Ɔkɔrɔti uwu kwonze 9
9
Ekpasu Mbala Ɛduma Iyi U zɛ ilɔ
1Imi mi yi ekpasu iyi apula iyinayina iwomo mo re? Imi mi kwu uzilɔ mo re? Imi mi ma Ɔkwu nzu Ɔzhizɔsi mo re? Lunyi lu kwu rigbɛ mi ingyi ɛduma iyi bɔkɔ mi wo laa Ɔkwu mo re? 2Akwiyi gba enzu umbafo o zɔ te Imi mi kwu u zɛ ilɔ mo lala, lunyi lu yitu tee Imi mi kwu u zɛ ilɔ, kwuwongu iyimo yi mu Ɔkwu i zɔ tee Imi mi kwu uzilɔ.
3Ɔlɛ gba akwu opwu igbama mi le kwuyengwunanguna gba enzu o zɔ te Imi mi kwu u zɛ ilɔ mo: 4Kinzu ki yi ekpasu iyi kiya irimo mbala embyi iwomo kwuwongu ɛduma nzu mo re? 5Wa zɛ ilɔ umbafo mbala ɛmanyi umba Ɔkwu nzu mbala Opita bɔkɔ o ka laa eko mbo wa mbwalu ma mu luzɛ le, kinzu ki yi ekpasu ɛnyi tete mo re? 6Nana Imi mbala Obaraba kɛɛkyi gba i fate la ki fye enzu le ŋa?
7Uwe bɔkɔ e wo ɛduma iyi asozha ba e fye ɛnwu? Uwe bɔkɔ e yi utu uwu eremi ba a nyama te e wo imuma yi mo? Uwe bɔkɔ e yi endo ba a nyama te e wo kwɔmɛ mba mo?
8Iso iyi mi so yi ele akwu mu imama iyi onzu mo, te gba Ɛrama iyi Omosisi i zɔ le. 9O ka yi mu Ɛrama iyi Omosisi tee, <<Gba endo e yi mu ewiri ilɔma, lo ma wu kenzu ma mo.>> Mu imama yi akwu endo gba Ukpo e pwu idɛnyi wu le? 10Akwu kwuwo nzu gba e siso ɛlɛ le mo? Ee mi so yi te mɛɛ, o ka iso ɛlɛ kwuwo nzu. I fa tee, onzu u gbama mbala onzu u lɔma lo fulo eyi te o fya ogbo mbo uwu apula iyi o lɔ. 11Kinzu ki so eyi iyi Kwundu ma yi-e. Gba ki ri kule meka yi iyi apula iyi kwudu kwɔlɛ, ɛlɛ akwu kiya ingyɛkwu meka yi? 12Gba enzu umbafo o yi ekpasu iyi kule irimo meka yi, ishoshi te kinzu la ki ri kule munyi yi ungwu ku ka ungwa mba ma mo?
Kinzu ba ki nyama tee la ki wo ɛlɛ mo. Kinzu ki bɔ enzu kepo mu idu kaa la ki se Ɛza Iyesheshi iyi Okrasi ɛlɛ ɔgwuzɛ ma mo. 13Lunyi lu yitu tee enzu umba bɔkɔ o wo ɛduma mu Ɔtɛpu mɔmɔ gba o fya kiya ingyirimo mba le. Tatayi umba bɔkɔ o wo ɛduma mu ribɛ ingyi Ukpo, mɔmɔ gba o fya apula iyi bɔkɔ o bo yi te o wo isabo le.
14Tatayi Ukpo a ta ɔkpa te enzu umba bɔkɔ o tanu iyi iso iyi Ukpo, mɔmɔ gba lo fya kiya ingyirimo mbo le.
15Imi ba mi nyama te la mi wo ɛduma mu ekpasu iyi mi yi yi ele mo. Imi ba mi ka yi kwupu kwɔlɛ le kaa la lu shi mi rigbɛ ingyi ɛduma mi mo. Imi mi kpomo kpeke ba i koshi la iyi bɔkɔ onzu uwufo a ba nyi mi ɛnwu ikwumo mu ɛlɛ! 16Kwuye ungwu mi yi mu anu itama iyi iso iyi Ukpo, mi kwu ɛnwu mo, moo akwu mɛga kaa la mi tanu iyi iso iyi Ukpo. Gbetu mi, gba mi tanu iyi iso iyi Ukpo mo! 17Akwiyi gba mi wo ɛduma mi mu igyima mi, de ba mi fulo eyi iyi rigbɛ mi; Imi ba wo yi kwuwongu akwu ɛduma mi iyi bɔkɔ Ukpo gba e shi mi te la mi wo le. 18Kimbe ba akwu rigbɛ mi? Rigbɛ mi gba akwu tee la mi tanu iyi Iso Iyesheshi ɛlɛ rɛshi, mi gyi te la mi zɔ te lo shi mi rigbɛ mega mo.
19Imi mi yitu te mi kwu unye uwu onzu mo; Tetete mi wo ɛmi unye uwu uwewe kaa la mi bɔ laa enzu gyɔɔ mbaa Okrasi. 20Kwuye ungwu mi yi mu ɛduma iwomo mbala Azhu, mi wo kyamate Ozhu tayi kaa la mi fya mba la mi bo mbo mbaa Ɔzhizɔsi; mbaa enzu umba bɔkɔ Ɛrama iyi Omosisi i yi ekpasu meka mba, Imi uwu bɔkɔ Ɛrama iyi Omosisi i yi ekpasu mu reshi mi mo, mi wo ɛmi kyamate onzu uwu bɔkɔ Ɛrama iyi Omosisi i yi ekpasu mu reshi wu tayi kaa la mi fya mba la mi bo mbaa Ɔzhizɔsi. 21Tatayi mbaa enzu umba bɔkɔ akwu Azhu mo, mi wo kyamate mi kwu onzu uwu bɔkɔ akwu Ozhu mo tayi kaka kaa la mi fya mba la mi bo mbo mbaa Ɔzhizɔsi. Ɛlɛ i zɔ tee mi mbwalu ɛrama iyi Ukpo mo mo; ɛrama iyi Okrasi i yi ekpasu mu reshi mi. 22Mbaa enzu umba bɔkɔ o kɔma mu iso iyi Ukpo mo, mi wo kyamate umba tayi tete kaa la mi fya mba la mi bo mbaa Ɔzhizɔsi. Imi mi kwu apula iyinayina mbaa enzu lɛɛbi kaa mu ɔgwuzɛ uwunawuna enzu umbafo mba la mi sa mba ma. 23Mi wo ɛlɛ lɛɛbi kwuwongu iso iyi Ukpo, kaa la mi fya esheshi yi ma. 24Lunyi lu yitu te gba enzu o yi mu ishi itomo iyi ɛnya irima mbala esu, onzu ukpɛnyi gba aa fya rigbɛ le. Kwuwo kwɔlɛ, la lu ri ɛnya ɛnyi mu ɔgwuzɛ uwu lu fya rigbɛ ngyɛngyi ma. 25Onzu uwunawuna uwu bɔkɔ e tishi iyi ɛninɛma mbala enzu umbafo, e lo ɛnwu wu inyashi iyɛkɔkɔ mu ivɔngɔma. Umba o wo ɛlɛ te kaa lo fya rigbɛ ingyi ki kpɛdɔma ɔnɔnuwa; kinzu ba ki wo ɛlɛ te kaa la ki fya rigbɛ ingyi bɔkɔ ri kpɛdɔma mo iyɔkpɔɔ. 26Imi mi ri ɛnya iyi umbwa mo; ikpama mi tete mi kpa shaa mo. 27Imi mi lo ɛnwu mi inyashi nzhii ba mi gwu yi mo. Imi mi wo ɛlɛ kaa kwuyengwu bɔkɔ mi mbwa enzu iso yi Ukpo isomo kaa Imi ba la mi fala rigbɛ ifyama mo.
Currently Selected:
Ɔkɔrɔti uwu kwonze 9: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
