Ɔkɔrɔti uwu kwonze 11
11
1La lu mondo mi, kyamate bɔkɔ Imi mi mondo Okrasi tayi.
Kiya Ikpomo Mu Reshi kwuyengwu Ukpo Ilɛma
2Mi pwɔ yi ma kwuwongu lu koko lu lolo mbaa mi akwɛyi lu gba lu ra la ɛzu ɔnyɛnyɛ kyamate bɔkɔ mi zɔ yi awu. 3Imi ba mi gyi tee la lu yitu tee, u to keyi uwu ɔnzɔnu uwunawuna akwu Okrasi, u to keyi uwu okokpayi akwu ɔzɔnu akwɛyi u to keyi uwu Okrasi ba akwu Ukpo. 4Ɔnzɔnu uwunawuna uwu bɔkɔ a lɛ Ukpo naa a tanu iyi iso iyi Ukpo kwuyengwu igyirima iyi odudu ba e koko reshi wu mo, onzu awu tayi e lo Okrasi lovya. 5Tatayi okokpayi uwunawuna uwu uwu bɔkɔ a lɛ Ukpo naa a tanu iyi iso iyi Ukpo kwuyengwu igyirima iyi odudu ba reshi wu ri yɛwu, okokpayi awu e lo ɔnu wu lovya; e yi kyamate oko uwu bɔkɔ a gbɛ inyi iyi reshi wu ma tayi. 6Akwiyi gba okokpayi e kpo kiya mu reshi mo, ba la gbɛ inyi wu ma. Akwiyi gba inyi igbɛma naa inyi ikpolomo akwu kiya ingyi lovya meka iyi eko, de ba i shoshi tee le kpo kiya mu reshi.
7I shoshi tee ɔnzɔnu le kpo kiya mu reshi mo, kwuwongu ɔnzɔnu akwu u wɔ mbala igba iyi Ukpo. Oko ba akwu igba iyi ɔnzɔnu; 8moo ɔnzɔnu a wɔ mu okokpayi mo, okokpayi gba a wɔ mu ɔnzɔnu le. 9O wo ɔnzɔnu kwuwongu okokpayi mo, okokpayi gba o wo wu kwuwongu ɔnzɔnu le. 10Kwuwo kwɔlɛ i shoshi tee okokpayi le kpo kiya mu reshi kwuwongu alɔgbulɔ umba Ukpo o yi mu imama, ɛlɛ i zɔ tee e loshi laa anu wu.
11Mu Ɔkwu imbwaluma, okokpayi e yi ikikɔ mbala ɔnzɔnu mo, naa ɔnzɔnu e yi ikikɔ mbala okokpayi mo. 12Moo kyamate bɔkɔ okokpayi a wɔ mu ɔnzɔnu awu, tatayi gba okokpayi ba a mba ɔnzɔnu le; tetete kiya ingyinangyina ki ngyi mbaa Ukpo.
13Lunyi la lu zɔ ombu lɛyi; i shoshi tee okokpayi la lɛ Ukpo kwuyengwu igyirima iyi odudu ba e kpo kiya mu reshi wu mo? 14Ewo iyi bɔkɔ Ukpo e wo apula mu kwudu kwɔlɛ le i zɔ tee, gba ɔnzɔnu a lafya laa inyi wɔzhi ba e kpolo yi mo mo, akwu kiya ingyi lovya, 15akwiyi gba okokpayi ba a lafya laa inyi wɔzhi, akwu kiya ingyi ɛnwu ikwumo meka wu. O shi wu inyi iyi wɔzhi kaa la kwa wu kyamate okpayi uwu e kpo mu reshi wu tayi. 16Akwiyi gba onzu uwufo a gyi te le ri kaambu mu ɛlɛ, mi gyi te la mi za wu te, kinzu mbala ɛshɔshi iyi Ukpo ki yi uukwu owa mo kwuyengwu igyirima iyi Ukpo ilɛma nzu.
Kiya Ingyirimo Ingyi Onoyo Ingyi Ɔkwu
(Omatiyu 26.26-29; Omaki 14.22-25; Oluku 22.14-20)
17Mu ɔkpa uwu mi shi yi ele, mi pwɔ yi ma mo, moo igyirima yi iyi Ukpo ilɛma i bo laa iyira i ka iyeshi ma. 18Iyi kwonze, mi pwa tee, mu igyirima yi, enzu o kama uzhi uzhi; Imi mi nyama laa iso iyi mi pwa le. (19Ee akwu ɛga tee ikama ikikɔ ikikɔ li yi meka yi kaa la ki yitu enzu umba bɔkɔ akwu umba Ukpo.) 20kwuyengwu lu gyirima mu ɔshɔshi, akwu kiya ingyirimo ingyi Ɔkwu gba lu ri le mo. 21moo kwuyengwu lu ka mbaa kiya irimo, lu rigbo la esu mo akwɛyi onzu uwufo e yi mo la lonzu, uwufo ba e wo embyi nzhii ba o yi wu mo. 22Lunyi lu yi agba yi iyi bɔkɔ lu ri lu wo mo re? Naa lu gyi te la lu zhi ɔshɔshi uwu Ukpo ma akwɛyi ba lu wo umba bɔkɔ o yi ngyi mo ɛnɛ ŋa? Lunyi lu gyi tee la mi za yi te? Lu gyi tee la mi pwɔ yi ma mu ɛlɛ? Imi mi pwɔ yi ma mo! 23Moo ɛzɔ iyi mi shi yi ele, mi na mbaa Ɔkwu nzu tee: mutu uwu bɔkɔ o ya kwoya wu awu, Ɔkwu Ɔzhizɔsi e to kwoburedi, 24mizhikembo iyi a gbɛlɛ Ukpo ɛnyi, a mu ngu ma akwɛyi a zɔ tee, <<Kwoburedi kwɔlɛ akwu ɛnwu mi, iyi bɔkɔ o shi kwuwo yi. La lu koko lu wo ɛlɛ kaa la lu lolo mi.>> 25Tatayi, mizhikembo iyi o ri kiya ma akwɛyi e to embyi umba ago akwɛyi a zɔ tee, <<Embyi umba ago mbɔlɛ akwu iso iyi bɔkɔ o so o shi mɛzhi iyepo iyi bɔkɔ Ukpo e wo mu ɛnzhi mi. La lu koko lu wo ɛlɛ, kwuyengwunguna ungwu lo wo ago ɛlɛ, la lu koko la lu lolo mbaa mi.>> 26Moo kwuyengwunanguna ungwu bɔkɔ lu ri kwoburedi kwɔlɛ lu gba lu wo embyi umba ago mbɔlɛ, i zɔ tee lu yi mu anu itama iyi lukwu undu Ɔkwu nzhii ba a gbama. 27Kwuwo kwɔlɛ, gba onzu e ri kwoburedi ungwu Ɔkwu kwɔlɛ naa e wo embyi umba ago umba Ukpo mbɔlɛ ba e yese ɛnwu ma dɛ mo, onzu awu tayi e ngbomo kwuwongu a nzhii ɛnwu iyi Ɔkwu mbala ɛnzhi wu ma. 28Kwuwo kwɔlɛ, i shoshi tee onzu le yese ɛnwu ma dɛ gba le ri kwoburedi kwɔlɛ, le wo embyi umba ago mbɔlɛ le. 29Gba onzu e ri kwoburedi kwɔlɛ naa e wo embyi mbɔlɛ umba ago umba Ukpo ba a zɔngɔma ma te akwu ɛnwu iyi Ɔkwu mo, onzu awu tayi a ka laa ɛnwu wu laa ombu uwoyi uwu Ukpo. 30Akwu kwuwo kwɔlɛ gba ɛnwu iyi umbafo yi ikɔma mo ba i yi gɛlɛ mo le, umbafo gyɔɔ ba o kpomo-o. 31Akwiyi gba ki yese enzu ma ɔnyɛnyɛ dɛ, Ukpo a ngbɛ nzu ombu uwoyi mo. 32Akwiyi gba Ɔkwu a ngbɛ nzu ombu uwoyi, uwu e ye nzu mu izɔma kaa la ki kyo mbala enzu umba kwudu kwɔlɛ kaa la ki kpɛdɔma mo.
33Kwuwo kwɔlɛ, ɛmɛnɛ mi, gba lu gyirima te lu ri kiya, ingyi onoyo ingyi Ɔkwu, la lu rigbo esu. 34Gba onzu e yi lonzu, le ri kiya mogba wu dɛ, kaa Ukpo le yi yi ombu mo kwuyengwu lu gyirima.
Kwuye ungwu mi bo mbaa yi, mi so yi iso iyi i shimo.
Currently Selected:
Ɔkɔrɔti uwu kwonze 11: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
