Leewwitotika Maxaafa 5
5
Cubbotika Tolcha
1« ‹Manji mitti barra banteessa uudeexxa yookaan laqeexxa yaane murte uunaaba dhugaa fulche kula gophoole cubbote isi'a kaddaan.
2« ‹Huuni manjinna afebaangi batto'eechcho fakkennakee'e biniinchiinka, horiinka yookaan godobiki me'achchik dadaxxa rensha afebaangi tuqoole, konne asseeka dedha ege'neege hirba'n balleessate isi'a kaddaan.
3« ‹Manji mitti wele manjinka batto'eeka shamina ege'nebaangi tuqoole, tuqeexxa ege'neenge hirba'n balleesate isi'a kaddaan.
4« ‹Manji mitti heene yaanenna eloxxanna kadde yo'oxxa assate'e xonxommachcho belo kakatoole isi ege'na belo assoole, ege'neenge hirba'n isi balleesanjo kadaan.
5« ‹Manji mitti tenne yaanuwwanaa'n mitte balleesoole aadde aagowwal. 6Hujeexxe cubbo'aana Duuchchi Woddike Gootti'a tolcha iyyedagowwaal; iyyedagaachchina horekenaa'n meyyaxxa gedhechcho yookaan meyyaxxe recco kaddowaal; qeesichchikinna cubbo ookkone manjixxa biraaka tolcha tolchaan.
7« ‹Isi gedhobo yookaan re'e shiqisha dande'a gophoole lame guuggenna yookaan lame shiixxaramma guuggenna, mitte cubbo biratike tolchi'a, langaxxa kinni ciincesatike tolcha kaddaashsha balleesa ifixxee tolcha Duuchchi Woddike Gootti'a iyyedagowwaal. 8Isinna iyyedageexxi qeesichchoke'n uwwowwaal; qeesichchikinna mitte gorra'ebaang gooba micciireexxi cubbo biratike tolcha asse tolchowaal; 9Mundetenaa'n shiixxoxxa aadheex tolcha tolchimalchike qarqara'ni fixowwaal; gatteexxa munde kinni tolchimalchi hunda dunowwaal; tinninna cubbo biratike tolchan. 10Langaxxa guugenjo yookaan shiixxoxxa guugenjo aadheexxi ciincatika tolcha tolchinammake seerishshan ciincesowaal; konne qicin qeesichchi cubbo biratika tolcha tolchaan; balleeseeke manjixxi cubbonna gattowaal hiyyendaan.
11« ‹Isi lame guuggenna yookaan lame shiixarama guuggenna shiqisha dande'a gophoole, lame kiilo shaqqinshe danneexxa bulle cubbo isixxa biratike tolcha kaddaashsha shiqishowwaal; kunnina cubbo biratike tolcha kadeemaxxee'e ejeersiinxa zayite yookaan ixaana makoqqe'e. 12Bulle eteneenna qeesichchoke'n uwwowwaal; qeesichchi eettene bullenaa'n oobeesse aadheexxi duuchchiinxa Duuchchi Woddike Gootti'a shiqqeexxe kaddeexxa qaabachisaate'e shiqaake tolchi hana tolchimalchoke'n ciincesowwaal; kunninna cubbo biraake tolcha kadaan. 13Qeesichchikinna konne qicin okkone manjixxe cubboxxe gattowaali'a tolcha shiqishaan; heeni manjixxi cubbonna gattowaal hiyyendaan; gatteexxi bulle kinni midhatixxi uwwa shiqqammashsha qeesichchiinxe kadduun.› »
Balleessate'e Shiqaaka Tolcha
14Duuchchi Woddiki Goottinna Muuse, 15«Manji mitti Magenokee woyyoonsineechcho balleesse cubbo hujoole, Duuchchi Woddike Gootti'a muratike tolcha kadaaka hori giddii'n fayyaka labbaka gedhechcho iyyedagowwaal; yookaan ookkone gedhechchika hirikinna galmiinxe kiiloshshanni kaduun. Kunninna muratike tolchan. 16Woyyoonsineecho balleesse cubbo hujemmaxxe cubbo'a uwwiyo hasissamaxxe uwwa'ni onde anga'n mitte lebe qeesichchoke'ninna uwwowaal; qeesichchikinna korbeessa okkonee manjichchiinxe cubbo biratike tolcha asse tolchowwaal; balleessa hujeeke manjixxi cubbonna gattowwaal hiyyendaan.
17«Manji mitti ege'nebaang Duuchchi Woddik Goottike seerinaa'n mitte xe'iyishoole cubbote isi'a kaddaan. 18Horekenaa'n fayyaka gedhechcho balleessa isixxee muratike tolcha asse iyyedagowwaal; hirikinna ege'neme seerishshanni murrowwaal; qeesichchikinna hore okkonee'e manjichcho okkonexxe balleessaa'a tolchcha tolchchowwaal; balleese manjixxi cubbonna gattowaal hiyyendaan. 19Tinninna ikki manji Duuchchi Woddike Gootta'n asseexxe balleesa'a cubbitike tolchan» hiyye.
Currently Selected:
Leewwitotika Maxaafa 5: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
