Roomawa 8
8
Ɔ̃nɛ a Suru
1Shɔ gbeteyi pɛ kirisi Yesɔ ɓɛɛ yɛ, ruuyeenɛ ayuu vɔnɛ ɓa ai yuuni dɔdɔrim niɓa. 2Aru Ɗa suru kaka gbete n-tiu suru kaliu naatɛ aru gbete u ã sisɨn a Kirisi Yesɔ bi, shɔ gbete Ɗalapa lɔɔyɛ u raau shɔbiiyiyɛ. 3Vi gbete nya-ãsinɛ Musa ji zɛnɔɔ pɛlinɛ ɓa, aru shɔzɛ vi pɛlinɛ u kaka ɓa, Ɗalapa pɛlirɛ. Ɗalapa nyɔ ruuvini a shɔzɛ bi, a nyaba gbete sho ɓɛɛ jaayɛ, shɔ gbeteu arɛ a shẽẽbii shɔzɛ gbete ruuvini a ɗɔnni, aru u sɔ̃nriu ruuvini, 4Ɗalapa pɛli vim aru vishonɛ vitɔ̃vɨng gbete nya-ãsinɛ kasinɛu pɛliyɛ, u pɛlitɔ u shɔgbete Ɗa suru shovi au biiyɛ, ama ɓa a ɔ̃nɛ tete ruuvini ɓa. 5Shɔ gbeteyi ɔ̃nɛ pɛ shɔzɛ vi pɛlinɛ, i sisɨn sɔɔ a vi gbete shɔzɛ kasiyɛ. Shɔ gbeteyi ɔ̃nɛ pɛ shɔ Ɗa suru, i sisɨn sɔɔ a vi gbete Ɗa suru kasiyɛ. 6Sɔɔrinɛ sisɨn a vi gbete shɔzɛ pɛliyɛ n ti vɔnɛ; ama sɔɔrinɛ sisɨn a Ɗa suru n ti suru a ɔ̃nɛ binyatɔ̃nɛ. 7Shɔ gbeteyi sisɨn a vigbete shɔzɛ pɛliyɛ ɔ̃tɛ Ɗalapa shɔnɔpɔ̃, aru i ɡɨn Ɗalapa nya-ãsinɛ ɓa, i zɛnɔɔ gɨnnɛ ɓa. 8Shɔ gbeteyi gɨn shɔzɛ vipɛlinɛ i pɔ̃ Ɗalapa ɓa u nta sisɨn pururɛ ɓa.
9Ama ɔ ɔ̃nɛ ɓa shɔzɛ zɔng ɔ̃nɛ ɓa, pɛ Ɗa suru ɓɛɛ, naa nizɛ kɔ Ɗa suru kɛ ɔ̃nɛ awɔ sisɨn. kopiya gbeteu Kirisi suru ɓa, u ɓa kirisi ɓɛɛ ɓa. 10Ama Kirisi kɛ ɔ̃nɛ a ɔkɔni, ko a bi vɔtɛ aru ruuvini, ama Ɗa suru ãwɔ surutɔ aru ɔ ã sisɨntɛ a Ɗabii, Ɗalapa pɔ̃ ɔ̃tɛ ɔ pɛ shɔ tɔ̃vɨn. 11Naa Ɗa suru, gbete yusi Yesɔ a sàà u ɗɔ ɔ̃nɛ awɔ sisɨn, kɛɗɔn shɔgbete au yusi Kirisi a sàà yɛ ukɔma yɛ awɔ bi gbete vɔtɛttɔ surutɔ, a nyaba u suru gbete ɔ̃ awɔ sisɨnyɛ.
12Kɛɗɔn mazɔ̃ a manayi, u vipɛlinɛ ɗɔn, ama ɓanɛu gɨn vigbete u bi kasi nɛ u pɛliyɛ nɛu pɛliu ukɔ ɓa. 13Aru ɔ kɛ ɔ̃nɛ, ɔ̃nɛ shɔzɛ vipɛlinɛ, ɔ yɛ vɔtɔ; ama ɔ kɛ ɔ̃nɛ, ɔnɛ Ɗa suru kaka kɛɗɔn ɔ nyɔ ɔ̃nɛ ruuvinirɛ, ɔ yɛ ɔ̃ a suruni. 14Shɔ gbete Ɗa Suru tɛɛsiyi ɗekɨn yɛ i pɛ Ɗalapa jaayi. 15Aru Ɗa Suru gbete Ɗalapa ãwɔ yɛ, ɓa shɔ gbete ɔ yɛ ɔ̃ foo yɛɓa, u pɔ̃ ɔrɛ ɔ ɔ̃ seeti ɓa; ama Suruwu pɔ̃ ɔrɛ ɔ ɔ̃ Ɗa jaayi, a nyaba Ɗa Surukɔ u gaki Ɗa, u shanɛ, <<Abba, Da!>> 16Ɗa Suru ɓasiu yuu au suruni a tasinɛu pɛ Ɗa jaayi. 17U kɛ ɔ̃nɛ Ɗa jaayi kɔya, u yɛ kpaa vɔɔ susãri gbete Ɗalapa pɔ̃siu shɔbiiyitɔ, au yɛ kpaa vigbete Ɗalapa pɔ̃si Kirisi yɛtɔ, naa ukɛ ɓooranɛ a Kirisini nyazɔɔ, kɛɗɔn Ɗalapa yɛ ɓassiu jo a ukɔni a nyazɔɔ.
Ɓassinɛ gbete a Ɗekɨn
18N zɛtɛttɔ raaɓoonɛ gbete ɔkɛ ɓoonɛ dɔdɔrim shɔyɛ tɛsi ɓa a Ɗalapa basinɛ gbete yɛ tasiu a ɗekɨn yɛ ni ɓa. 19Ɗa vishɛshinɛyi kpai i zassi bitɛ fɛ̃ɛm, i ɗɔgbete i gaa yɛ, nɛ Ɗalapa tasi shɔgbete i pɛ ɓɛjaayi yɛ pɛ. 20A Ɗalapa pɔ̃ vi gbete shɛshi yɛ kpai i yaa ruu vi gbete shɛshiyi ai yuunitɛ, ɓai kasinɛ ɓa ama pɛ vi gbete Ɗalapa kasiyɛ, a shɔmni kpai sisɨn pɔ̃nɛ siɗɔn. 21Nɛ vigbete Ɗa shɛshiyɛ i ai yuu i ranɛ a bassinɛ gbeteyi pɛli vi pmnɛyɛ, a nɛi kpaa bassinɛni gbete shɔ yɛ pɛli Ɗa jaayi yɛ. 22U zɛ tɛttɔ anɛ dɔdɔrim vigbete Ɗa shɛshi kpai i ɗɔ gbeteyi nta kɔnɛ naa su gbete nta kɔnɛ a ɗɔ jaa yeenɛ. 23Ama ɓa vigbete Ɗa shɛshikɔ sheeli i nta kɔnɛrɛ ɓa; u shɔ gbete u kpaa Ɗa Surutɛ gbete ukɔ ɔ̃rɛ vi gbete Ɗalapa gau ãnɛyɛ, u ɗɔgbete u nta kɔnɛ au sisɨn, u ɗɔ ganɛ fɛ̃ɛm aru Ɗalapa u risiukɛ u ɓɛɛ jaayi, u rau yuu tɔ. 24Ji a nyaba sisɨn pɔ̃nɛkɔ Ɗalapa raurɛ; ama ukɛ zɛ vigbete u pɔ̃ sisɨn au yuuninɛ gboti, shom toti sisɨn pɔ̃nɛ ɓa. Pi awɔ tetteni pɔ̃ sisɨn a vigbete kpaa tɛttɔ piya? 25Ama ukɛ pɔ̃ sisɨn nɛ a vigbete u ji zɛ ɓayɛ, u gatɔ a sisɨn zaza.
26Ji nankɔ Ɗa Suru arɛ u pɔ̃siunaa, u kaka ji yɛ ɓa, aru u ji zɛ nɔgbete u gaki Ɗa ɓa; ama Ɗa Suru au yuu gakiu Ɗalapa tɔ aru vigbete u nya zɛnɔɔ shanɛ dɔɔɓa. 27Ɗalapa shɔ gbete zɛu sisɨn tɛttɔ, zɛ vi gbete Ɗa Suru ã sisɨn tɛttɔ; aru Ɗa Suru gaki Ɗalapa tɔ ayuu u shɔbiiyini, ji naa gbete Ɗalapa sisɨn kasiyɛ.
28U zɛ tɛttɔ vi kpai Ɗalapa pɛli vishonɛ tɔ̃vɨn shɔ gbeteyi ɔriiyitɔ, shɔgbete ɓai nya aru vigbete kasi pɛlinɛyɛ. 29Shɔgbete Ɗalapa lɔyi tɛttɔ gboti, pɛliyi tɛttɔ i ɔ̃ naa ɓɛjaa shɛ̃ɛ̃bii, nɔgbete ɓɛjaa u ɔ̃ jamari a ɓuzɨn shɔ gbeteyi ã sisɨn Ɗa bi. 30Shɔgbete Ɗalapa lɔyi tɛttɔ ɓaanya ji ikɔ, a shɔgbete Ɗalapa ɓai nyayɛ, pɔ̃ ikɔyi i ruuvini ɓa au ɗekɨn ni ɓa, Ɗalapa ɓasijo ikɔ.
Ɗalapa ɔrinɛ a Kirisi Yesɔ bi
31A bilinɛ vim, u yɛ sha kɛnɛ iviya? Ɗalapa kɛ ɔ̃nɛ a ukɔni pi yɛ masinya pi ukɔni piya? 32Ɗalapa ji zãriu u jaa ɓa, ama ã ɓɛjaa a shɔ gbeteyi nyɔyɛ naa aru ukɔ kpai! Ãu ɓɛjaatɛ yɛ zɛnɔɔ ɓa u ãu vi gãsiyi weze kpai nagbete ãu ɓɛjaa ɓaya? 33Pi yɛ wuli shɔgbete Ɗalapa lɔyiyɛ piya? Ji Ɗalapa au yuu sharɛ nɛi ruuvini ɓa au kabii ni ɓa. 34Pi yɛ yeruu vɔnɛ ai yuuni kɛpiya? Kirisi Yesɔ shɔ gbete vɔyɛ, ko shɔu shanɛ shɔ gbete au yurɛ a sàà a suruni, au ɗɔ ɔ̃nɛ a Ɗalapa nakɨn, ukɔ u a ɗɔ Ɗa gakinɛ au yuu! 35Pi yɛ vɔsiu kɛpi a ɔrinɛ gbete Kirisi pɛliuyɛ piya? Kɛ raɓoonɛ ya ko bintanɛ ya, ko ratasinɛ, ko nwo ya, ko raa, yaa, ko viyaa ya, ko vɔrɔ ya? 36Ji nagbete Ɗanyarubii shayɛ nɛ,
<<Aru mɔkɔ u pɔ̃ vɔrɔtɛ a ɗekɨn ko ɗaaviya,
shɔ tuutɛ naa mɛrɛ̃ gbete shɔ yɛkɛ ɗɔ yeenɛ.>> 37A ɓuzɨn vim kpai Ɗashariu tɛttɔ kpai, shɔm a shɔgbete ɔriu yɛ kabii! 38N zɛ tɛttɔ viwɔɔ yɛ vɔsiu ɓa au ɔrinɛni ɓa, ko vɔrɔ, ko suru, ko Ɗajashonɛlapayi, ko kpatiyi tot-tot i kaka, ko shɔ dɔdɔrim ko shɔ ɗekɨn. 39Ko koo gbete a lapa ko koo gbete a tipi, atette vigbete Ɗalapa shɛshi yɛ kpai, viwɔɔ yɛ zɛnɔɔ ɓa u vɔsiurɛ a ɔrinɛ gbete Ɗalapa pɛliu a ka Kirisi Yesɔ Uɓeyelapani ɓa.
Currently Selected:
Roomawa 8: Laa
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
