1 KORḚNTƏ 12

Yá̰a̰ gə̄ ń Ndíĺ kə́ Táĺ a adə̄ de gə̄ karī ní

1Ń toō ɓáa j-a̰a̰ī najə̄ yā yá̰a̰ gə̄ ń Ndíĺ kə́ Táĺ a adə̄ de gə̄ karī ní tā.

Ngákó̰ó̰ḿ gə̄, m̄-sāā kadə̄ ī-gerī najə̄ kə́ rɔ̄kum kə́ dɔ yá̰a̰ gə̄ ń Ndíĺ kə́ Táĺ a adə̄ de gə̄ karī tə́ ní. 2Ī-gerī kadə̄ dan ń sḭḭ̄ ī-taāī kem Nə́ɓā aĺ ɓáý ní, sḭḭ̄ āwī gō ɓesə̄ gə̄ ń nin̄ a ɔrə̄n̄ najə̄ aĺ tə́ ní, tītə̄ kə́ i yá̰á̰ kógə̄ḿ n ɔsə sesí kadə̄ āwī gōdə́ tə́ beē. 3I tām̄ najə̄ ń noō tə́ n m-ə́dásí najə̄ ń toō kadə̄ ī-gerī ní: De kə́ ɔr̄ najə̄ kə ta kūl̄ Ndíl yā Nə́ɓāá kə́ əda na Jeju na i de kə́ ndɔ̄ĺnən̄ kɔ̄ɔ́ ní gətóo ō, de kə́ asə kəda na Jeju i Kɔ́ɔ̄ɓē kanjə̄ kadə̄ i Ndíĺ kə́ Táĺ n əndā tan tə́ ní gətóo ō.

4Yá̰a̰ gə̄ ń Ndíĺ kə́ Táĺ adə̄ deē karī kə gō kem ndigə yānneé ní, gíŕdə́ i ngá̰ý, ba i Ndíĺ kə́ Táĺ nəkɔ́ kə́ kal kógə̄ḿ beē ń toō n i nge kadə̄ de gə̄ ní. 5Loo rāā kəla gír i ngá̰ý, banī i Kɔ́ɔ̄ɓē nəkɔ́ kə́ kal kógə̄ḿ beē ń to n j-a jə-rāāī kəla yān ní. 6Gír kəla gə̄ i ngá̰ý, banī i Nə́ɓā kə́ kal kógə̄ḿ beē n rāādə́ malang kemjí gə̄ tə́ malang ní. 7Ndíĺ kə́ Táĺ ɔjə rɔ̄n kə̄ ndágá kə ta kūl̄jí kógə̄ḿ kógə̄ḿ i kə yá̰á̰ kə́ ni-adə̄jí karī, yā kadə̄ rāā majə kə de gēé malang. 8Ni-adə̄ deē kógə̄ḿ tɔ́gə kɔr̄ najə̄ kə́ kə kum kedēé ō, Ndíĺ kə́ Táĺ nəkɔ́ kə́ kal kógə̄ḿ beē ń toō adə̄ de kə́ rang tɔ́gə kɔr̄ najə̄ kə gō yá̰á̰ ń ní ger̄ kə ta kūl̄ Ndíĺ kə́ Táĺ ní ō. 9Ndíĺ kə́ kal kógə̄ḿ beē nəkɔ́ ń toō adə̄ deē kógə̄ḿ tɔ́gə taā kem ō, adə̄ de kə́ rang tɔ́gə kə́ yā rāań kadə̄ rɔ̄ deē ngáā ō, 10adə̄ de kə́ rang tɔ́gə rāā yá̰á̰ kə́ yáā gə̄ ō, adə̄ de kə́ rang tɔ́gə kəda najə̄ kə́ Nə́ɓā əndā tan tə́ ō, adə̄ de kə́ rang ɓáý to̰ tɔ́gə ger̄ gíŕ ndíĺ gə̄ ō, adə̄ de kə́ rang tɔ́gə kɔr̄ najə̄ kə ta kə́ tayā gə̄ ō, adə̄ de kə́ rang ɓáý to̰ tɔ́gə ger̄ kum ta kə́ tayā gə̄ ní ō. 11I Ndíĺ kə́ kal kógə̄ḿ beē nəkɔ́ ń toō n rāā yá̰a̰ gə̄ ń toō malang ní. Ni-adə̄ de gə̄ kógə̄ḿ kógə̄ḿ yá̰á̰ kə́ tayā tayā gə̄ kə gō kem ndigə yānneé.

Rɔ̄jí i kógə̄ḿ beē banī ngán rɔ̄jí gə̄ i ngá̰ý

12Tɔdɔ̄ rɔ̄ deē i kógə̄ḿ beē, banī ngán rɔ̄n gə̄ i ngá̰ý. Ba ngán rɔ̄n gə̄ ń gíŕdə́ i ngá̰ý noō ɓoon̄ naā anī, télən̄ i rɔ̄ de kə́ kal kógə̄ḿ beē. Ba Kərist i tītə̄ ń noō ō. 13Tām̄ jḭḭ̄ malang ní, Jipə gə̄ gə̄gē, de gə̄ kə́ nin̄ i Jipə aĺ gə̄ gə̄gē, ɓəlo gə̄ gə̄gē, de kə́ kɔ́ɔ̄ rɔ̄də́ gə̄ gə̄gē ní, rāān̄jí i batém Ndíĺ kə́ Táĺ kə́ kógə̄ḿ beé, i kadə̄ jə-téliī rɔ̄ de kə́ kal kógə̄ḿ beē. Tá jḭḭ̄ malang ní j-a̰yī i Ndíĺ kə́ kógə̄ḿ beē ō.

14I ngōn̄ rɔ̄ de kə́ gíŕ kógə̄ḿ beē n i rɔ̄ deē kə taá malang ní alé. Banī i ngán rɔ̄n gə̄ kə́ gíŕdə́ i ngá̰ý n ɓoon̄ naā á télən̄ rɔ̄n ní. 15Ré nja əda na ni na i jī alé, adə̄ ni na i ngōn̄ rɔ̄ deē aĺ ní, kədan yān ń noō a ɔgə̄ kadə̄ ni i ngōn̄ rɔ̄ deē a? 16Ré mbī əda na ni na i kum alé, adə̄ ni na i ngōn̄ rɔ̄ deē aĺ ní, kədan yān ń noō a ɔgə̄ kadə̄ ni i ngōn̄ rɔ̄ deē a? 17Ré rɔ̄ deē i kumən malang anī, ni a oō loo i ba̰ý? Aláa ré rɔ̄ deē i mbīn malang anī, ni a un wusə yá̰a̰ i ba̰ý? 18Banī Nə́ɓā əndā ngán rɔ̄jí gə̄ kógə̄ḿ kógə̄ḿ rɔ̄jí tə́ i kə gō kem ndigə yānneé. 19Ré rɔ̄jí malang i ngōn̄ rɔ̄jí kə́ kógə̄ḿ beē ní, rɔ̄jí kə taá malang i rá? 20Ní, ngán rɔ̄jí gə̄ i ngá̰ý, ba rɔ̄jí malang i kógə̄ḿ beē.

21Adə̄ kum a asə kəda jī na yá̰á̰ kə́ yā kadə̄ n-sāań njan na gətóo aĺ ō, dɔ a asə kəda nja na yá̰á̰ kə́ yā kadə̄ n-sāań njan na gətóo aĺ ō. 22Ba nge ń noō gē i karī ɓáý, tɔdɔ̄ ngán rɔ̄jí gə̄ ń jə-rāāīdə́ i ngán rɔ̄jí gə̄ kə́ nin̄-ngangə̄n̄ aĺ ngá̰ý tə́ ní, j-asiī ndi kanjə̄də́ aĺ ō, 23ngán rɔ̄jí gə̄ ń jə-rāāīdə́ i yá̰á̰ kə́ to rɔȳ aĺ gə̄ tə́ ní, i nin̄ bang n j-a̰a̰ī gōdə́ tɔȳ gotə gə̄ malang ní ō. Ngé gə̄ ń majə kɔr̄ najə̄ yādə́ aĺ ní, j-a̰a̰ī gōdə́ ka̰a̰ kə́ tɔȳ dɔ ō. 24Ba gotə rɔ̄jí kə́ rang kə́ to rɔ̄sɔl̄ aĺ gə̄ ní, usədə́ dɔ yá̰á̰ kə́ tītə̄ ń noō gə̄ tə́ alé. Banī Nə́ɓā rāā rɔ̄jí i rāā kə́ kadə̄ ngán rɔ̄jí kə́ to rɔȳ aĺ gə̄ ní rɔȳn̄də́ ngá̰ý, 25yā kadə̄ kēgə̄ naā gətóoń kem rɔ̄jí tə́, ba kadə̄ ngán rɔ̄jí gə̄ malang ní, o̰o̰də́ tɔdɔ̄ naā kadə̄ asə naā. 26Ré ngōn̄ rɔ̄jí kógə̄ḿ i mo̰y anī, gotə rɔ̄jí malang i mo̰y ō. Ré rɔȳn̄ ngōn̄ rɔ̄jí kə́rēý anī, gotə rɔ̄jí gə̄ malang rāān̄ rɔ̄nel̄ seneé ō.

27Sḭḭ̄ malang i rɔ̄ Kərist kə taá ō, sḭḭ̄ kógə̄ḿ kógə̄ḿ i ngán rɔ̄n gə̄ ō. 28I beé n Nə́ɓā əndāń ngámbang kəla gə̄ kété kem Egəlijə tə́ ní. De gə̄ ń utə̄n̄ gōdə́ ní i ngé koō ta gə̄. Kə́ ko̰ mətá i nge ndóō de gə̄ yá̰a̰ gə̄. Gōdə́ nin̄ tə́ i ngé rāā yá̰á̰ kə́ yáā gə̄. Kutə gō anī i ngé kaw̄ kə tɔ́gə́ kə́ yā rāā kadə̄ rɔ̄ de gə̄ ngáā ō, ngé rāā kə deē madə̄də́ gēé ō, ngé kɔr no madə̄də́ gə̄ ō, ngé kɔr̄ najə̄ kə ta kə́ tayā gə̄ ō. 29Nin̄ malang i ngámbang kəla gə̄ a? Nin̄ malang i nge koō ta gə̄ a? Nin̄ malang i ngé ndóō de gə̄ yá̰á̰ gə̄ a? Nin̄ malang i ngé rāā yá̰á̰ kə́ yáā gə̄ a? 30Nin̄ malang i ngé rāā kadə̄ rɔ̄ de gə̄ ngáā a? Nin̄ malang i ngé kɔr̄ najə̄ kə ta kə́ tayā gə̄ a? Nin̄ malang i ngé tútə kum ta kə́ tayā gə̄ ní a? 31Ādī ɓō kənge yá̰á̰ kə́ majə tɔȳ gotə gə̄ ń Ndíĺ kə́ Táĺ a adə̄ de gə̄ karī ní rāāsí.

Tá ɓáý to̰ ní m-ā m-ɔ́jə́sí ta róbə́ kə́ majə tɔȳ madə̄ gə̄ malang.

Currently Selected:

1 KORḚNTƏ 12: SARDC

Highlight

Copy

Compare