Dadatika Maxaafa 31
31
Ya'iqoobi Laabanaa'n Baaje
1Laabaxxi labbaxxi oose «Ya'iqoobi no'oke annixxa karra hexxeeshshanni adhdhe'en; tinni karra duuchcha no'oke annixxen» hita'ni haasottaa'naa Ya'iqoobi laqe. 2Ya'iqoobinna Laabaka jeejanna uuddaa wodda isi'a edi qico geyebaaxxa afe. 3Ookkone wodda Duuchchi Woddik Goottinna Ya'iqoobii'i «Atike annuwwikenna atike firuwwike bogibaa illee iima higi; ani atinni welti hedhannon» hiyye.
4Tennexxee Ya'iqoobi Raaheelinnaa Liya hore isika alla'lammaba dango'a ergeexxi, 5insa'nee hiyyee qici, «Anni ha'nooki jeeji ani'a edishshate kaddebaaxxa ege'neennen; kaddoollenna anke anniki Mageni aninni hedheen. 6Afennexxa hunna duuchcha anna ha'nookee ergatemenne qico ha'noonni egendine'en. 7Anni ha'nooki runda anka tommele jijjiira'ni ane sobeen; kaddo malee anee miidho'a Mageni eetti isi'a uwwe waalebaan. 8Isi ‹Tali tallichchi duuchchi atike runda kaduun› hiyyee wodda hori duuchchi tali tallichcha ile; higgeenna ‹Barro barro afeeki duuchchi atike runda kaduun› hiyyee wodda hori duuchchi barro barro afeeka ile. 9Konne qicinniten Mageni ha'nooke annika hore isonaa'ni aadhe ani'a uwwek.
10«Hore alfatee hasammaxxee yanna'ni barro barrotixxinnaa tali tallitte re'etixxi korbeeyye meyyaxxe re'e da'mitaa'naa oojjot uudenne. 11Oojjo eettene'ninni hedhee'naa Magenik iimik erganjinna ‹Koo Ya'iqoobi› hiyye ane ye'e; aninna ‹Hee kunna kabanni hedhennen› hiyyenne. 12Isenna ‹Laaba ate'n assa'neexxa duuchcha uudennaxxee hore da'mita'neexxi re'etixxi korbeeyye barro barrotixxe, tali tallittenna xillinni boddi boddi hiyyeexxe kaddeexxa hubatte uudi. 13Qaabetee kinjiinxa sooddo kaassettexxi hana Zayite hariirtetteba, ookkonne werreega werreegeteba Beeti'eeli'n ate'ni leellennek Mageni anten. Ta'anna konne boganaa'n rakke fulde ilendetteke bogibaa illee iima higge me'i› » hiyye.#Dada. 28:18-22. 14Raaheelinna Liya hineexxi hiissine haasonnee qici, «No'oki annike mininaa'n maa alfinaaneeke qoobbo hedheta? 15Isi no'oo uuda'neeki alagiinshatebaa? No'o gurgudhdhe, gurguremaaka maallakanna ite bire'en. 16Tennexxe Mageni no'oke annanaa'n aadheexxi ati'a uwweexxi karra duuchcha no'oxxenna no'oxxe oosexxen; tennexxe Mageni ate'ni kuleexxa duuchcha assi» hine.
17Ookkoneechchi uduma Ya'iqoobi aruwwa ifixxannaa ifixxa oose gaaluwwake'n ofo'lisheexxi 18Mesipheexoomiya hedhemma wodda horatemmaxxe karranna afemaaka hore duuchcha adhdheexxi anna ifike Yisaaqibaa Kenaani'a me'e. 19Laabanna gedhebo ifikenaa'n orda ciro'a me'ee'naa Raaheel annike minixxe fakkuwwaxxa misile moodhdhite. 20Ya'iqoobinna me'a'neexxa Sooriyichcho Laaba'n kulebaangi isoo sobe me'e.
21Ya'iqoobinna ifiichcho kadeechcho duuchcha adhdheexxi baaje; Efiraaxisika galaana foofeexxi Gele'adi koobatike bogiba me'e.
Laaba Ya'iqoobii Hordofe
22Sakkaxxe barra'n Ya'iqoobi sho'ome me'exxa Laaba'n kulende. 23Laabanna fira ifika adhdhe ke'e; Ya'iqoobinna torbaane barra hordofeexxi Gele'adi hiyyemaake koobatike bogiba'n dhaqqabe. 24Magenikinna hashshati Sooriyichcho Laaba oojjoti, «Ya'iqoobi'ni eloxxanna kadi elobaaxxa haasottaboxxoshsha hiqqedhi» hiyye. 25Ya'iqoobinna Gele'adi hiyyemaake koobatike boga'n ifixxa dunkaane olte hedhee'naa Laaba mare iso'o dhaqqabe. Laabanna ifike firuwwinni welt ookkonni ifike dunkaana'n ofo'le.
26Ookkoneechchi uduma Laaba Ya'iqoobi'i, «Mayee anee iitta assite sobbette? Dubarra anka bagediinxe booji'oshsha oolfitetten. 27Mayee anee sho'onde baajjette? Mayeeta ane'e sobbettee? Me'a atixxa ane'n kuldeettele ookkolikinna lumoka kirarinni gammashshoti faarsa'ni atee geegeessannabaa? 28Oose anxanna akka'wa anxa sunqedhe nage'ik hiyyabo'noshsha assiteboxxon; tennee gowwummati assitten. 29Ani ha'noo miidha dande'annoxxa hunna afeennen; yaane kinni yebeno hashsha atike annik Mageni anee ‹Ya'iqoobi'ni eloxxenna kadi elobaaxxa haasottaboxxoshsa hiqqedhi› hiyye. 30Ta'a ati atike annike miniba'a higatee halchiteettaxxee me'itetten; yaane kinni anike minixxe fakkuwwaxxa misile moortettechchi mayeete?» Hiyye.
31Ya'iqoobinna Laaba'n hiyye hiisse haaaso'ee qici, «Dubarra atika hunnati anenaa'n gatilsitatto hiyye sodaatennaxxeeten. 32Yaane kinni no'o giddi'n atixxe fakkuwwaxxa misile affattok manji isi hedhoti hedhoqqe'e; atiilcho kadeechchi mittichchinna aniba hedhoole kunnise firuwwi no'oki edo halsite adhdhi» hiyye. Ya'iqoobi tenne hiyyaa wodda Raaheeli fakkuwwatixxa misile moortemmaxxa egene'emmabaan.
33Ookkoneechchi uduma Laaba Ya'iqoobixxe dunkaane'n, Liyake dunkaane'ni iittanni lamiinxe erganjuwwiinke dunkaane'n e'ye; yaane kinni mittechchonna affeba'a; Liyake dunkaanenaa'n fuleechchi uduma Raaheelike dunkaane'n e'ye. 34Raaheelinna eettene fakkuwwaxxa misile aaxxe gaaliinke koori hunda shoxxeexxi hana ofoldeemman; Laabanna mitte mittende dunkaane giddo findige haseexxi mittechchonna afeba'a. 35Raaheelinna anna ifika «Annayo iima ke'e uurra gophennexxe mufattoxxe; xuri ane'ni dagee'naaten» hite; tennexxee Laabanna findige'e hase; kaddo malee eettene fakkuwwatixxa misle afa dande'ebaan.
36Ookkone wodda Ya'iqoobinna mufateexxi Laaba'a «Belleessa anxi maachcho? Konnee qico anee adandaatteki heene cubbo hujannaletetaa? 37Ta'a ati anke miyi giddo duuchcha findigge hasseten, meyaa atike kadeeka affettek miyi hoonte? Hedheexxe kaddoole konne ankennaa atike firuwwi edo shiqishe'naa insa'ne, no'o lamixxe oddo'n murrowwaal. 38Ani atinni welti lame tomme wogga hose galennen; tenne wogga duuchcha atik gedhebinna re'e rimo'a ibissebaan; hori atik giddii'n gedhebiinka buruusuwwanna ite egenebo'non; 39Biniinchi ninnifemmakenna kadoole isixxe bakka'n hiissanne malee isixxa hafe beesisummatee iyyedage ege'nebo'non; hashshanna kadi barra mooremeeke duuchchixxe bakka'ni anee hiississa'ne turteetten. 40Barra holati hashsha qorri anee gube; diiphikinna ille anxe'n wileba'a. 41Lame tomme wogga atike mine'ni sa'issenne qici: tommenna shoole wogga atika lame dubari'aa hiyye ergatemenne; jaane wogga hore adhdhanno hori'a ati'a ergatemenne; kaddo malee runda anka tommele jijjiirtette. 42Yisaaqi anni ank magenoofatemmak Abirihaamik Mageni aninni welti hedha gopheele telcho anga duwwixxen silaati anee shorriteettan. Yaane kinni Mageni elo anxanna rakko anxa uudeexxi yebeno hashsha atee xixe» hiyye.
Ya'iqoobixxennaa Laabaxxe Oddo'n Kaddeexxa Weli Aaggo
43Laabanna Ya'iqoobii'i «Tinni dubartenna anxe oosen, tinni insa'neexxi oosenna anxen; kunni horuwwinna anken; kunni uuddaattechchi duuchchi anken; yaane kinni oose anxanna kadi oose anxixxa oose gatilssatee mittelchonna assa dandebo'no. 44Tennexxee amo telcho atinna ani weli'a kako aango; kako tinninna atixxenna anxe oddo'ni dhugaate kadduun» hiyye.
45Ya'iqoobinna kinjo aadheexxi sooddotishsha kaase. 46Ookkoneechchi uduma Ya'iqoobi firuwwa fira ifika «Kino bukki asse» hiyye; insa'nenna kino bukki assine tuulleexxi tuuloti biranna ita inde. 47Laabanna tenne tuulo Yigari Sahaaduuta#31:47 Gala'aadi Ibrititotike laagadinni Galaad hiyya dhugaa kulatixxe tuulo hiyyate hiyye summa fulche. hiyye ye'e. 48Laabanna, «Tinni tuulo atixxenna anxe oddo'n dhugaaten» hiyye. Tennexxeetemma summi tenne tuulok Gali'aadi hiyyemeemmachchi.#31:48 GalaadIbirayixike'n Dhuga kulatixxe tuulo yokaan Sooddo hiyyoten. 49Laabanna «Gargar hinganno wodda ateenna anee Duuchchi Woddik Gootti heqquun» hiyyati eettene bakka Mitsiphpha#31:49: Mitsiphpha: Ibrititotike laagadinni Mitsiphpha hiyya heqqatixxe bakka hiyyate hiyye summa fulche. hiyyende. 50Laabanna lebeexxi, «Oose anxa miiccottole yookaan insa'ne'ni wele melaalle lebbe aaxxottole ayyinna no'onni welti hedhebaan; atixxenna anxe oddo'ni Mageni dhugaate kadeexxa deetoxxe» 51Laabanna Ya'iqoobi hiyyee qici, «Atixxenna anxe oddo'n kunnise tinni kinjiinxi tuulo; kunnise kaasennexxi sooddo. 52Ani atee miidhonnaa tenne kinotixxa tuulo sa'abe'noshsha, atinna anee miitottaa tenne kinotixxa tuulonna tenne sooddo saxxaboxxoshsha, tinni kinotixxi tuulonnaa sooddo dhugaaten. 53Abirihaamik Magen, Naakoorik Mageni insa'neeke annik Mageni no'o'n murowwaal» hiyye. Ookkoneechchi uduma Ya'iqoobinna anni ifike Yisaaqi magenoofatemmake Magenike summinni kakate. 54Ya'iqoobinna ookkone koobatike boga'n tolcha tolche#31:54: Tolcha Tolche: Kunni tolchi ciincatike tolchanaa'ni gargari hedheeke kadaa wodda wele ciincesine'e wele indaake tolcha hiyyate firuwwa ifika duuchchanna ye'eexxi itise; insa'nenna inde ke'neechchi uduma eettene hashsha ookkonni galle. 55Langaxxa barra gorsa Laaba dubarra ifikannaa insa'neexxa oose sunqedhe eebbise; ookkoneechchi uduma boga ifikiba'a illee iima hige me'e.
Currently Selected:
Dadatika Maxaafa 31: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
