Dadatika Maxaafa 32
32
Ya'iqoob Eesawu'u Araarsedho'a Qixxeefate
1Ya'iqoobinna me'ande'n hedhee'naa Mageniinxi erganna isinni afende. 2Ya'iqoobinna erganna uudee wodda «Tinni Mageniinxe kaanben» hiyye. Tennexxe eettene bakkaka summa Mehanaayim#32:2: Mehanayim: Ibrititotike laagadinni Mahanayim hiyya lami duuli bukki hiyyaaba hiyyate hiyye fulche.
3Ookkoneechchi uduma Ya'iqoobi Eedoomike bogi giddo Seeyir hiyyendaaxxe bakka'n hedhammake dayyo ifike Eesawubaa erganjuwwa edi'a ergeexxi hiyye insa'nee ajajee qici, 4«Eesawu anke gootta'n erganji atik Ya'iqoobi hiyya'ne hitinaa qici, ‹Baqate me'ennexxi Laababa hedhenani ta'i qico'ninna ookkon hedhennan; 5Ani ta'a heddo lalo, harre, gedhebokanna re'e iittanni labbakannaa meyyaka erganjuwwa afeennen; ta'a ani tennee erga atiba ergeenechchi atenaa'n elle alfannon hiyye hedeeten› hiyye ereggeen hitine kulle.»
6Erganjuwwikinna Ya'iqoobibaa ille iima higeexxi, «Dayyo atike Eesawuba mareennen isi ta'a atinni afemo'a dagate'n hedheen; shoole dhibba manninna welti hedheen» hine. 7Ya'iqoobinna lumoshsha sodaate wixxirri hiyyeexxi welt hedhemmaka mannana lameba qoode; gedhebo ifika re'e ifixxa, lalo fikinna gaaluwwa ifikanna lameba foye. 8Ya'iqoobinna iitta asseechchi «Eesawu dage mitte kuta biroole gatteexxi kuta fuldaan» hiyye hedeeten.
9Ookkoneechchi uduma Ya'iqoobi hiyyeexxi soodaatee qici, «Ee anka anna Abirihaamike Mageno Yisaaqike Mageno anee ‹Ilendetteke bogibaanna atike firuwwibaa illee iima higi; aninna ati'a eloxxa yaane assannon› hiteettake koo Duuchchi Woddike Gootta, 10Ani atik erganji ta'i qico'n ani'a assitettexxe ba'lunte'aanna addatensha'a geyeennekebaan; Yordaanoosi foofenna wodda anga abixxennaxxa siqqichcho malee mittechchonna afeennabaan; ta'a kinni kunnise lame kutake horiinkenna manjike kadeennen. 11Dageexxi anenna kadi tenne amuwwa annoolendinni mitteba no'o biraan hiyye sodaatennaxxee dayyo anke Eesawuxxe anganaa'n anee anjirtotta'a kadhataanen. 12Atinna ‹Dhugaanda ati'a eloxxa assannon; horte atixxanna laakko'emabaake abbaayatike maanchishsha bira sa'issannon hiteettan.› »
13Eettene hashsha Ya'iqoobi ookkonni gale; afeechchi duuchinaa'n dayyo ifike Eesawu'a uwwaaxxa uwwa konnechchinni butta hexxeexxa melle: 14lame dhibba meyyaxxa re'e, lame tomme re'etixxa korbeeyye, lame dhibba gedhebbanna lame tomme gedhebiinxa korbeeyye, 15sase tomme unuunsaaka gaaluwwa beltannandinni, shoole tomme saayyannaa tomme jiboota, lame tomme meyyaxxa harrennaa tomme labbaxxa harre. 16Konne horenna kuta kuta'n qoodeexxi, mitte mittenda kuta ga'ne me'aashsha ifike erganjuwwa'n uwwe; insa'nenna, «Ha'no ani'a edissine me'e; horekanna kuta kutanni weli birii'ni bayyissine ganne» hiyye. 17Edo aaneka erganjonna hiyye ajajee qici, «Dayyi ank Eesawu atinni afemeexxi ‹Ati ayyike? Haba'a martaate? Kunni gande me'itaattek hori duuchchi ayyike?› Hiyye atee qoroole, 18atinna hitatto qici, ‹Kunni hori atike erganjike Ya'iqoobiken; isinna konnee hore anke gootta Eesawu'a ergeexxe uwwan; isinna no'oo udumii'n dagate'n hedheen› hiyyi.» 19Iittanna langaka sakkakkanna hore kuta kuta'n gana'neeka wele manna duuchchanna hiyyeexxi ajajee qici, «Ha'nonna Eesawunni afendinaa wodda tenneenni iso'n kuldiinaan. 20Giddii'ninni ‹Erganji atik Ya'iqoobi no'oo udumii'n dagate'n hedheen› hitine kulle» hiyye. Isinna iitta hiyyeechchi, «Esawu aninni afemeebaa edi darre tinni anxi araarematixxe uwwa edise isoo geltaa wodda akimagaada godoba tilqeexxi gammashshot anee adhdhaan» hiyye hedemmaxxetemman. 21Tennexxee Ya'iqoobi araariinxa uwwa isi'a edise ergeechchi, isi kinni eettene hashsha ookko kaanbe giddo gale.
Ya'iqoobi Magenik Qaphphuleme
22Eettenee hashsha Ya'iqoobi ke'eexxi ifixxa lamiinxa aruwwa ittanni, lamiinxa ifixxa meyyaxxa erganjuwwannaa ifixxa tommenna mitte labbaxxa oose aadheexxi Yaaboqi hiyyemaaka galana foofe. 23Insa'nee galaana fooseechchi uduma afeechcho duuchchanna foosse. 24Ya'iqoobi kinni qofinni gate.
Mitti manjinna bogi soodaa qico'n isinni qaphulema'n gale. 25Iikki manjichchinna Ya'iqoobi'i injifata'nebaaxxa uudeexxi gudeedda isika tuqe; Ya'iqoobinna isinni qaphphulenshatenaa'n kexxeexxa tafi ifik mikitakenaa'n fo'o hiyye. 26Ookkoneechchi uduma manjichchikinna Ya'iqoobi «Yoona bogi soodo'aaten, me'onnaa anee wocci assi» hiyye.#Hos. 12:3-4.
Ya'iqoobinna, «Anee eebbisseboxxok atee wocci assabo'no» hiyye.
27Manjichchikinna, «Summi atiki ayyete?» Hiyye iso'o qore.
Isinna, «Ya'iqoobite» hiyye.
28Ookkoneechchi uudm manjichchikinna, «Mageninna manjik qaphphulende injifattettaxxee ta'anni edi'a summi atik Isira'eeli#32:28 Isira'eeliHiyya Magenik welti qappulemeen Hiyyate. malee, Ya'iqoobi hiyyemabaan» isoo hiyye.#Dada. 35:10.
29Ya'iqoobinna, «Maganneten summa atika ane'n kuli» hiyye isoo qore.
Manjichchikinna, «Summa anka qortaatechchi mayeete?» Hiyyeexxi isoo ookkonni eebbise.#Hay. 13:7-18.
30Ya'iqoobinna, «Ani Mageno albi anki edo uudennexxi midde hedho anxi gatteen» hiyya'ni eettene bakkaka summa Phiini'eel#32:30 Phiini'eeliHiyya Mageniinke alba Hiyyate. Hiyye. 31Ya'iqoobinna Phini'eeli'i sa'eshshanni arishsho fulde; isinna ifike tafixxe buutonaa'n kexxeexxa hokkola'nemman. 32Tinninna Isira'eelito telchi qico'n tafiinke mikitika maala itta'nebaaxxe buuto kaddaa wodda, isenna Manjichchi Ya'iqoobike tafika mikit tuqemmaxxeeten.
Currently Selected:
Dadatika Maxaafa 32: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
