Roomawa 3
3
1Shɔ Yahudawayi i tɛɛ shɔgbete i ɓa Yahudawa ɓayɛ kɛtɔya? Ko vitɔ̃vɨng kɛpi ivi a shaa yeenɛ ni viya? 2Nizɛ kɔ vikpaanɛ bangtɔ ko-pi nyaba shopiya! A gaanɛ, Ɗalapa ã shɔ Yahudawayi u nyaruubii a naa nɛi sãtɔ. 3Ama nɗa i gãsi i ji ɔ̃ ɓa shɔ sisɨn ãnɛ ɓa fa? Shɔmyɛ tasi kɛ nɛ Ɗalapa tɔ̃vɨn kɛ ɓa ɗɔn ɓaya? 4Ɓa nizɛ kɔ ɓa! Ɗalapa u pɛ tɔ̃vɨn, ko-pi shɔzɛ gbete piya i shɔ nyazɔ̃. Ji naa gbete Ɗalapa nyaruubii shayɛ nɛ,
<<Ɔ̃ raatɛ kaka jazɨ akɔrɔ, naa akɛ nwanyanɛ shɔu zɛ ji nɛ vigbete a sham pɛ nizɛ;
Ɔ̃ tɛ kaka jazɨ aa kɔrɔɔ a shaajo vitɔ̃vɨng auyɛ raa yuu naa shɔkɛ hɨlaa ruunɛyɛ.>> 5Ama naa u vipɛlinɛ gbete kɔ̃linɛ kɛ tasi nɛ a ɓili nɛ Ɗalapa vipɛlinɛ pɛ tɛpɛ-tɛpɛ, u yɛ shakɛnɛ iviya? U yɛ shakɛnɛ Ɗalapa yeeriu ruu a yuu ji pɛliɓa tɔ̃vɨn ɓaya? (Ko-piya yɛ hɨ ruumtɔ) 6Ɓa ɗɔkɔ ɓa! Si tɔnɛn ɔ̃ nankɔ, Ɗalapa yɛ yeeri shɔ ruu kɛpi kovi a koo ni viya?
7Shɔwɔ yɛ shanɛ, naa n nyazɔ̃ kɛ sɨ Ɗalapa bassinɛ nɛ kɛ shɛnɛ a ɓili wɔsɔ-wɔsɔ, ɔ yeerin ruu dɔdɔrim kɛpi aru ivi nɛn shɔruuvini viya? 8Ɔ ji shakɛ ɓa aru vi ne,<<U pɛlijo vikɔ̃linɛ nɔgbete u kpaa vi tɔ̃vɨn ɓaya?>> Shɔ gãsiyi ɗɔgbete i lɛsiu niiyɛ, nɛ u shali vimtɛ nizɛ! Shɔ yɛ yeeri shɔmiyi ruu ji naa vigbete i pɛliyɛ.
Shɔwɔ Ji Pɛli Vitɔ̃vɨng Biɓa Kɔ gbete
9Nizɛ kɔ uyɛ shakɛnɛ viya, <<U shɔ Yahudawayi u tɛɛ shɔgbete i ɓa Yahudawaɓayɛ kɛtɔ ya?>> Ɓa nankɔ ɓa! N tasi tɛttɔ nɛ Yahudawa a shɔgbeteyi i ɓa Yahudawa ɓa, i pɛli ruuvini tɛttɔ piti kpai. 10Nagbete Ɗanyaruubii shayɛ nɛ:
Shɔwɔ ɓa ɗɔn nɛn pɛ shɔ tɔ̃vɨn ɓa,
11Shɔwɔ ɓa ɗɔn nɛn pɛ shɔ sẽrẽe ɓa
Ko nɛn shɔ Ɗa bassinɛ ɓa.
12I piti kpai i risi Ɗalapa kntitɛ;
i pɛli vikɔ̃linɛtɛ kpai;
shɔwɔ ji pɛli vitɔ̃vɨng ɓa, ko gbete.
13I kɨnkɔrɔ naa saa gbete ɓelinɛ yɛ;
I vigbete shɛ ai rɛti yɛ pɛ nyayeelinɛkɔ sheeli,
i nyanwanɛ pɔ̃ shɔ seti naa pudu zũpɔ̃ ai ganyani.
14i yeeti nya ɓala-ɓala.
15I lɛsi shɔ sisɨn tẽẽti a nyɔ shɔ vɔrɔ;
16ɗɔgbete i kɛ sɔnɛ setɛ i lɛsivitɛ ɗɔgbete i yɛ piti kpai.
17I ji zɛ nyaba sisɨn puru ɔ̃nɛ ɓa,
18ko i mati nɔgbete i bassi Ɗalapa yɛ ɓa.
19Dɔdɔrim u zɛtɛttɔnɛ vigbete a Musa nya ãsinɛ shovi ɓɛjo a shɔgbeteyi gɨnyɛ yuu, aru gbete u zãri shɔ nya walinɛ u n ti Ɗa ruuyeenɛ a shɔ yuu piti kpai. 20Shɔwɔ yɛ ɔ̃ ɓa a Ɗalapa ɗekɨn nɛ ruugbete nɛn gɨn nya ãsinɛ ɓa; vigbete nya ãsinɛ pɛliyɛ nɛu zɛtɔ u pɛli ruuvinitɛ.
Atette sisɨn ãnɛ u kpaa ɔ̃ a Ɗalapani ɗekɨn
21Ama dɔdɔrim ɓa tete Musa nya ãsinɛ niɓa, Ɗalapa tasi shɔ nyaba gbete au pɔ̃ shɔ u ɔ̃ au ɗekɨn yɛtɛ, ko Musa nya ãsinɛ janyagadi i nwanyatɛ au yuuni. 22Ɗalapa pɔ̃ shɔ tɔ̃vɨn a tete sisɨn ãnɛ a Yesɔ Kirisi kabii. Ɗa pɛli vim piti kpai aru gbete shɔu kɛ ã sisɨn nɛ a Kirisi biiyɛ, aru gbete vɔsinɛ ɓa a tɛttɛ niɓa: 23ko-piya pɛli ruuvinitɛ u ɓa a Ɗalapa bassinɛ maani ni ɓa. 24Ama au ruu vitɔ̃vɨng gbete ã shɔyɛ ukɔ pɔ̃ shɔrɛ a Yesɔ Kirisi kabii, shɔu raa shɔyɛ. 25Ɗalapa ã Yesɔ kirisirɛ nɛu ɔ̃ viyuu ãnɛ u tusu shɔruuvini, aru kpaa gbete ntee nɗa shɔu sɔ̃ri shɔgbete ã sisɨn au biiyɛ ruuvinitɔ. Ɗalapa pɛli vim aru u tasinɛ u vishonɛ pɛ tɔ̃vɨn. Si tẽẽ-tẽẽ Ɗalapa mee sisɨn pɛtɔ jo gashɔ ruuvini ɓa; ama dɔdɔrim shɔvitɔ a shɔ ruuvini u yeeri ruu ayuu, nɔgbete u tasi shɔ a ɓili nɛn pɛ shɔ tɔ̃vɨn. 26Pɛli vim ɗɔkɔ aru u tasi u vitɔ̃vɨng pɛlinɛ a ɗauni, aru u ɔ̃ tɛpɛ -tɛpɛ a shɔ gbete pɛlinɛ vitɔ̃vɨng a sisɨn ãnɛ a Yesɔ kirisi biiyɛ. 27U yɛ basi kɛ ruu iviya? Viwɔɔ ɓa! Vim kɛpi aru iviya? Kɛ ruu gbete u gɨn nya ãsinɛyɛ ya? Ɓa, ama aru gbete u ã sisɨn a Yesɔ kirisi bi. 28Au nya yisin nɛ shɔgbete kɛ ɔ̃nɛ a Ɗalapa ɗekɨn si ɔ̃ ɓɛjo au ruu sisɨn ãnɛ ko sheeli, ɓa naa ruugbete nya ãsinɛ shayɛ ɓa. 29Ko Ɗalapa upɛ Yahudawayi Ɗalapakɔ sheeli ya? U ɓa shɔgbeteyi i ɓa Yahudawaɓa Ɗalapa ɓaya? Nizɛ u jiyi Ɗalapakɔ. 30Ɗalapa upɛ gbete, ukɔ yɛ pɔ̃ Yahudawayi i ɔ̃ au ɗekɨn ji nɔgbete i ã sisɨnyɛ, yɛ pɔ̃ shɔgbete i ɓa Yahudawa ɓa i ɔ̃ sɔ̃njo au ɗekɨn ji nɔgbete ai ã sisɨn yɛ. 31Aru sisɨn ãnɛmkɔ u yɛ gɨn nya ãsinɛm tokɨn ɓaya? Ɓa, ɓa ɗɔkɔ ɓa; aru nankɔ u sã nya ãsinɛ naa kaziti.
Currently Selected:
Roomawa 3: Laa
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
