télīneé de kə́ unjə̄n̄ njáý njáý gə̄. Loo ń noō tə́ ā ī-toī tītə̄ ndujə̄ mápá kə́ ló̰ȳ kijə kanjə̄ kənī kaa mápa kum tə́ beē. Tɔdɔ̄ sḭḭ̄ i ndujə̄ mápá kə́ ló̰ȳ kijə kanjə̄ kənī kaa kum tə́. Tām̄ Kərist ń i batə̄ Pákə yājí ní tɔ̄l̄nən̄ kɔ̄ɔ́ ɓá. 8I beé ní ādə̄ jə-rāāī nāā Pákə kə kaa mápá kə́ lōō kōkōó alé. Tɔdɔ̄ kaa kə́ lōō kōkə̄ ní i kem ndul ō, ndāńg ō. Banī ādə̄ jə-rāāī nāā Pákə kə mápá kə́ rāā kanjə̄ kənī kaa mápa kum tə́ ń i kem kə́ ndaa táĺ ō, i yá̰á̰ kə́ rɔ̄kum ō ní.
9Makətūbə̄ ń m-ndang m-ādə̄sí kété ní, m-ə́dásí najə̄ kemeé m-ə́da na kə ī-lōōī ɓoo naā kə ngé sāā naā loo kaya tə́ gə̄. 10Banī de gə̄ ń m̄-gḛy kadə̄ ī-ɓooī naā sedə́ aĺ ní, i de kə́ dɔ nang tə́ laā gə̄ malang ń nin̄ i ngé sāā naā loo kaya tə́ gə̄ ō, ngé ndə̄ngā yá̰a̰ gə̄ ō, ngé ɓogə gə̄ ō, ngé rāā ɓesə̄ gə̄ ō ní alé. Tɔdɔ̄ ré i beé anī, a asə kadə̄ ā ə́ya̰ī i dɔ nang ń toō kɔ̄ɔ́ ba āwī loo kə́ rang tə́! 11Najə̄ ń m̄-ndang m-ādə̄sí ní, i kadə̄ ī-lōōī ɓoo naā kə de kə́ ā ī-ɓāŕniī na i ngōkó̰ó̰sí, tá ni i de kə́ nge sāā naā loo kaya tə́, aláa ni i de kə́ nge ndə̄ngā yá̰a̰, aláa i nge rāā ɓesə̄, aláa i nge tetə najə̄, aláa i nge kasə rāā, aláa i nge ɓogə. De kə́ beē ní, yá̰a̰ kəsa gə̄gē ī-lōōī kəsa seneé.
12Tɔdɔ̄ gān̄g sarya dɔ de kə́ ndágá gə̄ tə́ i najə̄ yāḿ mā alé. Ngé gə̄ ń kadə̄ ī-gāngī sarya dɔdə́ tə́ ní, i ngé kə́ kemeé gə̄ aĺ a? 13Ngé kə́ ndágá gə̄ i Nə́ɓā n i nge gān̄g sarya dɔdə́ tə́ ní. Ɔ̄rī de kə́ nge kem ndul kɔ̄ɔ́ dɔ dansí tə́#5.13 Nge kem ndul: Á̰a̰ī Teē 12.3,5,21; Teē 13.7.
Currently Selected:
1 KORḚNTƏ 5: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
