1 YÁ̰A̰ GƏ̄ 5

De kə́ gír kojə yā Ruben tə́ gə̄

1-3Ruben i hágə Jakob ɓá tā ba ni ɓīī kə nə̄yá̰ bɔbə̄neé adə̄ télən̄ kə yá̰a̰ ndəba yān kə́ loo ngōn̄ hágə́ tə́ adə̄n̄ i ngán Jəjep gə̄. Jəjep i ngōn̄ Israel ō. Adə̄ rāān̄ Ruben i ngōn̄ hágə̄ tə́ to̰ alé. Juda i de kə́ bo tɔȳ ngákó̰o̰n gə̄ malang. Mban̄g kə́ Israel tə́ teē i gír yān tə́. Banī ta róbə kənge yá̰a̰ ndəbā kə́ loo ngōn̄ hágə́ tə́ i yā Jəjep.

Rī ngán Ruben kə́ hágə Jakob na i Hanok ō, Palu ō, Hesəron ō, Karmi ō. 4De kə́ gír kojə yā Joel tə́ gə̄ kə gō naā n toó: I Semaya ō, Gog ō, Simei ō, 5Mika ō, Reaya ō, Baal ō, 6Beera kə́ ngār yā ngán Ruben gə̄ ń Tigəlatə Pileser mban̄g kə́ Asiri əhɔn aw̄ seneé ɓəloó ní ō. 7Ngákó̰o̰ Beera gə̄ ń nin̄ i dɔ gír kaa yādə́ gə̄ tə́, aláa dɔ kojə yādə́ gə̄ tə́ ní, rīdə́ i kə́ ndang kem makətūbūú. Nge kə́ ta kəga dɔ rīn na i Yeyel, nge kutə̄ gōn i Jakari, 8nge tɔ̄l̄ tadə́ i Bela ngōn̄ Ajaj kə́ ngōn̄ Sema kə́ ngōn̄ Joel. Loo ń ngán Ruben gə̄ ndin̄ tū tə́ ní, ré deē ra tū tə́ anī Aroer i kə̄ dām̄ mbɔ́r ɓē kə́ geleé tə́ ō, mbal̄ Nebo ō, ɓē kə́ Baal Meon ō, ran̄ i kə̄ dām̄ mbɔ́r ɓē kə́ ko̰ó̰ tə́ ō. 9Dām̄ kə́ gír ɓē tə́ ɓáa nin̄ ndin̄ bátə́ ta kaw̄ kə kadə dəla loo ń kēgə̄ dɔ nang yādə́ naā tə́ kə bā Opəratə ní tə́, tɔdɔ̄ yá̰a̰ kul̄ yādə́ gə̄ i ngá̰ý dɔ nang kə́ Galaad tə́. 10Ɓāl̄ yā Saul tə́ ní nin̄ rɔ̄ɔ̄n̄ Hagəri gə̄ rɔ̄ɔ̄ tetən̄də́, adə̄ əlan̄ dɔdə́ gíŕ tɔ́gə yādə́ tə́. Gō tə́ anī gō nang ń deē ra Galaad anī i kə̄ dām̄ kə́ gír ɓē tə́ ní, nin̄ ndin̄ tū tə́ malang.

De kə́ gír kojə yā Gad tə́ gə̄

11Ré deē ra ɓē ngán Ruben gēé anī, de kə́ gír kojə yā Gad tə́ gə̄ ndin̄ i kə̄ dām̄ mbɔ́r kə́ ko̰ó̰ tə́, dɔ loo kə́ kḭḭ kə̄ dɔɔ́ ba gidə asə naā kə́ Basan tə́ ō, ndin̄ bátə́ ta kaw̄ kə̄ Salka dām̄ kə́ gír ɓē tə́ ō. 12De gə̄ ń ndin̄ noó kété ní de kə́ ta kəga dɔ gə̄ i gír kaa gə̄ yā Joel. Kə́ nge ko̰ jōó i gír Sapan. Gō tə́ anī i gír kaa gə̄ yā Yanai ō, yā Sapat ō. 13Tá kadə̄ gír kaa kə́ rang gə̄ i sīrí ɓáý to̰: I gír kaa gə̄ yā Mikael ō, Mesulam ō, Seba ō, Yorai ō, Yakan ō, Jia ō, Eber ō. 14Ngé kəndā gír kaa gə̄ ń noō ní nin̄ i ngán Abihail gə̄. De kə́ gír kojə yādə́ gə̄ kə gō naá n toó: Huri ō, Yaroa ō, Galaad ō, Mikael ō, Yesisai ō, Yado ō, Bujə ō. 15De kə́ dɔ gír kojə gə̄ ń noō tə́ i Ahi kə́ ngōn̄ Abədiel kə́ ngōn̄ Guni. 16Adə̄ de kə́ gír kojə yā Gad tə́ gə̄ ndin̄ i dɔ nang kə́ Galaad tə́ ō, kə́ Basan tə́ ō, gō nang gə̄ ń ɓē kə́ Galaad ō, kə́ Basan ō, o̰o̰ ɓē dɔ tə́ ní ō, ndin̄ i loo gə̄ kə́ Saron ń a aw̄n̄ kə yá̰a̰ kul̄ gēé dɔ mu tə́ tū tə́ ní ō, bátə́ ta kaw̄ kə̄ ta ngóy loo gə̄ ní tə́. 17Ndangən̄ rī de gə̄ kə́ gír ɓē ń noō tə́ gə̄ makətūbūú i ɓāl̄ yā Yotam mban̄g kə́ Juda tə́ ō, i ɓāl̄ yā Jeroboam mban̄g kə́ Israel tə́ ō. 18Ngán Ruben gə̄ ō, ngán Gad gə̄ ō, núsə de gə̄ kə́ gír ɓē yā Manase tə́ gə̄ ō ní, nin̄ i go̰ rɔ̄ɔ̄ gə̄ ō. Nin̄ i deē dūbú kutə̄ sɔ́ gidə i sɔ́ kə dɔn kə́ ɓú sīrí kə kutə mehḛ́. Nin̄ asən̄ kaw̄ ta rɔ̄ɔ̄ tə́. 19Nin̄ rɔ̄ɔ̄n̄ Hagəri gə̄ ō, de gə̄ kə́ gír kojə yā Yetur tə́ ō, yā Napis tə́ ō, yā Nodab tə́ ō. 20Nə́ɓā rāā sedə́ loo rɔ̄ɔ̄ ní tə́. Ni-əla Hagəri gə̄ ō, de kə́ sedə́ gə̄ malang ō, kem jīdə́ tə́. Tɔdɔ̄ dan ń udən̄ rɔ̄ɔ̄ naā tə́ a rɔ̄ɔ̄n̄ naā ní, nin̄ əgan̄ kɔŕ kə̄ dɔ Nə́ɓā tə́ adə̄ Nə́ɓā oō ndūdə́ ba dḭḭ̄də́, tām̄ nin̄ ənīn̄ kemdə́ adə̄n̄ Nə́ɓā. 21Nin̄ əhɔn̄ yá̰a̰ kul̄ yādə́ gə̄ jámbal gə̄ dūbú kutə mí ō, batə̄ gə̄ ō, bə̄yā̰ gə̄ ō, malang i dūbú ɓú jōó kə kutə mí ō, kərō gə̄ dūbú jōó ō, de gə̄ dūbú ɓú ō. 22Madə̄ ba̰ā̰ gə̄ ngá̰ý óyn̄ tɔdɔ̄ rɔ̄ɔ̄ ní i rɔ̄ɔ̄ yā Nə́ɓā. Nin̄ ndin̄ gotədə́ tə́ bátə́ ɓāl̄ kaw̄ ɓəloó tə́.

De kə́ gír kojə yā Manase tə́ gə̄

23Núsə de kə́ gír ɓē yā Manase tə́ gə̄ reē ndin̄ ɓē Basan bátə́ ugən̄ Baal Hermon ō, Senir ō, Hermon ō, i kə̄ dām̄ mbɔ́r ɓē kə́ ko̰ tə́ ní ō. Nin̄ i ngá̰ý. 24Rī de kə́ dɔ gír kojə yādə́ gə̄ tə́ n toó: Eper ō, Isei ō, Eliel ō, Ajriel ō, Yirmea ō, Hodabia ō, Yadiel ō. Nin̄ i go̰ rɔ̄ɔ̄ gə̄ ō, rīdə́ ɓār̄ ngá̰ý ō. 25-26Gír ɓē gə̄ yā Ruben ō, yā Gad ō, núsə de kə́ gír ɓē yā Manase tə́ gə̄ ō, rāān̄ hál kə́ sew aĺ kə Nə́ɓā yā kaadə́ gēé. Nin̄-əya̰nən̄ kɔ̄ɔ́ ba ndɔ̄ȳn̄ nə́ɓā gə̄ ń i ɓesə̄ gə̄ yā gír de gə̄ ń Nə́ɓā tɔ̄l̄də́ kɔ̄ɔ́ malang nodə́ tə́ ní. Tā anī Nə́ɓā yā Israel sə̄lā mban̄g gə̄ kə́ Asiri ń i Pul ō, Tigəlatə Pileser ní ō, adə̄ reē taān̄ dɔ nang yā gír ɓē gə̄ ń noō, ba ɔyn̄ de kə́ tū tə́ gə̄ aw̄n̄ sedə́ gō nang kə́ Hala tə́ ō, Habor tə́ ō, Hara tə́ ō, kadə man̄ kə́ Gojan tə́ ō. Ɓōólaā gə̄gē nin̄-ndin̄ noó ɓáý.

De kə́ gír kojə yā Lebi tə́ gə̄: Ngol ngé tun̄ yá̰a̰ gə̄

27Rī ngán Lebi gə̄ na i Gerson ō, Kehat ō, Merari ō. 28Rī ngán Kehat gə̄ na i Amram ō, Isar ō, Hebron ō, Ujiel ō. 29Rī ngán Amram gə̄ na i Aaro̰ ō, Moijə ō, Miriam ō. Rī ngán Aaro̰ gə̄ na i Nadab ō, Abihu ō, Eleajar ō, Itamar ō. 30Eleajar ojə Pinas ō, Pinas ojə Abisua ō, 31Abisua ojə Buki ō, Buki ojə Uji ō, 32Uji ojə Jeraya ō, Jeraya ojə Merayot ō, 33Merayot ojə Amaria ō, Amaria ojə Ahitub ō, 34Ahitub ojə Sadok, Sadok ojə Ahimas, 35Ahimas ojə Ajaria, Ajaria ojə Yohanan, 36Yohanan ojə Ajaria. I ni n i nge tun̄ yá̰á̰ kə́ kem kújə́ n Salomo̰ rāā Jerusalem tə́ ní. 37Ajaria ojə Amaria, Amaria ojə Ahitub. 38Ahitub ojə Sadok, Sadok ojə Salum, 39Salum ojə Hilkia, Hilkia ojə Ajaria, 40Ajaria ojə Seraya, Seraya ojə Yosadak. 41Dan ń Kɔ́ɔ̄ɓē adə̄ Nabukodonosor əhɔ de kə́ Jerusalem gə̄ ō, de kə́ gō nang kə́ Juda tə́ gə̄ ō, aw̄ sedə́ ɓəloó ní, Yosadak aw̄ ɓəloó ō.

Currently Selected:

1 YÁ̰A̰ GƏ̄ 5: SARDC

Highlight

Copy

Compare