Leewwitotika Maxaafa 7
7
Balleessa Biratika Tolcha
1« ‹Seera duuchchanaa'ni hara woyyichcha kadeeki giddii'n mitte kade balleessa biraree shiqaak konneechchin butti'a hedheeken: 2Tolchakee shiqeeka hore ciinceesatike tolchi'a shiqinshammaka hore gorraanammaba gorranowaal; mundetanna tolchimalchiinke shooliinge kasa'n fixowwaal. 3Ha'yo duuchcha: duba, godobi giddira buqammaka mooro'o, 4Lame kalattuwwa, tenne kalatuwwa hananna ciinachuwwiinke qarqara'n hedheeke mooro'o, iittan tidhoti hana hedheeka saapha kalatuwwati welti fulchowwaal. 5Tolchimalchoke'n hexxeexa ha'yo duuchcha qeesichchi Magenokee uwwendeexxe uwwa asseexxi giirate'ni ciinceesowwaal; isenna balleessatee shiqaake tolchan. 6Qeesetixxi labbaxi oose tolchiinka maala ittowwaal; tolchi ikki Duuchchi Woddike Gootti'a hara woyyoome shiqeeke tolchanaa'n mitteke kademmaxxe'e hara woyyichchaken; tennexxee woyyicha booncho'n itowwaal.
7« ‹Cubbo biratikinna balleessatike tolchi'a hujaaki seeri mitteken; tolchake shiqemmake horika maalanna cubbo biratika tolcha shiqishemmake qeesichchi'a uunaan; 8Ciincatike tolchi'a shiqemmake horika goga tolcha tolchemmake qeesichchi'a uunaan; 9Giirate'n ra'issineexxe midhaxxi uwwa duuchcha, yookaan odolchote'n yookaan she'late'n ra'issineeka tolcha tolchemmake qeesichchiken; 10Yaane kinni duuchchiinxi raxxebaaxxi midhatixi uwwa zayiteti makendeexxe kadi makendebaaxxi Aaroonike minixxe qeese kaddemmaxxi duuchcha qixxe qoodendowwaal.
Mittomiinka Tolcha
11« ‹Magenoke shiqaake mittomiinke tolchiki seeri, 12Manji mitti tenne uwwa Magenokee galatiinke tolcha asse shiqisho'a hasoole, tolchiinke horinni welti gamami e'yebaaxa zayiteti manke ra'issineexxa kebbo: zayite manke furdinse ra'isineexxa yookaan hephphinse ra'isine, zayite itti burreexxa yookaan shaqqinshe danneexxa bulle zayiteti manke ra'issineexxa kebbo shiqishowwaal. 13Galatakee'e shiqishammake mittomiinke tolcha'ni lebe uwwate kaddaaxxa lebele manke ra'issineexxa kebbo shiqishowwaal. 14Bifa bifanni shiqqeexxe kebbonaa'ni mitte mitte aadhe'e, Magenoke foyendeexxe uwwa asse shiqishaan; itti uwwanna horiinxa munde aadhe tolchinke boonchike kasa'ni mittomiinke tolcha asse fixeeke qeesichchi'a qoobboke kadduuni; 15Mittominke galati'a shiqeeke tolchemeeke horiki maali ettene tolchememmaxxe barra'n inde birrowaal; gate galaachchi hedhoqqen.
16« ‹Manji mitti shiqisha'neeki werregee'na muuxendeexe yaane'a yookaan eeyyantetixxe uwwa kaddoole duuchchingeechcho eettene shiqqeenxe barra'n indowwaal; gateekinna hedhoole langa baro indowwaal. 17Ooko'n tolchink maali sakkaxxe barra qico'ni tureeka giirate'ni gunbowaal; 18Sakka baro geyeeka mittoominke tolchika maala ayyinna itoole, iteeke manjika tolcha Mageni adhdhabaan. Tolchikinna adhdhemeeshsha laakko'emabaan; matanga batto'eeshsha laakko'emaan; okkone maalanna iteeki manji cubbote isi'a kaddaanni. 19Tolchiinka maala battitte yaane tuqqeexxe kaddoole giirati gunbo malee itiyyo hasissabaan.
« ‹Aada tolchiinxe'n battitte yaane tuqebaaki manji batto'ebaaka maala itowwaal; 20Tolchiinxe aada'n battumma bidhdhebaa manji konne Duuchchi Woddike Gootti'a shiqaake mittoomiinke tolchika maala itoole Duuchchi Woddike Goottike ardi giddii'n fulowwaal; 21Ayyinna batto'oole Duuchchi Woddike Gootti'a shiqeeka mittoomiinke tolchika maala itoole iikki manji ifike ardi giddii'n fulowwaal› » hiyye.
Mundenna Mooro'o Indabaaxxa
22Duuchchi Woddiki Gootti Muuse'e, 23«Isira'eelitote hitatoqic: ‹Laliinka, gedhebiinkanna re'etika mooro'o itaaki hedhoqqen; 24Reyeeke yookaani biniinchi shiyeeke horika mooro'o wele huje'a hoso malee ayyinna itoqqen. 25Ciincatike tolcha kade Duuchchi Woddike Gootti'a shiqeeke horika mooro'o itaaki manji ifike ardi giddii'n fulowwaal; 26Iittan kinni habanna hedhaaki Isira'eeliki manji booncho duuchcha'ni ci'atixxe kado horiinxa munde itoqqen; 27Ayyinna munde itaaki manji duuchchi ifike ardi giddii'n fulowaal hite Isira'eelike arda'ni kuli› » hiyye.
Qeesichchokee'e Uwwemaaka Qoobo
28Duuchchi Woddiki Gootti Muuse'e: 29«Isira'eelike ardi'a ayyinna mittoomiinka tolcha shiqishoole isonaa'ninni hanii'ni aadhe Duuchchi Woddike Gootti'a gargariti hexxeexxe uwwa asse iyyedagowwaal; 30Iikkin manji ciincatike tolcha asse Duuchchi Woddike Gootti'a shiqishowwaal; hore okkonka mooro'o, corme mitteba lele'misatike tolcha asse Duuchchi Woddike Gootti'a shiqishowwaal. 31Qeesichchikinna ha'yo tolchimalchoke'n ciinceesowwaal; corme kinni Aarooni'aanna labbaxxe isixxe oose'a uwwendeexxen; 32Mittoomiinke tolchi'a tolchememmake horixxi middixxa luka qeesichchoke'e uwwe. 33Mittoomiinke tolchixxa mundenna mooro'o tolchemmake Aaroonixxe labbaxxe oose giddii'n middixxa luka adhowaal. 34Ani mittoomike Isira'eeliki ardi tolchanaa'n coreme lele'misatixxi luka iimi'a ke'isee aadheexxi duuchchi wodda qoobo insa'neke kadaashsha qeesichcho Aarooni'aanna isixxe labbaxxe oose'a uwweenen. Kunni duuchchi woddike galdumiinke seeran. 35Kunninna Mageni Aarooniinna oose isixxa labbaxxa oose qeese asseexxi hariireexxa barra Magenokee shiqaake ciincatike tolchanaa'ni qoobbo insa'neeke kade gargari fule'eken; 36Eettene Hariiremeexxe barra'ni Duuchchi Woddik Gootti cormetanna middixa luka Isira'eeliki ardi qeesuwwatee uwwaashsha ajaje'een; tinnina okkonchinni kayyi'a qeesuwwatike duchchi woddike qoobbo kadaashsha asse'een hite Isira'eelike arda'ni kuli» hiyye.
37Yoona ciincatika tolcha, midhatixxa uwwa, cubbo biratika tolcha, balleessa biratike tolcha, qeesuwwa hariirtetika tolchanna mittoomiinka tolcha muunxaake seeriki ajajuwwi konneten. 38Ookkonna Siinaxxe kooba'ni qiilla gammooje'ni Duuchchi Woddiki Gootti Muuse'ni konne seera uwweexxa barra Isira'eeliki ardi tolcha shiqishaashsha ajaje.
Currently Selected:
Leewwitotika Maxaafa 7: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
