Matoosixxa Wengeele 10
10
Tommenna Lame Hordofeyye
(Mar. 3:13-19; Luq. 6:12-16)
1Yessuusi tommenna lame hordofeeyye ifibaa ye'eexxi fuggichcha hafuuruwwa fulchinaashshanna gargar hexxeexxa dhibo fayyinsaashsha insa'ne'e baalloonse. 2Eettene tommenna lame ergameeyyeke summi konnechchi butta hedheeken: siree Pheexiroosi hiyyemeek Simi'ooni, dayyi isiki Indiryaasi, Zebidewoosixxi oose Ya'iqoobi dayyi isik Yohaannisi, 3Filiphphoosinna Bertelomewoosi, Toomaasinna qaraxammak Maatoosi, Ilfiyoosik belti Ya'iqoobinna Taadewoosi, 4Hinaafalli Simi'ooni Yessuusii'i sa'isse uwweemmak Asiqorootuke Yihudamman.
Yessuussi Tommenna Lame Hordofeeyye Ergeexxa
(Mar. 6:7-13; Luq. 9:1-6)
5Yessuusi tennee tommenna lame hordofeeyye hiyya'ni ajaje ergee qici: «Isra'eltote kadebaake manniba'a martinoqqe'e Semaariyaatotike qachchiba'anna e'yitinoqqe'e! 6Ookko martinaaxxa bakka gedhebiinsha ba'eeke Isira'eelike ardibaa marre! 7Maritineexxi, ‹Iimatixxi mootumma shiqe'en› hitinaa'n lalabbe!#Luq. 10:4-12. 8Elagopheka fayyise! Reyeeka ke'ise! Soomo'eka manna ca'a asse! Durriisa fulchee! Tola adhdhitinemmalcho tolanga uwwe! 9Worqe yookaani birretika siblijo yookaani sageettotika sibiljo ha'noke subba'ni e'yexinoqqee. 10Hujalloke ita hasissaaxxe kaddeemmaxxe me'itinaa wodda jijidhatika subba, yookaan seemma yookaan kophe yookaan siqqo iyyexxinoqqee.#1 Qor. 9:14; 1 Xim. 5:18.
11«Maritinaake qachcha'ni yookaani maritinaake olla'a'ni ha'no'o adhdha eeyaa manjo affee! Booncho ookkone waalidineexxi weleba'a me'itinna qico'ni ookkonni turre! 12Manjiinke minibaa e'yitinaa wodda nage'a aadhdhe! 13Miniinki hadi nage'a aadhoole, nage'i ha'noki insa'neni welti hedhaani; adhdhaa gophoole kinni nage'i ha'nook illeema ha'no'a higaan! 14Ayyinna ha'noo adhdha gophoole yookaan haasotinaaxxa laqa gophoole mine isikinaa'n yookaan isike qachchinaa'n fuldinaa wodda lekka ha'nooxxenaa'ni bukko ganga'nitine fulle.#Erga. Huj. 13:51. 15Dhugaate ha'no haaso'aannen, murittetixxa barra Mageni ookkone qachchi irra Soodomikenna Gomorake qachchi'a murte shollexxaan.#Mat. 11:24; Dada. 19:24-28.
Goottinxe Daga'a Ediseexxi Kaddaaxxa Rakko
(Mar. 13:3-13; Luq. 21:12-17)
16«Yessuusi ookkoni lebeexxi laqqe! Ha'no'o gedhebiinsha yayyetixxe oddo'ni erigaannen; tennexxee ha'no bofiinsha qarooyyetenna guugenjotishsha ba'lake kadde.#Luq. 10:3.
17«Manni ha'no'o murittete'e sa'isseexxi uwwaan. Ifixxe magenooffattammaxxe bakka'ni ha'no'o jadhanfaan; tennexxe insa'nenaa'ni heqqedhdhe!#Mar. 13:9-11; Luq. 12:11-12; 21:12-15. 18Anxe buuto'a galchammakiiriba'anna moyanjuwwinba'a adhdhendinaan; insa'ne edonna Ayihudake kadebaake manni edo dhugaa kuldinaake kaddinaan. 19Manni muritetibaa ha'noo iyyemaraa wodda maa haasonnanno yookaan hitta Yaanemmanno? Hiyyiyyoti wixixxi hitinoqqe; eettenne yanna'ni hitta hitinaaxxanna hitta haasottinaaxxi ha'no'a uwwendaan. 20Ha'no'n hedhe haaso'ak iimike ha'nooke annike Hafuura malee'e ha'notebaan.#Mar. 13:12; Luq. 21:16.
21«Manji dayyo ifinga reyotee'e sa'isse uwwaan ittanni anni belto ifika reyote'e sa'isse uwwaan. Oosetinna hado ifike'n kexxaan; insa'neenna shiltaan. 22Anxe buuto'a manjo duuchcha'n gibendinaan; yaane kinn muuxamii qico'ni jabaate uurraak isi anjirema.#Mat. 24:9, 13; Mar. 13:13; Luq. 21:17. 23Qachcha mitte'n rakko ha'no'n geessinso'ole wele qachchiba'a baaje! Dhugaate ha'no'n haaso'anneni Manjink Belti ille iima higeexxi dagaaqico'n Isira'eelike qachcha duuchchibaa geltinabaan.
24«Barataak ifike barsiisanjonaa'n sa'abaan; erganjikinna gootta ifikenaa'n sa'abaan.#Luq. 6:40; Yoh. 13:16; 15:20. 25Barataak iso'o barsisammakishsha, erganjikinna ifike goottishsha kadiyyo isoo gelte'een. Minininka anna Bi'eelzebuuli!#10:25 Be'eelzebuuli hiyya duursiinke umo hiyyaten hineexxi ye'noole isika mini hado konnenaanni sa'edheeke elobaake summinni ye'e'naan.#Mat. 9:34; 12:24; Mar. 3:2; Luq. 11:15.
Ayee'e Sodaatiyyo Hasissaaxxa
(Luq. 12:4-7)
26«Tennexxe'e meenni insa'nee sodaatte! Feeteexxi ta'a buqendeexxi yaane leellitabaaxxi sho'ondeexxi yaanenna ege'nedabaaxxi hexxebaan. 27Tennexxee ani dukkanate'n ha'no'n kulannoxxa ha'no ifake'n haaso'we; hashashoti laqqineexxa ha'no mini hana uurritine lallabbe. 28Maala shiyaaka lubbo kinni balleessa dande'abaaka manna meenni sodaatte; konnee irra maalakanna lubbo gahanemixxe giira'n balleessa dande'aaka iso'o sodaatte! 29Lame diillise mitte sanite'n gurgurenda'neexxebaata? Kaddo malee'e iimike ha'nooke annike fedhi belo diillise mitte midde butta ibbe gattabaan. 30Ha'nooke umik ordichchi midde laako'eemedheeken. 31Yoona mee sodaatte! Heddo diillisuwwanaa'n ha'note saxxinaan.
Kirisitoosixxa Dhuga Kuliyyo
(Luq. 12:8-9)
32«Manjinii edo ani'a dhugaa kulaake duuchchi'a aninna iimate'n hedheeke anke anni edo isi'a duga'a kulannon. 33Manjin edo anee'e waakkataaka manna duuchcha kinn, aninna iimate'n hedheeke anke anni edo isoo waakkatannon.#2 Xim. 2:12.
34«Ani buttate'n dagennelchi buttate'n nage'a idagona'ate ha'no'n labboqqe! Ani bagedo idagonate malee'e nage'a idagonaa'a dageebe'non. 35Ani dagennelchi
« ‹Belti annake'n
belto amate'n
Beltiinxa beltiinxe ama'n diinummati ke'issonnaaten.
36Manjoke ifing minig hadi naaphake kadaan.›#Mik. 7:6.
37«Ani irra anna ifika yookaan ama ifixxa eeyyaak manji duuchchi anke kada dande'aba; ani irra ifika belto yookaan ifixxa belto eeyyaak anke kada dande'aba'a. 38Ayyinna umo ifikixxa fanno dulkeexxi ane'e hordofabaak manji anke kadatee geyaba'a.#Mat. 16:24; Mar. 8:34; Luq. 9:23. 39Lubbo ifixxa gatlso'a halsaak duuchchi lubbo ifinxe balleessaan. Lubbo ifixxa anixxee buuto'a gophaak duuchchi kinni lubbo ifixxa alfaan.#Mat. 16:25; Mar. 8:35; Luq. 9:24; 17:33; Yoh. 12:25.
Hordofeeyyetika Hira
40«Ha'noo adhdhaak ane'e adhdhaan. Ane'e adhdhaakinna ane'e ergeeka adhdhaan.#Mar. 9:37; Luq. 9:48; 10:16; Yoh. 13:20. 41Wabeeka wabeekiinke summinni adhdhaake wabeekiinke hira alfaan; qullichcha isixxi qullumma adhdhaak qullichinka hira alfaan. 42Dhugaate ha'no'ni haaso'annen anxe hordofeye kade'eke giddii'n shiixxoke mitti'a qasha qiidaka wode'e uwwaak manji midde tola gatabaan.»
Currently Selected:
Matoosixxa Wengeele 10: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia