1 KORḚNTƏ 4
4
Ngámbang kəla gə̄ yā Kərist
1I beé ní, majə kadə̄ ī-rāāījí ngé kəla yā Kərist gə̄ tə́ ō, ī-rāāījí de gə̄ kə́ əndān̄də́ ta kəla najə̄ kə́ rɔ̄kum gə̄ yā Nə́ɓā kə́ to loo mundə̄ tə́ ō. 2Yá̰á̰ ń a sāān̄ rɔ̄ de kə́ əndānən̄ ta kəla tə́ ní, i kadə̄ ni-rāā kəla yān kə gōó majə ngóy. 3Kə́ tām̄ yāḿ mā tə́ tā anī, ká i sḭḭ̄, aké i ngé rāā sarya yā de gə̄ n gāngə̄n̄ sarya dɔḿ tə́ gə̄gē anī, i karī seḿ. Mə̄kɔ́ m̄-gān̄g sarya dɔ rɔ̄ḿ tə́ aĺ ō. 4Ká ré m̄-ger̄ kadə̄ najə̄ gətóo dɔḿ tə́ gə̄gē anī, m̄-tél de kə́ gōtə́ i tām̄ nge ń noō tə́ alé. Tɔdɔ̄ nge gān̄g sarya dɔḿ tə́ i Kɔ́ɔ̄ɓē. 5Adə̄ ī-lōōī gān̄g sarya kété no ndɔ̄ sarya tə́, ī-ngóōī ādə̄ Kɔ́ɔ̄ɓē reē tá. Yá̰á̰ ń i kə́ ɓɔ̄ɔ̄ kum til tə́ ní, ni a teēń kum loo kə́ unjə̄ kow tə́ ō, yá̰a̰ gə̄ ń de gə̄ númə̄n̄ kemdə́ tə́ ní, ni a ɔjə kə̄ ndágá ō. Loo ń noō tə́ Nə́ɓā a ɓōkə́ deē kógə̄ḿ kógə̄ḿ tɔ̄ȳ kadə̄ asə kə gō kəla yānneé.
6Ngákó̰ó̰ḿ gə̄, m̄-tūr̄ najə̄ ń toō m̄-reēń dɔ Apolos tə́ ō, dɔḿ mə̄kɔ́ tə́ ō, i tām̄ yāsí tə́, kadə̄ ī-rāāījí yá̰á̰ ndájə̄ tə́, ba ī-ndóōī loo kɔjə rɔ̄sí kə ta kūl̄ ndigə najə̄ gō de kə́rēý tə́, ba mbātə́nń najə̄ gō de kə́ noō tə́ alé. 7Tɔdɔ̄ i náā n rāāī ḭ̄ de kə́ tayā tə́ ní? Yá̰á̰ ń ə́ngé ní i rí n i kə́ adīn̄ i mbée aĺ ní? Banī loo ń adīn̄ i mbée anī, i tām̄ rí tə́ á ɔ́jəń rɔ̄í tītə̄ kə́ adīn̄ i mbée aĺ ní?
8Sḭḭ̄ ī-ndānī kɔ̄ɔ́ ɓá ō, ə́ngeī yá̰á̰ ngá̰ý kɔ̄ɔ́ ō. Sḭḭ̄ i mban̄g gə̄, banī jḭḭ i mban̄g gə̄ alé. m̄-ndigə ngá̰ý kadə̄ sḭḭ̄ ó̰o̰ī ɓē kə́ rɔ̄kum tə́, yā kadə̄ jḭḭ j-o̰o̰ń ɓē sesí ō. 9Tɔdɔ̄ mā m-á̰a̰ kadə̄ to tītə̄ kə́ Nə́ɓā əndājí jḭḭ ngámbang kəla gə̄ i loo kə́ gogə́ tə́ beē: Jə-to i tītə̄ de gə̄ kə́ gāngə̄n̄ sarya yo dɔdə́ tə́, yā tɔ̄l̄də́ ta kum kósə de gə̄ tə́ beē. Rāān̄jí i kur̄ kəgō yā de gə̄ tə́ malang, rāān̄jí i kur̄ kəgō yā de kə́ dɔ rā̰ tə́ gə̄ tə́ ō, yā deē ndul gə̄ tə́ ō. 10Jḭḭ i mbóo de gə̄ tām̄ yā Kərist tə́, ba sḭḭ̄ i ngé kum kedə̄ gə̄ kə gō ɓoo naā yāsí kə Kərist tə́. Jḭḭ i de kə́ ngan̄g aĺ gə̄, ba sḭḭ̄ i de kə́ ngan̄g gə̄. De gə̄ rɔȳn̄sí sḭḭ̄, ba kídə̄n̄jí jḭḭ! 11Bátə́ ɓōólaā gə̄gē ní, ɓō rāājí ō, kəndā rāājí ō, ndoō kūbə̄ rāājí ō, rāān̄jí majaĺ ngá̰ý ō, jə-dáȳ kə̄ loo gə̄ tə́ ō, 12j-a̰a̰ tápə̄ loo rāā kəla tə́ kə jījí ō. Ré de gə̄ tájə̄n̄jí anī, jə-tɔ́r̄ i tají tá dɔdə́ tə́. Ré rāān̄jí yá̰á̰ kə́ tōr̄ anī, jə-tə́gā tají. 13Ré tetən̄ najə̄ dɔjí tə́ anī, j-ədadə́ najə̄ kə́ to sɔl̄ kem. Bátə́ ɓōólaā gə̄gē ní, jə-to i tītə̄ dɔ bū loo beé tām̄ yā de kə́ dɔ nang tə́ gə̄ tə́, jə-to i tītə̄ yá̰á̰ kə́ de gə̄ ɓōkə́n̄ kɔ̄ɔ́ beē.
14m̄-ndang yá̰a̰ gə̄ ń toō i yā rāań kadə̄ rɔ̄sí sɔl̄sí alé, banī m̄-tāāsí i mbéé kə́ ngáń kó tár yāḿ gə̄ tə́. 15Tɔdɔ̄ ká ré ngolsí gə̄ kə́ ngé ndóōsí loo njə̄rā kə Kərist gə̄ i dūbú kutə gə̄gē anī, bɔbə̄sí kə́ ta yā Kərist tə́ i kal kógə̄ḿ beē ngóy. Tām̄ najə̄ kə́ dɔ ndisí tə́ kə Jeju Kərist ní, i mā n i bɔbə̄sí loon tə́ kə ta kūl̄ kɔjəsí Najə̄ kə́ Majə ní. 16I beé ní m̄-rāāsí ɓɔ́, ba ī-téliī ngé ndájə̄ḿ gə̄. 17I tām̄ najə̄ ń noō tə́ n m-ə́la Timote rɔ̄sí tə́ ní. Ni i ngōnə̄ḿ kə́ ra dɔ ndūn tə́ kə́ m̄-tárən ngá̰ý sɔɔ̄ń Kɔ́ɔ̄ɓē. Ndū najə̄ gə̄ ń m-ún gō á m̄-ndiń kə Kərist ní, ni a ter̄ kemsí dɔ tə́. Adə̄ i yá̰a̰ gə̄ ń m̄-ndóō de gə̄ kə̄ kem Egəlijə gə̄ tə́ malang ní.
18De kə́rēý gə̄ dansí tə́ gírə̄n̄ kadə̄ m-ā m̄-tél yā kaw̄ loosí to̰ alé, adə̄ nin̄-ɔjən̄ rɔ̄də́ ngá̰ý. 19Banī ré Kɔ́ɔ̄ɓē ndigə anī, m-ā m̄-tél yā kaw̄ loosí ngɔr. Loo ń noō tə́ ngé gə̄ ń ɔjən̄ rɔ̄də́ ngá̰ý ní, m-ā m̄-ger̄ i najə̄ kɔr̄də́ ngóy alé, ba i kəla rāādə́ gə̄. 20Tɔdɔ̄ Ɓē ko̰o̰ yā Nə́ɓā i kɔr̄ najə̄ alé, ba i tɔ́gə. 21Yá̰á̰ ń sḭḭ̄ i ndigiī ní i rí? I kadə̄ m-āw̄ rɔ̄sí tə́ i kə ndéyé aké i kə tárá ō, i kə ndíĺ kə́ sɔl̄ lɔ́ lɔ́mɔ́ ō ḿ?
Currently Selected:
1 KORḚNTƏ 4: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.