Yohaannisixxa Wengeele 9
9
Yessuusi Balla'ake Kedeexxi Iemeeka Manjichcho Fayyise
1Yessuusi ora sa'aa'neege'ni balla'ake kadeexxi ilemeeka manjichcho uude. 2Hordofeeye isixxinna Yessuusii'i, «Barachchiisalloo kunni manjichchi balla'ake kadeexxi ilemaashsha cubbo hujeeki ayyete? Isi ifi'a hujeexxe cubbo'ate moo yookaan isike hadixxe cubboxxeete?» hite qorte. 3Yessuusinna hiyye hiissee qici: «Isi yookaani hadi isiki cubbo hujebaan; tinni kaddeechchi Mageniinxi huje isixxe hedho'ni leellitaashshaten. 4Barra hexxee'naanni anee eregemmakixxa huje ani huja hasissaan; fedheek manji hujatee dande'abaaxxe hashsha daggaan. 5Ani butta duuchcha'ni hedhennexxenni Ani butta duuchchike ifan.» #Mat. 5:14; Yoh. 8:12. 6Isinna tennee hiyyeechchi uduma buttinake'n hancufa tufe'e buttinakanna dhoqqete asse'e manjichchiinxe ille'n iseexxi, 7«Isoonna martettexxi Selehoomike xammanqammake baleessa'ni anshedhi!» hiyye. «Selihoomi» hiyya «Ergemeeke» hiyyaten. Tennexxe manjichchikinna mare anshedhe uuda'ni illee iima hige dage.
8Olla'i isikinna edi wodda kadhata'naa uudaammak manni, «Kunni manjichchi ofo'leexxi kadhataammakemmabaa?» hiyye. 9Mitti mitti mannina «Dhugaanda isonden» hiyye. «Weli mannina isoo fakkata'nee malee isotebaan» hiyye. Isi kinn, «Anendeqqa» hiyye. 10Mannikinna isoo, «Yoona ille atixxi hitta kadde banendetaa?» hine qorre. 11Isinna «Yessuusite hinaak manjichchi buttina dhoqqete asse ille anxe'ni isseexxi; ‹Selihoomi mare'e anshedhonnaa ane'ni kule!› Aninna mare anshedhennexxi uuda dande'enne» hiyye hiisse. 12Insa'nenna, «Iikki manjichchi habata hedhee?» hine. Isinna «Ani haba hedheenxa ege'nebo'non» hiyye.
Feriisito Iikki Manjichchi Hitta Kade Fayyeexxa Qodhdhate'ni Ke'neexxa
13Mannikinna ille ba'eemmaka manjichcho Feerisitotibaa iyyemare. 14Yessuusi dhoqqe isseexxi manjichchiinxa ille baneeki Edi Sanbatixxe barramman. 15Tennexxe Feerisitotinna hitta uudate dande'eexxa higgeenna isoo qorte. Manjichchikinna insa'nen, «Isi dhoqqe ille anxe'n buureen; aninna anshedhennexxi kunna'a ta'a uudannen» hiyye. 16Feerisitoti giddii'n mitti mitti manni, «Kunni manjichchi Edi Sanbata ulfeessa gopheemmaxxee isi Mageniba'nitebaan» hiyye. Weli manni kinni, «Cubbaleessake kadeek manjichchi iitta hedheeka mambe'uwwiinka beessisuwwa hitta assa dande'aa?» hiyye. Tennenaa'ni kexxeexxa insa'nexxe oddo'n garga higa kadde. 17Tennexxee insa'nenna ille ba'emmake manjichchibaa higgeenni marreexxi, «Ati konne ille atixxa baneeke manjichchixxee yoona ati maa hitaatte?» hine.
Manjichchikinna hiisseexxi, «Isi wabeekaken» hiyye.
18Ayihudikinna kunni manjichchi balla'ake kadeexxanna ta'a ille isixxi hitta banendeexxa isoo ilemmaka hado ye'eexxi laqaa qico'n amaneemmabaan. 19Insa'nenna isoo ilemmaka hado ye'neexxi «Balla'ake kade ilemeen hitina'neek ha'nook belti konnetee? Ta'ata hitta kadeeta uuda dande'e?» hineexi qorre. 20Hadi isikinna hiyyeexxi hiissee haaso'ee qici, «Belto no'oke kadeexanna balla'ake kadeexxi ilemeexxa no'o egenneennen. 21Ta'a kinn hitta uuda dande'eexxanna ille isixxa ayyi isi'aa baneexxa no'o egennebe'non. Isi umo ifikenni lumoke manjo kadeemmaxxeenna haaso'aa dande'aammaxxe'e isoonni qorre.» 22Hadi isiki iitta hiyyeechchi, Yessuusii'i, «Isi Kiristoositeni» hiyyaak manji hedheexxe kaddoole Muuseka seera barrachchotike minenaa'n Ayihudi isoo fulchatee weli aagemmaaxxee insa'nee sodaateettemman. 23Tennexxee hadi isik «Isi lumoke manjon isoonn qorre!»
24Insa'nenna ille ba'eemmaka manjichcho higgeenni ye'neexxi isoo, «Koo manjichcho, ati Mageno ulfeessi kunn manjichchi cubbaleessake kadeexxa no'o egeneennen» hine. 25Isinna, «Isi cubbaleessake kadeexxa ani ege'nebe'no. Yaane kinn ani balla'ake kadeennaxxanna ta'a kinn uudaannexxa tenne mitte yaane ege'neennen» hiyye. 26Insa'nenna isoo, «Isi ati'a maa asse? Ille atixxa hitta asse bane?» hineexxi qorre. 27Isinna insa'ne'n «Ediseenni ani ha'no'a kuleennan; ha'no kinn ani hiyyennexxa laqqinebaan; mayeeta higgeenna laqqino'a hassine? Ha'noonna hordofeeyye isixxe kaddino'a hassina'nee?» hiyye. 28Ookkoneechchi uduma insa'nee isoo cee'mine yowwina'ni hinee qici, «Konne manjichchiki hordofalli ateten; no'o Muusexxe hordofeeyyen! 29No'o Mageni Muuse'n haaso'eexxa egeneennen; kunni manjichchi kinn habaa'n dageexxa midde no'o egenebe'non» hine. 30Manjichikinna insa'ne'n hiisseexxi hiyyee haaso'ee qici, «Ha'noo isi habaa'ni dageexxa ege'na gopha ha'nooxxi mambe'aken; kaddo malee ille anxa baneek isoten. 31Mageni laqaak isoo sodaatakanna fedhii isixxa assaake maalee cubbaleeyyetixxa laqabaaxxa no'o ege'nenneenn. 32Balla'ake kadeexxi ilemeeke manjixxa ille baneeki hedheen hiyyenda'naa butta duuchcha dadendeexxe barranaa'ni ta'i qico'n ayyinna laqe ege'nebaan. 33Kunni manjichchi, Magenibaa'nite kada gopheele sila tennee assa dande'ammabaan.»
34Insa'nenna, «Koo cubbo ate'n gundee'na ilendeetteki ati no'oo hitta barachchiisatto?» hina'n Muuseke seerike barachchotike minenaa'n isoo shorrine.
Qalbetixxa Balla'umma
35Yessuusinna manjichcho shorrineexxa laqe; Isinna manjichchik afemeechchi uduma isoo «Manjiinke Belto'ni amandaatte?» hiyye. 36Manjichchikinna, «Anke goottaa Ani iso'ni amannonaa isi ayyete?» hiyye qore. 37Yessuusinna manjichchoke'n, «Ati isoo uuddeetten; ta'anna atinni welti haasosa'neek isoten» hiyye. 38Manjichchikinna, «Goottaa amanaannen» hiyyeexxi isi'a sagade. 39Yessuusinna, «Ballu'uwwi uudaashsha uudammakiirinna balla'ake kadaashsha murtetee kaba butta dageennen» hiyye.
40Isinni welti hexxeemmaxxe Feerisito giddii'ni mitti mitti konne haaso'a lanqeexxi isoo, «Tinni maa hiyyate? No'onnata balla'uwwaken hiyyatee?» hine.
41Yessuusinna insa'ne'n, «Ha'no balla'ake kaddine'eele silaan ha'noo'ni cubbote kaddammabaan; ta'a kinn uundaanneen hitinaammaxxee cubbaleeyyende kaddinee gattinaan» hiyye.
Currently Selected:
Yohaannisixxa Wengeele 9: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
