Iwomo 23
23
1Ɔpɔlu a bɔ eyi suu mu wa to keyi umba Azhu akwɛyi a za mba te, <<Ɛmɛnɛ mi, Mi yitu iyi kiya ingyi bɔkɔ mi wo ba akwu ingyira mo, moo ngbaa ta bɔkɔ o mba mi le Ukpo nzu gba mi ye wu mu ilomo le .>> 2kwuye ungwu Ananayasi obwoshi uwakɔ awu a pwa iso iyi bɔkɔ Ɔpɔlu e so akwɛyi a za la enzu umba bɔkɔ o ri kɛlɛ mbala Ɔpɔlu awu te lo kpa wu afyi mu kwɔngba. 3Akwɛyi Ɔpɔlu a za la Ananayasi te, <<Ukpo a gbala afyi a kpa ŋa uŋɔ onzu uwu kwukyoro ele! Uŋɔ ŋɔ ŋɔma mɔmɔ te ŋɔ zɔ mi ombu mate ɛrama iyi Omosisi bɔkɔ i so awu, uŋɔ mafyi ŋɔ ba ŋɔ fo ɛrama ma kwongwu ŋɔ za mba te lo kpa mi afyi ba ŋɔ yo mi kwuyo kaa ma te ombu u ri mi dɛ mo!>>
4Enzu umba bɔkɔ o rima kɛlɛ mbala Ɔpɔlu awu o za wu te, <<Ki pe obwoshi uwu Ukpo uwu uwakɔ ari mo>>
5Ɔpɔlu a gba mba opwu te, <<Ɛmɛnɛ mi, Mi yitu te ele akwu obwoshi uwakɔ mo; kwuwongu o ka mu kwokpo ungwu Ukpo te: <La lu so ungwoyi ungwu u to keyi uwu enzu mo.> >> 6Akwɛyi Ɔpɔlu a zɔngɔma te umbafo mba akwu Asadusi umbafo mba ba akwu Afarisi, akwɛyi e siso mu opwu uwɔkwuu mɔmɔ te, << Ɛmɛnɛ mi, Imi mi kwu Ofarisi, umɛ uwu Ofarisi. Watokeyi umba Azhu o yi mi ombu kwongwu egbo mi i na yi ma te enzu umba bɔkɔ o kpomo Ukpo a gbala iyimo mu kwuvɔ.>> 7Tabɔkɔ Ɔpɔlu a mbwa iso ɛlɛ i somo, Kambu ka ta mekeka iyi Afarisi mbala Asadusi akwɛyi enzu umba bɔkɔ o kpala ɛlu awu o kepo. 8(Mo Asadusi o zɔ te iyimo mu kuvɔ iyimo, o kyo o zɔ te alɔgbulɔ umba Ukpo mbala kwundu uwu Ukpo e yi mo, Afarisi ba o nyama te ɛlɛ lɛɛbi i yi.)
9Akwɛyi kambu ungakwu ka wɔ ka ta mɔmɔ, akwɛyi wa zɔ ɛrama iyi Omosisi umbafo umba bɔkɔ akwu Afarisi o yimo o rima la kambwu rimo ungakwu, o zɔ te, <<Ki ma kiya ingyira kikpikpɛnyi te ingyi bɔkɔ onzu ele e wo mo,>> akwɛyi o zɔ te. <<Igboshimo akwu kwundu uwu Ukpo naa ɔlɔgbulɔ uwu Ukpo gba e so wu iso le kɔ?>> 10Tabɔkɔ kambwu kɛlɛ ka vindɔ ovyo uwakwuu awu gba u to keyi uwu asozha uwakɔ awu e wiyi kwongwu enzu o bo pe Ɔpɔlu ma. Akwɛyi a za la asozha te lo so mɔmɔ kaa lo wala Ɔpɔlu ma renya mekeka mba kaa lo so wu mu obariki uwu asozha.
11Mutu uwu mɔnu mawu Ɔkwu a wɔ a ri kɛlɛ mbala Ɔpɔlu akwɛyi a za wu te, <<Yi idu! Mate ŋɔ to izɔgɔ mi mu Ɔzhɛrusalɛ awu, tayi gba ŋɔ to izɔgɔ mi mu Oromu tete le.>>
Azhu Umbafo O Ka Amasa Iyi O Ngbɛ Ɔpɔlu Ma
12Eyi i lama, Azhu umbafo o kpa kyaa akwɛyi o wo okwura mbala esu te o ri o wo mo nzhii ba o ngbɛ Ɔpɔlu ma dɛ. 13Enzu umba bɔkɔ o kpa kyaa te o ngbɛ Ɔpɔlu ma le o pika uwekpendo ma. 14O ka mu ebwoshi umbakɔ mbala enzu umbakɔ akwɛyi o zɔ tee, <<Ki wo okwura te ki ri mo ki wo mo nzhii ba ki ngbɛ Ɔpɔlu ma dɛ. 15Kekelele, lunyi mbala wa to keyi umba Azhu la lu wo kwuwoyo kaa la lu za la u to keyi uwu Asozha uwakɔ awu kaa le bo wu mu idu yi, la lu za wu te lu gyite lu yo Ɔpɔlu eyo kyo . Kinzu ba ki kwu ki gbo wu mu ɔgwuzɛ, a ba munyi yi dɛ mo akwɛyi ki ngbɛ wu.>>
16Tabɔkɔ umɛ uwu umanyi uwu Ɔpɔlu a pwa amasa iyi o ka awu, e fye mɛmi iyi obariki uwu asozha akwɛyi e so Ɔpɔlu iso ɛnyi.
17Akwɛyi Ɔpɔlu a ya u to keyi uwu asozha ukpɛnyi ma akwɛyi a za wu te, <<To ulugbaga ele so mba u to keyi uwu asozha uwakɔ; e yi iso ikpɛnyi iyi bɔkɔ a gyite le so wu.>> 18Akwɛyi e to wu a kawu la u to keyi uwu asozha uwakɔ awu.
U to keyi uwu asozha awu a zɔ te, Ɔpɔlu uwu e yi mu ugu ungyi awu, a lɔ mi ma a za mi te la mi bo la ulugbaga ele munyi ŋɔ kwongwu e yi iso iyi e so ŋɔ.>>
19U to keyi uwu asozha uwakɔ awu e yi ulugbaga ele a ka wu mu emba akwɛyi e yo wu kwuyo kyo kyo te, <<Kimbe bɔkɔ ŋɔ gyi te ka so mi?>>
20Ulugbaga awu a zɔ te: << Watokeyi umba Azhu o wo okwura te, umba o za ŋa kaa bo la Ɔpɔlu mu idu mbo kwɔnyi kwɔlɛ. O wo kwuwoyo te umba o gyite lo yo wu eyo kyo. 21Ki shi wu mbo mo, kwongwu enzu umba bɔkɔ o kwo gbo wu le o pika enzu uwekpendo mo. O wo okwura mbala esu te umba o ri mo, o wo mo nzhii ba o ngbɛ Ɔpɔlu ma dɛ. O rigbo te nya mba ma kaa lo bo la Ɔpɔlu.>>
22U to keyi uwu asozha uwakɔ awu a za la ulugbaga awu te le sheyimo iyawu akwɛyi a za wu te, <<Ki so onzu ukpukpɛnyi te ŋɔ so mi iso ɛlɛ mo.>>
O Lɔ Ɔpɔlu Laa Ogomina Ɔfɛlisi
23Akwɛyi u to keyi uwu asozha uwakɔ a ya wa to keyi umba uzhi uwu asozha wepo ma akwɛyi a za mba te, <<La lu yi ɛnwu ma kaa lu kwu asozha ederi epo, mbala wapɛ anya uwekperewo mbala asozha umba egwu iyewa ederi epo ka lo so mu Oseseriya mu ekerefe erendo iyutu ɔlɛ. 24La lu shi anya kaa Ɔpɔlu mbala enzu umba o zɛ mbala wu awu kaa lo ya ma mba, kaa lo so wu mba Ɔfɛlisi Ogomina moloto.>>
25U to keyi uwu Asozha a ka kwupwu tee:
26Imi o ya mi te Ɔkaladiyɔ Ɔlasiyɔ gba mi ka ŋa kwupwu kwɔlɛ le. Uŋɔ onzu uwakwu
Ɔfɛlisi
Ogomina :
Mi gbɛlɛ ɛnyi.
27Azhu umbafo o yi Onzu ele
ma akwɛyi o gyi te lo ngbɛ wu , Imi ba mi bo mbala asozha mi akwɛyi mi na wu ma mu ewo mbo, kwongwu mi pwa te akwu onzu uwu ɛzhi iyi Oroma. 28Imi mi gyi te kaa mi yitu iyi kiya ingyi ki wo bɔkɔ o yi wu mo, akwɛyi Mi ka wu la wa to keyi umba Azhu. 29Mi ma te imulo iyi o mu o lo wu akwu kwongwu ɛrama mba, umba ba o fya kwuyi ungwu ombu meka wu ungwu bɔkɔ kwu do lukwu ma mo naa i ta mu Ugugyi ma mo. 30Tabɔkɔ mi pwa okwura uwu bɔkɔ o wo mu reshi wu ele, Mi lɔma te lo ka ŋawu kɛlɛlɛ. Mi za la umba bɔkɔ o mwu o lo wu awu te lo so mu keyi ŋɔ mbala ombu mba.
31Akwɛyi Asozha o wo ta bɔkɔ o so mbo awu akwɛyi mutu ɔnwu o to Ɔpɔlu ma akwu luzɛ mba, akwɛyi o kawu mu kwuse ungwu o ya ngwu te Atipatiri awu. 32Meyi i lama, asozha o to Ɔpɔlu o shi asozha umba bɔkɔ o zɛ mu anya awu te lo she wu mo, akwɛyi umba ba o gbama o ka mu obariki uwu asozha mba. 33Tabɔkɔ asozha umba anya mbamba o fye mu Oseseriya, o shi ogomina Ɔfɛlisi kwupwu kwɔngu akwɛyi o lo wu Ɔpɔlu mu ɔwu. 34Mizhikembo iyi Ogomina a wa kwupwu kwɔngu ma akwɛyi e yo Ɔpɔlu te, mu ɛzhi iyi na bɔkɔ ŋɔ wɔ? Bɔkɔ a pwa te Ɔpɔlu a wɔ mu Osilisiya, 35akwɛyi Ogomina a za wu te, <<Mi pwa ombu ŋɔ kwuyengwu enzu umba bɔkɔ o lewa ŋa awu o bo munɛ.>> Akwɛyi a zɔ te Ɔpɔlu lo shi wu enzu umba o gbomo mogba ungwu ɔsu Ɛrɔdu.
Currently Selected:
Iwomo 23: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
