Matoosixxa Wengeele 11
11
Xammaqaammake Yohaannisibaa'n Ergemeeka Manna
(Luq. 7:18-35)
1Yessuusi ifixxe tommena lame hordofeeyye ajaja uwwe barsiisateenna lallabatee bira hedheeke qachchuwwibaa me'e. 2Xammaqaammak Yohaannisi usurriinke mine'ni hedhe Kiristoosi huja'neexxa huje laqeexxi ifixxa lame hordofeeyye Yessuusiba'a ergeexxi, 3«Daga'neen hiyyendeettak atete moo? Yookaan weleke heqinanno?» hiyyeexxi Yessuusi'i qorsiise.
4Yessuusinna insa'ne'n hiyyeexxi hiisse haaso'ee qici, «Martineexxi uuddineexxanna laqqine'exxa Yohaannisi'n kulle. 5Balla'uwwi afaan, naafuwwi toggi hiyyaan, soomo'emmakiirinna fayyaan, mansha laqammabaakiirinna laqaan, reyeek mannuwwi ke'aan, hiyyeeyyeteenna wengeele lallabendaan.#Isa. 35:5-6; 61:1. 6Anxe buuto'a guggufatabaak eebbisemeedheeken» hiyye.
7Yohaannisixxi hordofeeyye me'iteechchi uduma, Yessuusi Yohaannisixxee mannake'n haaso'a safee hiyyee qici, «Qiilla gammooje'n maachcho uudino'a fuldine? Diidallo lele'missa'neeka shonbooqo uuddino'a fuldinee? 8Yookaan Maachcho uudino'a fuldine? Dancha seemma oddo'weeka manjo uuddino'atema'a? Dancha seemma oddo'waakir moyanjuwwiinke mine'ni hedhaan. 9Yookaan maachchota uudinno'a fuldine? wabeeka uudateetemmo? Eetti wabeekakenaa'n sa'aaka uudino'aaten. 10Isi, ora atika ati'a fiyaashsha
« ‹Ati edo ora atika ati'a qophpheeso'a;
ati ediddarre arganjo anka ergannon› hiyyemeexxi borreeseemeemmak manjon.#Mil. 3:1.
11Dhugaate haaso'annen melaalletena'n ilemeeke manna duuchchanaa'n xammaqallo Yohaannisii'i sa'aak hara hedhebaan; yaane kinni Mageniixxe mootomma'n duuchchingenaa'n shiixxedhaak iso'o sa'aan. 12Xammaqammak Yohaannisike baronaa'ni saffe'e telchi qico'n mootumma Mageniinxi jaba qicinni dhiibendaan.#11:12 Dhiibendaan Dhiibemanna wo'laancho abixxa hassissaaxxa fuggoxxa hunnuwwa xa'niteexxi eettene hega uushsho sa'atee'e aammaange assitaaxxe aammaangngumatixxe wo'laanchon. Jaba qico'ni cichcheekiirinna isee alfaan. 13Wabeeko duuchchanna Muuseke seerinaa'n Yohaannisike bari qico'ni raaga haasoote'een.#Luq. 16:16. 14Insa'ne hina'neexxa ha'no adhitina'noole Daga'neen hiyyemeeki Eelyaasi konne Yohaannisiten.#Mil. 4:5; Mat. 17:10-13; Mar. 9:11-13. 15Mansha afeeki hedhoole laqowwaal.
16«Konne barika manna mayiik fakkeessanno? Insa'ne dikko giddo ofoldeexxi jaaluwwa ifika yexxa'ni,
17« ‹Suusu'le ha'no'a ufuufennen,
ha'no kinn sirbitinebaan;
Wi'lishsha wi'lishshine'een
ha'no kinni ooxxinebaan› hitaammaxxe oose fakkaattaan.
18Xammaqalli Yohaannisi ita'nebaakinna ha'wanebaak ha'nooba'a dagee wodda, ‹Kunni fuggichchi hafuurinni abidemedheeken› hine. 19Manjink Belti kinni ita'ninna ha'wa'n dagee wodda ‹Kunni itallokenna ha'walloken; qaraxammake mannikenna cubbaaleeyyetik jaalon› hine. Mageniinke beekumi huje ifixxenni leelle» iso hine.
Amanagophemmake Qachchuwwa'n Haaso'endeexxa Daabachcho
(Luq. 10:13-15)
20Yessuusi heddo mambe'a isi giddo hujeme'na'a aadde aaga gopheeka qachchuwwa hiyya'ni daabbatee qici, 21«Aannee ati'a koo Korraziinike qachcha! Aannee ati'a koo Beete Sayidake qachchaa! Ha'no giddo assemeek mambe'uwwi Xiroosikenna Sidoonake qachchuwwa'n assemeele yaaddotixxa seemma oddo'weexxi bululo ifi'ni fiffilxeexxi edonni aadde aagamman.#Isa. 23:1-18; Hiz. 26:1—28:26; Iyu. 3:4-8; Amo. 1:9-10; Zek. 9:2-4. 22Tennexxee ani ha'no'n kulo murtetixxa barra ha'no'a irra Xiroosikenna Sidoonake qachchi uwwemaka mura woxxa sholledhaan. 23Ati kinni Qifirnahoomi! Umo atika iimati qico'ni lummissotta'a hassette? Si'oolixxe giddo hundatto; ati giddo hujemeeke mambe'i Soodomi'n hujeme'exxe kaddeele iikki qachchi telchi qico'ni hedhamman.#Isa. 14:13-15; Dada. 19:24-28. 24Yaane kinni ani ate'ni murtetixxa barra ati'a irra xixichchi Soodomi'a sholledhaan» hiyye.#Mat. 10:15; Luq. 10:12.
Yessusinaa'n Afendaaxxa Hafuuradhdha
(Luq. 10:21-22)
25Ookkone wodda Yessuusi hiyyee qici, «Anke anna! Iimikinna buttik Gootta! Tenne'e yaane beekkoletenaa'ninna ege'nemeeke mannanaa'n shoxxettexxi annoolete'n ifisetaxxe ate'e galateeffataannen. 26Eeti anke Anna! Tenne assiyyotee atixxe eloxxe fedhe kadde'en.
27«Anki anni duuchchiinxa yaane ani'a uwwe'een; Annake kadoole malee'e Belto ege'naak hedhebaan; ittanni Beltoke kaddoole malee Anna ege'naak hedhebaan; Belti eeyyeexxi leellisheke kadoole malee'e Anna ege'naak hedhabaan.#Yoh. 3:35; 1:18; 10:5.
28«Ha'no ba'oo ha'urteek duuchchi anibaa amme! Ani ha'noo hafuura adhdhisannon. 29Ani ba'lakenna shaqqake kadeennaxxe'e qanbara anka dulkitineexxi anenaa'ni baratte! Lubbo ha'nooxxe'e hafuura adhdhitinaan.#Erm. 6:16. 30Qanbari anki ha'urabaaken; ba'oo anxinna shollaxxen» hiyye.
Currently Selected:
Matoosixxa Wengeele 11: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia