Yohaannisixxa Wengeele 8
8
Yabaabulumati Abidendeexxa Manjichcho
1Yessuusi kinni Debire Zayiti'a me'e. 2Langa baro gorsa isi Woyyichchi Galmixxe baxxe'ni higgeenni leelle; ardikinna isike qarqara'ni bukki hiyye; isinna ofo'le insa'nee barachchiisate'ni ke'e. 3Muuseke seerik barachchiisalluwwinna Feerisito yabaabulda'na'a abindeexxa manjichcho isibaa iyyedange; ardiinxe oddo'ninna isee uurinse. 4Insa'nenna Yessuusi'n hinee qici, «Barachchiisalloo tinni manjichcho yabaabulda'naa abindeennen. 5Muusenna iitta iseshsha hexxeexxi melaalle kinjik cancaqendaashsha ookkone seera'ni ajaje'een. Atita maa hitaattee?»#Lew. 20:10; Lew. 22:22-24. 6Insa'nenna konne qortuma iso'n shiqinseechchi isoo ku'linaaxxa yaane alfatee isoo hega uundo'a hanseeten. Yaane kinn Yessuusi heeshshi hiyyeexxi qubichchik buttinake'ni borreesa safe. 7Insa'nenna lenbe lenbe iso'o qorre wodda, isinna toggi hiyyeexxi insa'ne'n, «Ha'no giddii'ni cubbo afebaak isi ediseexxi ise'ni kinjo darbowwaal!» hiyye. 8Higgeenni butti'a heeshshi hiyyeexxi buttinake'ni borreesse.
9Insa'ne tennee lanqeeshshanni, geedhetenaa'ni sanfeexxi mitti mittiki fulle; tennexxee Yessuusi oddote'n uuriteemmaxxe eettene manjichcho callinni qoffitti gate. 10Yessuusinna qokki hiyyeexxi isee, «Tee manjichcho atee ku'lammak iikki manni haba hedhe? Ate'ni mureek mitti manjinna hedhebaata?» hiyye. 11Isenna, «Goottaa mittikinna hedhebaan» hite. Yessuusinna isee «Aninna ate'ni murabe'non; kexxe me'i; konneechchi edi'a kinn cubbo hujjoxxe!» hiyye.
Yessuusixxi Dhugaa Kula Dhugaatixxe Kaddeexxa
12Yessuusi higgeenn mannake'n «Ani butta duuchchike ifani; anee hordofaakinna hedhotike ifa alfaa malee hara dukkanate'ni maremabaan» hiyye.#Mat. 5:14; Yoh. 9:5. 13Feerisitotinna Yessuusii'i, «Ati umo atikixxee dhugaa kuldaaten; dhugaa kula atixxi kinni adhdhendaaxxebaan» hite.#Yoh. 5:31. 14Yessuusinna hiissexxi insa'ne'n hiyyee qici, «Ani umo ankixxee dhugaa kulonolenna habaa'ni dagennexxanna ta'a haba'a me'aannexxa ege'neennaxxee dhugaa kula anxi dhugaatixxen; yaane kinn ha'no ani habaa'n dagennexxa yookaan haba'a me'aannexxa egendineechchi hedhebaan. 15Ha'noo manjiinke hedumishsha murtinaan; Ani ayye'ninna murabe'no. 16Ani muronnolenna anee ergeeke Aabinni weltite malee qofitti hedha gophennaxxee murte anxi dhugaatixxen. 17Lame manjixxi dhugaa kula adhdhendaaxxa seera ha'nooke'n borreessende'een. 18Anke umixxee dhugaa kulaannok mitti anendeni; wele anxi dhugaa kula anee ergeeke Aabiten.» 19Ookkoneechchi uduma insa'nenna Yessuusii'i, «Anni atiki haba hedhe?» hine; Yessuusinna insa'ne'n, «Ha'no Anna ankanna aneenna egenidinebaan; sila anee egendine'eele, Anna ankanna egedinamman» hiyyeexxi hiise haaso'e. 20Yessuusinna tennee yaane haaso'eek Woyyichchi Galmike dalla'i giddo miya masseccatike mini bira barachchiisa'neetemman; kaddo malee yanna isixxi geya gophpheemmaxxee ayyinna isoo abideek hedheba'a.
Yessuusi Amanabaaka Manna Xexxe'achchiise
21Yessuusi higgeen insa'ne'ni, «Ani me'annon ha'noonna anee hassinaan; cubbo ha'nooxxenninna rertinaan. Ani me'annobaa kinn ha'noo daga dendeetinabaan» hiyye. 22Ayihudiink sooreessuwwi, « ‹Isi ani me'anobaa ha'noo daga dandeetinabaan› hiyyeechchi dedha ifi shi'wo'aate kadduun?» hiyye. 23Isi kinn insa'ne'n hiyyee qici, «Ha'noo kaba buttii'niten; ani iimii'niten. Ha'noo kaba butta duuchchiinaa'niten, ani tenne butta duuchchinaa'nitebaan. 24Cubbo ha'nooxxenninni rertinaaxxa ani ha'no'n kuleennen; Ani isoteni ha'noo'ni hiyyanno wodda, Ani isote kadeennexxa ha'noo amana gophphinoole cubbo ha'nooxxenni rertinaan.» 25Insa'nenna hiissineexxi, «Yoonata ati ayyete?» hineexxi qorre. Yessuusinna insa'ne'n hiyye hiissee qici, «Siretenaa'ni ke'isennexxi ha'no'aa kulennek Ani isoten. 26Ani ha'noo'ni heddo haaso'annoxxinna heddo murannoxxi yaane hexxeen. Yaane kinn Anee ergeek isi addatemeeken; Aninna isonaa'ni laqennexxa kaba butta duuchcha'n haaso'annon.» 27Ookkonneechchi uduma insa'ne Yessuusi Aabixxee haaso'a'neemmaxxa qaabanteemmaba'a. 28Tennexxee Yessuusi hiyyee qici, «Ha'noo Manjiinka Belto iimi'a shikki assitineexxi fannissinaa wodda, iikki ani hiyyannak isi ante kadeennexxanna Aabi anee barachchiiseexxa kulaannoxxa, fedhii anxenni mitteechchonna assabe'noxxa ha'no egendinaan. 29Anee ergeek isi aninni welti hedheen; Ani duuchchi wodda isoo gammachchiissaaxxa assaannaxxee isi anee qofi waalebaan.» 30Isinna tennee haaso'eshshanni heddi manni iso'ni amane.
Cubbotixxe Garbummanaa'ni Leexa Fula
31Yessuusinna iso'ni amaneemmaka Ayihuda'n hiyyee qici, «Ha'noo anxe barachcho'ni hexxinoole dhugaaten, ha'noo anxe hordofeeyyen. 32Ookkonneechchi uduma ha'noo dhugaatanna egendinaan; dhugaatinna ha'noo leexa fulchitaan.» 33Insa'nenna, «No'o Abirihaamixxe ilan; no'o ayyi'aanna garbake kande egenebe'non; yoona ati no'oo hitta ‹leexa fuldinaan› hitatto?» hineexxi hiissene haasonne.#Mat. 3:9; Luq. 3:8. 34Yessuusinna insa'ne'n hiyye hiissee qici, «Ani dhugaate ha'no'n hiyyaannen; cubbo hujaak isi cubbotike garban. 35Garbi duuchchinni wodda mini hadi giddo hedhabaan; belti kinni duuchchinni wodda mine hedhaan. 36Tennexxee Mageniink Belti leexa ha'noo fulchoole dhugaaten, ha'no leexa fuldinaan. 37Ani ha'no Abirihaamixxe ila kaddineexxa ege'neennen. Yaane kinn ha'no hiyyichcho anka adhdha gophphinnaammaxxee anee shiltino'a ka'litinee kexxine'een. 38Ani anke Annibaa'n uudennexxe yaane haaso'aannen. Ha'nonna ha'nooke anninaa'ni laqqineexxe assitinaan.»
39Insa'nenna iso'n, «Anni no'ok Abirihaamiten» hineexxi hiisine haasonne. Yessuusinna insa'ne'n hiyyee qici, «Ha'no Abirihaamixxe ila kaddino'oole, sila Abirihaami hujeexxe hujjinamman. 40Magenokenaa'n laqennexxa dhugaa ha'noo'a kulenenga anee shiltino'a ka'litine kexxine'een; Abirihaami kinni iitta assebaan. 41Ha'noo assitina'neeki anni ha'nook assaammanxen.» Insa'nenna, «No'o yabaabullet ilemmennekebaan; no'oki Anninna mitte Mageno callan» hineexxi hiisine haasonne.
Daabiloosixxa Oose
42Yessuusi insa'ne'n hiyyeexxi hiisse haaso'ee qici, «Mageni ha'nooke Anna kade'eele, ani Mageniibaa'ni dagennaxxee sila anee eetinamman; yaane kinni isi anee ergee'naa dagenne malee ani ifike uminni dagebe'non. 43Haaso'annexxa mayeete qaabbata gophphina'neek? Tinninna ha'noo hiyyichcho anka laqa dande'a gophphineemmaxxeteen. 44Ha'no anna ha'nooke dabiloosixxe oosen; ha'nooke annixxa halchanna muuxxino'a hassinaan. Isi sirendenaa'ninn anga sa'eeken: Dhugaa iso'ni hedha gophpheemmaxxee isi dhugaati welti mittooma afebaan; isi dharrichchakenna dhariinke anna kademmaxxee dhara haaso'aa wodda, isi haaso'aaxxi ifike umixxen. 45Yaane kinni ani dhugaa haaso'aannaxxee anee amandinabaan. 46Ha'noo giddii'n anee cubbaleessaken hiyyee ku'la dande'aak hedheeta? Yoona ani dhugaa haaso'aanneke kadeennexxenni mayeeta anee amana gophphina? 47Magenibaa'nite kadeek isi Mageni hiyyaaxxa laqaan. Ha'no kinni Magenibaa'nite kada gophphinemmaxxee laqqinabaan.»
Yessuusi Abirhaami'a Edin Darre Hedhemman
48Ayihudi Yessuusii'i, «Ati Semaarichchoken; fuggichcha hafuura affeeten hiyya no'oxxi dhugaandebaata?» hiyye. 49Yessuusinna insa'ne'a hiyyee hiise haaso'ee qici, «Ani Anna anka ulfeessaane malee fuggichcha hafuura afeebe'non; ha'no kinn anee salphisinaan. 50Ani anke umika ulfinna hasabe'no; kaddo malee ani ulfeesemonnaa hasaak weli hedheen; muraakinna isoten. 51Ani dhugaate ha'no'n hiyyaannen, ayyinna hiyyichcho anka heqqedhoole haranga reyabaan.» 52Ayihudikinna iso'n hiyyee qici, «Fuggichcha hafuura affeettexxa no'o ta'a reefi egennennen; Abirihaami reye; wabeekotinna rerteen; ati kinn ‹Hiyyichcho anka heqqedhaak› reyabaan hittaatte. 53Ati anna no'oke Abirihaaminaa'n saxxattota? Isi reyeen; wobeekotinna rerteen; atita ifi ayyete hittotta'aate?»
54Yessuusinna hiyya'n hiissee haaso'ee qici, «Ani ifi ulfeesaannole ulfinni anki toliinken; anee ulfeessaak kinni ha'no Magenoken hitina'neeke anke Annan. 55Kaddo malee ha'no isoo egendinebaan; ani isoo ege'neennen. Ani isoo ege'nebe'non hiyyennele aninna ha'nooshshanni dharichchake kadeennan hiyyaten. Kaddo malee ani isoo ege'neennen; hiyyichcho isikanna heqqedhannon. 56Anna ha'nooke Abirihaamixxi halcha barra anxa uudeexxi gammado'atemman; iseenna uudeexxi gammade.»
57Tennexxee Ayihudi isoo, «Ati onde tomme wogga wo'mitebexxok hittata Abirihaamii'i uuddeennen hittatto?» hiyye.
58Yessuusinna insa'ne'n «Ani dhugaate ha'no'n hiyyannen, Abirihaami ilemebaa edi darre ani anten» hiyye. 59Eettene yanna'ni insa'ne isoo cancanqo'a kino adhdhine; Yessuusi kinn insa'nenaa'ni miliqeexxi Woyyichchi Galmi giddii'ni fule me'e.
Currently Selected:
Yohaannisixxa Wengeele 8: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
