Ɔkɔrɔti uwu kwonze 1
1
1Imi Ɔpɔlu, mu inyama iyi Ukpo mi kwu u zɛ ilɔ uwu Okrasi Ɔzhizɔsi, mbala umanyinzu Osositini.
2Gba mi ka yi kwupu kwɔlɛ le, lunyi wa mbwalu Ukpo mu ɔshɔshi uwu Ɔkɔrɛti, lunyi umba bɔkɔ Ukpo a ŋa yi lɛnwu akwɛyi a ngbɛlɛ yi e lo mesu mbala Okrasi Ɔzhizɔsi, kaa la lu kwu enzu wu, ikyo mbala enzu lɛɛbi munamuna umba bɔkɔ o na Ɔzhizɔsi Okrasi te lakwu Ɔkwu mba kyamate bɔkɔ kinzu ki na wu akwu Ɔkwu nzu tayi.
3Ukpo Ete nzu mbala Ɔkwu Ɔzhizɔsi Okrasi le shi yi esheshi wu mbala egbo mɛzhi.
Esheshi Mu Okrasi
4Mi gbɛlɛ Ukpo ɛnyi kwuwo yi iyɔkpɔɔ kwuwongu esheshi wu iyi bɔkɔ e shi yi iyi bɔkɔ i zɛ mu Okrasi Ɔzhizɔsi. 5Kwuwongwu bɔkɔ lu kwu wa mbwalu Okrasi, o shi yi ingyinangyina ikyo mbala iso isomo mbala iyitu. 6Ɛlɛ i zɔ gedegede mekeka yi te iso iyi Okrasi iyi bɔkɔ ki so yi awu, akwu iso iyira mo. 7Kwuwongwu ɔlɛ, tabɔkɔ lu rigbo igbama iyi Ɔkwu Ɔzhizɔsi Okrasi awu, rɛshi ingyi bɔkɔ Kwundu Uwu Ukpo gba ee shi le awu, e shi yi ngyi ee. 8Ee shi yi ekpasu iyi irima nzhii ba ibomo iyi kwudu kwɔlɛ akwɛyi ɔnu uwu Ɔkwu nzu Okrasi Ɔzhizɔsi a ba gbama awu, o du yi la ingbomo mo. 9Ukpo uwu bɔkɔ a ya yi ma akwɛyi a ngbɛlɛ yi e lomesu mbala Umɛ wu, Ɔkwu nzu, Ɔzhizɔsi Okrasi awu, ee wo iyi bɔkɔ e so lɛɛbi.
Ikama Yɛyɛyɛ Mu Ɔshɔshi.
10Mi kpa yi ɛshɛku ɛmɛnɛ mi mu ɛnyi iyi Ɔkwu nzu , Ɔzhizɔsi Okrasi te la lu nyama lesu kaa ikama yɛyɛ li fye mekeka yi mo. La lu kpa kyaa kaa egbo yi lakwu ikpɛnyi. 11Ɛmɛnɛ mi, enzu umbafo umba bɔkɔ ɔ wɔ mogba uwu Okulo, o ka mi la iso te lunyi lu yi mu itumo mbala esu. 12Iso iyi mi yi mu isomo gba iyi te: onzu uwufo aa zɔ tee, <<Imi mi kwu uwu Ɔpɔlu>>; uwufo aa zɔ tee, <<Imi mi kwu uwu Apɔlɔsi>>; uwufo aa zɔ tee, <<Imi mi kwu uwu Okefasi>>, uwufo kpɔ, aa zɔ tee, <<Imi mi kwu uwu Okrasi.>> 13Inyete Ɔzhizɔsi o ka wu ma yɛyɛ re? Akwu Ɔpɔlu gba e kpomo mu kwuwɛyi ungwu lukwu kwuwo yi le re? Naa o wo yi obatisima mu ɛnyi iyi Ɔpɔlu ŋa?
14Mi ngbede la Ukpo tee Okirisipu mbala Ɔgayɔ kɛɛkyi gba mi wo mbo obatisima le, moo mi wo onzu uwunawuna meka yi obatisima mo. 15Kwuwo kwɔlɛ onzu uwu bɔkɔ aa zɔ tee Imi mi wo wu obatisima mu ɛnyi mi, e yi mo. 16(Mi lolo o, mi kyo mi wo Ositifana mbala agba wu obatisima tete; mi do te mi lolo te mi wo onzu uwufo obatisima fo.) 17Okrasi a lɔ mi tee la mi wo obatisima mo. A lɔ mi tee la mi tanu iyi rɛnu wu ingyesheshi ngyɛlɛ byi. Anu itama mi ɛlɛ ba lakwu mu ilukwu iyi onzu mo, kaa ekpasu iyi lukwu undu Okrasi e kpo mu kwuwɛyi ungwu lukwu lakwu shaa mo.
Okrasi Akwu Ekpasu Mbala Ilukwu Iyi Ukpo.
18Iso iyi lukwu undu bɔkɔ Okrasi e kpo mu kwuwɛyi ungwu lukwu i yi kyamate iso iyi erendo tayi mbaa enzu umba bɔkɔ o yi mu itomo; kinzu umba bɔkɔ o yenzu mu isama awu ba, ki yitu te akwu ekpasu iyi Ukpo. 19Ɛlɛ i zɛ kyaa mbala iso iyi bɔkɔ o so mu kwokpo ungwu iso iyi Ukpo tee:
<<Imi mi tutu ilukwu iyi enzu umba amasa ma
akwɛyi iyitu iyi enzu umba bɔkɔ o to ɛmba tee umba o yitu, mi shi yi mɛmba.>>
20Inyete enzu umba ilukwu mbala umba bɔkɔ ɔ wa ɛzu gyɔɔ, mbala umba ɔ zɔ iyitu o yi muna fo? Ukpo a da zɔ yi tee ilukwu iyi kwudu kwɔlɛ akwu erendo mo? 21Moo mu ilukwu wu, Ukpo ba a nyama tee enzu umba ilukwu lo ra la ilukwu mbo kaa lo yi wu mo. Enzu umba bɔkɔ o na iso wu, iyi bɔkɔ ki ta yi yi anu awu, iyi bɔkɔ enzu umbafo o to yi te akwu iso iyi erendo awu gba Ukpo a sa mba ma le. 22Azhu ɔ gyi te lɔ ma lɔzɔ undu amɛ, Agiriki ba o gagyi ilukwu. 23Kinzu ba ki tanu iyi Okrasi uwu bɔkɔ ɔ kpa wu mu kwuwɛyi ungwu lukwu ɔ ngbɛ wu ma awu, iso ɛlɛ gba i tutu Azhu egbo mo le, enzu umba bɔkɔ akwu Azhu mo ba o to yi te akwu iso iyi erendo; 24tetete, enzu umba bɔkɔ Ukpo a ya mba ma, la Azhu, la enzu umba bɔkɔ akwu Azhu mo, Okrasi gba akwu ekpasu iyi Ukpo iyi bɔkɔ i sa enzu ma le, uwu tete gba akwu ilukwu iyi Ukpo le. 25Moo kiya ingyi bɔkɔ enzu o to ngyi tee akwu erendo iyi Ukpo awu, i ka ilukwu laa ilukwu iyi onzu uwunawuna ma, tatayi iyi bɔkɔ enzu o to yi tee akwu inyɛma iyi ekpasu iyi Ukpo awu ba i ka ekpasu laa ekpasu iyi onzu uwunawuna ma tete.
26Ɛmɛnɛ mi, la lu lolo ewo iyi bɔkɔ lu yi kwuyengwu Ukpo a ya yi ma awu. Lunyi bwɛɛ bi gba enzu umba kwudu kwɔlɛ o to yi tee lu yi amasa le, lunyi bwɛɛ bi gba lu kwu enzu umbakwu le, ɛmɛ yi bwɛɛ bi gba akwu ɛmɛ umba enzu umbakwu le. 27Ukpo ba a ŋa kiya ingyi bɔkɔ kwudu kwɔlɛ kwu to ngyi tee akwu erendo awu kaa le lo enzu umba bɔkɔ kwudu kwɔlɛ kwu to mbo tee akwu enzu umba amasa awu lovya, akwɛyi a ŋa wa kpɔfɔ mu eyi iyi enzu umba kwudu kwɔlɛ, kaa le lo enzu umba o yi ekpasu lovya. 28Ukpo e to apula iyi ɔ zhi yi ma mu kwudu kwɔlɛ, iyi bɔkɔ o to yi tee akwu kiya kinyinyi mo awu, kaa apula iyi bɔkɔ ɔ du yi ma mu kwudu kwɔlɛ awu, la ngbɛ yi ɛdɔma. 29E wo ɛlɛ kaa onzu uwunawuna le kwɛnwu mu idu iyi Ukpo mo. 30Kiya ingyi Ukpo e wo le gba ki shi lu kwu enzu umba Okrasi Ɔzhizɔsi le, Okrasi gba akwu ɔgwuzɛ uwu amasa uwu bɔkɔ Ukpo a wa wu kaa la sa enzu ma le. Uwu gba akwu ototo nzu mbaa Ukpo le; uwu gba akwu usama nzu le tete. 31Kwuwo kwɔlɛ, iso iyi Ukpo i zɔ te, <<Onzu uwunawuna uwu bɔkɔ e kwɛnwu ba le kwu mu kiya ingyi bɔkɔ Ɔkwu e wo.>>
Currently Selected:
Ɔkɔrɔti uwu kwonze 1: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
