Ɔkɔrɔti uwu kwonze 12
12
Rɛshi Ingyi Bɔkɔ Kwundu Uwu Ukpo E Shi
1Mɛka iyi iso iyi rɛshi ingyi bɔkɔ Kwundu uwu Ukpo e shi,
ɛmɛnɛ mi, mi gyi tee la lu yitu iyi ongbulolo meka yi. 2Lunyi lu yitu tee, kwuyengwu bɔkɔ lu du yitu iyi Ukpo mo awu, o kyoro yi mo mu ɛgwuzɛ ikikɔ ikikɔ akwɛyi lu byi eshi iyi bɔkɔ i yi kwunyɔ mo. 3Kwuwo kwɔlɛ mi gyi tee la lu yitu tee, onzu uwu bɔkɔ Kwundu uwu Ukpo e yi mbala wu, e do tee <<Ira li mbwalu Ɔzhizɔsi!>> gbee mo, tatayi onzu e do tee a zɔ tee, <<Ɔzhizɔsi akwu Ɔkwu>> mo gba Kwundu uwu Ukpo e yi mbala wu mo.
4Rɛshi ingyi Kwundu uwu Ukpo ri yi ikikɔ, ikikɔ, Kwundu awawu gba ba ee shi le. 5Ɛgwuzɛ iyi bɔkɔ ki wo ɛduma laa Ukpo i yi ikikɔ, ikikɔ, tetete akwu Ɔkwu ukpɛnyi gba o ye mu ɛduma iwomo le. 6Ɛduma iyi iwomo i yi ikikɔ, ikikɔ byi, kpɛkpɛyi ba akwu Ukpo ukpɛnyi gba e shi uwewe ekpasu iyi iwomo le.
7Ukpo e shi uwewe rɛshi kaa li zɔ tee Kwundu uwu Ukpo e yi ma nzu kaa enzu lɛɛbi lo fya esheshi. 8Onzu uwufo, Kwundu e shi wu ilukwu iyi iso isomo, onzu uwufo ba Kwundu ele tete gba e shi wu amasa iyi iso isomo le. 9Onzu uwufo Kwundu e shi wu rɛshi ingyi ikwu idu lu fulo iyɛku, uwufo ba o shi wu rɛshi ingyi ɛkpasu iyi enzu efya ibomo, kpɛkpɛyi ba akwu Kwundu ele tete gba e shi le. 10Kwundu e shi onzu uwufo ɛkpasu iyi apula iyi amɛ iwomo; uwufo ba o shi wu rɛshi ingyi anu itama iyi iso iyi Ukpo; uwufo tete o shi wu rɛshi ingyi bɔkɔ a zɔngɔma rɛshi ingyi Kwundu uwu Ukpo ma mbala reshi ingyi bɔkɔ akwu ingyi Kwundu uwu Ukpo mo. Onzu uwufo o shi wu rɛshi ingyi iso isomo mu lunzu undepo, uwufo ba o shi wu rɛshi ingyi iluma iyi iso isomo mu lunzu undepo ndɔndu. 11Ekpasu iyi iwomo ɛlɛ kpɛkpɛyi akwu Kwundu ukpɛnyi ele gba e shi le; uwu ba e shi uwewe kyamate bɔkɔ egbo wu i gyi.
Kpɛkpɛnzu Ki Kwu Ɛnwu Ikpɛnyi Laa Asanga Riba
12Ɛnwu i yi asanga riba; tetete akwu ɛnwu ikpɛnyi. Tegba Okrasi e yi le.yi. 13Moo Kwundu uwu Ukpo ukpɛnyi gba e wo nzu obatisima le kaa la ki kwu ɛnwu ikpɛnyi, laa Azhu laa enzu umba akwu Azhu mo, laa enye laa enzu umba bɔkɔ akwu enye mo, Kwundu ukpɛnyi ele e yi kyamate embyi umba bɔkɔ kpɛkpɛnzu ki wo tayi.
14Moo ɛnwu i yi asanga riba, moo akwu asanga ikpɛnyi mo. 15Akwiyi gba kwɔlɛ kwu zɔ tee, <<Kwuwongwu Imi mi kwu kwuwo mo awu ba mi kyo mbala ɛnwu ɛlɛ mo,>> akwu kwuwongu isomo ngwu ɛlɛ gba i shi kwu kyo mbala ɛnwu ɛlɛ fo le mo. 16Tatayi, akwiyi gba kwɔlu kwu zɔ tee, <<Kwuwongwu Imi mi kwu kwuyi mo awu ba, mi kyo mbala ɛnwu ɛlɛ mo,>> akwu kwuwongu isomo ngwu ɛlɛ gba i shi kwu kyo mbala ɛnwu ɛlɛ fo le mo. 17Gba ɛnwu kpɛkpɛyi lakwu kwuyi, ba ipwama o pwa mungye? Gba ɛnwu kpɛkpɛyi lakwu kwɔlu, ba umbwɔ o se mungye? 18Iso iyi ongbulolo gba i yi te, Ukpo a nɔngɔ asanga iyi ɛnwu ikikɔ ikikɔ kyamate bɔkɔ a ka yi mu egbo wu le. 19Gba asanga iyi ɛnwu kpɛkpɛyi lakwu kwɔsanga kwukpɛnyi, ɛnwu i yi mo! 20Ongbulolo e yi tee, ɛnwu i yi asanga riba, tetete akwu ɛnwu ikpɛnyi.
21Kwuwo kwɔlɛ, kwuyi kwu do tee kwu za la kwuwo tee, <<Imi mi yi ugɔ ŋɔ mo!>> mo. Reshi tete ri do tee ri za laa alɛ tee, <<Imi mi yi ugɔ ŋɔ mo!>> mo. 22Ongbulolo gba e yi te, asanga iyi bɔkɔ ki ma yi tee i do ugɔ ukpukpɛnyi isama mo awu gba ba ki yi ugɔ yi i ka le, 23asanga iyi bɔkɔ ki ma yi tee i yi umwɔ mo awu gba ba ki shi yi umwɔ i ka le; akwɛyi asanga iyi bɔkɔ i shoshi tee enzu lo ma yi mo awu gba ba ki bɔ eyi ma yi ɔnyɛnyɛ le, 24munɛ ba asanga iyi bɔkɔ enzu o ma yi ba ki kpo yi ekpayi mo. Ukpo a nɔngɔ asanga lɛɛbi e lomesu kaa asanga iyi bɔkɔ kinzu ki ma tee i yi umwɔ mo awu gba ba ki shi yi umwɔ ikiika le. 25Ikama iyi ɛnwu li yi mo, kaa asanga ɛlɛ ii mbwama lesu kyakya. 26Akwiyi gba kwosanga ungwu ɛnwu kukpɛnyi kwu pwa ofya, akwu ɛnwu kpɛkpɛyi gba i pwa ofya mbala ngwu le; akwiyi gba kwosanga kukpɛnyi kwu fya ipwɔma, ɛnwu kpɛkpɛyi i mu ɔnyɛ mbala ngwu tete.
27Lunyi kpɛkpɛyi lu yi kyamate ɛnwu iyi Okrasi tayi, uwewe yi ba e yi kyamate kwosanga ungwu ɛnwu iyi Okrasi tayi. 28Mekeka iyi enzu wa mbwalu, Ukpo a ŋa wa zɛ ilɔ keyi, akwɛyi anukenzu o mbwalu, akwɛyi uzhi uwɔla akwu wa zɔ ɛzu; akwɛyi umba bɔkɔ o wo apula iyi amɛ, akwɛyi umba bɔkɔ Ukpo e shi mbo ekpasu iyi enzu ofya ibomo, akwɛyi umba bɔkɔ o mbwama laa enzu, akwɛyi umba bɔkɔ o ra laa enzu ɔnyɛnyɛ, akwɛyi umba bɔkɔ Ukpo e shi mbo rɛshi ingyi iso isomo mu lunzu undepo o mbwalu. 29Akwu lɛɛbi mba gba akwu wa zɛ ilɔ le? Lɛɛbi gba akwu anukenzu le? Lɛɛbi gba akwu wa zɔ ɛzu le? Akwu lɛɛbi gba o yi ɛkpasu iyi apula iyi amɛ iwomo le 30naa iyi enzu ofya ibomo le Naa iyi iso isomo mu lunzu undepo le Naa ɛkpasu iyi lunzu undepo ndɔndu iluma le. 31Kwuwo kwɔlɛ, lunyi la lu shi egbo yi mu rɛshi ingyi ri ka le.
Imi ba mi zɔ yi ɔgwuzɛ uwu bɔkɔ u sheshi u ka le lɛɛbi.
Currently Selected:
Ɔkɔrɔti uwu kwonze 12: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
