Laakosinka Maxaafa 6
6
Naazircho Kadatika Seera
1Duuchchi Woddik Gootti Muuse hiyyee qici: 2«Isira'eelika arda'n hitattoo qici, ‹Manji mitti meyyaxxi yookaan labbaki Duuchchi Woddike Gootti'a gargar ifi foyeexxi Naazircho kado'a werreega werreegoole, 3Isi woyinetixxe bookanaa'ninna wele machchossaake ha'winaa'n ifi lagowaal; woyinetika yookaan wele machchoossaake ha'wo majajaaka ha'woqe'e; iitttanni woyinetixxa bookanna ha'woqqe'e; woyinetika tishanna kadi bageeka ittoqqe'e.#Luq. 1:15. 4Naazirchummatixxee yanna duuchcha woyinetike daalixxa gumma yokiin gummatixxa quncenna midde ittoqe'e.
5«‹Ifi gargar foyeexxi wereegeexxa yanna duuchcha haado umo isika tuqqoqe'e; Duuchchi Woddike Gootti'a ifi gargar foyemmaxxi yanna muuxendaa qico'n woyyichchake kadowwaal umokanna nossedhowwaal. 6Ifi Duuchchi Woddike Gootti'a gargar foyemmaxxe yanna duuchcha'n renshiibaa shiqoqqe'e. 7Ifi Duuchchi Woddike Gootti'a gargar foyatik beesis ifike umike ordichcho'n hedhemmaxxee isik anni yookaan ama, dayyi isik yookaan dayyo rertoole rensha insa'neeka tuqeexxi ifi battoossoqqe'e. 8Isi ifi gargar foyeexxe yanna duuchcha'n Duuchchi Woddike Gootti'a woyyichchaken.
9« ‹Dedhange'ni manji mitti isi bira reyeexxi isi gargar foyememmaka umo ifika battoossoole seeriinxe aadashsha luqqi hiyyammaxxe torbeessoxxe barra'n ifikr umika ordichcho haaxxowwaal. 10Saddeettixxe bara'n isi guugeenjo yookaan lame guuggenna yookaan lame bejjo'o aadheexxi afenshatike duunkaanixxe huddumme edo qeesichchinba dagowwaal. 11Qeesichchikinna mitte cubbotike tolchi'a, helxenee ciincatik tolchi'a shiqishati, Naazirchi renshii bira shiqati ifi battoossemmaxxa cubbo biraan; Naazirchikinna eettenneenni barra ifike umike ordichcho woyyonsaan. 12Isinna ifi gargar foyemmaxxa yanna Duuchchi Woddike Gootti'a woyyonsaan; mitte woggaka gedhebiinka buruussanna balleesatike tolchixxee iyyedaguun. Konnechchi edo Naazirummatixxe yanna'n batto'eemmaxxe'e iti yanna isi'a laakko'endabaan.
13« ‹Mitti Naazirichchi ifi gargar foyemmaxxi yanna muuxxendaa woddik seeri konnechchi butta hedheen: isi afenshatike duunkaanixxe hudummebaa dageexxi, 14ookko Duuchchi Woddike Gootti'a uwwa shiqishuun; kunninna ciincatike tolchi'a mitte woggaka faya afebaaka gedhebiinka buruusa, cubbotike tolchi'a mitte woggaxxa faya afebaaxxa gedhebiinxa beltanjo ittanni mittummatike tolchi'a fafayyaka gedhebiinka korbeesa shiqisha'n, 15konneerinni welti ifi ifike midhatke tolchinni weltininna ifi ifike ha'watike tolchinni welti mitteba, gamami e'yebaaxxe bullexxa mitte masoobe kebbo tinninna zayiteti qushshendee shaqqiteexxe bulleka xaltuwwanna raxxeexxe zayite hana buurendeeka hephphaka xalta iyyedagowaal.
16« ‹Qeesichchikinna konneechchuwwa duuchcha Duuchchi Woddike Gootti edo cubbotike tolchi'anna ciincatike tolchi'a shiqishuun. 17Gedhebiinka korbeesanna mittummatike tolchi'a masoobe giddo hexxeexxa gamami e'yebaaxxe bullexxe kebbonni iittanni midhatikenna ha'watike tolchinn welti Duuchchi Woddike Gootti'a shiqishuun. 18Ookkonechchi uduma Naarichchi weerregeexxi ifi gargar foyemmaka ifike umika ordichcho afenshatike duunkaanixxe huddume edo haaxxeexxi mittummatike tolchi hunda ha'yita'neexxe gira giddo ugguun.
19« ‹Naazirichchikinna weregeexxi ifi gargar foyemmaka ifike umika ordichcho haaxxeechchi udumi dare qeesichchi gafemeeka gedhebiinke korbeessika hayenna masoobe giddi'n gamami e'yebaaxxe bullexxa kebbonna mitte hephphaka xalta aadheexxi Naazirichchoke'n anga abidaashsha assuun. 20Ookkoneechchi uduma qeesichchi konnechchuwwa Duuchchi Woddike Gootti'a edo dolsatika tolcha asse shiqishuun. Kunni dolsemeek hayinna shiqqeexxi corme woyyichcha qeesichiinke qoobbo kaddaan. Ookkoneechchi uduma Naazirichchi woyinetixxa booka ha'wa dande'aan.
21« ‹Yooni kunni werreega muuxo'a Duuchchi Woddike Gootti'a werreegeeke Naazirichike seeran; yaane kinni mitti Naazirichchi Naazirummatee dande'eexxi uwwaaxxe yaane iimi darre Duuchchi Woddike Gootti'a uwwo'a werregeexxa yaane Naazirumma ifixxee weregeemmahshanni kada hassissaan. Naazirummatike seerishshanni werreegeeka werreega muuxowwaal.› »
Qeesooletixxa Eebba
22Duuchchi Woddik Gootti Muuse'e hiyyee qici: 23«Aarooninna isixxi labbaxxi oose, ‹Isira'eelito eebbissinaa wodda hitinaa qici:
24« ‹Duuchchi woddike Gootti atee eebbisoo;
atee heqqoo;
25Duuchchi Woddik Gootti ati'a alba farri hiyyoo;
ati'anna mararoo;
26Duuchchi Woddik Gootti alba atibaa wirri hiyyoo;
nage'a ifikanna ati'a uwwoo.› »
27«Konnee qicinni summa anka ganna'n Isira'eelito eebinsoole aninna Isira'eelito eebbisannon.»
Currently Selected:
Laakosinka Maxaafa 6: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
