Yohaannisixxa Wengeele 10
10
Allalisanjokanna Isika Gedhebo
1«Ani dhugaate ha'no'n hiyyannen, gedhebiinxe goodhexxe hulanaa'nite kaddebaak welebaa'ni e'yaaki isi modhalchokenna mulqedhaaken. 2Eettene hulanaa'n e'yaaki kinn isi gedhebiinke allalisanjon. 3Iikki hula heqqammak eettenee hula isi'a banaan; gedhebikinna hafuura isika laqaan. Isinna ifika gedhebo summi summik ye'a'ni, akeeka'n gadhi'a fulchaan. 4Ifike kadeeka gedhebonna fulcheechchi uduma gedhebii edo me'aan; gedhebikinna hafuura isika ege'nemmaxxee duuka isixxa hordofaan. 5Yaane kinn iikki gedhebi weliinka hafuura ege'na gonpheemmaxxee isonaa'ni bajaa malee haranga isixxa duuka me'abaan.» 6Yessuusinna konne mammaassa insa'ne'n haaso'e; insa'ne kinni isi maa insa'ne'n haaso'eexxa qaalbeefantebaan.
Yessuusi Eloke Allalisanjon
7Tennexxee Yessuusi higgeen insa'ne'n hiyyee qici, «Ani dhugaate ha'no'a hiyyaannen; gedhebiinxi hula anten. 8Ani dageebe'no edi darre dageeki duuchchi moodhalshetenna mulqedhaakeeramman; yaane kinn gedhebi insa'neexxa laqebaan. 9Iitti hulanna anten; ani darree'ni e'yaaki duuchchi isi anjiremaan; isi eyya'ninna fulaan; bobba'aabanna alfaan. 10Moodhalchi mooro'a, shiyo'aanna balleessa calli'a dagaan; Ani kinni dagenneechchi hedho alfino'aanna bira saxxeexxi hedho he'naashshaten.»
11«Eloki allalisanji anten. Elok allalisanji hedho ifixxa gedheboke'e sa'isse uwwaan; 12Gedhebi isike kadebaak rundakee allalaaki dhugaatike allalisanjo kada gophpheemmaxxee kinn yayye daggaa wodda gedhebo waale baajaan; yayyetinna gedhebo bubbuttee xeertaan. 13Iikki allalisani waale baajaachchi rundakee allalaammaxxeenna gedhebokee marara gophaammaxxeeten.
14«Elok allalissanji Aneten; Aninna gedhebo anka ege'neennen; gedhebi Ankinna anee ege'ne'een.#Mat. 11:27; Luq. 22:33; Lew. 24:16. 15Tinninna Aabi Anee ege'nemmashshanni; Aninna Aabi'i ege'neennashanden. Aninna hedho anxa anke gedhebia sa'isse uwwannon. 16Ani tenne goodheke kadebaaka wele gedhebo afeennen. Ani insa'nee iyyedaga hasissaan. Insa'ne hafuura anka lanqaan; mittebanna bobbanaan: allalisanji insa'nekinna mittenge kadaan. 17Lubbo anxa sa'isse uwweennexxi hiisse adhdhannaxxee Aabi anee eeyya'neen. 18Hedho anxa feedhi anxenni sa'isse uwwaane malee; ayyinna isee'e Anenaa'ni adhdhabaan; hedho anxa sa'isse uwwateenna kadi adhdhatee Ani baallooma afeennen; Aninna konne ajaja adhdheenneki anke Anninaa'niten.»
19Konne hiyyichchinaa'ni kexxeexxa Ayihudiinxe oddo'n higgeenni gargar higa kadde. 20Insa'nenaa'n heddi manni, «Isi fuggichcha hafuura afe'eeni maraataken. Mayeete ha'noo isixxa laqqina'neek?» hine. 21Weli kinn, «Kunni, fuggichchi hafuur abideeke manjike haaso'abaan; fuggichchi hafuur ille ba'eeke manjichchixxa ille bana dande'aa?» hine.
Ayihuudi Yessuusii'i Morome
22Ookkonneechchi uduma Iyyeerusaalemi giddo Woyyichcha Galma qammalchati ayyaani kade; iitti yannanna haarsottemman. 23Yessuusinna Woyyichchi Galmixxe baxxeba Solomooni mammaremammaxxe ba'laxxe soronaa'ni sa'aa'nemman. 24Ookkone wodda Ayihudi isoo oddote'ni qoqqobeexxi, «Haani qico'n ati no'oo memmi assita'ni hexxatto? Ati Kiristoosite kaddoottole amoo farri assite no'aa kuli» hiyye.
25Yessuusinna insa'ne'n hiyyeexxi hiissee qici, «Aniqqa ha'noo'ni kuleennan; ha'noo kinn amandinabaan. Ani anke Annike summinni assaannek beessisuwwi kunni anxee dhugaa kula'neen. 26Ha'noo kinn anke gedhebo kada gophphineemmaxxee amandinabaan. 27Anki gedhebi hafuura anka laqaan; Aninna insa'nee ege'nennen. Insa'nenna anee hordonfaan. 28Ani duuchchi woddixxa hedho insa'ne'aa uwwannon; haranga ba'nabaan; anga anxenaa'n insa'nee dandeexxi bute adhdhaaki ayyinna hedhebaan. 29Insa'nee ani'aa uwweek Ank Anni duuchchingenaa'n sa'aken; anke Annixxe anganaa'ni ayyinna insa'nee buteexxi adhdha dande'abaan. 30Aninna Aabi mitteken.»
31Higgeenni Ayihudi Yessuusii cancanqo'a kino adhdhe; 32Yessuusinna insa'ne'n, «Aabibaa'ni uwwemeeka heddo lumolla beessissuwwa ha'no'n leellisheennen; eegerta'a konneeranaa'ni hoonexxee, anee kinjik cancaqqino'aate?» hiyye.
33Ayihudikinna iso'n, «No'o atee cancanqaannechchi ati manjonge kaddee, ifi Magenoke assitee, yowwichchiinka haaso'a haasottettexxeete malee wele yaanexxeetebaan» hiyye.
34Yessuusinna insa'ne'n hiyye hiissee qici, «Ha'nooke seera'ni, ‹Ha'noo magenuwwaken hiyyennen› hiyyende borreessedebaa?#Far. 82:6. 35Yoonna Woyyichcha maxaafa jijjiira dandeesisabaan; Mageniink hiyyichchi insa'ne'aa dageekara Woyyichchi maxaafi ‹Magenuwwaken› hiyye ye'eexxenni; 36eegerta'a, ‹Ani Mageniink Belton› hiyyeennexxee, Aabi ifi'a foye woyyonseekanna kaba butta duuchi'aa ergeeka ati yowwitaaten hitineexxi mayee ane'ni yaane hassinaa? 37Anni anki assa'neexxa assa gophonnole ane'ni amandinoqqee! 38Yaane kinn Ani tennee assaannexee kaddoole anee amana gophphinoolenna midde Aabi ane'ni hedheexxa Aninna Aabi'ni hedhennexxa ha'noo egendinaashshanna qalbeeffattinaashsha Ani hujaannexxe huje'n amanne.» 39Higgeenni insa'ne Yessuusii abindo'aa wo'laanne; yaane kinni isi anga insa'nexxenaa'n fulchedheexxi me'e.
40Ookkonneechchi uduma Yessuusi edi wodda Yohaannisi xammaqammake Yordanoosike galaani wido higeexxi ookkoo ture.#Yoh. 1:28. 41Heddi manni isibaa dage. Insa'nenna, «Yohaannisi mittekanna mambe'iinka beessisa assebaan; yaane kinn Yohaannisi konne manjichchixxee haaso'eexxi duuchcha dhugaatemman» hine. 42Ookkone booncho'ninna heddi manni Yessuusi'ni amane.
Currently Selected:
Yohaannisixxa Wengeele 10: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
