Laakosinka Maxaafa 5
5
Battoomakenaa'n Kaambetixxa Ca'a Hiyya
1Duuchchi Woddiki Gootti Muuse hiyyee qici, 2«Gogiinka tare sa'aaka dhukkuba afeeka, yookaan labballiinke bisonaa'n shamini fulaaka yookaan rensha tuqiyyoti aadatishsha batto'eeka manjo duuchcha kaambe giddii'n fulchinaashsha Isira'eelito ajaji. 3Labbakenna kadi meyyaxxa fulchi; Ani oddote'n galannoxxa ifixxa kaambe battoosinabaashsha kanbe giddii'n fulchi» 4Isira'eelik ardinna tenneenni asse; mannakanna kaambe giddii'n fulche. Duuchchi Woddiki Gootti Muuse ajajemashanni asse.
Balleesatixxa Mura
5Duuchchi Woddiki Gootti Muuse hiyyee qici,#Lew. 6:1-7. 6«Isira'eelike arda'n hitattoo qici, ‹Labba meyyak manji hoone orinninna mitte manjo balleessa tennenaa'n kexxeexxinni Duuchchi Woddike Gootti'a addatema gopheeke kadoole ikki manji balleesanjoken; 7hujeexxa cubbonna faaci'wowaal; hujemmaxxe balleessa'anna wo'ma mura, murendemmaxxe mura hana onde anga'n mitte anga lebeexxi balleessa geltemmake manji'a mura woxowwaal. 8Balleesa geltemak iikki manji reyoole, mura isi'a aadhaak isik shiqik fir hedhagophoole kinni iitti mura Duuchchi Woddike Goottixxe kaddamaxxee ookkone manjixxa cubbo biratike tolchi'a shiqammake gedhebiinke korbeesinni welti qeesichchokee uwwendowwaal. 9Isira'eelik ardi iyyedagaaxxi woyyitte uwwa duuchcha uwwa eettenee aadhammake qeesichchixxe kaddaan. 10Mitte mittinge manjixxi woyyitte uwwa umo ifi ifikinxenni; yaane kinni isi qeesichchokee uwwaaxxi uwwa qeesichiinxe kaddaan.› »
Aro'i I'nataaxxa Aruwwa
11Ookkoneechchi uduma Duuchchi Woddiki Gootti Muusee'e, 12«Isira'eelik arda'n hitattoo qici: ‹Aro'o affeexxi mitte manjichcho yaadik wele labballiba'a higati ifike aro'i'a affeemmaxxa xuurameessumma xe'isheexxi, 13wele labbalinni welti diiphphoole, tinninna illeti isee afeek manji hedhagopheemmaxxe'e iseke aro'inaa'n shoondoolenna, dhuga'a kulaak hedha gophamaxxee isexxi battooma farri hitteexxi leella gophphoole, 14isek aro'o'n hinaaffetik yaadi galee'naa ise kinni batotteexxe kadde afendoole yookaan aro'o iseke'n hinaaffetik yaadi galena'a ise kinni battoottebaaxxe kadde afendoole, 15iikki manji eettene ifixxa are qeesichchibaa iyyedagowwaal; isexxeenna mitte kiilo so'inxa bulle uwwa iyyedagowwaal; tinni hinaafetee shiqqeexxi midhatixxi uwwa balleessa qalli assitaaxxe qallixxe uwwa kaddeemmaxxee iitti hana zayite dhangalaassoqqe'e hixaanakanna itti woroqe'e.
16« ‹Qeesichchikinna manjichcho eettene iyyedageexxi Duuchchi Woddike Gootti edo urritaashsha assowaal. 17Ookkoneechchi uduma qeesichchi woyyichcha wode'e odolchote'n cosseexxi, Taabotii galdumike duunkaani giddii'n buttii'n shiixxoka buttina aadheexxi wodi'i giddo worowwaal. 18Qeesichchikinna eettene manjichcho Duuchchi Woddike Gootti edo uurritaashsha asseechchi uduma iseka umonna tikaan; hinaaffe qalli assitaaxxa midhatixxa uwwanna anga abiddaashsha assaan; Qeesichchikinna badino iyyedagaaka wode'e anga abidowwaal. 19Ookkoneechchi uduuma qeesichchi, isee hiyya'n kakachisaa qici, «Aro'o atika affeenni hexxe'e wele labballinni dhiiphagophphe'e, ifinna battoossagophphpootole kunni badino iyydagaakke qararaake wodi'ixxi badino atee miitabaan. 20Yaane kinni aro'o affeenni hexxe'e wele labballinni diiphphe battoottootole» 21qeesichchikinna eetene manjichcho hiyye badinotixxa kako kakachisaa qici, «Duuchchi Woddiki Gootti tafa atika xuuxxati godoba atika bokossati arda atikixxe oddo'n badinotixxenna kakotixxe atee assowwaal. 22Kunni badino ate'n iyyedagaak wodi'i ha'witatto wodda atee godoba bokosso'o; tafa atikanna xuuxo'o.»
« ‹Manjichchotinna, «Hmiin. Hamiin» hitaan.
23« ‹Okonnechchi uduuma qeesichchikinna konne'e badinotika hiyyichchuwwa borreesatike bidir hana borreessuun; ookkonechi udumi'a borrotanna qaraaranjo wodi'inni anshe balleessuun. 24Badino idagammaka wode'enna eettene manjichcho'n ha'wisaan; woddi'ikinna godobi'a sa'eechchi uduma manjichchote'n qaraarto elagonphe geessisaan. 25Qeesichchi hinaafete'e shiqqeexxe midhatixxa uwwa manjichotixxe anganaa'n aadheexxi Duuchchi Woddike Gootti edo dorseexxi tolchmalchiiba idagowaal. 26Okonechchi uduma qallitixxe midhatixxe uwwanaa'n mitte qeerro kaddaaxxa aadheexxi tolchimalchi hana gubowwaal. Okonechchi uduma mannjichcho ookkonee wode'e ha'witaashsha assowwaal. 27Manjichchotinna ifi battoossite aro'o ifike'ninna addatema gophpheexxe kaddoole konne badino idagammaka wode'e ha'witaa wodda godobi'a sa'eexxi qaraarto elagonphe, godoba ise'e bokossaan; tafa iseka xuuxaan; arda ifikixxe oddo'inna ise'e badinendeexxe kaddaan. 28Kaddomale manjichcho battoottebaaxxenna ci'mendebaaxxe kaddoole balleessa affebaaxxe kaddaan; oosetanna ildaan.
29-30« ‹Yoonna mitte manjichcho aro'o affeenni hexxe'e welik hosse ifi battoossitoole, yookaan mitti manji are ifixxa hi'naafee'naa'a hinaaffetik yaadi iso'n galoole tenne yaanek seeri konnechchinni butti'a hedheeken: qeesichchi eettenee manjichcho Duuchchi Woddike Gootti edo uurtaashsha asseexxi konnechchi iimidarre kulemeek seeruwwi duuchchi ise'n muuxemaashsha assaan. 31Aro'o isekinna balleessa afebaake kadaan; manjichcho kinni ifixxe balleessaxxe buutoxxe'e hira alfiftaan› » hiyye.
Currently Selected:
Laakosinka Maxaafa 5: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
