Roomawa 4
4
Vigbete Ibirayi pɛliyɛ u tasinɛ nɛ upɛ shɔ nya ãsinɛ gɨnnɛ
1U yɛ shakɛnɛ ivi a Ibirayi yuuni gbete upɛ u ɓɛuru ni viya? Kɛɗɔn ɔ kãkɛ ivi zɛnɛ aru vimiyi ni viya? 2Naa Ibirayi kɛ kpaa ɔ̃nɛ nɛ a Ɗalapa ɗekɨn au ruu vishonɛ gbete pɛliyɛ, u viwɔɔ siyɛ ɔ̃ ɗɔn gbete si basi a wuniyɛ, ama ɓa Ɗa ɗekɨn ɓa. 3Ɗalapa labeenɛ shanɛ, <<Ibirayi ã sisɨntɔ a Ɗalapa biini, au ruu sisɨn ãnɛkɔ Ɗalapa tɛu naarɛ nɛu ɔ̃ shɔ tɔ̃vɨn.>> 4Shɔgbete au kɛ shovinɛ shɔ shoriu vi ɗɔnwanɛtɔ, ama saa gbete shɔ shoruyɛ ɓa vi ãnɛ weze ɓa; shɔ shoru ji au ruu viyɔnɛ. 5Ama shɔgbete ai pɔ̃ yuu a a sisɨn ãnɛ, ɓanɛ aru vipɛlinɛ ɓa, a shɔu kɛ ã sisɨn nɛ a Ɗalapa gbete teenɛ shɔgbete pɛli vikɔ̃linɛ nɛu pɛ shɔ tɔ̃vɨn, Ɗalapa tuu jo u sisɨn ãnɛmkɔ shovirɛ awuni nɛi ɔ̃ a nyazɔ a wuni. 6N pɛ vigbete Dauda nwanya aru shɔ vɔ susãsri tasinɛ abi gbete Ɗalapa tɛirɛ nɛi pɛ shɔ vitɔ̃vɨng pɛlinɛyi, ɓa a tete vigbete shɔzɛyi pɛliyɛ ɓa:
7<<Vɔ u tasi shɔgbete a shɔ yasiyi ruuvini tɛyɛ susãri abiini,
shɔ gbete shɔ sɔ̃riyi ruuviniyɛ!
8Vɔ u tasi shɔgbete au Uɓeyelapa yɛ gau ruuvini ɓayɛ susãri abiini!>> 9Vɔ susãri gbete Dauda nwanya au yuuni mi ji shɔ Yahudawayi ɓɛkɔ sheeli ya? Ɓa, ɓa ɗɔkɔɓa. Ji a shɔgbete i ɓa Yahudawaɓa ni piti kpai. Vigbete au shayɛ shɔ bee tɛttɔ nɛ, <<Ibirayi ã sisɨn tɛttɔ a Ɗa bi ni, au ruu sisɨn ãnɛmkɔ Ɗalapa tɛurɛ nɛu ɔ̃ shɔ vipɛlinɛ tɔ̃vɨn.>> 10Shɔ pɛli vim pi ɗaviya? Shɔ pɛli a ɗagbete ko a knti gbete shɔ yeeri Ibirayi shaa yɛ ya? Shɔ pɛli aɗagbete shɔ yeeriu shaa yɛ ɓau knti shaa yeerin ɓa. 11Ibirayi shaa yeenɛ si a knti, u shaa yeenɛu sipɛ vigbete yɛ tasinɛ u sisɨn ãnɛ ukɔ sɨnrɛ Ɗalapa tɛu naa nɛ u ɔ̃ shɔgbete au pɛli vitɔ̃vɨng nɗa shɔu yeeriu shaa kɛkn. Arumkɔ Ibirayi ukɔ pɛ shɔgbeteyi ã sisɨn a Ɗa biiyɛ i ɓeye a tɛtte suru, a Ɗa tɛi naa a pɔ̃nɛ i ɔ̃ shɔ vitɔ̃vɨng pɛlinɛ au ɗekɨn, ko shɔji yeeriyi shaa ɓa. 12Ukɔ sɔ̃n ji shɔgbete shɔji yeeriyi shaa ɓayɛ i ɓeye, i kɔ ɔ̃rɛ a shɔ ɓasiyi sɔ̃n a shɔgbete shɔ yeeriyi shaa yɛ, i ɔ̃ sɔ̃njo naa uɓeye Ibirayi ɔ̃ siji ɔ̃nɛ sisɨn ãnɛ aɗagbete shɔji yeeriu shaa ɓayɛ.
Ɗalapa Ruu Maanɛ Shɔ tɛɛ atette Sisɨn Ãnɛ
13Naa Ɗalapa maa ruu tɛ a Ibirayi ni au shɔ laduruyini nɛ koo tipi yɛ ɔ̃ u ɓɛɛ, pɛli nankɔ, ɓanɛ aru gbete Ibirayi gɨn nya ãsinɛ yɛ ɓa, ama ɓɛji ruugbete ã sisɨntɔ a Ɗalapa biini a Ɗalapa tɛu naa nɛu ɔ̃ naa shɔu pɛli vitɔ̃vɨng au dɛkɨn yɛ. 14Aru Ɗalapa si tɔnɛ maa ruu nɛn ã shɔgbete i gɨn nya ãsinɛyɛ, kɛɗɔn sisɨn ãnɛ si ɓa viwɔɔ ɓa, Ɗalapa ruu maanɛ si ɔ̃ wati. 15Nya ãsinɛ n ti Ɗalapa sisɨn lɛsinɛ; ama ɗɔgbete nya ãsinɛ ɓa ɗɔn ɓa, shɔ bẽẽ nya ãsinɛ ɓa. 16Ruu maanɛ shɔ maa jo a nɔgbete shɔ ã sisɨnyɛ, aru gbete ruu maanɛ u ɔ̃kɛ Ɗalapa vi ãnɛ gbete au ã Ibirayi shɔ laduruyi piti kpai wezɛyɛ, Ɓanɛ aru shɔgbete i gɨn Musa nya ãsinɛ kɔ sheeli ɓa, ama sɔ̃njo aru shɔgbete i ã sisɨn naa Ibirayi ã yɛ. Nagbete Ibirayi kɔ ɔ̃rɛ uɓeye a Suru piti kpai; 17nagbete Ɗalapa nya ruubii shayɛnɛ, <<N pɔ̃tɛ a ɔ̃ shɔ laduru waanɛ i ɓeyeyi.>> Kɛɗɔn ruu maanɛu ɔ̃kɛ tɔ̃vɨn a Ɗalapa kabiini, a shɔgbete Ibirayi ã sisɨn au bi ni yɛ Ɗalapa shɔgbete au n ti shɔgbete i vɔtɛttɔ a Suruni yɛ a shɔgbete u nya ãsinɛ n ti vigbete si ɓa ɗɔm ɓayɛ. 18Ibirayi ã sisɨn a pɔ̃ yuu ɗɔn, ko sijo ɗagbete viyuu pɔ̃ si ɓa, a ɔ̃ kɛkn << laduru waanɛyi ɓeye.>> Ji naa Ɗalapa nyaruubii shayɛ, <<A laduru iyɛ ɔ̃ naa sɛ a kulapa.>> 19U kpẽnɛ si saa mɛnɛ laa maani; ama sisɨn ãnɛ ji kɔsi ɓa naa zɛtɛ nɛn kpẽtɛ, gbete si u biu vɔtɛtɔ gboti, aru gbete Sera u si sutɔ̃ri ji kpaa jaa ɓa. 20Ji vɔsi ɓa au sisɨn ãnɛ ni ɓa, ji lɛri ɓa au sisɨn ãnɛ Ɗalapa ruu maanɛ yɛ pɛli ɓa ɓa; u sisɨn ãnɛ lakiu kaka bitɔ, a bɛli Ɗalaparɛ. 21Si zɛtɛttɔ au sisɨnni nɛ Ɗalapa yɛ pɛli vigbete maa a wuni yɛ dɔɔtɔ. 22Si jo arumkɔ Ibirayi au tɛttɛ sisɨn ãnɛ,<<Ɗalapa tɛurɛ nɛ u pɛ shɔ vipɛlinɛ tɔ̃vɨn au ɗekɨn.>> 23Nya nwanɛ gbete shɔ shanɛ,<<shɔ tɛurɛ nɛ upɛ shɔ vipɛlinɛ tɔ̃vɨn a Ɗalapa ɗekɨn>>shɔ ji bee ɓa au yuukɔ sheeli ɓa. 24Shɔ beeri sɔ̃n ji ukɔ shɔgbete shɔyɛ tɛi yɛ nɛ i pɛ shɔ vipɛlinɛ tɔ̃vɨn a Ɗalapa ɗekɨn, shɔgbete ai ã sisɨn au bi yɛ nɛ ukɔ yusi Uɓeyelapa Yesɔ a suruni a saa. 25Au ruuvini kɔ shɔ ãu naa nɛu vɔtɔ, a shɔ yusiu laparɛ a suruni u pɔ̃u a Ɗalapa ɗɔbii.
Currently Selected:
Roomawa 4: Laa
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
