Leewwitotika Maxaafa 6
6
1Duuchchi Woddik Goottinna Muuse'e hiyyee qic, 2«Olla'a ifika sobati anee Duuchchi Woddika Gootta sobaake manjik seer konneechchi butta hedheeken: manji mitti maganeti iso'ni uggudhineechcho yookaan adhemmachi'a abidiseechi'a olla'a ifika soboole, olla'a ifika saamoole, la'o alfatee hiyye olla'a ifika dhiiboole, 3yookaan baxxeexxa yaane afe'e uudebe'no hiyye dhariki kakatoole, yookaan iita hexxeexxe cubbonaa'n mitte hujoole, 4konne qicinni cubbo huje balleessanjo kadoole, isi moorechcho yookaan saameechcho yookaan maganne uwwee'neechcho yookaan la'o alfatee olla'a ifika dhiibeexxi yookaan ookkonee ba'ee'naa afeechcho, 5Yookaan dhariki kakate adhdheexxa duuchcha onde anga itti lebe karratike anni'a balleesatika tolcha tolchaammaxxa barra hiissowaal. 6Isinna balleesatixxe cubbotike tolchi'a hori giddii'n fayyaka gedhechcho yookaan ege'nemeeke seera'ni murreeka gedhechchiinke hirika maallaqa iyyedage Duuchchi Woddike Gootti'a tolchake asse qeesichchoke'n uwwowwaal. 7Qeesichchikinna okkone manjixxa cubbo biratike tolchi'a Duuchchi Woddike Gootti edo tolcha tolchowaal; balleesemmake manjixxi cubbo gattowaal hiyyendaan» hiyye ajaje.#Lak. 5:5-8.
Hedheeshshan Ciincesinaaka Tolcha
8Duuchchi Woddik Gootti Muuse'e, 9«Aarooni'aanna isixxe labbaxe oose'a uutatoki seeri konnechchi butta hedheeken; tolchimalchoke'n ciincatiki tolchi hashsha duuchcha turaashsha assinee'na giiratinna ha'yita'n galdowwaal; 10Qeesichchikinna layinoti gonbe giissineeka gonfanna iimii'ni butta geltaaxxa layinotixxa seemma oddo'weexxi ciincatike tolchika bululo bukki asse'e tolchimalchiinke qarqara'ni dunowwaal. 11Ookkoo'n seemma woldixxa fulchedhe wele oddo'weexxi bululo ookkonee olla'ii gadhdho batto'eebaake booncho'ni dunowwaal. 12Tolchimalchoke'ni hexxeexxi giira xoxxebaang hashsha barra duuchchi wodda ha'yitowwaal; qeesechchikina gorsa gorsa haqqe itti lebowwaal; giirate'nina ciincatika tolcha giisse uggati mittoomiinke tolchixxa ha'yo ciincesowwaal. 13Giiratinna xoxxebaang tolchimalchoke'n duuchchi wodda ha'yitowwaal.
Midhatixxa Uwwa
14« ‹Midhatixxe uwwa'a muremeek seeruwwi konnechchinn butti'a hedheeken; Aaroonixxe labbaxxe oose giddii'n mitti midhatixxa uwwa tolchimalchi edo Duuchchi Woddike Gootti'a midhatika tolcha shiqishowwaal; 15Ookkoneechchi uduma qeesichchi shaqqinshe danneexxa bulle guunsse, zayitenna ixaanaa aadheexxi Duuchchi Woddike Gootti'a shiqeeke kadeexa qaabachisatike tolchimalchoke'n ciincesowwaal; iitta hexxeexxe ciincaki fooli Mageno gammachchiisaan. 16Ciincatenaa'n gatteexa uwwa Aarooninna isixxi labbaxxi oose ittaan; lebele itti lenbebaangi ra'issine woyyoonsine boonno'n Mageni ulfinniki leellammake duunkaaniinxe huddume'ni indaan. 17Lebele itti lenbe ra'issinabaan; qeesuwwatike qoobbo kadaashsha uwweenneken; cubbo biratike tolchishshanna balleesatik tolchisha Magenoke shiqqeexxe uwwa kaddemmaxxee'e hara woyyiteten. 18Dagaake baro duuchcha'n Aaroonike miniki labbaki duuchchi Magenokee'e shiqqeexxe uwwanaa'n isi'a uwwemeeka qoobbo ita dande'aani; midhatixxi uwwa Magenokee'e uwwendeexxe kaddemmaxxee weli ise tuqaaki duuchchi woyyoomaan› » hiyye.
Qeessetik Sooressi Hariiremaa Wodda Uwwendaaxxa Midhatixxa Uwwa
19Duuchchi Woddik Gootti Muuse'e, 20«Aarooninna isixxe labbaxxe oosenaa'n qeesetika sooreessa kadaak hariiremaa baro lame kiilo shaqqinshe danneexxa bulle barra barra'n shiqqammaxxe midhatixxe uwwaxxa qixxe Magenoke tolchake kaddaashsha iyyedagowwaal; bulle ettenee gamisa gorssa, gamisa galgala shiqishowwaal; 21Zayiteti welti mankeexi midhatike tolchishsha she'late'n ra'issineechchin udumi'a Duuchchi Woddike Gootta gammachchiisaaxxe midhatixxe uwwa kedde shiqqowwaal; 22Qeesichcho Aaroonixxe labbaaxxe oose giddii'n qeesetike sooreessa kade'e hariiremaak duuchchi konne seera muuxowaal; Duuchchi Woddike Gootti'a shiqeeke tolcha kademmaxxe'e mittikinna gatebaangi ciinceesemowwaali. 23Qeesichchi shiqishaaxxa midhatixxa uwwa mittetanna indebaang duuchchiinxa ciincesendowaal» hiyye.
Cubbotixxe Gattowaali'a Shiqaaka Tolcha
24Duuchchi Woddik Gootti Muuse'e, 25«Aarooni'ninna isixxe oose'n, ‹cubbotike tolchiki seeri, cubbo biratee tolchino'a shiqinshaaka hore ciinceesatike tolchi'a hore dullammaba tolcha tolchinamma middi darre'n gorraanowwaal. Isinna Duuchchi Woddike Gootti'a shiqeeke hori giddii'n mitteke kademmaxxee hara woyyichchaken. 26Horekanna tolchaaki qeesichchi Mageni ulfinniki leellammake duunkaaniinxe huddume'ni woyyichcha boonchcho'n tolchchake shiqemmake horika maala itowwaal; 27Manjokenna kadi welichchi Magenokee shiqeeka ookkonee maala tuqoole woyyomaan; okkone horixxi munde heene seemmanna tuqqoole, seemma eettene woyyite bakka'n anshinowwaal; 28Hooneenna maali gafemeeka faariinka miya butuchchinowwaal; Maali gafemeeki sageetotike miya kadoole soonfe ringeexxi wodi'iki anshinowwaal. 29Qeesichchiinxi labbaxxi oose konne tolchiinka maala ittowwaal; isinna Duuchchi Woddike Gootti'a shiqeeke tolcha kademmaxxee hara woyyichchaken. 30Cubbo biratike seeri'a munde ookkone horixxi duunkaani giddi'a woyyitte bakka'n e'yitoole maala ookkone ita hassissabaan; duuchchinga giirate'n ciinceesinowwaal› hite kuli» hiyye.
Currently Selected:
Leewwitotika Maxaafa 6: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
