Iwomo 22
22
1<<Ɛmɛnɛ mi mbala umba ada mi, la lu pwa opwu uwu iso mi ŋanɛ!>>
2kwuyengwu o pwa ta e ye mbo mu iso isomo mu Iburu akwɛyi o ŋɔ kyoo.
Akwɛyi Ɔpɔlu a za mba te: 3<<Imi mi kwu Azhu, o mba mi mu Otasu uwu Osilisiya, o yi mi mu Ɔzhɛrusalɛ munɛ. Midu iyi Ɔgamaliyɛ gba mi vɔngɔ ɛzu iyi ɛrɛma iyi umba asɔkwu nzu mamari le, akwɛyi imi rala ɛnwu mi mi shi Ukpo kyamate bɔkɔ lunyi lu rala ɛyi yi lu shi Ukpo ɔnɛnɛ te awu. 4Mi lo enzu umba ɔgwuzɛ ɔlɛ inyashi nzhii ba o kpomo, mi yi anzɔnu mbala eko ma mi fu mbo mu ugu ugyi. 5Eboshi umbakɔ mbala wa to keyi umba Azhu akwu azɔgɔ umba iso ɛlɛ te akwu ongbulolo. Watokeyi mbɔlɛ o shi mi kwupwu akwɛyi mi ka mbaa Azhu umba o yi mu Ɔdamasikɔ awu, mi ka mɔmɔ kaa la mi yi wa mbwalu ma kaa mi lo mbo ɛyɛ la mi bo mbo mu Ɔzhɛrusalɛ kaa lo lo mbo inyashi.
Ɔpɔlu E So Iyi Bɔkɔ I Wo Bɔkɔ A Na Ɔzhizɔsi
(Iwomo Iyi Wa zɛ ilɔ 9.1-19; 26.12-18)
6<<kwuyengwu ɔnɔnda ta bɔkɔ mi bo kɛlɛ mbala Ɔdamasikɔ, kɛlɛlɛ ɛbɛ iyɛku i wɔ mu oshi i kpo mami. 7Mi kpeyi mbwe mɛzhi akwɛyi mi pwa opwu uwu onzu u ya mi ma te, <Ɔsɔlu! Ɔsɔlu! Kimbe ki shi bɔkɔ ŋɔ lo mi inyashi te?>
8Mi yo wu kwuyo te, << < Uŋɔ ŋɔ kwu uwe ngyɔɔ Ada?>
A gba mi opwu te, << < Imi mi kwu Ɔzhizɔsi uwu Ɔnazarɛti, uwu ŋɔ ye wu mu inyashi ilomo awu.> 9Enzu umba bɔkɔ o zɛ mbala mi le o ma ɛbɛ ɛnyi, umba ba o pwa opwu uwu onzu uwu bɔkɔ e yemi mu iso isomo le mo.
10Mi yo wu kwuyo te, << <Kimbe ba mi wo, Ada?> Ɔzhizɔsi a za wu te, << <Yimo, ka so mu Ɔdamasikɔ. Gba ŋɔ kama mɔmɔ o so ŋɔ kiya ingyi bɔkɔ ŋɔ wo lɛɛbi.> 11Enzu umba bɔkɔ o zɛ mbala mi awu o yi mu kwuwo gba o ka mya mu Ɔdamasikɔ le, kwongwu ilemo iyi ɛbɛ ɛnyi i se mi eyi mo.
12<< Mu kwuse kwɔngu onzu uwufo o ya wu te Ananayasi e bo te la ma mi. Onzu ele akwu u mbwalu ɛrama iyi Omosisi, Azhu umba bɔkɔ o yi mɔmɔ le o lowu mo gyɔɔ. 13Ananiya e bo kɛlɛ mba mi akwɛyi a za mi te <Umɛnɛ mi Ɔsɔlu, gbala ɛbɛ imama!> Akwɛyi mu kwotota kwɔngu mi gbala ɛbɛ imama akwɛyi mi ma wu.
14<<Akwɛyi a za mi te: <Ukpo uwu asɔkwu nzu a mulɛ ŋɔ ka yitu ingyi uwu a gyi, kaa gba ma onzu uwu ototo ka pwa iso mu kenzu wu. 15Kwuwongwu ɔlɛ ŋɔ kwu onzu uwu bɔkɔ ŋɔ so enzu iso iyi kiya ingyi ŋɔ ma ba ŋɔ pwa laa enzu. 16Kekelele kimbe ba ŋɔ rigbo ngyi fo? Yimo, ya ɛnyi iyi Ukpo kaa lo wo ŋɔ obatisima akwɛyi ingbomo ŋɔ o gbayi o kpaŋa.>
O Ya Ɔpɔlu Ma Te Kaa La Ta Anu Laa Enzu Umba Bɔkɔ Akwu Azhu Mo
17<<kwuyengwu mi gba mi ka mu Ɔzhɛrusalɛ bɔkɔ mi yi mu Ukpo ilɛma mu ɔtɛpu, akwɛyi Mi ma ɛbɛ iyifo 18akwɛyi mi ma Ɔzhizɔsii, akwɛyi a za mi te, <Wo efyefya ka lafya la Ɔzhɛrusalɛ mu atata ɛlɛ! Kwuwongwu enzu mbɔlɛ o nyama la iso mi iyi bɔkɔ ŋɔ so mbo mu reshi mi le mo.>
19Mi gba wu opwu te, << <Ɔkwu, enzu mbɔlɛ o yitu mi mamari te mi ka mu idaba iyi ɛlu ikpalama iyi Azhu gyɔɔ, mi yi enzu umba bɔkɔ o mbwalu ŋɔ mi gba mi kpamba ɛmwu akwɛyi mi fu mbo mu ugu ugyi. 20kwuyengwu bɔkɔ o yi mu Ositivi, u uzɔgɔ ŋɔ mu ingbɛma awu, Imi tete mi rima mɔmɔ mi nyama mi kyo mbala mba, Imi gba mi gbo ekpayi iyi enzu umba bɔkɔ o ye wo mu ekyi ikpama awu le.>
21<<Akwɛyi Ɔkwu a za mi te, <So; Imi mi lɔ ŋɔma sharu mbaa enzu umba bɔkɔ akwu Azhu mo.> >> 22Tabɔkɔ Ɔpɔlu e siso ɛlɛ akwɛyi enzu mbamba o nyama te lo pwa iso wu fo. Akwɛyi o yi opwu mo o wo ovyo iyɛkɔkɔ o zɔ te, << Lo ngbɛ wu ma mo i fate le yi lakwunyɔ mo!>>
23Tabɔkɔ o yi mu ovyo iwomo, akwɛyi o to ekpayi mba mbala umburu pyo pyo moshi, 24akwɛyi u to keyi uwu asozha uwakɔ awu a za mba te lo to Ɔpɔlu ma lo so mu obariki uwu asozha. Akwɛyi a za mba te lo kpa wu ikpa kaa la zɔ kimbe ki shi bɔkɔ Azhu o lo wu egbulo te le. 25Tabɔkɔ asozha o wa wu kwudu kaa lo kpa wu ikpa, akwɛyi Ɔpɔlu a za la u to keyi uwu asozha uwu bɔkɔ a rima mɔmɔ awu te, <<I fate kaa kpa umɛ uwu ɛzhi iyi Oroma kwɔkpa, uwu bɔkɔ o do zɔ ombu wu ma ba u riwu dɛ moo?>>
26kwuye ungwu u to keyi uwu asozha awu a pwa iso ɛlɛ, akwɛyi a ka mba u to keyi uwu asozha uwakɔ e yo wu kwuyo te, <<Ki wo iyi bɔkɔ ŋɔ wole mo, moo onzu ele akwu umɛ uwu ɛzhi iyi Oroma.>>
27U to keyi uwu asozha uwakɔ awu e bo mba Ɔpɔlu akwɛyi e yo wu kwuyo te, <<So mi, uŋɔ ŋɔ kwu umɛ uwu ɛzhi iyi Oroma?>> A gba wu opwu te, <<Ee, mi kwu umɛ uwu Oroma.>>
28U to keyi uwu asozha uwakɔ awu a zɔ te, <<Imi mi shi eduwo gyɔɔ te lami kwu umɛ uwu ɛzhi iyi Oroma.>> Ɔpɔlu ba a gba wu opwu te, <<O mba mi umɛ uwu ɛzhi.>>
29Kɛlɛlɛ enzu umba bɔkɔ o gyite lo yo wu eyo awu o gba kembo. U to keyi uwu asozha uwakɔ awu iyi i wo wu mo kwongwu a zɔngɔma te Ɔpɔlu akwu umɛ uwu ɛzhi iyi Oroma.
Ɔpɔlu Mu Keyi Unga Watokeyi Umba Azhu
30Tabɔkɔ eyi i lama, u to keyi uwu asozha uwakɔ awu a gyi te le yitu iyi kiya ingyi bɔkɔ ki wo pwaa ba Azhu o lewa iyi Ɔpɔlu, a zɔ te lo lu Ɔpɔlu ɛyɛ ma akwɛyi a za la ebwoshi umbakɔ mbala wa to keyi umba Azhu te lo kpala ɛlu. Akwɛyi e bo la Ɔpɔlu kaa la rima mu keyi mba.
Currently Selected:
Iwomo 22: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
